حبيتها وقلبي من الحب تايب

بارت 1

صحت بطلتنا ليان كلعاده ببيتها لحالها خاصه لأن اهلها ماتو بحادث وهي ماتبي تسكن مع احد من اهل ابوها او اهل امها وبحكم انهم اثرياء وعندهم فلوس استأجرت شقه لها تعيش فيها لحالها
قامت وهي حاسه بملل وماتبي تروح للمدرسه وكانت تسحب نفسها بالقوه
ليان بصراخ : يعنييي لازمم اداووممم
انحاشت قطوتها من صوت صراخها وقالت ليان : معليش ما قصدي اخوفك
راحت تجهز نفسها وتسوي فطور سريع بدت تاكله بسرعه وطلعت وقفلت باب البيت
مشت لمدرستها برجولها واول ماوصلت لقت صديقتها نوف
ليان : نووفف
نوف : لوليي
ليان : اهخخ وربي ماكان ودي اداوم بس عشانك جيت
نوف : تصدقين حتى انا كنت ما ابي اداوم
ليان : اجل شرايك بكره نغيب انا وانتي وتجين بيتي ونسهر مع بعض وتنامين عنديي؟
نوف : قداام
ليان : يلا يلا شوفي استاذه نوره كيف تناظرنا
نوف : خليها تنقلع ذي بعد
نوره : سمعتكك انتي وياها
نوف : استاذه ماتعرفين ان استراق السمع ع الغير عيب ؟
نوره : يعني انتي جايه تعلميني الادب ولا ويش ؟
نوف : ممكن
ليان : خلاص نوف خلينا نمشي
شمقت نوف والاستاذه تناظرها ومعصبه عليها
ليان : ليه سويتي كذا الحين بتنزلنا الاداره
نوف : خليها تشتكي يشيخه ماهمني اصلا هي تكرهنا من يوم ما هربنا من المدرسه يعني كذا ولا كذا للحين تكرهنا
ليان : صادقه
مشو لفصلهم وقعدو بطاولتهم الي جنب بعض بدو يسولفون شوي بعدها دخلت الاستاذه وبدت تشرح
ليان بصوت خفيف لنوف الي تشرب مويه : تذكرين ذاك الي علق ثوبه ب اس....
ضحكت نوف قبل لا تكمل ليان  وتفلت كل المويه عليها والاستاذه وقفت شرحها وهي تناظرهم واسيل وشموخ يضحكون وايمن وحمد نفس الوضع 
منيره : خيررر انتي وياها وش صار؟
نوف : ولا شي
منيره : تفلتي عليها ليه؟
نوف بضحكه وهي تناظر ليان : بالغلط
منيره : ليان قومي غسلي وجهك
طلعت ليان وهي منكتمه ضحك وغسلت وجهها ورجعت الصف ولقت الاستاذه خلت نوف تمسح الارض بمنشفه
ليان : اي نظفي هنا بعد
نوف : انقلعي
بدت ليان تنرفزها ونوف تدقها بالمنشفه
منيره : نووف قلنا مسحي الارض مو تدقين ليان يكفي تفلتي عليها
ضحكو البنات والاولاد على كلام الاستاذه وضحكت نوف وقالت : معليش خلاص بمسح الارض
مسحت الارض وطلعت ترجع المنشفه للعامله وهي متعمده تتأخر وتمشت بكل ممرات المدرسه بعدها رجعت
منيره : صباح الخير تو تجين؟
نوف : ضيعت
منيره : الله واكبر هذا وانتي  حافظه المدرسه اكثر من الحارس وتقولين ضيعت ؟
خلود :واضح قعدت تتمشى يستاذه
نوف : انكتمي انتي
خلود : ما بنكتم وش بتسوين يعني
تقدمت نوف وهي متعمده تخوفها وصرخت خلود وهي تبي تكبر المواضيع
منيره : نووووف
ليان : نوف خلاص
خلود : يوو عاد ليان جت
لفت عليها ليان وهي تتقدم لطاولتها وضربت يديها على الطاوله وقالت : لا اشوفك تفتحين فمك ب شي مايخصك فاهمه ؟
آدم : يوووو
خلود : على كيفك هو ؟
ليان : اي ع كيفي اي شي يخصني انا ونوف وشلتي لاتحشرين نفسك فيه
خلود : ياي خفت
مالك : يعيال بتصير ضرابه
ليان : اوريك بعدين
منيره : خلصت الحصه وانا بس اهاوش فيكم متى تعقلوووون
نوف بملل وهي ترجع لطاولتها : لما تحج البقره على قرونها
منيره : مايضحك
ليان : خلاص اشرحي عادي
منيره : ع كيفك تتأمرين
ليان : ماقلت شي بس قصدي بتخلص الحصه
منيره : يحياتي اصلا خلصت والحين بطلع انا
نوف : تمام
طلعت الاستاذه ونوف وليان يضحكون وخلود بس تشمق لهن كانو البنات يحبون ليان ونوف والكل يعرف بصداقتهن مع انه مدرستهن مختلطه
كانت شله ليان ونوف بالمدرسه هي عباره عن
اول شي (ليان )  لطيفه ودلوعه وتحب الحيوانات وذباتها تهبل وتحب كل احد وتوثق بسرعه وداشره اذا صارت مع شلتها وتعيش لحالها مع قطوتها 
( نوف ) ام لسان محد سلم منها حتى الحارس تهاوشه  ماخلت احد بالمدرسه ما هاوشته بدون سبب والغريب ان الكل يحبها ويحبون شخصيتها القويه وتسوي اي شي براسها وتحب تعاند بس احيان تصير هاديه وانثى.
