انتبه مسفر ان في احد يلحقه واسرع بالسياره و اسرع فهد وراه و كل ما يلف مسفر يلف فهد والبنات مصدومين سارا اللي مو عارفه ابدا وش صاير قالت : وقف وقف بنزل وين رايح بنزل مارد عليها فهد كان بس يلحق مسفر يبي يعرف على الاقل مكان بيته ريم : فهد شفيك من هذا اللي تلحقه وكالعاده اذا اندمج فهد بشي ما يسمع احد قالت سارا بخوف بعد ما راحوا لمكان بعيد : وقف وقف بروح البيت ترا بفتح الباب
مارد عليها فهد وهي مصره تحن انها تبي تنزل ما تبي تتاخر على جدتها صرخ فهد عليها من كثر حنتها : هاه هاه خير لاتبكين بيتكم بتروحين له اكرمينا بسكوتش بس
انصدمت سارا من كلامه وفعلا سكتت لكن هالمره سكتت وهي تبكي مالها اي حس بس دموعها تنزل على الصامت اخذ مسفر بريك بنص الطريق واخذ فهد وراه بريك و مسك ريم بيده و سارا دخلت بين فهد و ريم من قوه البريك ضرب راسها بالجام لكن رجعت بسرعه واستمر فهد يلحق مسفر وراحوا على الطريق السريع بعدها اختفى مسفر صرخ فهد : وينه ابن الكلب وين رااح ، مالقى اثر له من كثر السيارات ف ظن انه لف من الشارع على البر لف فهد للبر يدوره خافوا ريم و سارا ريم : من ذا ارجع
قالت سارا بصوت بارد يرجف من البكي الصامت : اي ارجع البيت يا فهد ، فهد اللي قرصه قلبه من اسمه اللي كان حلو بصوتها المرتجف الضعيف وهو كل ما شافها الا هي تصارخ الا هالمره كانت هاديه تماما ما طاوعه قلبه ولف يبي يرجع لكن ضيع الطريق بس ما تكلم ما يبي يخوفهم اكثر وجلس حوالي ساعه وهو يدور الطريق قالت ريم : ها شفيك ترجع للمكان اكثر من مره
فهد : الله يستر علينا بس تراني ضيعت الطريق
ريم : طيب عطني تلفونك بشوف اللوكيشن عطاها فهد تلفونه وحاولت تشغل اللوكيشن لكن للاسف مافي سيرفس بالمكان خافت ريم : لااا ما في سيرفس مب قاعد يفتح حاولت اتصل على جدي ما يجي
قال فهد بخوف و بمسوليه: بنطلع بنطلع ما عليش ناظر فهد سارا من المرايا الا يشوف عيونها اللي تلف يمين ويسار وترمش ببطيء الواضح انها بتدوخ قال : يابنت سارا لف على ريم : عطيها ماي رشي عليها بتدوخ نطت ريم ورا مع سارا وحاولت تشربها ماي فكت حجابها لعلها تتهوى و تبرد عليها و تصحصح وكبت على شعرها و رقبتها ماي بس داخت و ما قامت للاسف ولحسن حظ فهد لقى بالارض طريق سياره قبله واتبعها ووصل للشارع العام وتوجه مسرع للمستشفى نزلت ريم تركض تنادي الممرضات يشيلونها بس ما لقتهم وجات تركض لفهد : فهد ما فيه ولا ممرضه تعال ساعدني او جيب كرسي ، راح فهد يركض يجيب كرسي بس ما لقى لان المستشفى قديم وماكان فيه كل شي وهم مايدلون ولا يعرفون المنطقه اللي هم فيها حاولت ريم تشيل سارا ما قدرت وصرخت على فهد يساعدها فهد مسك خصر سارا بيد وحده ولف يدها حول رقبته وكان لاف راسه للجهه الثانيه لانه ما يبي يشوفها وهي مو متغطيه والصوب الثاني كانت ريم ماسكتها
————.....————
العصر في بيت الجد سليمان عند راكان اللي معصب على صويلح لانه نسى يجيب علف الابل : اي والله اني داري اقول بيكبر ويعقل لكن ما ضنتي والله وتبي اشتري لك سياره بعد تعقب والله اني ما شريتها لك قم قم روح جيب العلف وودها واقعد عندها لين بعد الفطور
صويلح: يبا والله اني نسيت بروح اجيبه وقلت لك مسكوني شباب سرقوا ساعه فهد وخذو الخمسين واللي عطيتني والحين اجمع من مصروفي
