صحيت من النوم وفتحت عيوني من اشعة الشمس الي دخلت من نافذة الغرفه الكبيره ، عقدت حواجبي بأنزعاج من النور ومن الالم الي بظهري ، انا ليش نايمه بالأريكه؟ ليش امي ماصحتني انام بالسرير ! تنهدت وفتحت عيوني اطالع بالغرفه ،
لحظه لحظه لحظه ! ذي مو غرفتنا؟!!!
استوعبت الثقل الي على كتفي ولفيت وشفت شخص نايم على كتفي ، بديت استرجاع الاحداث الي صارت امس،
الكهرب طفى ، طلعت برا الغرفه وقابلت ياسر ، اخذني معه للغرفه عشان نتابع فلم ويروح الوقت لين يرجع الكهرب ، لين انتبهت ان ياسر نام وشكلي من التعب نمت جنبه بدون لا احس !
وامي واختي وخالتي جاوا وماشافوني بالغرفه! شكلهم قلبوا الدنيا يدوروني وجوالي مافيه شحن بعد! لا خلاص بيذبحوني اذا عرفوا انا وين!
قمت بهدوء عشان ياسر الي بسابع نومه مايقوم ، غسلت وجهي وتوضيت وصليت الفجر وعدلت حجابي الي شوي ويوصل الارض ، اتمنى انه بوسط نومته ماقام وشافني بالشكل الخايس ذا ، طالعت ساعة الغرفه وكانت ٩ ونص ، وبلندن يأذن 2:22 بعد الساعه 12
الله يتوب علي اخرت الصلاه ، للحظه جا ببالي الاخ الي نايم ولا يدري وين ربي قاطه ، اكيد لو انه قام كان قومني معه ، لا لا شكله ماصحى
اخذت نفس ومشيت لياسر الي نايم على الاريكه بكل هدوء ومكتف يدينه ، الله يعينه شكل جسمه تكسر من ذا الاريكه الي توجع
تحمحمت ودقيت كتفه بخفه وانا اهمس
-ياسر ...... ياسر..... ياسر !! قم الساعه 9 الصباح قم صل الفجر حرام راح وقت الصلاه !
عقد ملامحه منزعج وفتح عيونه وهو يهمس بالانجليزية
- ارجوك اذهب الان انا لم استدعي خدمة تنظيف الغرف
مسحت على وجهي وانا استغفر بهمس على كلامه ، شكله حلمان او انه مابعد يصحصح
- سكران انت؟ شخدمة تنظيف غرف انا ريم ! اخلص قم صل الفجر مايجوز راح وقت الصلاه
فتح عيونه بسرعه اول ماسمع جملتي وراحت العقده من على ملامح وجهه وابتسم
- يالله اذا كان هذا حلم ما اقوم !
قلبت عيوني وانا اسوي نفسي ماسمعت وش قال
- انت بتقوم ولا اسحبك من شوشتك ؟
اتسعت ابتسامته وقال وهو يسند راسه بيده الي عالأريكه
- الي تبين
تنهدت وانا اطالع فيه نظرات تكفي وتوفي عن الكلام الي بداخلي
تحمحم وهو بقوم من الاربكه ويتجه للحمام
- خلاص خلاص بقوم شفيك عصبتي
توضى ياسر وصلى وانا ادور بالغرفه وكلي خوف من ردة فعل اهلي اول ما اروح لهم
