ආදරණීය හිස්තැනක් | Dare To Read?

ස්තුති සටහන සහ ඉතුරු කරුණු...

(Anjana Kumarasiriගේ ෆේස්බුක් පිටුවෙන්...)

ගොඩක් ස්තූතියි!

මේ ඔයාලා හැමෝටම ස්තූතියි කියන්න වෙලාව. මම කතා ලියන්න ගත්තේ ගොඩ කාලෙකට කලිනුයි. නමුත්, ඒකට වටිනාකමක් ලැබුණේ ෆේස්බුක් සහ වට්පැඩ් හරහායි. "වැස්සටත් එහායින්" කතාවේ ඉඳල අවසානයට සටහන් කරපු "අකාල" දක්වා මා එක්ක එකතුවෙලා එක වචනයකින් නමුත් මාව ඇගයීමට ලක්කරා නම් - පළමුවෙන්ම ඔයාට ගොඩක් ස්තූතියි! මේ පොත ඔයා වෙනුවෙන්.

වත්කම්... දේශපාලන බලයක් හෝ සමාජීය බලයක් නැති ලංකාවේ ජීවත්වෙන සාමන්‍ය පුද්ගලයෙක් හැටියට, මාතෘකාවට අදාල පොතක් ප්‍රකාශනය කරනවා කියන්නේ සුළුපටු දෙයක් නොවුණත් 'මොකක් හරි හොඳ දෙයක් සිද්ධ වේවි...' කියන බලාපොරොත්තුවෙන් මම ඒ කටයුත්ත අවසන් කළා. වැඩේට එකතුවුණ පුංචි කාණ්ඩයක් ගැන මතක් නොකර කොහොමද?

හැඩොක් මල්ලි සහ නුවර ඉස්කෝලේ ළමයා - කලින් ලියන්න ගත්ත ප්‍රොජෙක්ට් එක වගේම මේකත් කියවලා ඔයාගේ අදහස් කිව්වට... 'පිටකවරේ මෙහෙම හැදුනොත් ලස්සනයි.' කියලා අලුත් අදහස් ඉදිරිපත් කළාට - ගොඩක් ස්තුතියි! (නැත්නම් පිටකවරේ ඉන්නෙ සමනල්ලු රෑනක්!) නුවර ඉස්කෝලේ ළමයා නම් ඉතිං කතාවට අවශ්‍ය කරුණු කාරණා නොසැහෙන්න දුන්නා! සමහර කෝල් පැය දෙකකුත් දිගයි. එක අතකින් බැලුවම ආදරණීය හිස්තැනක් 'ඇත්ත කියන ප්‍රබන්ධයක්' හැටියට හඳුන්වන්න පුළුවන් ඒ අදහස් නිසා තමයි.

ගයාන් අයියා: සතියට දවස දෙක තුන කතා අදහස් සාකච්ඡා කරන්න වෙලාව වෙන් කරගත්තා වගේම පුද්ගලික ගැටළුවලදි පවා කතා කරලා සපොර්ට් කළාට. ආදරණීය හිස්තැනක් ගැන අදහස ආව වෙලාවේ ඉඳලා, පොතේ කවරේ සෙට් කරගන්න... ප්‍රෙස් එකක් හොයාගන්න... අවසනට පොත ප්‍රින්ට් එකෙන් එළියට එන දවසෙත් "අද අරක කරන්න යනවා නේ...? වැඩේ කරගත්තද...? මොකද වුණේ?" - හැම දෙයකටම තෑන්ක්ස්!

ඊළඟට පූ මි: ආදරණීය හිස්තැනක් ගැන මම තරමටම පූමිත් සතුටු වෙනවා කියලා මට විශ්වාසයි. අපි චැට් කරන්න අරගෙන අවුරුදු කිහිපයක් වගේ... මගේ ලිවීමට පූමිගෙන් ලැබුණු සපොර්ට් එක එදා ඉඳලම එහෙමයි. මේ පොතට විතරක් නෙමෙයි... කලින් පොතක් ප්‍රකාශනය කරන්න ගත්ත උත්සහයකදිත් පූමි (සහ ගයාන් අයියා සහ හැඩොක් මල්ලි) මාරම සපොර්ට් එකක් දුන්නා. ඒ කටයුත්ත අසාර්ථක වුණාම පූමී මටත් වඩා දුක් වුණා. මම නොදැකපු කෙටිකතා... නවකතා තරඟ... ලේඛකයන් සම්බන්ධයෙන් වැදගත් වෙන අවස්ථාවලට සම්බන්ධ වෙන්න විස්තර... ෆේස්බුක් එකෙන් හම්බෙන පොස්ට්... පොත් ප්‍රකාශන සම්බන්ධයෙන් වැදගත් වෙන කරුණු ඇතුළත් ලිපි... සෑහෙන ප්‍රමාණයක් එවන්න ඇති. අවශ්‍ය පරිවර්තන පොත් කිහිපයක් හොයාගන්න "පූමි, පුළුවන් නම් හොයලා දෙනවකෝ..." කිව්වම - එයාගේ යාළුවන්ගෙන් අහලා මං වෙනුවෙන් පොත් හොයලා දීපු අවස්තාත් තියෙනවා. මම කලින් සඳහන් කරපු 'ගැඹුරු දිය මත' ලියවෙන්න පටන් ගත්තෙත් පූමී එව්ව, 'විදර්ශන සාහිත්‍ය සම්මාන' තරඟයට ඉදිරිපත් කරන්න නවකතාවක් හැටියටයි.