طفوف

بارت 2

#طفوف #بارت_الثاني لـ #وسام_الفراجي 🐢🌻

صرت ثولة وحددت الكل ورسلتهن لمحادثة خاصة وحددتهن جميع وحتى احولهن لمحادثتي الثانية راحت لكروب الصف الأول ابتدائي بالغلط ...

جمدت بمكاني عقلي وكف بعد مايشتغل لان يزن من غير شي هيج يعاملني واني عروسة اذا عرف هالشي يطلكني ويشبعني كتل ..

ايدي عرگت وحرارتي احسها صعدت ..
خوف وارتباك وما ادري شسوي ..

نزلت ع محادثة بسرعة حتى احذفهن حددتهن كلهن ومن الارتباك والخوف حتى احذف من الجميع حذفت لدي فقط ..

مكان المصيبة صارت مصيبتين يارب دخيلك استرني بسترك ومااعرف يا دقيقة يدخل يزن للغرفة  ..

هو البارحة منعني انزل واتساب واليوم نزلته بدون مايدري وبالغلط الصور انتشرت بكروب طلاب الصف الاول وهذا الكروب ارقام لو امهاتهم لو اباهم

يا مصيبتج يا طفوف والله اذا ما الله سترج اليوم الا يعلكني يزن بالبنكة ويخلص عليه ..

.. راسلت المدير ع السريع استاذ سلام استرني الله يستر عليك صوري نزلت بكروب صف اول بالغلط وحتى احذفها من الجميع حذفتها لدي فقط ..

واني بحالة مكدر اسوي شي بداعة الله تصرف من عندك

باوعت ع خط الرسائل خط واحد بمعنى مو فاتح نت ..
افتح افتح افتح الدقيقة بساعة صارت ..

ياربي شهالحظ هذا مالي المصخم ..

شفته كلت يجوز يطول كلت اراسل استاذ حيدر ياخذ شعبة الثانية باء من صف الأول وابلغه بالموضوع بلكي يخابره ع السريع ..
لان اني مرشدة شعبة (أ) وحيدر (ب) واثنينه والمدير بكروب الاول ..

فتت لكروب المدرسة الخاص بالمعلمين والمعلمات اخذت حساب استاذ حيدر رقمه يعني لان ماجنت حافظته مجرد اعرفه بالمجموعة وياي ..

نهايته جان 33 اثير ماحفظته بس راسلته منه  .. وبلغته بالمشكلة كلها كتبتله كل الي صار ..

وهسة يرد وهسة يرد وصار خطين ويارب يرد الوكت احسه يركض ركض متعرفون شنو احساسي بذاك الوقت جان الكل عذرني ..

رررررد الف الحمد لله يا رب ..
وكالي اني اخابره وافهمه ..
كتله شتفهمه استاذ صور بالكروب ماشفتهن
كالي ست بله شفتهن كلهن والله معرف شهالصور الي انرسلت  وطبيت فضول وشفتج بالصور وطلعت والله ..

استاذ حييدر لتبرر فضني خلصني ..

بسرعة دز استاذ حيدر رسالة بالكروب الصف الاول ..

تم ارسال صور خاصة لمعلمة في المجموعة بالخطأ يرجى من حضراتكم عدم حفظها ومسح المحادثة استروا ما رأيتم ان الله يحب الساترين ..

كبل غلقت اشعارات الواتساب وضميته البرنامج لان مكدر امسحه الا اخلص من هالمصيبة

بهاللحظة سمعت يزن طركة حذاءه ديمشي للغرفة لزمت تلفون سديته وشمرته ع المراية ..