قال راكان : ما يهمني تجمع منين اهم شي العلف يوصل
قال عبيد : انا بطريقي امس شفت ثنين رابطين واحد بعدها راحوا للمصنع المهجور
صويلح: احلف
عبيد : والله العظيم بعد ما ترجع من البل اوصلك لهم هز راسه صويلح ب طيب راح صويلح يدق على فهد لكن مافي اي استجابه بعدها راح لبيتهم يدق باب الدوانيه وطلع هايف ولد سعود: يامرحبا بصالح حياك
سلم عليه صويلح : لا والله مستعجل بس ابي فهد يروح معاي للابل ، استغرب هايف اللي كان متوقع ان فهد مع عبيد: فهد مب فالبيت توقعته معك
صويلح: لا مب معي بروح ادوره فالمحل يمكن انه هناك
————.....————
في بيت ام علي جالسه تدور يمين و يسار وتبكي قالت لها نوره : ما عليه يا يما بنلقاها اهدي الحين بكلم لولوه تدورها بمدرستها اكيد انها بالمدرسه ولا راحت مع صديقاتها قالت ام علي : لا لاانا اعرف اذا راحت مكان تبلغني يارب يا حافظ احفظ لي بنيتي احفظها يا ربيي قالت مناهل: ما عليه بنلقاها انا بدورها بالمحل ولولوه تدورها بمدرستها
قالت الجده ام علي وهي تبكي : روحوا تكفون روحوا دوروها لا تخلونها ،راحت لولوه لمدرستها تدورها فيها لكن للاسف المدرسه كانت مسكره ولفت تدورها حولين المدرسه ما لقلتها ، عند مناهل اللي تفتر حوالين المحل ما لقتها والمحل مقفول راحت لمحل العود اللي قدامها كان مفتوح دخلت تبي تسال فهد يمكن انه شافها بس ما لقته وشافت باب بطرف المحل توقعت انه داخل دخلت شوي شوي بس ما لقت احد مشت لي اخر الغرفه وتحركت الكراتين اللي كانت اخر الغرفه و طاحت كل الكراتين المصفوفه وصرخت مناهل من الخرشه و صرخ صويلح اللي كان يدور فهد ورا الكراتين واخذ عصا المخمه : بسم الله الرحمن الرحيم انس ولا جن ، انهاارت ضحك مناهل على خرشته نزل العصا انس انس ، تعجب صويلح منها : طيب من انتي شتبين مدرعمه؟ ماردت عليه مناهل ميته ضحك طلعت من الغرفه الصغيره وهي تتحرك يمين ويسار مثل السكرانه من الضحك ، ضحك صويلح على ضحكتها رغم انه مب فاهم شي قال لها : اطلعي برا بقفل المحل هزت راسها ب لا : لا بنتظر صاحب المحل اللي كان موجود امس
صويلح : تقصدين فهد ؟
مناهل : اي اي فهد وينه ؟
صويلح: مدري انا جاي ادوره ما لقيته
مناهل بصدمه : خذاها
صويلح: وشو؟
مناهل : انا جايه اساله عن ساره ما جات البيت من انتهى دوامها وهو تهاوش معاها ذاك اليوم شكله خذاها
صويلح: لا ما يسويها فهد
مناهل : والله ان لقيت صديقك ماخذها والله يا ويلكم منيي
صويلح : يابنت الحلال قلت لش ما يسوييها و وش يبي ببنات الناس دقي عليها
مناهل : تلفونها بالبيت ، ركب صويلح بسياره جده وراح يبي يدور فهد ووقفته مناهل : بركب بدور سارا
فهد : ما ينفع يا بنت مايصير
مناهل ركبت ورا عصب صويلح عليها: انزلي يا بنت شلون تركبين مع واحد مو محرم لش انزلي لحد يشوفنا قالت مناهل : عادي بقول لهم اني طالبه سايق اجره
صويلح: يا لييل الليل انزلي اخلصي علي بدور فهد اذا لقيت سارا معاه بقول لش
مناهل :لا والله ما لي شغل بدورهم معك ، حرك صويلح وهو مو راضي ابدا انها تركب معاه
ومستعجل يبي يدورهم قبل الاذان عشان يمديه يجيب العلف و يفطر
———-.....———-
