اليوم الثاني كان الصبح الساعه عشر كانت نجود تجهز الفطور بينما طفلها (الياس) جالس فوق الطاولة يتذمر من يوم صحى لأن اخوياه كنسلوا الطلعه بسبب ظروف
الياس بتذمر : افف يعني انا ما صدقت انك توافقين ليه تخترب الطلعه كلها ليه حظي كذا
قربت منه نجود تعطيه حليب الموز حقه : ما تعرف يمكن خيره
طالع الياس فيها وحضنها وهو جالس فوق الطاولة وهي واقفه قدامه : بلييييز نجوديي مامييي
ابتسمت نجود على حركته : عيونها آمر
الياس : امم عادي نطلع اليوم ما ابغى اجلس فالبيت طفش
هزت نجود رأسها بالموافقه : نطلع لحالنا ولا اكلم الجماعه و الاهل نطلع كشته نعوض كشتتك اللي ضاعت
نقز الياس: اي اي بليز بطلع كشته من زمان ما طلعنا وبعدين اشتقت لسعيد و يوسف ومحمد .... وبدأ يعدد العائله كلها ونجود تتطالع فيه بابتسامه وسرحانه تتأمله وتتأمل تفاصيله
صحت من سرحانها فيه بعد م شمت ريحة الاكل اللي انحرق وبسرعه راحت تطفيه
نجود : احح كله منك و من جمالك نسيتني الاكل و كل شي
غطى الياس وجهه بيديه لانه تحول إلى طماطه حمرا ضحكت نجود عليه وكملت تسوي الفطور و هي تراقب اللي مره يسولف ومره يتذمر ومرات يأخذ جوالها يطالع فيه
خلصت مجهزة الفطور وحطته على طاولة الاكل وطالعت فاللي كان مندمج مع الانمي اللي يتابعه قربت وشالته وحطته فالكرسي وهو مكمل اندماجه نجود : يويي حبيبي هات الجوال عشان اتصل عليهم اشوفهم اذا بيطلعون معنا
الياس بانزعاج : نوني مابي خذي الجوال الثاني اتصلي منه ابغى اتابع
نجود وهي تتنهد : بس جوالي الثاني فوق مالي خلق اطلع اجيبه
الياس : ما رد ، اخذت الجوال وبدأ الياس يتذمر و يحاول يأخذه منها
نجود : الياس اذا ما وقفت بخليك اسبوع كامل فالبيت وأنا بطلع معهم الكشتة وانت بخليك هنا بروحك(قالتها بحدة)
وقف الياس وهو يطالع فيها بدموع : ما احبك
نجود : انا أعشقك وسحبته تجلسه فحضنها وهو شد على حضنها وخبى و جهه فرقبتها وبدت هي ترسل لأهلهم تسألهم اذا بيطلعون أو لا واتفقوا أنهم يطلعوا على الساعه ١ ويلتقون فالبر
نجود : امم خلاص وافقوا وبنطلع
نقز الياس بحماس : صدقق
ضحكت نجود على حماسه : اي صدق والحين خل ناكل عشان نقوم نتجهز
بدوا ياكلون و خلصوا وراحوا يتجهزوا ويجهزوا الاغراض اللي بياخذوها
نزل الياس من الدرج يركض : مامييي
نجود كانت موجودة فالمطبخ : هنا حبيبي تعال
راح عندها المطبخ
نجود : همم شفيك
الياس : ما حصلت الفروه حقتي
نجود : اتوقع فالسيارة خذ المفتاح وروح شوفها اذا هناك
أخذ الياس المفتاح من علاقة المفاتيح اللي جنب الباب و راح السيارة يدور الفروه حقته حصلها موجودة هناك فتركها ودخل
نجود وهي تحط الاغراض عند الباب : ها لقيتها
هز الياس رأسه وبدأ يساعدها يطلعون الاغراض حطوهم فالسيارة و دخلوا يجيبون أغراضهم الباقيه لما خلصوا وسكروا الباب وركبوا السيارة نجود تسوق والياس جنبها يحاول يشغل الشاشات حق السيارة يتابع شي عشان يضيع وقته الين يوصلوا
كان الطريق طويل شوي ٤٠ دقيقه و الياس دايم يتخدر إذا ركب السيارة ينام ابتسمت نجود على نومته ووقفت السيارة على جنب نزلت كرسي الياس وخلته منسدح و حطتله المخده والبطانيه اللي دايما يكونوا موجودين فسيارتهم
وصلوا عند مكان اهلهم وكانوا هم اخر الواصلين كالعاده بدت نجود تحاول تصحي الياس : حبيبي يوي اصحى وصلنا بدت تهزه بخفه وهو بس يتذمر وععيونه تنذر عن نوبة بكاء قريبة سحبته نجود تحضنه وتمسح لى شعره : اشش آسفة قاطعت قيلولتك بس وصلنا ما تبغى تنزل تسلم وتجلس مع العيال رفع الياس رأسه وهو يطالع فالمكان ولما استوعب نقز مكانه وهو يقول خل ننزل بسرعه فتحت الباب وهو ركض عند اهلهم يسلم وهي نزلت وراه بعد م شالت شنطته وشنطتها اللي فيهن اغراض مهمه و راحت عندهم تسلم خلصوا سلام واجلست هي عند الحريم وهو راح عند العيال يسولف ويلعب معهم
ام نجود : و الله ان لكم وحشه ما صدقنا نشوفكم مقاطعينا