(شموخ ) ذي اكثر بنت انيقه ف الشله وتحب تتشكخ وشايفه نفسها بس حلوه
( ايمن ) ذا جوه الضرابات اذا شاف ضرابه يركض اول واحد يشوف وفلاوي وبس يذب ومزيون ويدافع عن كل الي بشلته حتى لو هم غلطانين واذا نزلوهم الاداره يتحمل كل المسوؤليه ويحط الغلط عليه احيانا ويلقم مخالفات
( أسيل ) ذي دلوعه الشله وحساسه اي كلمه ممكن تزعلها وام دميعه لكن افكارها احيان حتى ابليس مايفكر فيها
( حمد ) ذا نقال علوم الشله كل ماسمع سالفه بالمدرسه جا يقولها لهم لان نص وقته يكون برا الصف واجتماعي ويعرف كل احد بالمدرسه ومخقق نص بنات المدرسه
( سلطان ) ذا هادي ونفسيه كيف صار من شلتهم محد يدري لكنه معهم انسان غير ولطيف حاله حال نفسه ويحب شلته ومايرضى عليهم ب شي وكلهم يوثقون فيه ويفضفضون له
قعدو يسولفون ودخل حمد وهو يركض للصف ووصل لهم وحط يديه ع الطاوله وهو يحاول ينظم انفاسه
ليان : دام دخل حمد كذا وراه سالفه قويه
شموخ : حمد وش عندك ذي المره ؟
حمد : تخيلووو وشش
لفو كلهم عليه وكانت ليان ونوف قاعدين بطاولاتهن وقدامهم أسيل وشموخ وورا قاعدين حمد وايمن جا سلطان معهم وقعد بمكان ايمن لان ايمن قعد فوق الطاوله واسيل وشموخ جابو كراسيهم وسوو دائره حول بعضهم وتجمعو حول طاوله حمد وهم متحمسين يسمعون السالفه
حمد : تعرفون استاذ سالم ؟
ايمن : حق البدنيه صح ؟
حمد : اي
نوف : شفيه بعد
حمد : شفته يحاول يتحرش ببنت
شهقت شموخ وقالت : خيرر
حمد : اي والله
أسيل : تكفى قول انك قلت للأداره حرامم البنت مسكينه
سلطان : حمد علمت الاداره ؟
حمد : الصراحه
ايمن : ايوا ؟
حمد : ما امداني لاني جيت اقولكم اول
ليان : وش تنتظر ياغبي يلا روح قول
حمد : واذا كذبوني وقالو ماعندك دليل
دق ايمن صدره ووقف وقال : احنا شاهدين معك يالخويي
نوف وهي تنزل ايمن من كتفه وتخليه يقعد بمكانه مره ثانيه : اقول اقعد بس
أسيل : اي نحن بنشهد
ليان : قدام
نوف : تستهبلون هم يعرفون اننا يمكن كذابين ونبي نتبلى عليه وبيحقد علينا استاذ سالم وبينقصنا بالدرجات
سلطان : وانتي من متى تهتمي للدرجات
نوف : انكتم انت الثاني
حمد : خير خليه يهرج طول عمره مكتوم الحين بدا يتكلم
سلطان وهو يأشر ب اصبعه عليها : لايشيخ ترا ما كنت بسكت تخسي تسكتني ذي
نوف : وش قصدك ب ذي
رفعت يدها وهي تضرب اصبعه وقالت : نزل اصبعك
ضحك سلطان ونزل اصبعه وهو يدقها من ظهرها
نوف : اعععع
ايمن : شدعوه دلع
نوف : كل تبن
اسيل : يهووو لاتغيرون الموضوع ركزو بموضوع البنت الي تحرش فيها
حمد : اي صح
شموخ : شفت شكلها ياحمد؟
حمد : اي بس معرف صف كم هي
شموخ : مستحيل كيف ماتعرف
حمد : شكلها جديده
شموخ : بسس عرفتهااا
ليان : جددد؟؟
شموخ : ايي البنت صف ....
