قصة ---☆ إذا جمعنا القدر فلن يفرقنا البشر ❤
حلقة 4 الأخيرة🔥🔥 《حقيقية》
فات الوقت ❤
كنت مرة مررة نكلم فيه بالسر وأمي كشفتني .. قعد عمر يكلم ف ماما ويبكي ويقوللها والله نحبها وناويها بالحلال .. أمي ارتاحتله الحق وبعد أيام وافقت ع علاقتنا لأن كانت تشوف فيا نبكي ومستواي فالدراسة نزل .. وصتني منديرش الغلط وقتلي بحكم إن عمر خال صاحبتي سارة ف مضمون ..
روح عمر من بنغازي وجي لمنطقتنا راس لانوف
قعدت نكلم في سارة انّسق أنا ووياها،، نخططو لعيد ميلاد عموري بنديرله مفاجأة 🤪
درتله تورتة من عمل يديا 😎 ودرتله موالح قداش ما غالية عليه البيتزا وشريتله قلم ومفكّرة نازكات أسود فالذهبي ومحفورات عليهم اسمه ولقبه وحرفي أني بالذهبي ،، وقميص وعطر .. غلفتهمله
وجتني سارة جايبها خوها بنبعت معاها الحاجات وقعدت نوصي فيها كيف تزينله داره
اسمعي حطيله الحاجات ع سريره ورشي الورد وعبيله داره بعطري وبخري بالوشق عمّوري يحبه ،، وولعي اضاءة خفيفة وخلي روحك عادية قدامه
سارة / قداشني متحمسة 😃
روحت سارة بالحاجات لحوش جداها وقعدو يساعدو فاها أمها وأمه وخوات عموري هههه ويراجو فيه امتى يروح للحوش بش يشوف 😂😂
خش عمر للحوش حس بحاجة غريبة ونظرات عيلته كلهم 😁
عمر/ خن نخش نبدل حوايجي ونطلع نهدرز معاكم
خش عمر للدار ولقى الديكور والهدايا والتورتة ❤🔥
طلع فرحان
عمر/ أووووه من متفكر عيد ميلادي ومدايرلي المفاجأة الحلوة
كلهم نطو فيه وقالوله هادي هومي
عمر تحشم من أمه وقعد يضحك
خشو معاه للدار وقعدو يغنوله سنة حلوة يا عمر و قالوله تمنى امنية و اطفي الشمعة
قصو التورتة وقعدو ياكلو وعمر ع أعصابه يبيهم يطلعو بش يرن ع الهام
عمر/ شن المفأجة السمحة هادي
مالا شنو تستاهل كل خير عمورتي 😘😘
عمر / ولعولي الشمعة وقالولي اتمنى امنية مشى تمنيت إن يجمعنا النصيب وكان مجمعناش يقعد حبك ف قلبي ..
أهني اني انتخصت 😣 قلت خيره يدوي هكي ..
بعدين قلتله ان شاء الله نكونو لبعض🥺
ومن هذوكا الأيام عيلته وخواته زادو متعرفو عليا وحبنا زاد أكتر واكتر ❤❤ لين فاتت سنة وخشيت سنة تانية ثانوي
_______♡■☆Kd°•Sha▪La'Bi☆■♡_______
🏵💎 روايــــات دمــــعتــي تـــــروي مــــــأســـاتــي 💎🏵
الكاتبة|:- 💜 خ ـــلـــود شــــــــــلابـــــي 💜
👑🎶Kd Sha La Bi🎶👑
رن عليا عمر راقيله وقعد يسأل فيا
عمر/ تندري على سارة عندها هاتف بالسر
لالا معندهاش
عمر/ إنتي تتستري علاها قوليلي الحق ،، تكلم في فلان الفولاني؟
لا يا عمر منعرفش وهيا متكلمش فحد ،،
سكرت منها وقعدت نرن علاها نبي نحذّرها نلقى فتليفونها مقفل،، ركبتني نار 🔥 خايفة شن بيصير ف صاحبتي سارة 😭
جي يوم الأحد خشيت للفصل سلمت عالبنات وسلمت على سارة حسيتها متغيرة .. قعمزت بحداها وقعدت نهدرز معاها
سارة/ خليني نحس ف راسي صداع يوجع فيا
خيرك سرو احكيلي جوك مش عاجبني
سارة/ انتي داوية لخالي وحاكيتيله إن عندي تيليفون بالدرقة ونتكلم
لا والله ما صارت معقولة أني بنحكي عليك.. 😨
سارة/ محد يعلم بالموضوع غيرك .. قعدو يكشخو عليا ويعاركو فيا ،، ماما وجعتها منك 😭 وحتى كان تبيهم يضربوني مضربونيش 😒
قبل ممنيش نحكيليك لكن مداما صار الموقف هذا حنحكيلك ،، اتصل بيا عمر وسالني انك تتكلمي وعندك تيليفون اني نكرتله وقتله لا ..
