علمتني قسوته ان اكون

تقديم

قالو  ناس  زمان  تمشي  ناس و تجي  ناس  و تبقى رضاة الوالدين تاج فوق الراس، و الحاجة  لي  مارضاوش عليها الوالدين طلقها  و خليها لا خير و رباح فيها.
هاكا  تربينا و  ترباو  والدينا ، لا كلمة  فوق  كلمة الأب و النهار  كلمتو  طيح  عرفو يا أما روحو طاحت معاها ولا جهدو تقادا عليها .
و قالك ماتاكل  الخبز حتى تعرف عجينتو  و ماتاكل  لحم حتى تعرف بهيمتو و  ماتعاشر بنادم  حتى تعرف قيمتو
داكشي  علاش  الزواج فهاذ الوقت قصاح و  مابقاش بالساهل  على  من والا يتزوج  ،   خلاوها  ناس زمان  بفلوسك  بنت السلطان  عروسك،  و الله و ماكان  عندك  حتى يشيط  لا قديتي  على  الزواج  و  خصوصا ببنات  هاذ الوقت بالحق  فين عمر الجيعان يشبع ؟ إيوا  هاكا  داير الراجل  المغريبي  لي  شافها  عجباتو و  تا وحدة   ما قنعاتو   كي  عندو  كي  ماعندوش  بالنسبة  ليه  إلى  ماتزوج  بخدودها  راه  تزوج  بجدودها يعني فلوسها ، ايوا المهم  راه  كيف المنشار  طالع  واكل  نازل  واكل  يا يديها  على زينها  ولا  على حسبها  و  نسبها  . لكن  شي  مرات  كيخشي رجلو فالحريرة  و  كيولي  ما دايها  لا على  زينها  ولا  على  كنيتها لا فلوسها  غا طلية  طلطلها و  حطها  فوق  راسو .  و النهار   تبان ليه البنت لي  تعمر  عينو كيعمر بيها  حتى  دارو . و  هنا  كيولي  كي  قط العراس  ما هو مع الناشطين  ما هو  مع الواكلين .

كلشي بقواعدو  و  حتى  الزواج  عندو   شروطو ،  كون  عالم ولا جاهل  ملي  تكون انت هو الراجل خصك  تكون  شاطر   لا يطرا ليك ما طرا لسيادك  . شطارتك  خدمها  فحلاوة  اللسان و  ليد  المطلقوة ماشي المشكرفة  لي  ماطلق   الدرهم  تا طيّح معاها المادة  .  و الله و  ماعرفتي   كي تسايس   المرا تا تلعب عليك راه قالك  سيد القبيلة  يديها شيخة  . و  ما تخلي الزمام يزمم  تا  تقتانع  لا  تولي   كي الهبيل  من  دار هادي   لدار هاذي .  وحدة  تسحر ووحدة  تفتخ .

كيفما شطارة الراجل  واجبة  فالزواج  فراها مشروطة  تا على المرا ،  لازمها  تكون  مرا بجميع موصفاتها  ،  لا من  زين لا من  حداكة  لا  من تقالة  لا من نقاوة  ،  و شتي واخا  يكون  عندك  هادو  كاااملين  و  ماعندكش  حلاوة  اللسان غتكلسي   كي القردة  فديك الدار .  قالك  المرا  السحارة  غلباتها  اللحلاحة  ،الراجل كيقلب  على راحة بالو  ماشي  على وحدة  طبخ ليه مزاجو  و تجيب ليه الغمة و القنطة  حتى طجو من  دارو .
و الى  كنتي  مرضية  لو  مع  ميمتو  غتنسيه  فكاع  النسا  واخا  تكوني  كي  موكة  غتولي   تباني   ليه حمامة  ، شخصو  هاذ الراجل من  غير  لي تفهمو و تريح  بالو  و  تقابل  دارو  وولادو ؟