قاطعهم الاستاذ الي دخل وافترقو بسرعه ورجعو اماكنهم وهم يتراسلون بالاوراق كتبت لهم شموخ انها بتعلمهم بالفسحه عشان يروحون لها يتأكدون وسكتو وركزو بالحصه
مرت الحصص وجت الفسحه الي اول مادق جرسها فزت ليان وشلتها والاستاذه مازالت موجوده انصدمو الكل من قوه فزتهم وركضهم بس عرفو وراهم سالفه وما اهتمو كثير
شموخ : شوفو اعرف بنتين جديدات بنشوف اي وحده
حمد : طيب
تقدمت شموخ لاحد الصفوف وهي تدخل
ايمن : ذي داقه ميانه حتى ماتطق الباب
نوف : لا يشيخ تبيني اذكرك يوم انت كسرت باب احد الصفوف من قوه الميانه وفصلوك ثلاث ايام
ايمن : تكفيين لاتذكريني اذكر ابوي جلدني جلد ذاك اليوم وخلوني ادفع تعويض بعد الخايسين ذول
اسيل : تستاهل ترا
ايمن : اص
بعدها بشوي طلعت شموخ ومعها بنت وقالت لحمد : حمد ذي هي ؟
ركز حمد فيها لثواني بعدها اشر براسه وقال. : لا مو هي
شموخ : اجل مشينا للثانيه وانتي يلا انقلعي ارجعي لصفك
رجعت البنت وهي مستغربه منهم وطنشتهم
سلطان : يلا وين الثانيه
شموخ : انتو اسكتو وتعالو
وقفت شموخ ب صف ودقت الباب
ايمن : شكلها تحسست
ليان : لا واضح مو داقه ميانه مع ذا الصف
اسيل : توترتت
طلعت البنت واول ماشافها حمد وقف ثواني وقال بحماس : هي هي ذييي
شموخ : متأكددد؟؟
مريم : من انت وكيف تعرفني وش السالفه وش سويت
حمد : تعالي معنا بس
مريم : لا ما ابي
سحبتها نوف وهي تقول : ما بناكلك بس بنكلمك بموضوع
مريم بتوتر : طيب
خذوها ورا المدرسه وقعدت هي متكيه ع الجدار وهم كلهم واقفين قدامها والي متكتف والي جالس ع الكرسي
ايمن الي قاعد بالكرسي عكس ومتكي ع يده بظهر الكرسي قال : يلا تكلمي
مريم : وش اتكلم ماقلتو لي ليش جايبيني
ليان : اسمعي حمد شاف استاذ سالم يتحرش فيك
مريم : جددد
ليان : ايوا والحين حنا نبي ننتقم منه
مريم : عشاني ؟
نوف : عشانك وعشان باقي البنات لايصير بهم شي
مريم : هو هددني ما اعلم احد
سلطان : وليش خايفه عادي حنا معك
مريم وهي بدت تبكي : انتو مو فاهمين هو مصورني وقال بينشر صوري لو احد درى
اسيل : وشوو
شموخ : اجل ويهدد البنت بصورها بعد
حمد : يقهرر
ايمن : والله لا افقع وجهه
نوف : هدي هدي
سلطان : اسمعو  عندي خطه
التفو كلهم عليه ينتظرونه يتكلم
سلطان : بنسوي خطه عشان ناخذ جواله ونفتحه
نوف : وشلون ؟
سلطان : شوفو اول شي خلال ذي اليومين بنحاول نشوف كم رمز جواله يوم يفتحه ركزو معه
مريم : انا اعرف رمزه
سلطان : كيف؟
مريم : شفته وهو يفتحه
ايمن : كم الرمز بسرعه عشان اكتبه
مريم :٨٧٣٥٤
ايمن : خلاص تم
سلطان : اجل الرمز معنا باقي بس اننا نفتح جواله بدون علمه ونمسح الصور والبيانات كلها
حمد : ليه ماتخلوني اهكر جواله وبس
سلطان : لا لا تهكر شي لان في مسائل قانونيه ف التهكير لو رفع بلاغ وممكن هو يعرف ويقفط حسابك يعني هدي
اسيل : اي صادق اجل وشلون بنسوي ومتى؟
ليان : بعد بكره
حمد : ليش مو بكره يعني ؟
ليان : بكره انا ونوف نبغيب واصلا ماعندنا بدنيه بكره بتكون باليوم الي بعده
سلطان : اي صح معها اسمعو اليوم العصر بنتجمع بمكاننا السري وبعلمك الخطه الاولى والخطط البديله لو مانجحت
شموخ : خلاص تم
نوف : جويي
مريم : شكراا وربي