سارة/ لالا مافيش حد يعرف الا انتي متقنعينيش 😡💔
ومن هذاكا الموقف سيبتني سارة و مبتش تصدقني 🔥🔥
|
|
|
فاتو أيام وجي شهر واحد يناير 2011
علاقتنا تمام التمام 🙈 أني مفيش مخلوق منحكيلاش عليه سواء صحباتي أقاربي وعيلتي كلها لدرجة بدو ينادو فيا عمّوري 😁 وهوا نفس الشيء مصدع راس أهله بيا ❤
جت فترة الأحداث متع فبراير
قعد يحكيلي عالأخبار وعالمستجدات..
عمر/ شن رايك؟
كيف شن رأيي !
عمر/ البلاد هادي ضروري ما تتساوى قداش بنقعدو هكي
شن قصدك يا عمر؟
عمر/ يعني لامتى بنقعدو احني مش زي باقي البلدان نبو نظام صح يخدم المواطنين ونبو الديمقراطية ..
أني قعدت نقوله فكك من المشاكل و متخشش فالسياسة ..
رقدت ونضت ع هرجة وعياط فالشارع
كانو فيه شباب حارقين مثابة اللجان الثورية.. ومقر شرطة ومكانات ف راس لانوف .. وسمعت إن عمر كان منهم مشيت نجري نتصل بيه المرة الأولى الثانية العاشرة لين رد عليا وكان صوته تاعب 😴
عمر/ كنت راقد هومي أمس للصبح مرقدتش
وعلاش هذا كله شن درت
عمر حكالي ع كل حاجة دارها وحرق مع الشباب
قتله ليش هذا كله انت عندك رأي احتفظ بيه لنفسك علاش حرق المثابات ومركز الشرطة ومكانات الدولة
قعد يحكيلي عالحرب ف بنغازي وع الأخبار وكان راقيله هلبااااا.. قاللي دسيت تلاتة رصاصات بنضربهم فيوم زفتنا مع بعض ❤🤤 ..
قتله .. باهي ان شاء الله ربي يسخّر ..
..
..
..
ومنها جي الجيش القديم تبع القدافي و بحكم معروفين اللي طلعو و دارو شوشرة منهم عمر .. فهرب عمر وعيلته لبنغازي .. وانقطعو الإتصالات بينا
كنا احني ف راس لانوف وسرت نقدرو نتصلو للغرب
. بس هما اتصالاتهم من اجدابيا لمساعد فقط ،، اما بين الجيهتين لا .. يعطي مقفل ولا ميشدش ..
