يوميات طالب ثانوي عام

الفصل الاول

صلو على نبي الله ✨♥

________________

هاقد عدت لكم من جديد
و معايا قصه هنموت فيها ضحك
هي قصه قصيره من 3 فصول
بس مع "ندى" و "اروى"  هتكون قصه جنونيه

بنتين ادركو في يوم انهم واخيرا في 3 ثانوي و هم مش مذاكرين حاجه ولا عارفين المنهج بيتكلم عن ايه اصلا

ياترى هيعملو ايه؟؟ و هم كانو عايشين حياتهم ازاي اصلا
دا اللي هنعرفه

مع
يوميات طالب ثانوي عام
بقلم/نور علي

___________________

صلي على نبي الله قبل ما نبدأ♥

_____________

we start

في عماره عاديه في المنيا، و بالتحديد تقع هذه العماره امام احد الميادين المشهوره في تلك المحافظه

واكثر تحديدا الدور الرابع من هذه العماره العاليه

كان يجلس بهدوء امام التلفاز يشاهد نشرة الاخبار، يحتسي فنجان القهوه الخاص به، يتابع بأنتباه و تركيز و كأن العالم يتوقف على هذه النشره

ليقاطع هذا التركيز و الانتباه صوت مزعج يقول بتهكم و نفاذ صبر
" بقالي ساعه واقفه يا حج الدرس راح عليا "

رفع نظره لصاحبة الصوت بشر، يرمقها بغيظ لانها قطعة عليه تركيزه في هذه النشره المهمه في وجهة نظره
لتعود هي للخف بحذر قائله بمرح ممزوج بخوف

"مالك بس يا عبده، اتعصبت ليه كدا يا راجل، اقولك انا مش عايزه حاجه، سمو عليكو"

قالت هذا الكلمه و ركضت بأقصى سرعه من امام والدها، و كأنها تهرب من اسد او ما شابه
نظر عبدالله في اثرها بحنق قائلا

"بنات مش بتيجي غير بالعين الحمره، بس هي كانت عايزه ايه؟؟؟ مش مهم في داهيه"

اما عن الفتاه فكانت تركض صوب باب الشقه بسرعه وهي تضع كتبها في الحقيبه
و قبل ان تخطو خارج الشقه خطوه واحده، وجدت من يسحبها من ملابسها من الخلف، و هنا ردفت برعب وهي تكاد تبكي خوفا

"والله يا عبده ما عايزه حاجه، سيبني يأخي الهي تنستر، اوعدك اني مش هقول على فلوس تاني بس سبني الهي يرزقك ما يحرمك و يكرمك و يطعمك و ميحوجك لحد قادر يا كريم"

ليأتي لها صوت هي تعرفه جيدا، يقول بقرف وهو يترك ملابسها

"ايه الكلام الشحاتين دا، بت انتي بتشتغلي شحاته من ورانه"

"ياريت يا ماما والله كنت لميت فلوس بالملايين"

"يختي اتنيلي وهو حد هيعطف عليك بلبسك دا، دا احتمال يعطف على نفسه"

ضحكت الفتاه بقوه، لتقول والدتها

"امسكي الفلوس دي، وانتي جايه من الدرس هاتي معاك طماطم و خيار علشان السلطه، و عدي على عمك هاني بتاع الفول وهاتي كسين فول للعشا، و انتي جيه من عند عمك هاني احودي على خالتك سماح قوليلها خلصتي العبايه لامي لو خلصتها هتيها لو مخلصتهاش تقوليلها تشهل فيها علشان خطوبة ابن خالتك قربت"