قصص واتباد عراقيه:
البارت ١
يا سيدي المجنون الغريب ضمني بين طيات جنونك ، انا الهاربة من العاقلين أليك لا يعنيني قربهم ولأ اتزان عقلهم لقد فاقت طاقة تحملي لأذيتهم ، تشبعت روحي من سمومهم ، تجرح جسدي من نظراتهم .
هاربةً
هاربةً اليك ضمني ،
"""""""""""
أآلى مجنونًا تلجئين ؟ غبيةً انتِ ام تستغبين ؟ اذهبي واستطرقي ملجئاً غيري ، اذ وقفتي على بابي وخطيتي لقربي تُسجنين ، لا يدفعك فضولكِ لأستكشافي دعيني اخبرك لأوفر عليك رحلة البحث ، ظالماً انا ولست مظلومًا ، والان اذهبي ، او ادخلي !!
(الله أكبر ...الله أكبر )
-صوت الآذان هز مسامعنا رفعت راسي من الجنطة والتفتت للبنات اغلبهن مخليات ايدهن فوك الكتب ونايمات رجعت التفتت للمدُرسة بعدها تكتب على السبورة ما مهتمة منو مركزة وياها منو لا ، المهم عدها محد تحجي وهي تدخل تكتب وتطلع لا احنا فاهمين شنو كتبت ولا هي مهتمة اذا فهمنه او لا .
ندك باب الصف ونفتح بهدوء بنية من الدوام الظهري لابسة عكس لبسنا احنا نيلي وهمه رصاصي باوعت للمُدرسة وحَجت بابتسامة واحترام
-العفو ست إنتهى دوامكم واحنا عدنا امتحان اول درس نريد نحضرله .
شام:: تقدمت المُدرسة سدت الباب بوجه البنية بدون ما تحجي والتفتت لنا كالت .
-يله اكتبوا وباجر حلن تمارين .
رشا:: ست مانلحك نكتب !
-مشكلتكم تعلمن على السرعة ، هاي عود بعدكم خامس ، بالسادس شتسون؟
شام - عوجت حلكها تعيب سدت قلم السبورة والتَفتت للباب بمجرد طلعت ، عج صوت البنات بالغلط عليها لان مستحيل نلحك نكتب يا دوب نجمع كتبنا ونطلع قبل لا يدخلن بنات الدوام الظهري.
لمينا كتبنا بين التضحك وبين التلبس عباية وبين التخلي عطر ومرطب وبين التصيح "الخط عافني وراح "، شلت الجنطة بكتفي وابقي بأيدي سجل هيج نشيلة بايدنا هذا كشخة وبقيت واكفة منتظرة صديقتي رشا لان نرجع سوا .
رشا:: وعلي بطني تسب بيه على كد الجوع هسه الكه امي مسوية ذاك التشريب الزين بوية وبصل وخضرة اغط غطوط اوصل الزفر الراسي .
شام :: هههههه بس فضيها خلي نطلع .
طلعنا من المدرسة نمشي بأحد الشوارع ، بمشاعر بارده وتفكير مرهق يا ترُى لو أبوي عايش يخليني امشي كل هالمسافة لو يخصصلي خط ،خطوات متعبة ومشاعر متضاربة ، خاصة هالفترة افكاري كلها من اخلص امتحانات الخامس لازم استغل العطلة وادرس للسادس ، رغم شكد ما ادرس واتعب واجتهد درجاتي على كدي جان حلم عندي اخذ تسعين وميه فززني من تناقض افكاري سؤال رشا .
