تَخَطَتّْ الحُدودّ

4

﴿ 5:00 الفجر ﴾

نضت من النوم واني نتحسس في السرير ندور ع تليفوني وشفت الساعة وانصدمت..
مش متفكرة امتى رقدت لكن الواضح إني رقدت بكري هلبا لدرجة نضت الوقت هدا ..
شفت مسجات واتصالات فائتة هلبا من صاحباتي وريان ..
قررت نرد ع ريان أول شي وحكاياتها ولفيت ع كل المحادثات الموجودة ورديت عالكل وشفت للساعة والي بدت 5:43
سكرت تليفوني وحدفته بقوة مش مصدقة ضيعت الوقت هدا كله بالرد ع المسجات ...
نضت للحمام غسلت وجهي ودرت روتيني المعتاد ..

ودعيت منشوفش المديرة اليوم ولا نصادفها
خديت دوش ع السريع وجهزت نفسي
حطيت ماسكرا ومشطت حواجبي ومرطب الشفايف اللي مانستغناش عليه وتعطرت وطلعت ..

﴿ 7:15 ﴾
وصلت للمدرسة وبما إني وصلت فلوقت هدا
قررت منشوفش حد من صاحباتي وركبت فوق للفصل طول بسرعة قبل مايشوفني حد ويطلعني للطابور الممل
قررت نرتب دولابي ...
نظفته وحطيت فيه كتاباتي ودفاتر وكل شي ممكن يثقل الشنطة على ظهري المسكين .
وسكرته برضا تام

وكيف كنت متجهة للفصل شفتها ...
ومن الواضح حنشوفها هلبا فالاخير حني نقروا في مكان واحد ونقروا في نفس المادة في نفس الفصل .

ومع هدا شتت عيوني بعيد عليها وحاولت نتهرب للفصل بينما هي متجهة اتجاه الدواليب
مريت من جنبها وسمعتها تكلمني بمحاولة استفزازي:
علاش نحس فيك كأنك هاربة ؟ وحدة وحدة عليك

وقفت مكاني بإنزعاج وقررت نرد ..
ميار وهي تضحك : وعلاش فكرتي إني بنهرب؟
ردت وهي مشغولة بالترتيب : منعرفش يمكن لأن كل المواقف اللي جمعتنا كانت سيئة .. بسببك ؟

نحلفلكم بشني إنها كانت تحاول تستفزني ، ونجحت ..
لكن قررت نمشيها ونشوف النهاية
ميار : مانظنش لازم تجمعنا مواقف حلوة ، وع اللي صار وبسببي ع قولتك ، ماكانش بدون سبب ، وع فكرة اعتذرت !

ماجاوبتش ع كلامي وهي تشبح لدولابها
رفعت حاجبي مذهولة من تصرفاتها وبضحكة :
اشك إن الكلام معاك بلا فائدة توا وهالمرة فعلا بنهرب ..
مشيت وأني نسب فداخلي ، عمري ماعاديت حد بهالشكل الصريح ومن البداية

لمحتها وهي تمشي وراي .. حسيت بإيدها تلمس كتفي مروراً برقبتي ...
قالت : ع فكرة ، مش لازم نكونوا أعداء ! يعني اهدا من هكي
وكأنها قرت أفكاري لما قررت نخليها عدوتي ..
شديت ايدها ونحيتها من عليا وقلت بنبرة حادة :
مش لازم نكونوا أعداء صح لكن مايعنيش إنك تلمسيني بالطريقة هادي !!

ردت بإبتسامة ماشفتش نفسها فعمري كله : فعلاً لكن ماقدرتش نقاوم ؛ حلويتي أكثر من قبل ..
ومشت بعيد عليا وهي عاطيتني ظهرها
وقفت استوعبت كلامها ، هل مدحتني هي توا ؟

مشيت الفصل بسرعة بحكم أن الجرس رن وبنخش فصلي بسرعة قبل ماتزحم الممرات ..
حطيت شنطتي بقوة ع الكرسي وقعمزت نفكر في كلامها ..
معقولة هي حفظتني لدرجة هادي ملاحظتني ؟
ولا هي لهدرجة موهوبة وتنتبه لأصغر التفاصيل وبس ؟

شتت تفكيري وعطيت انتباهي للأبلة اللي خشت علينا بش تعطينا حصة ، طلعت كتابي وقررت نركز معاها ونطلع البنت من بالي شوية ..

______________________
        
                        انتهى✨