تعدو الساعات لي كانت تحسب فيهم بالثانية... وكل مرة تجبد تليفون تشوف الوقت...حتى وصل وقت خروجها غير هبطت لقات لبنات يستناو فيها بقات تشوف مع عايدة وترجع تشوف مع لمياء
غير شافت عايدة فلك تشوف معاها ...فهمتها
عايدة: لمياء هيا نروحو.... فلك عندها قضية ماشي راح تجي معنا اليوم
فلك اومت ليها غير براسها
ودعتهم في زوج غير شافتهم بداو يبعدو خرجت لقاتو واقف قدام الطموبيل يستنى فيها
جواد: مد ليها يديه... وسلم عليها... ونطق هوا يفتح ليها فالباب
جواد:لباس عليك
فلك:لباس الحمد لله... ياك ماطعتلتش عليك
حرك رسو بمعنى لا هذا وين وصلت انا تاني
ركبت فالطموبيل بعد مادارت حزام الامان... ضمات يديها لعندها... ونزلت راسها تشوف معاه غير مابين شوافرها... حتى خلعها بالصوتو
جواد: عندك بلاصة تحبي تروحيلها
فلك: حركت راسها بلا... ونزلت عينيها وكملت تحكي... عمرني خرجت مع شي حد... ورحت لبلاصة... ضغطت على يديها من قوة الاحراج... مكملة كلامها تقدر تختار انت ماعنديش مشكل
جواد: اوم ليها براسو.... وكسيرا بالطموبيل
مسافة طريق كامل داوها غير فالسكات... يتسمع غير صوت انفاسهم.... حتى وقت سألاتو فلك في واش يحتاجها... جوابها غير بزوج كلمات وقص...
جواد: وقت نوصلو تعرفي...
غير وصلو... ڨارا طموبيل جنب الطريق... ونزل غلق الفاست... ودار ليها يفتح فالباب... هزات راسها وتبسمت ليه اول مرة شخص يعاملها بهذا اللطف واحترام كامل...شرارة صغيرة لامست قلبها من هذا الجاست حتى حشمت على روحها وخدودها توردو كيف توت البري ....و نطقت بصوت انثوي مغلفاتو الحشمة
فلك: شكرا
اوم ليها براسو... ونطق
جواد: نمشو.... هزتلو غير براسها بمعنى اه... تمشاو مع بعضاهم كان مقلل من مشيتو ويشمي على حساب خطواتها.... حتى وصلو للمكان... مكانش مطعم فاخر ولا
كانت عبارة على عربة الطعام فالشارع ... جلسو فوق لكراسة لي كانو فوق الرصيف... وريحت الماكلة واصلة لحتى لعندهم....تقابلو مع لبحر... حطت صاكها في حجرها... وبدات دور في راسها... عجبتها لبلاصة... ماكنتش حاطة في بالها انو يعرف كيف هذي الاماكن الشعبية...
جواد:[ شافها دور في راسها يمين وشمال شاف معاها ونطق ] اذا ماعجباتكش نقدرو نبدلو لبلاصة
فلك: دورت راسها ليه وهزت عينيها فيه و حركت راسها بمعنى لا... بالعكس عجبتني... غير، جاني عجب تعرف هذي لبلايص... احم قصدي مايبانش عليك...
جواد: وكيفاش نبانلك
فلك: ها.. م.. مافهمتش
جواد: قلتي مايبانش عليك... زعما كيفاش نبانلك
فلك:[ضحكت ضحكة خفيفية مخبية بيها الاحراج... ونطقت] معرفتش كنت تبالي كيف هذوك لي شايفين رواحهم...
جواد: رجع ظهرو وراء ... وحط يدو على الكرسي...
يعني كنتي تشوفي فيا مغرور...
فلك: عضات على شفايفها... ونطقت بخجل ماقصدتش...
جواد: ... وقت كنت صغير... ديما نجي مع لواليد لهنا...وتربيت لهنا... موحال ننسى اصلي... ولا تغرني لفلوس
بعد ماسافرنا... ماعدتش جيت... شاف معاها مكمل كلامو.... هذي اول مرة نجي من وقت هبط لدزاير.. معاك....
فلك: اومت ليه غير براسها...حتى من الهدرة هربت ليها...وقت سمعت واش قال....
كانت مزالها متوترة من لقعدة معاه... وخصوصي انو قريب ليها بزاف...
بقات ساكتة حتى شفاتو ناض من بلاصتو...
جواد: درك نجي
اومت ليه براسها وخلات عينيها يتبعوه وين رايح...
وقف قدام العربة
جواد: سلام عليكم... عمي القايد
قايد: وعليكم والسلام ولدي... اهلا بيك
جواد: الله يسلمك... زوج كسكروتات.... دار ليها شافها تشوف معاه... ورجع حكى بلا حار.... زوج كيسان اتاي...
قايد: باهي اولدي... ارجع اقعد مع مريتك.... دورك نوجدلكم ونجيبهوملك...
اوم ليه براسو... وماحبش يدقق في واش قالو... ورجع جلس بحداها...
جواد: فين خليناها...
فلك: هزات راسها فيه... وحكات... كنت تحكي على وقت كنت تجي فيه لهذي لبلاصة...
جواد: اه وقت كنتي تشوفي فيا مغرور...وضحك ضحكة روجولية خلاتها تسهى فيه
كان هوا يحكي وهيا تسمع ليه... عجبها وقت حكى ليها على صغرو... وخصوصي انو جابها لاكثر بلاصة يحبها... حتى قاطعهم وقت جابلهم طلب تاعهم... حكماتو بين يديها... غير حكماتو.. وهيا تحرقها يديها.. خرجت اه صغيرة من فمها
جواد: عندك راه سخون
حطاتو فوق المايدة صغيرة كانت قدامهم... قربت يديها لفمها ولات تنفخ عليها....
بقا يشوف في تعبير وجها... كيف كل مرة يتغير وقت تنفخ على يدها... حتى حكمها على يدها... وحكمها مابين يديه مقربها لفمو ينفخ عليها... بقات تشوف معاه وترجع تشوف مع يديه كيفاش حاكمها... خرجت منها تبسيمة خفيفة... وقت قارنت حجم يديه مع يديها.. كانو يبانو صغار خلاه... مقارنة بحجم يديه
هز فيها عينيه ونطق بصوت رجولي
جواد: علاش ضحكتي
فلك: والو... غير ضحكت....بقى يشوف معاها ويتبع في كل حرف يخرج منها
حتى فاجئها بالكلمة لي قالهالها....خلى تبسيمتها تختفي غير بالشوية... يتبع
أنت تقرأ
مكتوبة على اسمك #مكتملة
Romanceقـــــــصــة كـــــامــــلة تـــــــــــحـــــت عــــنـــــــــــــوان مكـــــتوبة علــــى اسمـــــــك.... 🥀بِـــــقَــــــلَــــــمِــي✍️: 🌪 Marwa bzd🌪 القصة واقعية.... من الواقع المعاش فيها كمية كبيرة من...
