تَخَطَتّْ الحُدودّ

2

{ 8:54 } مَ ..

كنت نحكي لصاحبتي المقربة ' ريان ' ع أول يوم ليا ..
سألتني بمراوغة : اعترفي ماحطيتيش عينك ع وحدة؟😏

رديت بضحكة : نلقاها من صحباتي ولا منك ؟ بعدين اني مش خاشة سوق ندور ع وحدة ونقيم تعجبني ولا ماتعجبنيش !! ياتصير من نفسها ولا بلاش ..

ريان ضحكت بهدوء : بشوية عليك ماتنفعليش باه خلاص استني الصدف والقدر يعرفوك ع البشر

تنهدت بضحكة : خلوني فحالي ، كأني يأسة ونستنى وحدة تحبني خيركم !!!

ريان بصدق : نبيك تجربي تجارب جديدة وتكوني علاقات وتستغلي فرص لصالحك ، انتي مراهقة ولا عزوز عمرك ستين ؟؟ بعدين نصيحتي ليك بطلي تستني كل الفرص تجيك والصدق تتحقق قدامك .. انتي تنازلي وتصرفي ولو لمرة وحدة .

ضحكت من كلامها بعصبية بسيطة : أني عزوز صار؟؟ اني مش مستعجلة ع التجارب قدامي العمر و العلاقات العابرة مانبيهاش وماتناسبنيش ، محتاجة نركز فقرايتي أصلاً.

بسرعة ما ' ريان ' غيرت الموضوع لأنها حست بعصبيتي وبدت تتكلم ع الحلوين اللي ف جامعتها وكم وزنها حالياً ومن اللي بيفوز فالاخير ...

ساعة وسكرت المكالمة وسكرت فوني وقعدت نفكر فحياتي العاطفية *المملة* واللي مافيهاش أي شي مميز ولا مثير للإهتمام من سنتين ..
وكل اللي صار قبل جروح وعلاقات سامة ، وللأسف أني ناخد ف العلاقات العاطفية بجدية كبيرة والشي هدا ساهم فكسري هلبا مرات .
           رقدت وافكاري لحقتني في احلامي زي العادة

                    { 8:10 صَ }

نضت وعرفت إني متأخرة ، بجد؟؟
اووفف من أول أسبوع نتأخر! حلو شكلي رجعت للتمرد اللي مش بإيدي بكل بسبب نومتي اللي زي نومة اهل الكهف اخخخ .
وتيت روحي بسرعة خلال عشرة دقايق ومشيت للمدرسة ، أول ماخشيت من الباب وقفتني المديرة واللي اصلا ماجتش هي أمس فا اكيد مستقعدة لكل طالبة اليوم ....

هي حرفياً " هزبتني " مش لأني متأخرة بس لكن ع خاطر حتى طريقة وشاحي وشعري اللي طالع منه ،، عطتني محاضرة سريعة ع التشبه بالجنس التاني ...
وكل اللي يدور فبالي وقتها " من جمالهم بش نتشبه بيهم ؟"

وقعت تعاهد ع التأخير وع شعري فوقها ..
ركبت للدور الثالث واني ندور ع قائمة الأسماء بش نعرف فصلي وكالعادة اني في فصل بروحي من غير صحباتي ..
تعودت ع الموضوع ومعاش يزعل فيا ومانمانعش نقعمز بروحي لكن تمنيت تكون السنة الأخيرة مختلفة.

خشيت الفصل واخترت المقعد الثالث في الصفة الوسطية بش نضمن المكيف وبش نطلع بسرعة ونركز ف الحصة وهلبا اسباب مش مهمة ...

فاتو اول حصتين تعريفية وقوانين الأبلات والأمور المملة هادي .
رن جرس الحصة الثالثة ونزلنا ناخدو الكتب من المخزن مشيت اتجاهه وكان زحمة بطررريقة مستفزة بنسبة ليا لأن منحبش الزحمة فا قعمزت البرا نستنى جنب الباب لين ماتخف الزحمة لكن الواضح أن البنات مدايرين زردة وتجمع الداخل ومش حابين يتمو وبنستنى اسبوع زيادة ..