بالمستشفى عند ريم قالت لفهد يجيب لسارا اكل السكر نازل عندها راح فهد يجيب اكلات ترفع السكر بالجسم بعد ما نامت سارا طلعت ريم من الغرفه تسال الممرضة متى تطلع سارا دخلت وحده من الممرضات فتحت الستاره على سارا وقاست ضغطها وركبت المغذي بيدها وطلعت بدون ما تحس فيها سارا دخل فهد بعد الممرضه وكانت الستاره مفتوحه جلس يناظر في سارا كانت اجمل بمليون مره من المره الاولى اللي شافها فيها جلس يتاملها اول مره يشوفها بهالقرب و ملامحها كانت حاده كانت مغمضة و راصه على حواجبها من ارهاق جسمها فهد ما وده يتحرك عشان ما يصحيها يبي يجلس يتاملها لكن سمع صوت ريم اللي جايه وسكر الستاره بسرعه وجلس على الكرسي دخلت ريم تقول : يلا الحين بياذن المغرب جبت اللي قلت لك عليه
فهد : اي هذا هو بس ما جبت لنا اكل بس تمر و عصير ، قالت ريم : خلاص اجل شفت هنا محل عنده فطاير و شاورما تبي اجيب لك ؟
فهد : لا خليش انتي انا بروح اجيب
ريم : لا انا اسرع و باخذ من الدكتوره علاج سارا
فهد : زين اجل بقيل على ما تجين راحت ريم تجيب الفطاير من المحل اللي في الدور اللي تحت ، فتحت عينها سارا بس ما شافت احد نادت ريم بصوت واطي مبحوح من التعب و مارد عليها احد : هييه في احد هناا ؟ الوووو مافي اي احد رد عليها و جلست تبكي بصوت واطي وكل شوي تقول رييم وترجع تبكي قام فهد بعد ما سمع صوتها الواطي من ورا الستاره وهي تبكي تنادي ريم تنحنح يوضح لها ان في احد هنا سمعته سارا قالت: من في احد ؟
فهد : اي اي انا موجود ريم راحت تجيب الفطور و جايه
سارا : طيب عادي ادق على جدتي من تلفونك بطمنها
فهد: اي ابشري مد يده من ورا الستاره و دقت سارا على جدتها بس ما ردت كانت تدور سارا عند جيرانها
فهد: ها ردوا عليش
سارا برجفه : ل لا ما ترد
فهد : طيب تعرفين امش ولا ابوش
سارا : ماعندي ام و اب ما يستاهلون
انصدم فهد من قوه كلامها هي ما تبي اهلها وهو يتمنى ان امه وابوه للحين عايشين : لا لاتقولين ذا الكلام طيب دقي على احد
سارا: تلفوني بالبيت بشوف يمكن احد يرد ، دقت سارا و فتحت التلفون عمتها نوره مين معي ؟
سارا : هلا عمتي انا سارا
شهقت نوره : تعالوا هذي سارا جات الجده تركض وجات لولوه و لميس
الجده ام علي تبكي: الو السوري سوسو ياقلبي وينتس شفيتس ؟
ردت سارا عليها : لبيه يا عيوني ما فيني شي بس نزل سكري وصديقتي ريم جابت اخوها ودتني للمستشفى
ام علي : يلا انا جايتس
سارا : لا لا ما يحتاج انا جايه الحين
ام علي : اكييد ما فيتس شي خوفتينا دورتس بكل مكان
سارا : لا يا عيون سارا ما فيني شي
ام علي : يلا اجل بكلم مناهل راحت تدورتس
يلا حبيبتي مع السلامه
ام علي : لميس يا روحي قولي لاختس ان سارا بخير مع صديقتها ريم
لميس : ابشري دقت لميس على مناهل وقالت لها ان سارا مع صديقتها ريم وسكرت
مناهل : خلاص رجعني البيت
لف صويلح عليها:ليه
مناهل : خلاص كلمتهم سارا تقول مع صديقتها ريم خذاها اخو صديقتها فهد للمستشفى
صويلح: صدق؟
مناهل : اي
راسل صويلح فهد يتطمن عليه ودز له فهد اللوكيشن
صويلح عرف ان ريم اخت فهد وتاكد ان سارا معاهم كمل صويلح طريقه صوب المستشفى
انتبهت مناهل انه مو راجع للبيت : انت وين رايح ارجع للبيت قاطعها صويلح: اششششش لقيتي خويتش خلاص الحين دوري بدور خويي
مناهل : طيب نزلني هنا
قلدها صويلح : هنا شكلش سعوديه
مناهل : مالك دخل سعوديه ولا كويتيه رجعني لا انزل