خشو ثوار فبراير بعتالي وصار الضرب ف منطقتنا هلبااااا
كنت نعاني هلبااا ف بعده 😭💔 كان جي حد من معارفهم كنت نسأل عليه من فوق الفوق وقعدت نسأل في سارة لأن قعدو ف راس لانوف مهربوش ف كانت تستكرد فيا ومتعطيش فيا ف اخباره 😭
قعدت نطلع ف هداياه ونتفرج ع صوره نرقد بدمعتي🥺
بعد ما طاحت طرابلس بوقت
اتصل بيا اني قعدت نشوف لرقمه ومصدومة 😭
عمر/ هاه حبيبي هومي
رديت عليه ونبكي بالعبرة ونلوم ونعاتب انت وين هاااه 😭 وينك
عمر/ اني فالطريق مروح .. عيلتي اولامس روحو .. قعد يحكيلي عاللي صار معاه ف بنغازي
عمر/ كنت فالجبهة الفترة هاديكا كلها حتى اهلي نجيهم شوية ونمشي 💔 ومقدرتش نتصل بيك قلت أكيد كملت حياتها من غيري ومحبيتش نفسّد عليك
قعدت نضحك عليه اني من الصدمة 😥 معقولة بعد الحب هذا كله بنقدر ننساك بسهولة
عمر/ عارف والله ،، لكن البلاد هادي لو نقعد فاها يوم ولا يومين ولا سنة ولا حتى خمسة سنين أني متأكد ان مش حنقدر نجي نخطبك ونقعد معلقك بيا وتقعدي تخممي وتفكري فيا 💔
قتله .. شن هالكلام اللي تقول فيه يا عمر 😭
قالي .. اني ريت الموت بعيوني و منبيش الا تكوني فرحانة ..
قتله غر روح و تو نتفاهمو معش تحكي هكي 😔💔
روح لمنطقتنا وتلاقينا و يوم عن يوم زاد حبنا لبعض زي قبل
رجع و استقر بعد مدة و فتح محل مواد زينة يجيب ف بضاعة من بنغازي ومع العمل الحكومي ..
قاللي بنفتح لامي الموضوع بش نجيب اهلي اني فرحت 😍
فات اليوم الأول عطل مكلمنيش قعدت نرن عليه مرة وتنين وعشرة ميردش لين ف الاخير رد عليا وكان صوته تاعب قتله خيرك قاللي متضايق قتله بلكي من ضغط الخدمة مابعدك الحق
مر أسبوع ونفس الحال يقولي متضايق وجوه اخي ومتغير معاي واني نحطله ف اعدار تعب الخدمة
لين فيوم قاللي نبيك فموضوع قتله ان شاء الله خير
عمر/ حاولت مع أمي لكن امي قتلي لو تكون هيا اخر بنت ماك واخدها .. جبتلها خالاتي وخوالي وخوتي المتزوجين يكلموها لكن هيا سكرت راسها 😭💔
اني انهرت من البكاء كان بودي نعرف السبب قتله بلكي ع خاطر احني مؤيدين نبو معمر وانتو من التوار قاللي لا هكي من غير سبب 💔😔 و تاريته ناقمين عليا ع خاطر يحسابوني عاودت على سارة ان تكلم ف ولد ..
فاتو ايام
قعد يحاول مع امه بس سكرت راسها ورفضت💔😭
أيّس من مامته وقعد معش يتصل بيا ولما آني نرن عليه ميردش 😭 مشى لبنغازي هج من الحوش قعد ف استراحة صاحبه شهرين
خش عالحشيش وعالسكير بدي يرقد ع شيشة وينوض ع شيشة .. لكن صلاته مسيبهاش قاللي هي املي فالحياة 😔
يتصل بيا اني نبكي وهوا يبكي 😭💔
نحسه من احداث فبراير الراجل انقلب و معش زي قبل ،، انحرف و شيء خداه مني لبعيد ..
ع قد ما اني متمسكة بيه بيديا و رجليا لكن ينفك من قبضة يدي ..
تررررن📞📲
حمزة/ قالك بوك لو متروحش حنتبرا منك ونغضب عليك ليوم الدين هادي اخرلك فرصة 💔
عمر/ تو نروح 😭
روح عمر لمنطقتنا وقعد يلح على امه وهيا شيء مسكرة راسها 💔 وكلم بوه قاله رضا امك أهم ..
مشى اتصل بيا وقاللي حاولت و درت قدر جهدي لكن خلاص احنا مش نصيب بعض 😔 معش نقدر نربطك بيا
اني زي حد غرس موس في قلبي ، انهرت وقعدت نبكي 😭 نار ف صدري قسم بالله
عمر/ أني منعتبرش راجل لان مخديتش حب حياتي
لا يا عموري بالله عليك اسكت متقولهاش😭
عمر/ سامحيني هذا الحل الوحيد معش نقدر نكمل معاك ونربطك بيا ونضيعلك فوقتك 💔 لمصلحتنا احني الزوز
توا معقولة فراقنا بدا لمصلحتنا يا عمر ! 🥺
.
