Ye jo hawaayein chal rhi hai,
aur aake mujhe chu rhi hain ,
In hawaayon mein koi to baat hogi -
Warna khidki band karne mein kitna waqt lagta hai !
Ye jo adha sa chand ab bhi dikh rha hai,
aur ye raat bit ta jaa raha hai,
Iss raat mein koi to baat hogi -
Warna aasman mein baadal chaa ne mein kitna waqt lagta hai !
Ye jo kabse tumhare paigam ki raah dekh rhi hoon,
Na bechain hue, sahi waqt ki umeed rakh rhi hoon,
Iss intezaar mein koi to baat hogi-
Warna bharosa tootne mein kitna waqt lagta hai !
Ye jo hum sab kuch sach sach likh rhe hain,
bina kuch soche apne aap hi lafz mil rhe hain,
Inn lafzon mein koi to baat hogi - Warna ek jhoot bolne mein kitna waqt lagta hai !
Ye jo tum roz apne marzi ki ek dhun bhejte ho ,
mano mere liye saugat mein sukoon bhejte ho ,
Iss dhun mein koi to baat hogi -
Warna bahar ka shor bajne mein kitna waqt lagta hai !
Ye jo dheere se dil ke darwaaze khol rhi hoon,
Dil ki sunke, tumse dil ki baatein bol rhi hoon,
Fir , tum mein koi to baat hogi -
Warna dimag ki baat sunne mein kitna waqt lagta hai !
Ye jo ab bhaaga daudi chorr ke, thoda tham gyi hoon ,
Thodi der iss sukoon ke pal mein jam gyi hoon ,
Iss pal mein koi to baat hogi-
Warna ye waqt badalne mein bhi kitna waqt lagta hai !