صويلح تعمد يستفزها : لا بالعربي و نو بالانقليزي اسكتي عشان ارجعش بيتكم
مناهل : بسكت يعع منك كرييه
صويلح: عشانش قلتي كريه ماراح ارجع
مناهل حذفت عليه شنطتها اللي طاحت عند رجله:ارجع اخلص علي ترا والله لعلم امي
صويلح: الله جاتني شنطه بعطيها اختي هديه ، اخذ الشنطه يسوي نفسه يفتحها يبي يستفزها خذت مناهل الشنطه من يده: ملقووف رجعني البيت
صويلح: انا قلت اسكتي اذا تبين ترجعين
سكتت مناهل تبي تمشي الليله قال صويلح : الله يازيين الهدوء تبين اشغل شي؟
قالت مناهل : لا
صويلح: يووه تكلمتي حسافه لو ما تكلمتي رجعنا
سكتت مناهل وضحك صويلح على صوت انفاسها وهي معصبه وشغل خالد عبدالرحمن وغنى معه : ماني على فرقاك يا شوق ناوي ويعيدها بصوته شاف مناهل من المرايا مغطيه اذانيها وجلس يضحك عليها وقصر على الصوت وقال لها : حلو صوتي ؟
ماردت عليه خايفه يكون يكذب عليها يبيها تتكلم ، رجع شغل الاغنيه وقال : السكوت علامه الرضا يعني عجبش صوتي ، وهي صدق عجبها صوته بس ما تبي تقول له و يشوف نفسه وهو قاهرها ودها تقوم تذبحه
وصلوا للمستشفى و نزل صويلح : انزلي
قالت مناهل : لا انت انزل انا بقعد اخلص علي دور صديقك
صويلح: انزلي ما ادل فالمستشفى هذا قال لها كذا عشان تنزل
نزلت مناهل وهي تضحك: هذا وانت الرجال اخ بس اقعد بالسياره بروح ادوره المكان يخوف مايحتاج تجي
ناظرها صويلح بطرف عين : اقول قلنا ما ادل ما قلت اخاف وواضح من الخواف اصلا
مناهل : بسم الله علي ما اخاف انا
صويلح: واضح ، دخلوا المستشفى و سالوا عن فهد وقالت لهم الممرضه مكانه راحوا متوجهين للمكان وكان الممر مظلم تماما مشت مناهل سريع على اساس انها تدل وراح صويلح ورا الصبه وهي تمشي ما حست بخطواته : هيه يا ولد وينك يلا سبقتك وهي داخلها ميته رعب هيييه يا ولد ، رجعت تركض وطلع لها صويلح من ورا الصبه : بووووووووو ، صرخت مناهل وجع الله ياخذك ركض صويلح يسبقها للغرفه و هو ميت ضحك وركضت ورااه تبي تفتح الباب بس فهد عند الباب فتحه وطاحت مناهل وتعثر صويلح برجلها وطاح جمبها فزت سارا وريم يشوفون شصاير وجلسوا كلهم يضحكون على اشكالهم قامت مناهل بسرعه من الاحراج وصرخت لما شافت سارا : اح سارا وش جابتس
سارا: الناس تقول السلام عليكم وش هالدخله
حكت راسها مناهل : السلام عليكم جميع
ضحكوا عليها فهد و ريم: وعليكم السلام ورحمة الله
لبست سارا جلست على السرير وجلست جنبها مناهل و ريم قالت سارا لريم : هذي مناهل بنت عمتي ولفت على مناهل هذي ريم صديقتي
قالت ريم : تشرفت
وردت عليها مناهل : انا اشرف وجلسوا يضحكوون كلهم عليها قال صويلح: لا لا مب كذا لو ساكته احسن ، ردت عليه مناهل : مالك دخل مضيع الطريق بعد تخيلوا انا اللي دالته على الطريق
لف فهد على صويلح: اح اح البنت تعلمك الطريق
قال صويلح: لا بس اقول لها كذا عشان تسكت وتنزل
مناهل : افف يا ليت اني داريه ان سارا هنا والله لقول لك انطم مزعجنا بصوته عباله حلو
قال لها فهد : لا لا عاد الا صوته صدق يجنن
صويلح: تعلموا يا بعض الناس الكلام الحلو من فهد
دخلت عليهم الممرضه تقول لهم خلاص وقت خروج سارا طلعو و الساعه كانت ٢ الفجر ركب فهد و ركبت معه ريم و ركب صويلح سيارته وقال : من يركب معي ؟
محد رد عليه كلهم ركبوا مع فهد