.
.
كنت ضامناته ،، كنت نحس كأني مرته و هو حلالي ،، الناس كلها تندري بيا نبيه ..
بس كان كف ،، و درس قوي ان معش نتعلق بحد غر ربي ..
ربي عاقبني بذنوبي و بعده عليا ،، لأن تجاوزت حدودي معاه ..
اللي نطلع نلاقي فيه ،، و ندبر كيف بنشوفه من وراء ضهر عيلتي اهو رخى بيا و مكانش قد الوعد 💔👌🏻
سكّر مني واني منهارة ربي عالم بحالي جتني خالتي اماني تصبّر فيا
قعدت شهر مناكلش الا بالسيف امي تغصّب فيا ع ماكلة ، ومعش قدرت نوصل فيه أرقامه غيرهم ، و الناس علمت بنهاية حبنا 😭 المتشمت اكتر من اللي واجعه حالي .. ونسأل عليه محد يبي يقوللي
جيت مرة بنمشيله لمحله ماما حلفتلي قتلي تمشيله نحرش فيك بوك خلاص هذا فرّط فيك فوتيه 👌🏻
فات الوقت ب بطء ..
شريط حياتي يمر قدامي كأني كنت مدمنة و تم مني المخدّر ،، كنت نحس ف عمر هو علاجي من اعراض الانسحاب .. بكاء و حزن و اغاني حزينة ،، و فقد كبيررررر ... ضحكتي اختفت 💔😔
قررت نخش كورس بش نغير جوي ونبدا حياة جديدة كانت خالتي المتزوجة تخدم فالمكان اللي نقرا فيه كورس تمريض
واني نقرا تلاقيت مع شاب كان يحاول يوصل فيا ويشبحلي وعاطيني كل اهتمام بس اني كنت مسكرة مواضيع هادي خلاص قلبي مكسور 😔💔
لعند مشيت لحوش خالتي المتزوجة نادتني نهدرز قتلي بري افتحي الباب يطق
مشي فتحت الباب قتله تفضل
قالي فلان فولاني قاعد ؟ يقصد ع راجل خالتي قتله كيف طلع
سكرت منه وأني نقول متأكدة هوا نفس الشخص اللي ف معاي الكورس
خالتي/ شن رايك فاللي دق عالباب؟ 😉
وعلاش بنقول رأيي فيه
خالتي/ شافك معاي فالكورس وهوا يعرف راجلي مشى سأله وناوي يخطبك ويجيك من الباب
قعدت خالتي تلح عليا وراجل خالتي يشكرلي فيه مشى تعرفت عليه ❤ اسمه محمد الحق يجنن أسلوبه وحنيته وغيريته حسيت روحي ملكة معاه .. كان طويل وعضلات وعيونه ملفتات للنظر وراهم غموض يجذبك من اول نظرة ..
قلت نجرب بلكي ننسى عمر بيه ..
و قعدت نتواصل معاه ..
و كل ما يكلمني نتخايل ف صوت عمر مش صوته 💔 ..
و مرات تمشي امورنا كويس و بعدين نفيق على روحي نلقى ف نفسي نطنش فيه و نسكر ف هاتفي نتهرب منه ..
قاعد قلبي متعلق ب عمر ..
محمد كان يعرف بعلاقتي بعمر .. بس مع هذا كله قاللي مش حنحاسبك ع ماضيك وراضي بيك ❤
فيوم اتصل بيا عمر رديت عليه
عمر/ جاني واحد يسأل عليك قاللي كنت نعرف ان تبو بعض وسيبتو نبي نسألك علاها ونعرف اخبارها منك .. مشى قتله خودها وعيونك مغمضات ..
اني رقالي من كلام عمر للدرجة هادي قدر يفرّط فياااا 😭💔 حاولت نكابر و هو عمر ع نفس القرار ان لي بينا تم 💔 وسكرت منه
حكالي محمد عالموقف وانه مشى واجه عمر ..
