تقدم ايمن وهو يشوف مهاب قدامه وشلته شمّر اكمام ثوبه وهو داخل بكل ثقه
ووقف قدامه عند وجهه بالظبط وقال : هيا وريني احسن ما عندك يارخمه
مهاب بعصبيه : اناااا رخمهههه!
ايمن وهو يبتسم ابتسامه تنرفز ويغمز له : اي رخمه
تقدم مهاب وهو يمسك ثوب ايمن من رقبته وهو معصب وقال : والله لا اوريك يا ايمن اوريييكك
ايمن : انا الي بوريك
مسك ايمن يده ونزلها من رقبته ووصار هو الي ماسكه من رقبته تقدم وهو يعطي بوكس على وجهه ويطيحه بالارض ويركب عليه وهو يضربه بوجهه وبصدره بعشوائيه تدخلو اصحابه وهو يحاولون يبعدونه عن ايمن بس اصحاب ايمن تدخلو
سلطان: وخرووو عن ايمننن
تدخل وسحب واحد منهم وهو يقلبه بالارض
وحمد : مسك واحد منهم وبدا يتضارب معاه
اما نوف كانت متردده بس قررت تشوف وش تسوي دخلت وهي تركض وتسحب شعر واحد واول ما جا يمسك شعرها ابعدت وعضت يده بقوه صرخ الولد وهو يبعد يده عنها لكنها نزلت رجولها وهي تلف رجوله وتطيحه ع الارض بعدها مسكت يديه وثبتتها ورا ظهره
نوف : اسكت يحبيبي اهدا
الولد : ابعدييي يحيوانه
مسكت نوف راسه ودقته بالارض وقالت : عيد ماسمعت؟؟
سكت الولد وهو منصدم اما ليان كانت تراقب الوضع وشافت ان مهاب يضرب ايمن ركضت ونقزت وهي تشوته بحكم ان كلهم يعرفون التايكواندو والقتال من يومهم صغار طاح مهاب وهو يناظر ليان بعصبيه وبنظره متوعده الا وتمسك ليان يد ايمن وهي تقومه وركض ايمن لمهاب يبي يضربه علق يديه بالهواء وهو مجهز قبضته لكنه سمع صوت المدير يصرخ ويقول : طلابببب وش يصيير هنااا
تركه ايمن وهرب مع شلته والمدير مسك مهاب والي معه
رجعو لفصلهم وكان عندهم حصه فراغ طلعت اسيل ادوات الاسعاف ومسكت اي حد قدامها واخذت سلطان اما ليان بدت تعالج ايمن وشموخ عالجت حمد اما نوف ما تعورت مره لان هو ماقدر يمد يده عليها بحكم انها بنت لكن هو تضرر اكثر منها ف قعدت نوف ماسكه جوالها تلعب فيه
سلطان : اهخخ ترا يوجع
اسيل : انت اصبر عشان يخف جرحك لازم
سلطان : طيب
قعدت هي تسوي له وهو بس ساكت ويلعب بجواله
وحمد قاعد يسولف لشموخ الي تنرفزت وقالت : حمد انطم ابي اعالجك بس تتحرك كثير ترا لو دخل المعقم بعيونك مالي دخلل
حمد : طيب
قعد ساكت لمده ثلاث ثواني بعدها قال : الا شموخ شفتيي ....
