Ikaw Ang Akong Tanan ( Ongoing)

Unang Panid

Unang Panid : Ang kasabutan

SIYA si Jarieska Brinna Lastimosa, ang iyang angga kay Eska, dise-otso anyos ang panuigon ug kasamtangang nagtungha sa kolehiyo. Tungod kay maaayo siya mangluto, lami kini ug magpangita gyud kas iyang tinimplahan maong mikuha gyud siya ug kursong Hotel and Restaurant Management sa iladong unibersidad, ang Doña Torribia Mabini.

Maanyag, sakto ug barog, maanindot ug kurba sa panglawas si Eska. Pun-an pa sa kahamis sa iyang pamanit ug insakto lang ang iyang kaputi. Ubay-ubay ang gusto mangulitawo kaniya, apan magdumili gyud si Eska kay ang iyang pangandoy mao ang makahuman.

Ug uban sa mga sakripisyo, pagkugi ug damgo nga makabaton ug kaugalingong kan-anan sa umaabot maong naningkamot gyud ug maayo ang dalaga, aron usab dili mapakyas kaniya ang iyang mga ginikanan.

Tulo sila ka managsoon-- ang kinamagulangan  mao si Juan Pablo Lastimosa, ulitawo ug kasamtangang nanimpalad usab sa negosyo niini-- ang pagpaninda ug pagpautang sa mga alahas. Nakahuman na kini sa pagtungha, usa ka boutan nga matinabangon sa ilang pamilya.

Misunod si Jalinda Viviana Lastimosa, dalaga, maanyag ug mao pa gyuy paggradwar  niini sa kolehiyo  isip usa ka sumacumlaude. Tungud sa kautukan ug kamaayo modiskarte maong nakatrabaho usab kini ug nahimutang nas dako nga sweldo sa usa ka pribadong kompanya.

Ug siya, ang kinamanghuran. Kinamanghuran nga walay laing buhat kung anaa nas balay -- higda, kaon, tulog, cellphone. Maoy sige ug yampungad sa iyang cellphone nga di na gyud halos motabang sa lihukon sa balay. Oh, asa pa mo mangita ana? Kana bang masuguan lang gani ug kadyot sa iyang inahan  dayon ug tubag-tubag kay kono aduna pa siyay gibuhat. Maong adunay mga panahon nga makasab-an gyud kini sa iyang mga magulang.

Dili man sab sila kaaayo adunahan, igo-igu lang gyud nga nakapahuman iyang mga ginikanan sa iyang duha ka igsoon ug siya napud ang musunod. Ang iyang ginikanan ang nanag-iya sa usa ka sikat nga baligyaanan ug mga sanina sa ilang lugar.

Aduna silay katabang, si Nang Rosa nga usahay tudluan siya sa mga buluhaton sa balay apan gahi pas ulo sa hiniktang manok si Eska, magdumili gyud kini. Arang katapulan, tagad na lang maingnan siya ug  "gwapa lagi, apan tapulan" maong di na lang gyud niya panumbalingon kini.

Usa ka adlaw niana samtang gatuun si Eska sa iyahang lawak, midalikyat kini ug kanaog kay gitawag sa iyang inahan. Adlawng sabado maong nagpundo ra siya sa iyang lawak kay wala may klase sa tulunghaan.

"Eska, wala may klase karun kuyugi una si Nang Rosa sa merkado. Mamalit mo didto ug utanon, isda ug buwad. Isa naman ta kasemana gasige ug sud-an ug karne. Mangamatay unya tag sayo sa highblood." matod pas iyang inahan nga si Gregoria Lastimosa.

Dugay pa kaayo mitingog si Eska. Kana bang makita gyud nimo nga nag-ugot, gapangalot sa ulo ug mitubag, " Aw, ug mangamatay ta, ma-- ipanglubong gyud na. Ana ra mana, lisud man pod ug pang-asinon pa ta di naman gyud na mapuslan."

"Ayaw kog pinilosophi, Eska ha. Lihok na aron makapainudto tag sayo kay karong taud-taud aduna koy mahinungdanon kaayong lakwon."

"Ma, bali sad uy. Kapoy kaaayo moadtog merkado ba. Si Nang Rosa na lang gud." midumili si Eska kay sa iyang hunahuna gakapoy-kapoy ra kono.

"Na, hala! Di na lang pod ka mokaon? Tarunga ko, Jarieska. Lihok na, di ko madala anang imong mga pasumangil." katapusang istorya sa inahan maong wala gyuy nahimo si Eska.

Naa pa kini binagulbol, pahiwi-hiwi sa simod kay dili gyud unta mokuyug sa merkado. Aduna ra man pod diay kahadlok sa inahan.

Pilay dagan sa istorya, nahikuyug gyud siya sa merkaso uban ni Nang Rosa.