لا هوى قبلك ولا امل بعدك ولا سماء الا في عيونك

البارت الثالث

      - بعد اسبوع -
مسكت ورد راسها بقهر وقالت : يعني الحريم مالقو يجون الا اليوم وبالييوم الي ليان فيه مريضه ؟؟
قالت الجوهره : ايه عندك شيء ؟
مسكت ورد المخده الي جنبها ودفنت راسها فيها وبدات تصرخ وتطلع كل حرتها .
دخل عليهم سلطان وهو يناظر لورد وقال : وش فيها هذي بعد ؟
تكلمت ليان وهي تكح وقالت : عشان... عشان الحريم بيجون اليوم
قال سلطان : وخير يا طير وش فيها ؟
رفعت ورد راسها من المخده ووجهها احمر
وقالت : اليوم فيه مسابقه وانا ابي اروححح !
قال سلطان باستغراب : كم الجائزه ؟
قالت ورد : خمس ميه
هز سلطان راسه بتفهم وقال : اقعدي بالبيت وبعطيك عشر ريال
ضحكت الجوهره وقالت : كثيره عليها العشره بعد
وبدوا يضحكون مع بعض وخش معهم غيث وهو مايدري شسالفه لكن بما انهم يضحكون على ورد !! اكيد بيضحك
قالت ورد بانزعاج منهم : برووح مالي دخل !
قالت الجوهره : اقول اقعدي بارضك بس ، مين بيساعدني ويصب القهوه ؟ ليان مريضه ماتشوفينها ؟ ماعندي الا انتي
قالت ورد : طيب لو خلصت بدري ؟؟
قالت الجوهره : عاااد اذا خلصتي بدرري ذيك الساعه روحي مع انه ماضنتي
قال غيث : اتركيها على اساس انها تعرف بالنهايه بتخسر
ناظرت له ورد وقالت : لا تتدخل فيما لا يعينك عشان ما احشر التراب بفمك
نزل سلطان كوب الشاهي الي بيده وقال بحده : عيببب لا تتكلمين مع اخوك الكبير كذا
ابتسم غيث من كلام سلطان وناظر لورد عشان يقهرها
لاحظت الجوهره نظراته وقالت : انا الحين جالسه مع كبار ولا بزران ؟ اعيد تربيتكم من جديد يعني ؟
ابتسمت ليان وقالت بتعب : هذولي لو تعيدين تربيتهم مليون مره ماراح يتعدلون
فجاءه طق باب البيت ، قامت الجوهره بسرعه
وقالت : هذولي الحريم جو يالله تقلعوا
طلع سلطان من المجلس لغرفته ولحقه غيث الي كان يمشي وراه ويمد لسانه لورد .
وقفت ورد من مكانها وراحت تجهز الفناجيل والكاسات واما الجوهره راحت تضيفهم وتسلم عليهم ، طلعت ورد جوالها واتصلت على نوره وقالت : اسمعي اليوم متى دوري ؟
ردت نوره وهي تبرد اظافرها وقالت : امم ...اظن الرابعه ؟
قالت ورد : خليني السادسه لان الواضح ان امي بتمسكني وماراح تخليني
ضحكت نوره وقالت : ليه ماتجيبون مساعده طيب ؟
ضحكت ورد من سؤال نوره وقالت : انتي بنت تاجر ماراح تفهمين
كانت بترد نوره لكن قاطعها دخول زيد وهو يقول اذا تكلمين ورد قولي لها تخلي غيث يجي اليوم
قالت نوره : اتوقع سمعتيه
قلبت ورد عيونها من تذكرت حركات غيث
وقالت : طيب بقوله
ابتسمت نوره وقالت : اجل يلا سي يووو
وقفلت المكالمه ، اما ورد ناظرت في جوالها
وقالت وش سيو ذي بعد
تنهدت وقفلت نار القهوه الي بدات تثور وصبتها بدله وجهزت الصينيه والفناجيل واخذتها للمقلط ، ولاحظت عجوز كبير بالسن وغريبه اول مره تشوفها وهي تعرف كل الموجودين بالديره ، ناظرت لامها الي كانت مستغربه منها بعد لكنها ابتسمت وبدات تسالها عن احوالها ومن وين جايه
اخذت ورد الفناجيل وبدات تصب للحريم الي عددهم خمسه مع العجوز الغربيه ، وبعد مرور ساعتين تقريباً
اتصلت نوره وقالت : وينكك ؟؟ جا دورك
تنهدت ورد وقالت : كم باقي ؟
قالت نوره : باقي ثنتين
قالت ورد : خلاص خليني الاخيره
قالت نوره : طيب بس لا تتأخرين
قالت ورد : لا ماعليك ماراح اتاخر
قفلت المكالمه وراحت ورد جلست جنب امها الجوهره الي كانت تخزها بالنظرات لانها تكلمت بوسط المقلط
وبدو يكملون سوالفهم الي كان محتواها مين ولدت ومن تزوج ولدها وسوالف الكبار إلى ان تكلمت العجوز الغريبه
وقالت : البيت الي مقابل بيتكم ، هذا بيت الساحر صح ؟
توتروا الموجودين وناظرت الجوهره لبنتها ورد الي لمعت عيونها من سمعت بيت الساحر وهي تدري انها فضوليه
ابتسمت الجوهره وقالت : ورد شرايك تروحين لخويتك ؟
وقفت ورد من مكانها متجاهله لكلام امها وجلست جنب العجوز وهي تتبوسم وقالت : ايه هو بيت الساحر ليه وش فيه ؟
قالت العجوز باستغراب : ما تعرفين وش سالفته ؟
قالت ورد : لا محد علمني !
هزت العجوز راسها بتفهم وقالت : الساحر كان متزوج لكنه قتل زوجته وقدمها كقربان للجن وكانت بليلة 15 ،واكيد انتي ملاحظه ان ولد الساحر كل ليلة 15 يطلع من بيت..
قاطعتها الجوهره لان هذي السالفه محرم احد يتكلم فيها وحتى ولد الساحر نفسه مايعرف عنها شيء
وقالت بحده : لو سمحتي حنا مانتكلم بهذي الامور ولا نجيب طاريها !
ناظرت ورد لامها الي قلبت فجاءة من يوم ماجا طاري الساحر وزااااد فضولها ، وناظرت للعجوز تنتظرها تكمل كلامها لكن قطع هذي اللحظه اتصال نوره ...
قالت نوره : تاخرتي جا دورك !
رصت ورد على اسنانها وقالت : ياشيخه ولي انتي والمسابقه ماني جايه !
قفلت المكالمه ولكن مع الاسف وقفت العجوز من مكانها وقالت : اسفه اذا ازعجتكم وشكراً على حسن الضيافه  ، طلعت وطلعوا كل الحريم وراها وحده ورا الثانيه
وقفت ورد من مكانها وراحت تركض لغرفتها لكن سحبتها الجوهره وقالت بعصبيه : وين رايحهه ؟؟
بلعت ورد ريقها وقالت : وين بروح يعني ؟ بروح عند نوره
شكت الجوهره بكلام ورد بس قالت : طيب روحي وياويلك تتأخرين !
قالت ورد : ان شاءالله
فتحت باب الغرفه بقوه وفزت ليان من مكانها
وقالت : وش فيك يالمريضه ؟
ابتسمت ورد بسعاده وقالت : بعدين بعدين بقول لك
اخذت عبايتها السوداء وطلعت من البيت تركض ركض ماقد ركضت نفسه .