سحبت شموخ شعره وهي تقول : وش قلتت انا
حمد : وجعع
شموخ : لا تتحرك قلت ولا والله بتركك انت وجروحك المعفنه ذي
مسكها وقال : لا خلاص اسف بقعد ساكت
سكت ذي المره صدق وهو يحاول مايتكلم اما ليان كانت ماسكه ايمن الي فيه جروح اكثر من غيره بحكم انه تضارب مع مهاب
ايمن : بشويش يليان
ليان : قاعده اسوي بشويش طيب
ايمن : اي ترا يحرق
ليان : ادري خاصه ان جروحك عميقه شوي
ايمن : يلا عادي
قعد ساكت وهو يناظرها وهي تعالجه وتهاوشه بدت تعقم جروحه الي كانت بحواجبه وبخدوده وبفكه وبشفايفه
رفعت شعره بيديها وربطته وقالت : خله كذا لان حطيت معقم تحت جبهتك فيها جرح بسيط انتبه لا يجي بشعرك
ايمن : ابشري
حطت له لصقات للجروح وقعدت مكانها وبدو يسولفون اما ايمن حط راسه ونام بعدها طبعا كلعاده بيسوون لهم استدعاء للأداره بنص الحصه شافت الاستاذه عليهم وقالت : وش مسوين ذي المره
حمد : ولا شي
آدم : يووو مادريتي صارت ضرابه قوييه
ايمن : انطمم
سمحت لهم الاستاذه يطلعون وبقو اسيل وشموخ بالصف لانهم ماتدخلو اصلا
ليان : كله من ايمن
ايمن : اسكتي لحد يعترف وربي لو قلتو شي بكفخكم
نوف : اي طبعا مستحيل نعترف
سلطان : الله يعين وش بيصير
ايمن : انا اهلي من قوه اليأس الي وصلوه صارو اذا استدعوهم مايجون يعرفون مشكله يقولون ادبوه انتم
حمد : تتخطى يبوي عادي
مشو لمكتب الاداره ودقو الباب
المدير : ايمن وشلته ؟
ايمن : اي نعم
المدير : ادخلو لابارك الله فيكم
دخل ايمن وقال : شدعوه
المدير : وش مسوين بالطلاب انتم؟
ناظرو على مهاب وشلته وكانو صدق متكسرين الي مربوط راسه بشاش والي نوف كسرت يده وحطو له جبس والي كله خدوش وجروح
سلطان : احنا سوينا كذا ؟
المدير : بالله وتسأل بعد ؟ يعني من غيركم ب ذي المدرسه اذا ضربو كسرو الطلاب
ايمن : هو بدا
مهاب : كذابب
ايمن : اصص لاترفع صوتك لا اتوطى ببطنك ذلحين
المدير : توطى ببطنه قدامي كانك تقدر
ايمن : لا انا احترمك
المدير : لو تحترمني ماسويت كذا
حمد : ماله دخل
نوف : اي صادق
ناظرت نوف على الي ضربته وهي تسوي انها تخوفه ورجع ورا
المدير : نوووف اهجدي
نوف وهي كاتمه الضحكه : ابشر
المدير : يراسي حتى ليان
ليان : ما كنت بتدخل بس هو ضرب خويي وساعدته
المدير : يشيخه
هاوشهم المدير وخلاهم يكتبون تعهدات كلهم بعدها رجعو لفصلهم وهم يخبرونهم السالفه وكل شي صار بعدها رجعو بيوتهم وهم مطنشين الموضوع
العصر الساعه ٣:٢٠ ( ببيت الشجره )
شموخ : هييييي
سلطان : وجع وش
شموخ : ماسمعتو ولا ؟
لفت ليان الي كانت تهاوش نوف وقالت : وشو
شموخ : اول شي اقعدو زين عشان اتكلم
تربعو كلهم عندها وكان حمد منسدح على رجول اسيل وهي تربط له شعره اما ايمن متكي ع سلطان وليان ونوف قاعدات جنب بعض طبيعي ويترافسون برجولهم
شموخ : ليااان ونوف قلت لاتتحركون