غلا (بنت عمة نجود وصديقتها): ليه يقاطعونا ترا حنا ما ندعم الاحتلال هههههههههههه
ضحكوا أغلبهم نجود اللي تطالع ف غلا ببرود من ذبتها المخيسه
ام الياس : كيفك يبنتي وكيف الياس ودراسته عساه ما يتعبك
نجود وهي تنفي برأسها مع ابتسامه خفيفه: الحمدلله كلنا بخير ولا تخافين الأمور تحت السيطره
كملوا سوالف بعد شوي جا الياس عندهم يركض : نجودييي
نجود : لبيه شفيك
طالع فيها بنظرات لطيفة : ابغى اركب دباب وهو يأشر على العيال اللي راكبين دبابات
تنهدت نجود : بس الدبابات خطيرة و لازم تكون تعرف تركبها عشان تسوقها
الياس وهو يحاول يقنعها : انا اعرف ما يحتاج ما رح يصير شي بليييز
نجود تتنهد للمره المليون من عناده : وإذا طحت وتعورت وش اسويبك ذيك الحين
الياس : ما رح اطيح و اذا طحت عادي بلييييز وافقي كلهم بيركبواا
طالعت نجود فيه وهزت رأسها وهو ركض عند العيال عشان يروح معهم يركبون بحماس
ام الياس : مستحيل يكون الياس اذا ما عاند
نجود : ذي الفتره زايد عناده و صاير اذا قلت لا على طول يصيح الله يعين ، بروح اوقف قريب منهم اشوفه تجين (قالت آخر كلامها وهي تكلم غلا)
غلا : اي بجي ابغى اصورهم و أشوف حبيبي
قامن بثنتيهن و راحت من وين كانوا يلعبون بالدبابات و جلست غلا تصورهم بينما نجود تطالع فحبيبها كيف فرحان ومستمتع ويضحك وابتسمت على فرحته
خلصوا لعب و تجمعوا كلهم فالجلسة و الياس حاط رأسه فحصن نجود
ام الياس : بعض الناس متى تبدا اختباراتهم
فتح الياس نص عين وطالع فنجود اللي كانت تطالع فيه :ماما ليش تجيبي طاري الاختبارات يعني لازم تذكروني فيهم وتخربون مزاجي
ام الياس : آسفين يا ابو المزاج ، بعدين قوم اقعد احترم وجودنا شوي ، و ترا نجود مو سرير بيوجعنها رجولها
الياس وهو يغطي نفسه بشيلة نجود : ما ابغى
نجود : خليه خالتي انا عادي عندي دامه مرتاح كذا خليه
ام الياس : تراك مدلعته بزيادة
نجود ابتسمت : اذا ما دلعته هوه مين بدلع
ابتسم الياس وحضنها و الكل ابتسم على علاقتهم اللطيفة
جا وقت الاكل و انقسموا الرجال فصوب والحريم فصوب بس الياس كان جالس بعيد عنهم يلعب بالآيباد
انتبهت له نجود : يوي ترا محطوط الاكل قوم وخل الايباد
الياس : ما ابغى شبعان
نجود : ابي اعرف من وشو شبعان فطور مو ذاك الزود ماكل انت ناويلي تعيش على الهوا و الطاقة الشمسيه
ما رد الياس و كمل لعب
تنهدت نجود وقامت تروح عنده اخذت الايباد
نجود : لما أكلمك مره ثانيه لا تتجاهل و رد و بعدين احنا طالعين عشان نغير جو مو عشان تجلس على الآيباد وقوم اكل
الياس تكتف وبوز شفايفه : ما ابغى مو غصب
تنهدت نجود منه : وش تبغى تاكل
الياس : ابغى حليب موز
نجود : بس ذا مو اكل
الياس : بس انا ابغى كذا اكل
نجود تنهدت منه ومشت تجيبله حليب موز من الكولد بوكس رجعت وعطته وراحت هي تاكل
خلصوا وكملوا سوالف لين جا الليل راح الياس عند نجود اللي كانت تسولف مع البنات
الياس : نجوديي
نجود التفتت عليه : هلا
قرب الياس منها وهمس : جوعان قالها و عبس
طالعت فيه نجود : لا حول ولا قوة الا بالله وقت الاكل ما ابغى و ما ابغى والحين جوعان
زاد الياس عبوسه
نجود : اصبر ساعتين بالكثير ويحطون العشاء
الياس : بس انا جوعان و ابغى اكل الحين
تذكرت نجود الاكل الاحتياطي اللي فشنطة الياس وقالتله يروح ياكله
لمار (اخت الياس): شفيه ذا الدلوع
نجود : يقول جوعان
لمار : وقت الاكل يتدلع و يقول ما ابغى والحين جوعان
نجود : خليه على راحته المهم ....
كملوا سوالفهم و خلص اليوم ورجع كل شخص لبيته
* * * * * * * * *
هلووو
رأيكم فالبارت ؟ حاولت اخليه طويل قدر الإمكان
المهم لڤيووو
أنت تقرأ
حُبنا المختلف
Ficção Geralالجميع يظن بأن علاقتهم فاشله بسبب فرق العمر والصفات المختلفة إلا أن ذلك هو ما يجعل علاقتهم قويه ومميزة روايه البطل فيها اصغر من البطله والبطله هي اللي شخصيتها قويه ومسيطره اذا ما تحب هذا النوع من الروايات يفضل انك ما تقرأها🤗 ملاحظة : الروايه بتكون...
