قامت ورد على صوت طق الباب ، فركت عيونها بتعب وقامت وهي تتمايل وفتحته واستقبلها صراخ امها وهي تقول : تأخرنا !!!!
قامت ليان تناظر لها وقالت بكسل : تكفين حتى الديك ماصاح تبينا نروح بهذا الوقت ؟
تكتفت الجوهره وقالت بغضب : ايه عندك شيء ؟
تنهدت ورد ورجعت لفراشها وتكورت بالبطانيه ، سحبت الجوهره البطانيه وقالت بصراخ اعلى : خمس دقايق ! لو ماشفتكم جاهزين .. تعرفون وش بيصير صح ؟
طلعت من الغرفه وسكرت الباب بقوه .
تفتحت عيون ورد بصدمه وقامت بسرعه فتحت دولابها واخذت العبايه وطلعت تركض وليان نفس الحاله وكانت اسرع بعد من ورد
دخل غيث البيت وهو يناظر لحالة الاستنفار الي قاعده تصير
وقال : كم عطتكم دقيقه ؟
تكلمت ليان وهي تركض تدور نعالها : خمس دقايق !
قال غيث بسخريه : خلاص اقعدوا ماعاد يمديكم ، بكرا بتروحون تحلبون النياق وتساعدون حصه بالبقاله
تكلمت ورد وهي لابسه جزم مختلفه : سد حلقك انت ماحنا ناقصينك
تكتف غيث وقال : تؤ تؤ تؤ باقي سبعين ثانيه مايمديكم خلاص
ركضت ليان للباب الخارجي ودفت غيث
ولحقتها ورد بجزماتها المختلفه
ابتسم غيث على منظرهم المضحك وتكلم وهو ماشي لغرفته عشان ينام : الحمدلله انا رجال
فتح باب غرفته لكن فيه شخص سحبه من ورا
وقال : على وين ان شاءالله ؟
جمد غيث بمكانه وبلع ريقه وتكلم بدون ماياخذ نفس : توني راجع من عند ابو محسن وساعدته بالي اقدر عليه
قال سلطان : اهااا كنت عنده ، اجل مين الي ازعج العالم بالعود حقه ومسوي نفسه طربان ؟
لف عليه غيث وقال : ارجووك لا تعلم ابوي !
قال سلطان باستغباء : وليه ما اعلمه ؟
قال غيث : انت تدري وش بيسوي فيني ! بيذبحني
قال سلطان : ويوم انك داري بانه بيذبحك ليه تعزف ؟
سكت غيث ومارد عليه ، سحبه سلطان مع اذنه
وقال : يالله قدامي الحين بنروح عند ابو محسن ، ولو فكرت بس مجرد فكره انك تتهرب ، العود بينكسر على ظهرك .
لحسن الحظ لحقوا ورد و ليان على امهم الجوهره
ناظرت ورد لامها الي تمشي قدامهم و معطيتهم ظهرها
وقالت : كم بنقعد عندها هذي بعد ؟
قالت الجوهره : اسمها صيته مو هذي بس ماراح الومك لاني ماعرفت اربيك انتي واختك
قالت ليان بخفوت : وش دخلني ان..
قاطعتها الجوهره وقالت : بنقعد عندها لين العصر وبعدها بنرجع للبيت نتجهز ونرجع لهم على المغربيه
شهقت ورد وقالت : بس...
وقفت الجوهره وناظرت لهم وقالت بعصبيه : بس ايش ؟
نزلت ورد راسها للارض وقالت : ولا شي
تنهدت الجوهره وكملت مشي والبنات وراها
قالت ليان بندم : ليتني اخذت كتبي على الاقل
تجاهلتها ورد وناظرت لبيت الساحر
وقالت بفضول : ودي اشوف الي ساكن فيه
قالت الجوهره : عشان احش رجولك
وقفت ورد بخوف وهي تناظر لرجولها
وقالت : ليه رجولي طيب ؟ ليه مو يدي
قالت ليان : مو وقت استهبالك ، تبين امي تذبحك ؟
قلبت ورد عيونها وقالت : الواحد مايمزح يعني
ابتسمت الجوهره وقالت بسعاده : ها شوفو الربايع جو كلهم يساعدون صيته
ناظرو ورد وليان لجهة اليمين وبالفعل كان فيه اكثر من وحده
قالت ورد : اتحداك تعرفين وحده منهم ولك الي تبين
قالت ليان بحزم : الي معها صينية القش ام رغد
ابتسمت ورد وقالت : خطااااء هذي ام هيام
ناظرت لهم الجوهره بحسره وقالت : هذي ام عزيز يالي ماني بقايله وبعدين كيف ماتعرفون امهات خوياتكم ؟
قالت ورد بملل : وكيف اعرفهم وكلهم مبرقعات
تنهدت الجوهره وقالت : الله يخلف
لمحت ليان وحده محجبه وابتسمت وناظرت لورد
وقالت بهمس : هذي تذكرك بمين ؟
ناظرت ورد للحرمه الي تقصدها ليان وانحرجت وتوردت خدودها وقالت : الله لا يلعنك انا وش قايله ؟
قالت ليان : الرساااام ..