نوف : افف طيب
حمد : يلا تكلمي شعندك
اسيل : لاتحرك راسك حمد
حمد : ابشري
شموخ : خلي راس الولد اعتقيه مو كل تسريحه تجربينها عليه
اسيل : شعره حلو ويظبط ع التسريحات
حمد : ايوا
سلطان وهو يشوت شموخ برجوله بشويش : بتتكلمين ولا وش
شموخ : اي صح بتكلم
نوف : يلا
شموخ : اسمعو بما ان اليوم الخميس وبكره الجمعه اجازه
ليان : ايوا ؟
شموخ : سمعت ان في بنت من صفنا بتسوي حفله ببيتها وبتعزم كل الي بصفنا
ايمن : وناااسه
اسيل : الله حماسس
نوف : فله ياشيخه
شموخ : معزومين انتو ؟
ليان : مدري
شموخ : افتحو القروب حق الفصل وشوفو
نوف : طيب
فتحو جوالاتهم وشافو صدق في دعوه لحضور حفله
قرا ايمن بصوت عالي الرساله وهو يقول : انا الطالبه شادن بنت خالد ادعوكم لحضور حفله بسيطه في منزلي وستكون حفله خاصه بصفنا لا يمكن حضور اي احد غير مدعو للحفل وقت الحفل " المغرب " الساعه " ٦:٣٠ " والموقع برسله الان احضرو بالموعد وللدخول يجب ان تكون بطاقه الدعوه معكم
وكتبت بخط كبير اخر الرساله ( الطالب ايمن بن احمد ممنوع من دخول الحفله منعاً باتاً بسبب الفوضى الذي يسببها بالمدرسه وقد يسببها ف الحفله) شهق ايمن وهو يقول : خيررر على كيفها ذي التببببن
ضحكو الباقي عليه وقالت شموخ : ما الومها
ايمن : خيرر بتروحون بدوني يعنييي ؟؟
حمد : لاااا
اسيل : الا بنروح
ايمن : والصداقه والعشره تهون ؟
ليان : حد قالك مخلي الناس يجيها فوييا من مشاكلك
ايمن : اي مشاكل ؟ مو مره قويه ترا ماقد قربتها ذي الحيوانه
شموخ : اصبر بحاول اقنعها تخليك تجي
ايمن : شموخ احبككك
شموخ : خلاص اسكتو بتصل فيها
اتصلت وهي تنتظرها ترد وتحاول تتجاهل ايمن الي يقول لها بيده انها تفتح السبيكر ردت شادن وفتحت شموخ السبيكر وقالت : هلا شادن
شادن : اهلين ؟
شموخ : ليه كاتبه ممنوع ايمن يحضر ؟
شادن : لانه مزعج
شموخ: لا لا تكفين خليه يحضر ذا خوينا واوعدك ان اي شي يسويه بمسؤوليتي والله مابخليه يسوي شي طول الحفله بخليه جنبي تكفين ماينفع كل الي بالصف يحضر الا هو غلط
شادن : لكن
شموخ : صدقيني اوعدك بنمسكه ما بنخليه يسوي مشاكل بعدين هو يتمشكل مع الي برا الصف مو الي داخل الصف كلهم يحبونه
شادن : خلاص طيب قولي له ينفع يحضر
شموخ : عادي ترسلين بالقروب انه مسموح له بالدخول عشان لو حضر وشافوه ممكن يحرجونه ويقولون انت مو معزوم واطلع ومن ذا الكلام
شادن : خلاص ابشري
قفلت الخط وهي تناظر ايمن الي نط يحضنها : شموخخ كفوو وربي كفوو يعني بحضرر معكم
شموخ : كفووك الطييب ايي مو انا الي اخلي خويي
ايمن : اطلقق وحده لبى بسس
بعدها بشوي جت رساله بالقروب مكتوب فيها ( كنت امزح ايمن ينفع يجي ومعزوم للحفل اكيد )
ايمن : غصباا عنكك يشيخههه
ليان وهي تحط يدها عند فمه ع اساس مايك : وش تحس الحين ايمن حكينا عن مشاعرك