اني تعاركت معاه ،، و كيف تفوله و تمشيله
قعد يرضي فيا ،، و ما خلى ما دار لين سامحته ..
قلت مداما عمر فرط فيا حناخده محمد جكارة فيه ..
بعدها تقدملي وجي لعيلتي وأني تعلقت بيه نوعا ما كان معبيلي وقتي و زي حب من طرف واحد ،، قلت مهم واحد يحبني و خلاص ،، ناس قبل قالت خودي لي يحبك و متاخديش اللي تحبيه ،،
به علاش مناخدش اللي نحبه و يحبني ؟؟
.
.
قعدنا مخطوبين لستة شهور وبعدها حددنا العرس
قبل عرسي بأسبوع انقرت فاتحتي بكيت مووووت تفكرت عموري 😭😭💔 وفنفس الوقت واجعني محمد للي كان طيب ومخداش اهتمامي وحبي كنت جافة معاه😔
جي يوم الحفلة ركبت فالسيارة نسمع ف صوت ضرب كلاشن تلاتة رصاصات .. شبحت للروشن لقيت زي جسم عموري .. عرفت إنه هادو الطلقات اللي قاللي بنضربهم يوم اللي بننزف ليه فعرسنا .. لكن قدرنا إن يضربهم الرصاصات لما انزفيت لغيره 😭💔
وصلنا للحوش صلينا وهدرزنا ❤ وخشينا لدار النوم
قعد يحاول إن ينفض غشاء البكارة لكن مفيش استجابة قعدت نبكي ومتلبكة بس هوا احتواني وقاللي عادي غدوة نحاولو بلكي من التصفيح ولا حاجة .. مشت الليلة حلوة وغيرلي من نفسيتي
جي تاني يوم لبست البدلة العربية وجو عيلتي واهله دارو وليمة كبيرة وخشلي وعيون البنات كلهم حسسد 😍 وروح بيا .. ع قد ما حاولنا مقدرتش نتهنى فاتو أسبوعين وشيء مفيش استجابة .. أني نبكي ونفسيتي متدمرة ركبني الوسواس لكن هوا كان واثق فيا وقاللي تو نمشو نشوفو دكتورة مختصة ..
رفعني للعيادة وقتلي الدكتورة غشاءك مطاطي ولازم من عملية وتدخل جراحي .. وقتلي الحمد لله زوجك انسان متفهم وعرف كيف يتصرف ❤
جاني حضنته ونبكي ونقوله شكرا ع وقفتك معاي
محمد/ أني واثق فيك حبيبتي وعارفك صقراء بنت صقر 🔥🔥
ناداه الدكتور وطلعله محمد وقعد يفهّم فيه ..
فاتت نص ساعة خشلي محمد وقاللي بيجي يكشف عليك الدكتور تاني خليك ساكتة ومتتكلميش واني معاك ❤
خش الدكتور دارلي بنج موضعي قتله علاش قاللي اجراء عادي
دارولي عملية بسيطة مخدتش ربع ساعة ومكانش محمد يبي يخبرني لانه عارفني نخاف .. بس زعلت تمنيت يصيرلي زي أي بنت ويكون كل شيء طبيعي 😣🥺 و قداش ما شبحتله هالموقف لي داره معاي بنظرة كبيرة و مشهدرش بيا او شك ف اخلاقي ..
فات شهر لين تحسنت بعد العملية وعشنا زي أي متزوجين .. وفالفترة هاديكا كان يدلل فيا وصابر عليا ومتحملني ❤❤ و أني مش هذاكا الحب .. فيه شيء مكسور 💔
وبعد هالشهر حسيت بشيء ف درت تحليل منزلي ومطلعلي شيء وبعد اسبوع تاني جابلي محمد التحليل وصارت بينا مشكلة طلع وخلاني .. مشى خشيت لفراشي بنرقد بعتالي قلت خن نشوف للتحليل نسيته مرة وحدة 🤦♀️ شفته لقيته شرطتين فرحت وكلمت محمد جي طول حظني من الفرحة وقاللي نوعدك ندير بالي عليك وعلى ولدنا وزاد دلاله واهتمامه بيا اكتر واكتر ❤
لكن أني هملت نفسي و اهملته ،، جافة معاه و ديما مشاكل ..
