﴿ 8:45 ﴾
بداية الحصة التانية
وعرفت إنها حصة الفيزياء من لما شفتها خشت الفصل
السؤال اللي يدور فراسي ، علاش حاطين حصص المادة هادي كلهم في البداية ؟
حابين يخربو يومي من أوله كل يوم ؟
تبخرت أفكاري من لما شفتها متجهة ليا وهي تبتسم ونظراتها .. اكدتلي أنها تخطط لهلبا اشياء
قعمزت جنبي وهي تكلم فيا : ردي الابتسامة به ع الأقل ؟
حسيت .. كإنه هدا اللي ناقصني اني ؟
ابتسمت شوية ورجعت كشرت وقلت : اعترفي انك تحاولي تستفزيني بس !! ..
ضحكت واعتقد إنها احلى ضحكة مرت عليا ، حقيرة ولذيذة فنفس الوقت ..
جاوبتني :
يمكن اي ... نجحت فيه ولالا؟
ميار : قريب .. لكن مهما حاولتي مش حنسمحلك تنجحي
للحظة حسيت بكبر كذبتي .. هي بجد من لما كنا في المخزن وتسأل ع الكتاب مستفزتني فكيف مع وضعنا هدا ؟
خشت علينا وحدة من الطالبات مقاطعتنا :
الأبلة غايبة اليوم مش حتجي
زادت الدوشة فكل الفصل ع طول
لكن حسيت بزعل شوية .. هل حتمشي ترجع فصلها ؟
عصبت من زعلي للحظة المفروض إنها ماتهمنيش من الأساس
ضحكت وهي تشبحلي وتحط رجليها فوق المقعد وقالت :
من حسن حظي معناها ..
يعني إحساسي إنها مخططة لهلبا اشياء طلع صح ومن قعدتها واضح إنها مش راجعة لفصلها ..
نعترف ؟ فرحني الشي هدا 🥹 لقيت شخص نقدر نلهى معاه شوية بدل الوحدة
سألتها بفضول واضح : شن هو اللي من حسن حظك؟
جاوبتني وهي تبتسم بقوة : ان عندي وقت نستفزك أكثر
ميار : حلو معناها سلميلي ع الوقت لأن بنحط راسي ونرقد ..
وطبعا اني كذابة مش حنرقد لأن امس راقدة نومة اهل الكهف حرفياً .. لكن هي ديما تثير فيا رغبة الهروب
تحرك فيا اشياء المفروض تكون ثابتة بأمري ..
وفعلاً حطيت راسي بسرعة من غير مانستنى جواب منها
ثواني وحسيت بإيدها تلمس رقبتي ..
وسحبتني من رقبة السورية !
نحلفلكم إني كنت ناوية نهزبها ونخليها تكرهني بجد ..
لكن سكتت لما رفعت راسي وشفتها تبتسملي وفيها نظرة خطفت قلبي زي ابتسامتها ..
فقت لروحي بسرعة وسحبت إيدها من رقبتي :
مصرة يعني نخوضو حرب؟
جاوبتني بهدوء : لأ ... ماحد يبي يخوض حرب هني إلا انتي
خلينا نعطي بعض فرصة ونتعرفو ؟
هي : غرام ..
وأني سارحة فعيونها : هاا ؟
هي بضحكة : إسمي غرام🤭
وقتها مليون فكرة وفكرة يخطروا فراسي ..
وبهدوء قلت : ميار ..
غرام وهي تبتسملي : حلو إسمك ..
اوك وأني نتكلم بجد خلينا نعطوا بعض فرصة
فالأخير السيم هدا كله بنقرا هني وماينفعش نخشوا في عداوة وحروب صح ميار؟
اقل شي اعتبري الفرصة هدنة .. كان قعدت نستفز فيك كملي حربك مش حانمنعك🌚🤣
كانت تتكلم بجدية خفيفة ..
نعترف إنها خلتني نستسلم ونخضع بسبب ابتسامتها اللي تصاحبها بعد كل جملة .. حتى إسمها حلو هلبا
أنت تقرأ
تَخَطَتّْ الحُدودّ
Romanceرقيقة وقوية في نفس الوقت .. عبرت حدودي بكل سهولة كأنها استخرجت مفاتيح سرية واستعملتهم معاي ع خاطري .. طمنت خوفي وقلقي .. ريحتني بعد تعب وجري طويل ورا المجهول والغريب كانت هي وجهتي ومحطة الوصول . تفهم مشاعري وتعابيري لدرجة مجنونة .. فكرت إنها ممكن تك...