ايمن وهو مصدق انه بمقابله وعايش الدور: مشاعري جدا جدا قويه وفرحانه وسعيده ومبسوطه ومستانسه
والصراحه شي جميل اني احضر و
اسيل : خلاص اسكت
ايمن : خير ترانا بمقابله ماعلموك الذوق العام وكيف لازم تحترمين الي يتكلم
اسيل : وشو ذوق عام انت بعد انت عندك كل شي الا الاحترام والذوق العام
حمد : حرامم عليكك
اسيل : وشو
حمد وهو يقوم من رجولها : ما ارضى ع خويي
اسيل : لحظه التسريحه
حمد : دام قلتي كذا عن خويي مابسوي تسريحه اعتذري
اسيل : طيب اسفه ايمنن يلا حمد تعال
حمد : طيب
خلصت التسريحه وهي تصوره الف صوره وفيديو وهو ساكت ومتحمل
ليان : اسمعو شرايكم نروح المول نتقضى ونشتري فساتين ماعندي
نوف : ولا انا
سلطان : يلا مشينا
ليان : بما ان بيتي قريب تعالو اول شي عندي ناكل نتغدا بعدين نروح
حمد : مشينا
طلعو من المكان وراحو لبيت ليان ودخلو
ليان : ادخلو يلا
ايمن : قطوووتيي تعالييي
ركض للقطوه وهو يبوسها وييمسح عليها
ليان : قطوتي مو قطوتك
ايمن : اغراضك اغراضي بيتك بيتي قطوتك قطوتي مابيننا خصوصيات اغراضنا مشتركه ولا انا غلطان ياجماعه
نوف : صادق
دخل حمد غرفه نوم ليان بكل ميانه وتسدح بالسرير
ركضت ليان وراه ودخلت الغرفه وقالت : لا يشيخ
حمد : طول عمري انام بغرفتك شتبين
ليان : لا ولا شي اقعد خلاص حنا بننزل نسوي الغدا ماتبي تساعد
حمد : لا
ليان : طيب
نزلت ليان وتركته وشافت الباقي تحت بالصاله
ليان : شتسوون انتم قلت نسوي غدا يلا ع المطبخ
ايمن : حتى انا وسلطان وحمد ؟
نوف : اي حتى انتم يلا ع المطبخ معنا
سلطان : وين ابو حمود ذا
ليان : نايم بغرفتي
ايمن : على كيفه ماينفع ينام لازم يساعدنا
ليان : اقول خلوه مو فاضيه لهواشه وعناده يلا تعالو نطبخ بسرعه ونروح للمول ماعندنا وقت
اسيل : صادقه
دخلو المطبخ وترك ايمن القطوه وقال : وش اسوي
ليان : تعال انت قطع الخضار ذي وسلطان ابيك تغسل المواعين اما نوف ساعديني بالدجاج انا انظفه وانتي حطي بهارات اما شموخ جهزي الرز واسيل جهزي السلطه
اسيل : تم
شموخ : يلا
بما انهم حافظين بيتها زين ما كانو يسألون عن اماكن الاغراض كانو يطلعون كل شي وهم عارفين مكانه
بدت شموخ تغسل الرز وبعدها شغلت النار وحطت الرز وبدت تطبخه بعد ماحطت مويه شوي وانتظرتها تغلي ووقفت تناظر الباقي وتصورهم عشان تحطها ستريك صورت المطبخ الي كانو كلهم فيه الي يغسل والي يقطع والي يطلع صحون وكان شكلهم يجنن وهم يتساعدون وازعاج المطبخ
ايمن : اهههخخ عيونييي
اسيل : شفيها
ايمن : تحرقنييي
اسيل : اي لانك تقطع بصل
بدت عيونه تدمع وهو يقول : يوجع يوجع
جا بيفرك يده الي ماسك بها البصل الا وتوقفه اسيل بسرعه وتقول : يغبي لاتحط يدك على عيونك دامك تقطع بصل
ايمن بفهاوه : ليه
