فوتنا عرس هايل كملنا حتى لبعد لعشا وجا خويا روحنا من وراها بنهارين قدقد عيطت لمرا لماما قالتلها بالجمعة نجو نشوفوا الطفلة ونتفاهموا . ماما وبابا ماتوا بالفرحة سيرتوا ماما من شافت الحطة لي داروها في العرس عجبوها خلاه. المهم بقينا مع توجاد ماما شرات كلشي جديد من تفريشة تاع صالوا للسرفيس حتى من قاطو كمونداتو قاتلي مطيبيش متكسريش راسك بيه يا ربي ادا توجدي روحك انتي والله حسيتها خطبة مش شوفة برك حتى بابا المرة هادي متحمس مام خاوتي نفس الشي خرجت مع ماما شريت وش خصني وكلش. جا نهار الجمعة منكدبش بتت قاعدة ليلة هديكا شوية ستراس وشوية فضول باه نشوف لعريس . مع الصباح نضت دخلت للدوش من بعد خرجت لقيت ماما هيا وسلسبيل وجدو كلش في الصالة وفي البيت الثانية للرجال . قالولي انتي غير روحي وجدي روحك برك . دخلت ليسيت شعري باه نسيبوا ومكياج كوم منعرفش ياسر درت غير غسيل وغوجلافر وفغاجوا كيما في العرس ولبست الروبة لي شريتها في بلو غوا نموت عليه لاكولار هدا ويجيني يهبل مع صندالة طالوا وقعدت في شمبرة نستنى . حتى وصلت سعتين باه جاو دخلوهم بقاو وحد الساعة وانا نسمع غير في الهدرة . من بعد جاتني سلسبيل قاتلي هيا ارواحي من قبيل تسقسي عليك لمرا قتلها شكون لي جا قاتلي امو وخالتوا وثلاث بنات خواتاتوا . قتلها وش يبانوا عاقلين ولا واعرين .قاتلي نورمال من لي قعدنا هوما يقصروا يبانوا عاقلين . وليت مشيت عندهم مع سلسبيل الحشمة قتلتني ما جيت ندخل قلبي قريب حبس خفت غير لا نتعثر ولا تصرالي كاش عفسة قدامهم تقعدلي بخصة نتبهدل . بصح الحمد الله فاتت دخلت سلمت عليهم وقعدتت . نشوف فيهم يكيلوا فيا بصح يتبسموا . نطقت المرأ لي شافتني في العرس لي هيا اموا قاتلي الله يبارك عليك تهبلي وتدخلي القلب ، الحمد الله يا ربي انا ولدي يحيى صيد ولازماتوا لبة كيما انتي تاع حرمة وتاع شان التربية وضرافة وزين ، تصون اسمو وتصون عرضوا . قالتلها ماما من ناحية هادي متخافيش بنتي رباها باباها على الاصول والدين و طاعة الوالدين ، بصح وشنو بنتي مازالها صغيرة وهيا ممو عين باباها ادا ولدك راح يحطها في عينيه راهي ليه . تبسمت لمرا قالتلها ادا كتبت ليا والله يا نديرها وحدة من بناتي ، ديجا هيا صغيرة عليهم كامل والله نديرها هيا المازوزية تاع الدار . انا غير نتبسم وفرات فمي وجعني من تبسام وليت ندعي في ربي غير وقتاه يروحوا ستريسيت خلاه . قاتلي لمرا يخي مش شارطة لقراية ولا خدمة . قتلها ماما لا رونق حبست لقراية في المتوسط .شفت لبنات خاوتوا شغل معجبهمش الحال كي جيت منيش قارية شافوا مع بعض وسكتوا .غير لعجوزة لي قاتلي معندك ما ديري بالقراية اخرتها دار راجلك .