شهق عزيز الي كان واقف قدام بيتهم عشان يمر غيث
وقال : وش ذا الاسود الي طلع من عندكم ؟!!
قال غيث بلا مبالاه : هذا جني دايم بذا الوقت يطلع ماعليك منه

اما ورد راحت لبيت هيام وطبت على امها بالحوش الي بغا يطير عقلها وقالت : بسم الله ، خرشتيني !
ابتسمت ورد وقالت : السلام عليكم، اسفه كنت مستعجله وين هياام ؟
تتهدت ام هيام وقالت : بغرفته..
ماكملت كلامها لان راحت ورد تركض لغرفتها وفتحت الباب وقالت : جبتتتت لك العلمممم !!!!
شهقت هيام ومسكت قلبها وقالت : انتي ما تتوبين ؟ ماتقولين حررام فيه ناس يخافو..
قاطعتها ورد وقالت : عرفت شي من بيت الساحر
لمعت عيون هيام لان من يوم هم اطفال وهم يحاولون يعرفون سالفته
وقالت : اسألك بالله !!
قالت ورد : والله العظيم ، فيه عجوز كانت عندنا وقالت لنا كل شي .. لا مو كل شي بس جزء بسيط
ابتسمت هيام وقالت : علميني !
بادلتها ورد الابتسامه وعلمتها السالفه من بدايه صياحها عند امها لين خروج العجوز .
قالت هيام : واليوم ...
قالت ورد باستغراب : اليوم وش ؟
قالت هيام : اليوم ليلة 15
ابتسمت ورد لانها عرفت الشيء الي تفكر فيه هيام و هيام بادلتها الابتسامه .

                   ✨لا تنسون النجمه وكومت لطيف ✨
تعالو الانستا عشان بنزل فيه لو نزلت بارت واحتمال تنزل هذي البارتات في الانستا  vcilli__