ضربت ورد فم ليان بخفه وقالت : مو قلتي انه سر بيننا ؟؟
ناظرت لهم الجوهره باستغراب وقالت : وش فيكم انتم انجنيتوا ؟
قالت ورد : لا بس كان فيه ذبان على فمها وضربته
بعد مرور عدة دقائق وصلوا لبيت صيته الي من يوم ماشافتهم وهي ترحب وتهلي وبدت تسلم على البنات وتضمهم بحرقه ، حسو البنات بتأنيب ضمير شوي لانهم كانو مستثقلين مساعدتها وهي ماقد قصرت معهم ، قاطع هذا السلام والمحبه ام سلمان وهي واقفه بجانب اختها صيته وتناظر لهم فوق وتحت
وتركزت عيونها على جزم ورد
وقالت باستهزاء : شكل هذي الحركه جديده مو لايقه عليك
ناظرت الجوهره لجزم بنتها ورد وانقهرت ، بس ابتسمت وقالت : ماعليك من جزمها الا قولي لي لقيتي فستان على مقاس بنتك ؟ عاد الله يعينك مافيه اكثر من ثلاث اكسات لارج
كتمت ضحكتها ليان وهي تناظر لام سلمان الي تغيرت كل ملامح وجهها وعرقت من الاحراج
قالت ورد بخفوت : تستاهل العجوز
ابتسمت صيته بتوتر من الجو المشحون بينهم وقعدت تحاول تضيع السالفه قد ماتقدر .
بعد ما مر الوقت وتحديدا الساعه ثمانيه مساء
تنهدت ورد وهي تناظر للطقاقات وقالت : ذولي كم يطلعون من العرس الواحد ؟
تركت هيام الحلا الي كان بيدها وناظرت للطقاقات
وقالت : حوالي عشرين الف
شهقت ورد وقالت : اسالك بالله انتي صادقه ؟
قالت هيام : مانتي مصدقتني روحي اساليهم
عضت ورد على شفايفها وقالت : اخخ بس لو اني معهم وجمعت لي كم مبلغ وسافرت فيها للرياض واستقريت هناك
ضحكت هيام وقالت : احلمي الاحلام مجانيه
قاطعهم دخول شله نوره وجو جلسوا قدامهم على نفس الطاوله
ناظرت لهم ورد وقالت : خير وش تبين ؟
ابتسمت نوره وقالت : انتي وكلامك ذا ، المهم جايه اقول لكم اذا بتشاركون في المسابقه الجايه..
قاطعتها هيام وقالت : لا لا ماراح نشارك
قالت نوره : حتى لو كانت الجائزه خمس ميه ؟
لمعت عيون ورد من سمعت المبلغ وقالت : افضل ميكب صح ؟
ابتسمت نوره وقالت : ايه بس اذا بتشاركين بتدفعين عشر ريال
طقطقت ورد اصابعها بسعاده وقالت : تم ، بس اي تاريخ ؟
قالت نوره : بعد اسبوع بس الصراحه ماحددنا اي يوم لو حددنا بتصل عليكم
قامت نوره من الطاوله ولحقوها شلتها ، ناظرت لهم هيام وهم رايحين وقالت : والله عرفت تلعبها الثعلبه تلقينها مطلعه دبل الخمس ميه من العشرات هذي
قالت ورد : عاد يارب اليوم الي بيختارونه مايكون يوم شغلي
قالت هيام : عادي حتى لو كان شغلك بدلي مع ليان
قوست ورد شفاتها وقالت : لا تصدميني وتقولين انك ماتعرفين ليان ، حبيبتي هذي لو اموت قدامها مستحيل تاخذ يومي .
عند الرجال
طلعوا غيث و عزيز و زيد من العرس وهم يتمايلون بمشيتهم إلى ان وصلوا لمكانهم المعتاد بعيد عن الانظار وكل واحد بدا ينفض ثوبه ويناظر لحصيلته من الببسي بسعاده
قال عزيز : كبرنا اجل
جلس زيد على الارض وهو يعد البباسي وقال : فيه احد يكبر قدام الببسي ؟
اخذ له غيث واحد واخذ رشفه منه وقال : بس انه حار مب بارد
قال عزيز : احمد ربك تتشرط بعد ، زين ان سعيدان النحس
ماقال شي
قال غيث : ايه ماقال لانه سارق له كم حبه بعد
غير زيد السالفه وقال : الا ماودك تعزف لنا ؟
تنهد غيث وقال : قول انك تكرهني وتبي سلطان يقتلني
ضحك زيد وقال : ياخوي ماهو داري عنك الحين هو عند الرياجيل ماهو بطالع الا 12 الليل وحنا تونا بالبدايه
ابتسم عزيز وقال : لا تقول انك خايف ؟
عض غيث على شفايفه السفليه وقال : الحياه مره وحده
مشى غيث لفرشتهم وبدا يحفر بالتراب إلى ان طلع العود المغبر وبدا يمسحه بطرف ثوبه ورفع راسه لهم
وقال : ماراح تجهزون النار يعني ولا وش ؟
قربوا منه هم الاثنين واخذو من الحطب الي مجمعينه
وماهي الا دقائق وشبت النار وجلسوا بشكل دائري حولها
ابتسم غيث وقال : بغني لكم وحده تكرهونها
قال عزيز بترجي : لا تبدا بحركات النذاله
تجاهله غيث وبدا يعزف على العود ويغني :
عشت باحلام الهوى ليل وبنيت
كل امالي تداركها الفناء
في حياتي ماذكرت اني شكيت
في هوانا ضحكت الدنيا لنا .
ماكان ينسمع من ذاك البيت المظلم سوى صوت الكرسي الهزاز بجانب الشباك الكبير الي يطل على جلستهم ، رجع ناظر لاوراقه الي كان يكتب عليها مع ضوء الشمعه الخافت ، اخذ رشفه من القهوه وهو يرتب افكاره المبعثره الي لها يومين ملازمته ومع الاسف ماقدر يطلع بنتيجه تخارجه منها .
✨ لاتسون النجمه وكومنت لطيف ✨
أنت تقرأ
لا هوى قبلك ولا امل بعدك ولا سماء الا في عيونك
Acciónيقولون مات في القرية ساحر فاستراحو من اذاه ، خلف الساحر ابناً فاق بالسحر اباه
