Alluring Mask

CHAPTER 22

CHAPTER 22

SARAH DAYANGHIRANG

Tahimik ako ngayon sa aking kinauupuan habang pinagmamasdan ang mga mangingilang bahay na nadadaanan namin. Si Atlas ngayon ang nagmamaneho ng kotse. Kanina pa kami nakarating sa Mexico at nakalabas na sa Cancún International Airport.

Naging directed na rin naman ang flight namin dahil din kay Atlas at sa private plane nito. Inabot ng 16-18 hours ang biyahe namin. Kahit naman nakaupo lang kami, sobrang nakakapagod 'yon.

"I'll give you one day to rest before your training. Ipapakilala rin kita sa magiging trainer mo ngayon para makapagsimula na tayo bukas," biglang sambit ni Atlas.

Napalingon tuloy ako sa kan'ya. Nanatili pa rin siyang nakatingin sa kalsada dahil nagmamaneho pa rin siya. Dahan-dahan na lang akong tumango at muling binalik ang paningin sa labas ng nakababang bintana nitong kotse.

Gumuhit ang ngiti sa aking labi ng may madaanan kaming dagat. Sobrang ganda, hindi ko maiwasan na hindi mamangha, at inayos pa ang pagkakaupo ko para masilip 'yon ng maayos.

Dahil nakababa naman 'tong bintana ng kotse. Pinatong ko roon ang siko ko at inangat ang kalahati ng aking katawan para makita pa ng maayos ang magandang dagat. Deep blue sea ang tubig sa malayuan, hindi pa ako nakakapunta at nakakaapak sa pearly white na buhanginan doon, pakiramdam ko ang pino na no'n sa balat.

Kitang-kita ko rin ang mga nagkalat na mga souvenir shops doon at ang mga tao na rin. Maraming mga naglilibot, halos lahat ay mga nakasuot na bikini. Pumapasok sa loob ng kotse ang maalat na simoy ng hangin na nanggagaling sa dagat. Abot na abot 'yon dito.

Nakita ko pa lang ang islang 'to sa himpapawid kanina; hindi ko maipaliwanag ang mararamdaman ko. Para na 'tong isang isla kung tutuusin. May pagkaluma at modern din. Halo-halo na ang mga nandito, may mga buildings na at iba pa.

"We're here at the El Centro of Cancún," wika ni Atlas. "Since it's your first time here, I need to tell you about everything here in Cancún. Cancún is divided into two main areas. First is the Zona Hotelera; mostly pumupunta rito ang ibang turista para experience ang world-class attractions at marami pang iba." Mabilis niya akong tiningnan para masigurado na nakikinig ako. "They have many resorts and luxury hotels here... lalo na ang mga nightclubs."

Napatango na lang ako at muling nakinig.

"Pangalawa, El Centro, this is the city center of Cancún, also known as Downtown Cancún. There are also some tourists who visit here if they want a local experience. But El Centro is much quieter than Zona Hotelera; that's why I prefer to stay here every time I visit Cancún."

Tama naman siya sa sinasabi niyang local experiences. Pakiramdam ko nga para nasa Pilipinas lang ako. Medyo iba nga lang ang mga disenyo rito. Siguro halos magkakaparehas lang dahil sa vibes. May mga wet market na rin kaming mga nadaanan. Mas madali na lang din makapamalengke. Pati na rin ang mga bilihan ng mga isda at prutas.

"Ang ganda rito, Atlas," ani ko habang nakatanaw pa rin sa labas ng bintana.

Hinayaan ko lang na magulo ng hangin ang buhok ko. Ang mahalaga ay mabusog ang mga mata ko sa mga magagandang tanawin dito.

"I know."

May nadaanan pa kaming mga public beaches bago makarating sa bahay niya. Lumiko lang kami galing sa highway at dumiretso na sa daanan papuntang bahay nito. Sa tingin ko ay parte pa rin naman 'to ng downtown na sinasabi niya dahil ang ibang wet markets ay halos maliit lang din ang distansya hanggang dito.

Una kong napansin sa lugar kung saan kami lumiko ay sobrang tahimik. Maliit lang ang daanan, parang sakto lang din na may madaanan ang dalawang kotse. Sa bawat bahay ay nagkalat ang mga bulaklak na bougainvillea. Ang daming pink. Hindi ko tuloy maiwasan na mapangiti habang nadadaanan namin 'yon. Ang iba pa ay nagkalat pa sa sidewalk.