حمد : العفو يلا ارجعي صفك انتي ولاتخافي من شي
شموخ : واذا حاول يتعرض لك اصرخي اضربيه سوي اي شي
مريم : لما تركني قال لو جيتك وقاومتيني صورك بنشرها عشان كذا عجلو تكفون
ليان : شرايك بكره تغيبين؟
مريم : ليه
ليان : عشان مايتعرض لك
ايمن : لا لا بكره بنخليها تجي معنا هو اذا شافها معنا بيبعد
مريم : صدق ؟
ايمن : اي صدقيني بنجي معك كلنا وبيتوتر لان معك شله كبيره وفيها عيال بعد
مريم : طيب شكرا ماتقصرون
رجعت مريم وهم بعد رجعو وراها لان خلصت الفسحه مرت الحصص سريع وطلعو كلهم بالصرفه مع بعض يمشون كلعاده
سلطان : اسمعو اول بنروح مكاننا بعدين نرجع بيوتنا ؟
ليان : لا لا ابي اسبح وابدل واتغدا بعدين بنجي
نوف : بنطلب غداء يوصلونه لنص الشارع وناخذه مانبي احد يعرف مكاننا السري
حمد : اي صح
رجعو بيوتهم يبدلون ويسبحون وبعدها طلعو لموقع مكانهم الي محد يعرفه غيرهم من يوم كانو صغار  وهو عباره عن بيت شجره كبير بوسط الغابه وكان مرتب. ويجنن ولونه بني والارضيه من خشب وكانو كل ماطلعو يشوفو العصافير والحيوانات الصغيره زي القطاوه والكلاب والارانب وحتى في احصنه والاشجار محاوطه المكان وفي نهر يبعد عنهم مسافه بسيطه كانو يوم يبون يطلعون يجون هنا يفضفضون يسولفون  يذاكرون وكل شي
دخل سلطان بشويش وهو يقول 
سلطان :  في احد ؟
ليان : اي انا
دخل سلطان وقال : شكلك اول وحده
ليان: ايوا لان بيتي اقرب
قعدت هي وسلطان يسولفون بعدها دخلو باقي الشله وقعدو بالجلسه الي كانت عباره عن كراسي ارضيه  مريحه زي الوسايد اسمها bean bag و بالوان مختلفه وهاديه وكان بالنص في طاوله دائريه خشبيه وتحتها مفرش ابيض ناعم كان البيت الوان اضوائه صفراء هاديه وتجنن
حمد : يلا تكلم
سلطان : شوفو نحن بنشوف متى استاذ سالم يترك جواله وبناخذه
شموخ : بس ؟
سلطان : لا اول خطه احد منا يروح والثاني يحرس ونفتح الجوال بس اذا انقفطنا بنسوي الخطه (ب)
نوف : وش الخطه الثانيه ؟
سلطان : الشي الثاني بننقسم شموخ واسيل وحمد انتم بتضيعون وقت الاستاذ وتقعدون تكلمونه وتحاولون تأخرونه لا يجي المكتب حقه وانا وايمن وليان ونوف بندخل مكتبه نفتح الرمز
شموخ : تم
ليان: كلنا الاربعه ندخل؟
سلطان : لا انتي وايمن بتدخلون وانا ونوف نحرس برا اذا حد بيجي ونراقب لكم الطريق
ايمن : خلاص تم
حمد : اي لان ايمن عنده الرمز وحفظه ف بيفتحه اسرع
ايمن : ايوا
اسيل : خلاص اجل بنقعد نشتت الاستاذ لحد ماتخلصون واول ماتخلصون طلعو لنا اشاره
ليان : اول ما نخلص بنصفر او بنصفق
اسيل : بسرعه اختارو تصفيق او تصفير عشان مانتورط
سلطان : لا ذا ولا ذا
شموخ : اجل وش
سلطان : كل عيال يصفرون وبنات المدرسه يصفقون يعني ممكن تتشتون وماتعرفون من الي يصفر او الي يصفق وتخرب الخطه
حمد : صادددق اجل وش الاشاره
سلطان : بنركب ب اذنكم سماعه واول مانخلص بنكلمكم فيها اننا خلصنا المهمه
ايمن : حلوو
نوف : وربي اكشنن
اسيل : خلاص بعد بكره بنبدا الخطه
شموخ : وصلت الطلبيه من الشاطر الي يقوم يستلمها
ايمن : انااا
فز ايمن وطلع برا البيت يجيب لهم طلبيه الغدا وتغدو مع بعض وبدو يذاكرون لين المغرب بعدها رجعو بيوتهم ونوف رجعت مع ليان لان بتنام معها