اسيل : لان بتحرقك زياااده وربي مووت الوجع
ايمن : يمهه اجل خلاص ما ابي اقطع تعالي يعيوني قطعي وانا بسوي السلطه
اسيل : خلاص طيب رحمتك يلا بادلني بالمكان
ايمن: طيب
قام ايمن وهو يقعد مقابلها بالطاوله ويقطع السلطه وهي تقطع البصل وباقي الخضره
ليان : نوف طلعي البهارات لا اصفقك الحين
نوف : كلي تبن
ليان : نوف طلعي بسرعه
نوف : طيب طيب
طلعت نوف البهارات وهي تنتظر ليان تخلص تغسل الدجاجه
ليان : اصبري باقي بس شوي
سلطان : ياليل نوف خليها تغسلها تبينا ناكل دجاجه مليانه دم وجراثيم ونتسمم
نوف : لا
شموخ : اجل اسكتي
خلصو الدجاج وحطوه بالنار والباقي بعد خلصو تقطيع الخضار وحطوها مع الدجاج وسوت ليان دجاج الماسالا الهندي وحطت الصوص وكانت الريحه تشهي بشكل طلعو العيال من المطبخ بعد ماخلصو شغلهم والبنات نفس الشي بدو يرتبون السفره عشان ياكلون راح ايمن يقوم حمد عشان ينزل يتغدا صح انهم يتغدون متأخر بحكم انهم تغدو بالمدرسه اكل خفيف
حمد وهو يلعب بشعره بكسل : جهز الاكل ؟؟
ايمن : ايوا يلا انزل
قعدو على طاوله الاكل والكل يحط للثاني ويمدون الصحون لبعض ويسولفون بعد ماخلصو اكل نظفو الطاوله وغسلو المواعين وعلى طول طلعو للمول
ركبو سياره ايمن وهم خايفين من سواقته الطايشه الي كلها سرعه وتفحيط لكنه كان مؤدب ووصلهم سالمين
نزلو للمول والبنات يمشون مع بعض قدام والعيال وراهم
ليان : اسمعو تعالو ندخل هنا في قسم بنات وقسم رجال انتو ادخلو هنا وحنا هنا
حمد : طيب
افترقو ومشى حمد وسلطان وايمن لقسم الرجال مع انهم دارين مابيشترون شي وبيلبسون ثوب وشماغ بالنهايه
ركضو البنات يشوفون الفساتين ويدورون اذا شي يعجبهم او لا
اسيل : بنات شوفو تحسونه حلو
ناظرو البنات للفستان الي تأشره وقالت شموخ : لا مو مره احس اللون اوفر
ليان : صادقه
كانو يوثقون بذوق شموخ لانها تلبس ملابس تهبل والوان تليق عليها ف هي تعرف تختار لهن
ماعجبهم شي من المحل وطلعو ونادو العيال معهم قعدو يدورون بالمول لمده ساعتين ونص لحد ما اخيرا قررو يشترون وحصلو فساتين تهبل
شموخ : وانتم وش اشتريتو ؟
سلطان : ماشرينا شي
اسيل : ليييه ؟
سلطان : وش تبينا نلبس بدلات كننا ايطاليين اكيد بنلبس ثوب
نوف : خليهم ينقلعون ما يهم يلبسون الي يبون
رجعو بيت ليان وبعدها وصلهم ايمن لبيوتهم وبقت ليان لحالها تستمتع بوقتها كلعاده بدت تحط لنفسها ماسك ورفعت شعرها وحطت اكل لقطوتها وقعدت هي متسدحه بالكنبه وحاطه الابتوب حقها بحضنها وتتابع مسلسلها المفضل بدت تاكل سناكات وعصاير بعدها بفتره نعست وقررت تنام
بصباح اليوم الثاني صار نفس الروتين طبعا وبالظهر اتصلو اصدقائها عليها لانهم بيجون بيتها يتجهزون
فتح ايمن الباب ودخل مالقاها وراح لحد غرفتها وداهمها
ليان : يمهههه
انخرع ايمن وقال :يمههه وششش
