في المدرسة الإعدادية بنات وتحديدا في الجامع
كانت واقفه بتتوضي وخلصت وطلعت واستعدت أنها تصلي ولكن قبل ما بتبدأ بتلاقي اللي بيخبط علي كتفها ..
بتلف ليه ..
بتضحك البنت باستهزاء عليها وبتقول:
انتي هاتعملي ايه
رفعت حاجبها :
انتي شايفة ايه هاكون هتغدي مثلا ؟! هاصلي يا أم جهل خير عاوزة حاجة ؟!
ضحكت بصوت عالي وكأنها قالت نكتة :
ايه معقول هاتصلي يا سهر هو اللي زيك يعرف ربنا ؟!
سهر بتنفخ بضيق : لا اله الا الله اه اعرف ربنا الحمد لله اكتر منك وعدي من قدامي واغزي الشيطان احسن لك
زقتها البنت وقعتها عالأرض بتحدي وقالت:
وان ماعملتش كده هاتعملي ايه يا سوسو ! وريني اخرك !
كان كل البنات اللي في الجامع بيبُصوا عليهم ...
وقفت سهر وهي بترفع كمها وبتبتسم بقوة :
عارفة انتي جيتي لي نجدة من السما انا كنت مخنوقة وقرفانة من الدنيا ولقيت اللي اسقف علي وشه واطلع ضيقتي فيه انجوي بقا يا حبيبتي
مسكتها من شعرها وقعدت تعض في رقبتها والبنت بتصوت بانهيار :
انتي بتعملي ايييييييييييييه آااااااااه ..الحقونييييييييي
ضحكت سهر بشر:
بمُص دمك انا اصلي ما قولتش ليكي اني مصاصة دماء فامبير مُستجد هههههه
البنات اتدخلوا وحاشوهم عن بعض بصعوبة والمدرسين ودوهم للمديرة لأن سهر حتي وهي ماشية مع المدرس اللي وداهم لطشتها كام قلم مفاجئ وماكنوش قادرين عليها ...
قامت المديرة من علي مكتبها ووقفت قدامهم واتكلمت بعصبية:
الله الله كل يوم مافيش ورانا غير خناقة الست سهر والست ريهام بنتين في أولي إعدادي مش قادرين نسيطر عليهم ولا اهاليهم عارفة تسيطر عليهم ايه اللي بينكم من اول التيرم يخلوكم تعملوا كده في بعض
سهر : معلش يا مس هي بتكرهني عشان العين بتكره اللي أحسن منها طول عمري احسن منها وكعبي عالي عليها ههه
ريهام بدموع : انا ما عملتش حاجة يا ميس انا جاية عشان اتعلم وبس هي اللي حطاني في دماغها مش عارفة ليه انا كنت راحة اصلي وواقفة جنبها عادي قالت لي انا متضايقة وعاوزة حد اطلع فيه طاقتي وضربتني اهئ اهئ هي بتكرهني وبتغير مني يا ميس
شاورت علي رقبتها :
شوفي يا ميس رقبتي شوفي العض شوفي قفايا اللي صوابعها معلمة عليه
