بنت صغيرة ماسكة عروستها وبتلعب بيها وبتقول لها:
عارفة يا شيري يا عروستي أنا لما أكبر هاتجوز مؤمن
بتدخل عليها عمتها الأوضة:
بتعملي ايه يا اية يا حبيبتي
اية: بحكي لعروستي سر كبير خالص
بتضحك عمتها:
وايه هو السر ده
اية: لو قولت لك مش هايبقي سر أصلا يا عمتو
سكتت دقيقة وجريت عليها بفرحة وماده ليها ايدها:
شوفي يا عمتي الخاتم الجميل اللي جابو ليا مؤمن دي شبكتي
استغربت عمتها:
شبكتك ازاي يعني
اية:يعني اللي زي الدهب كده يا عمتو بتاع الكبار اصل انا لما هاكبر هاتجوز مؤمن
بتضحك عمتها:
مش انتِ لسه صغيرة علي الكلام ده يا يويو
أية: يا عمتو بقولك لما أكبر وبعدين ده سر اوعي تقولي لحد
*حاضر
بتعدي الأيام والصغير بيكبر وانا بكبر وكل ما بكبر بيكبر حبه في قلبي حب مؤمن ابن عمي اللي حبيت الحياة بسببه حتي لو كلامنا قليل أو بيظهر لي دائما أنه مش مهتم بوجودي
احنا عيلة كبيرة من الأرياف بناكل مع بعض وبنسهر لوقت طويل نتفرج علي التلفزيون ونتسلي بيت عيلة فيه اتنين اعمامي وابويا وعمتي وجدي وستي
طلعوني من المدرسة بعد ماشافوا اني مش مني رجا وانا اساسا ماليش في العلام بلاش وجع قلب
انا دلوقتي عندي 15 سنة وخلاص جدي كلم ابويا أن مؤمن يتقدم لابويا احنا عندنا البنت اللي تبقي 15 سنة تبقي فارت ونتجوز وتجيب عيال اصلا لو البنت قضت عمرها كله في العلام مرجوعها فين في الاخر في بيت جوزها انا طايرة من الفرح اخيرا حب عمري هايكون ملكي واخيرا هايجمعنا بيت واحد يارب تمم لنا بخير
♡ــــــــــــــــــــــــــــــــــــــــــــــــــــــــــــــ♡
وفي بيت مؤمن .
_مش عاوز اتجوزها يا بابا مش بحبها
بيرد ابوه: يابني انت من وانت صغير معروف انك لاية
مؤمن: هو انا بنت عشان تجبروني عالجواز ثم انا بحب سلمي بنت عمتي
*اخرس ماسمعش الكلام ده منك كلام جدك هايتنفذ غصب عنك
بيطلع مؤمن يقعد في الاوضه اللي بره اللي بيذاكر بيها وبيطلع منها وبيروح لحد بيت عمته
مؤمن: يا عمتي خلي سلمي تيجي تذاكر معايا احنا في ثانوية وعاوزين نذاكر كويس
_طيب يا مؤمن بس ما تتأخريش يا سلمي
سلمي: حاضر يا ماما
مؤمن بيبُص لها بحب وبيمشوا
بتمشي مع مؤمن وهي مبسوطه وبتروح تقعد معاه في الاوضه اللي بيذاكروا فيها