ليان : كيف دخلت انتت خرشتني
ايمن : بسم الله عليك اسف
ليان : طيب جيت اول واحد ؟
ايمن وهو يرمي نفسه بطرف السرير وهي منسدحه ع لابتوبها واتكأ ع كف يده : اي
ليان : طيب
ايمن : وش تتابعين
ليان : مسلسلي
ايمن : اشوف
تقدم وتسدح عندها وهو يلعب مع قطوتها وشاف المسلسل وماعجبه قام وقعد بالكرسي حقها يشوف وش عندها من ميكب
ليان : لاتلمس شي
ايمن : وشو ذا
ليان لفت وقالت : ايلاينر حطه مكانه
ايمن : اها
حطه وقعد يحوس ب اغراضها وقال : يووو ياكثر الميكب وياريت تطلعين حلوه بعد
ناظرته ليان بحده وسكت وقال : امزح
بعدها قعد يدور بغرفتها الي مره كبيره لدرجه فيها كراسي وتلفزيون بعد ووقف عند مكان العطور واخذ عطر وشمه وقعد يتعطر
ليان :بسسس بسس خلصتهه
ايمن : حلووه ريحته
ليان : ياليل ايمن خير اقعد
ايمن : بالله اذا لبست ثوب بتعطر فيه
ليان : تخسي يالله برا
داهمو الغرفه حمد وشموخ الي جايبه كل عفشها معها وحمد ماسك عنها شناطها
شموخ : اهخخ جبت ملابسي وميكب واستشوار وكل شي
ليان : ليه تتعبين نفسك عندي كل شي شوفي
لفت شموخ وهي تشوف ان صدق كل شي موجود
حمد : ليه ماقلتي لليان اذا عندها اغراض بدل لا تخليني امسك كل شييي
ليان : ليه كلكم بغرفتي الحين
شموخ : توء توء غرفتنا
ليان : ياشيخه
اتصل سلطان وهو يقول لهم انه مالقى احد بالصاله وقالو له انهم فوق دخل وجت بعده اسيل
ليان : اسمعو يعيال في عند المخزن مرايتين طويلات جيبوها لنا
ايمن : طيب يلا حمد وسلطان تعالو
مشو للمخزن وطلعو المرايات وحطوها عند البنات
ليان : لا خلوها عرض كذا ع الارض
حمد : كذا
ليان : ايوا بس
حطوها وقعدو البنات وبدو يطلعون ميكبهم ويتجهزون وهم مشغلين اغاني ومروقين والعيال قاعدين يناظرونهم ايمن متسدح بسرير ليان يناظر وش يسوون وبعدها يقعد يلعب بجواله اما سلطان قعد يرتب شعره ويحط عليه زيوت بعد ماعطته نوف من الزيوت الي عندها وحمد قاعد بوسط البنات ويشوف وش يسوون ويمسك كل شي قدامه
نوف وهي تضرب يده : اترك الكونسيلر بسرعه
حمد : وجع
قعد يناظر وقال : بعدين بقيم من احلى وحده سوت مكياج احلا
شموخ : لا مشكور اقعد مكانك مانبيك تقيم ميكبنا
حمد : الا بقيم انطمي وتمكيجي
شموخ : انكتم بالله
اسيل : لو في جهاز يحط ميوت للبشر كنت بستخدمه ع حمد كل يوم
نوف بضحكه : ميوت دائم
حمد : مايضحك
ليان : اصصص حمد لاتحركني
حمد : ليه
ليان : بحط ايلاينر
شهقو البنات وهم يناظرونها وكاتمين انفاسهم وهم متقصدين يكبرون الموضوع ويسوون دراما عشان يخرشون حمد الي انكتم زيهن وهو يناظرها وقال : وشو ذا تحديد مصير ولا
اسيل : اي موت ولا حياه اسكت خلها تركز
قعد ايمن يضحك وهو يشوف تركيز ليان ومسك مخده ورماها عليها ضرب راس ليان بالمرايه والايلاينر طار لجبهتها رفعت راسها بشويش والبنات خافو وهم عارفين ان ولا عظمه بتسلم ف ايمن الحين بعد الي سواه
