لفت نظري عقد فضي على شكل فراشه يلمع وجداً هادي ، ابتسمت واشرت على ياسر الي مفهي ويطالع العقود والاساور الي موجوده
- ياسر شف ذا العقد مره حلو! اخذه لاختك صدقني بيعجبها
لف ياسر وطالع على العقد الي مأشره عليه
- عجبك؟
رفعت حواجبي باستفهام
- اي عجبني بس انا قلت عشان تشتريه لأختك يعني ماقصدت شي
همهم ياسر واتجه لأحدى العاملين الي بالمحل وكلمهم عن العقد الي قلت له عنه ، حطوا بكيسة خاصه بالهدايه وطلب منهم ياسر كرت وقلم
اتجهت لياسر اتكي على القزاز حق المحاسبه
- بتعطيها العقد عشان يوم ميلادها ولا كذا بدون مناسبه؟
رد ياسر وهو يغطي الكرت بيده بينما يكتب عليه
- لا بعطيه اياها عشان مناسبه ثانيه
عقدت حواجبي وانا اشوف يحط الكرت بالكيسه ويرجع القلم للمحاسب
- وليه مغطي الكرت ولا تبي توريني وش كاتب مافهمت يعني
ابتسم ياسر بمكر بعد ماحاسب ويشيل الكيسه معاه
- بس كذا عناد مابي اوريك
قلبت عيوني ارد بعدم اهتمام مزيف وانا منقهر من حركته
- مالت لاتوريني كأني بموت عشان اعرف
ضحك ياسر وهو يمد يده ناوي يفتح باب المحل لكني سبقته وفتحت الباب اطلع من المحل تاركه الباب يسكر بوجهه ، قطعت الشارع واتجهت لبوابة ديزني لاند متجاهله نداءه لي
وقفني يمسك معصمي ويسحبني معه لجهة حجز التذاكر، وقفنا بالطابور ولفيت عليه
- اذا كنت ناوي تركب الالعاب قطار الموت وطقتها ترا ماني راكبه
ابتسم ياسر باستفزاز ورد بنبره كأنه يكلم فيه بزر بعمر ال8 سنوات
- ليه ياشطوره خايفه؟ لاتخافين بصير معاك مارح اتركك
عضيت لساني اكتم غيضي واشرت على شنطتي الي معلقتها بكتفي
- ياسر ترا ان ماتركت حركاتك بكفخك بالشنطه
سكر ياسر فمه وسحب اصابعه على شفايفه بشكل طويل وكأنه يسكر سحاب جاكيت بمعنى انه راح يسكت ، تنهدت ولفيت اناظر الناس الي داخل والي طالع والاطفال مع اهلهم اسلي نفسي
الساعه 6:55
رجعنا بعد ساعات قضيتها مع ياسر واقدر اصنفها انها اجمل واسعد 10 ساعات قضيتها بحياتي ، تعامل ياسر معي يخليني احس اني اثمن واغلى شي بالنسبة له بالكون هذا كله
يتأكد من اني ربطت حزامي قبل لاتبدا لعبة قطار الموت ، يعطيني علبة المويا اشربها رغم انه عطشان بعد كل الصراخ الي صرخناه واحنا بالهواء بسبب سرعة القطار ، يمد لي وردة اشتراها من احد المارة بحجة انه ماحب يكسر خاطر الطفل الي بغاه يشتريها