نوف : جاك الموت يا ايمن قلنا اسكتو بس تحبون الجلد
لفت ليان راسها بسرعه عليه وكان شكلها يخرع حتى ان حمد نط من مكانه وقعد بالكنب وهو يناظر اما ايمن الي كان بالسرير شافها وقفت وهي متجهه له وتقول : ايمنننن يالحيوانننن
نقز من السرير ونزل ع الارض وهو يحاول يخليها ماتمسكه كانت ترميه بالمخدات وهو نفس الشي ماسك مخده يحمي فيها نفسه من اي شي ممكن يجيه تراكضو بالغرفه وصراخهم واصل اخر الدنيا اخر شي نطت ليان فيه وهي تطيحه بالارض وتمعط شوشته
ايمن : خلاصصص اسف فكيييي شعريي
ليان : خربيبت المييييكب تعبت عليهه
ايمن : والله بسويلك ميكب احلا تعالي بس
ليان : كل تبن واطلعوووو
طلعت ليان العيال وقفلت الباب عليهم بعد ماخلت سلطان الوحيد هناك لانه يبي يغسل شعره وقال بعد ما يغسله بيطلع
طلع سلطان ورجعت هي ترتب ميكبها والبنات نفس الشي بعد مده دخلو العيال طبيعي وهم ساكتين لان خلصت فقره الميكب وصارت فقره الشعر
فكت ليان شعرها وهي تخلي شموخ تسويه لها ويفي
اما حمد استغل الفرصه وقال ل اسيل : اسيل انتي دايم ترتبين شعري تعالي اسوي لك شعرك
اسيل : لا انت ماتعرف
حمد : الا اعرف جربي مابتندمي
استسلمت اسيل وسلمته شعرها بكامل قواها العقليه
لكن الحمدالله ان حمد ما خرب شي وكان يقلد وش شموخ تسوي ويسوي زيها بالظبط
اسيل : اي نزله نزله ولف شعري عليه
حمد وهو يسوي : كذا ؟
اسيل : ايووا الحين خله شوي بعدها اتركه
حمد : طيب
سوا لها شعرها وظبطه لها بعدها سحب نوف من شعرها
نوف : اعععععع
حمد : اسكتي تعالي اسويلك انتي بعد
نوف وهي تسحب شعرها منه : ما ابييي
سحبها حمد وهو يثبتها وقال : شوفي اسيل شعرها طلع يجنن
شموخ : خليه يسوي لك انا ليان قاعده تسوي لي مابيمديني ارتب لك هو كان يسوي نفس ما انا اسوي يعني يعرف
ايمن : اي واضح
ناظرته ليان بنظره بعدها سكت وقمط العافيه
سلطان : يعيال تعالو نلبس نحن بعد
قامو ايمن وسلطان للغرف الثانيه يبدلون بعدها ايمن دخل عليهن مره وراح يرش عطر مع ان ليان قالت لا بس رش بسرعه وركض
قعدت ليان تتوعد فيه وتتحسب لحد ما انقلب وطاح على الارض
ايمن : اعوذ بالله عطتني عين
ليان : احسن
ودخلت الغرفه وقفلت الباب والعيال خذوه وقعدو بالصاله يتفرجون تلفزيون لحد مايخلصون البنات يلبسون
![](https://img.wattpad.com/cover/369229542-288-k24598.jpg)
YOU ARE READING
حبيتها وقلبي من الحب تايب
Mysterie / Thrillerتدور القصه عن بطلتنا ليان الي فقدت اهلها بحادث وصارت تعيش ببيت لحالها لكن اصحابها عوضوها عن كل شي وكانو معها ومايفترقون عن بعض بذيك الفتره نشرت الاخبار عن وجود قاتل متسلسل يقتل كثير ناس بدون اي رحمه كان الكل يخافه ومايجيب طاريه لكن شاءت الاقدار ان ب...