يخش يبدا ينادي منجريش نفتحله فالباب و نبدا مبهورة بحضوره ،، و ع قد ما يديرلي عندي كله عادي و شيء مفروض عليه ان يديرلي هكي ..
لعند وصلت للشهر السابع رن بحداي تيليفونه فتحت الخط ع رقم غريب سمعت صوت بنت .. ع جيته هوا سألته وقتله منو هادي اللي متصلة
محمد/ منوو منووو 😳 اكيدة وحدة غالطة
حسيته توتر وقعد يلكلك خليته يمشي ورنيت علاها من تاليفوني حفظته رقمها طول وردت عليا قلتلها نعم
قتلي منو انتي ،، قلتلها انتي رنيتي ع رقم كذا كذا قتلي ااااه انتي منو قلتلها اني زوجته .. قتله كيييف 😳 اني كلمته أولامس ومعمره محكالي انه متزوج ومش مفكر فالزواج أصلا .. ونعرفه من قبل
أني ستاكيت وراسي دخّن .. صح هوا حاكيلي ان عنده علاقات هلباااا مع الجنس اللطيف قبل بس هادي كيف تجرأت واتصلت بيه توا
قعدت نراجي فيه لين يروح واني قلبي ع نار 🔥🔥
محمد/ سامحيني معش نعاودها هادي وحدة من قبل نعرفها واتصلت بيا
قتله أرقامك غيرهم
مشى يجري نحى شفراته من التيليفون وكسرهم قدام عيوني وقاللي لي تبيه حاضر ❤
فاتو شهرين وجبت بنوتة فرمضان قعد معاي يومين وهوا مرقدش واقف معاي وفرحان ببنتنا هلباااا 😍😍
وحتى لما يصير سوء تفاهم بيني وبين اهله كان يوقف معاي من غير حتى ما يفهم ، وحتى لما معنداش شيء واني خاطري ف حاجة كان يدبّر كيف يجيبها ليا ومش حارمني من الطلوع والمناسبات ..
جبت البنت التانية كبرت شوي وزادو المشاكل بيناتنا
كنت نلقى ف أرقام ورسايل وهوا يمسح فيهم ويقوللي هذا صاحبي واخد تيليفوني باعت بيه .. وأني كان ضميري يأنب فيا عليه لأني قعدة جافة معاه شوي ومش عاطياته قلبي كله ف نعذر فيه مرات لان الغلط مني لكن الخيانة مليهاش مبرر 💔😔
ومرة من المرات مسكته لقيته مهدرز مع وحدة عالفيس يبي يتعرف علاها ف سيبته وقعدت شهر حرجانة عند حوش أهلي .. قعد يجيني وما خلى من رفع غر سامحيني وارجعيلي قعدت اني مسكرة راسي لين قالولي راهو شكله شعف ونادم .. قتله ع خاطر البنات وأخرلك مرة 👌🏻 وقعدنا مررة مررة نتعاركو ونحسه كل ما نتناقش معاه يجي يقرب مني يبي يمد عليا يده وحاجة تمسكه يقعد يخبّط ويكسر ويطلع يقربع فالباب حسيته القدر طاح
_______♡■☆Kd°•Sha▪La'Bi☆■♡_______
قعد بو عمر يكلم فيه ويقوله تزوج بحكم عنده دوالي ومعاين قبل ومقايليله الدكاترة فرصة الانجاب قليلة لو فتت الأربعين .. دار عملية وتزوج من وحدة كانت معاه ف العمل وتعرفها امه .. خطبوهاله من وراه وتمو فاها من غير ما يعلم وبوه قاله لو متتزوجهاش وتخليني نولي ف كلامي قدام الناس حنغضب عليك .. ف قرر يتزوج .. بوهم كان واعر وشيخ قبيلة كلمته تمشي 🔥👌🏻
وجاب صغار سماهم نفس الأسماء اللي كان مخططلهم هوا والهام 💔
فاتو أيام كنت نشوف ف عمر لما نبدا خاطمة ف المحلات اني وراجلي .. كنت بنموت بس ماسكة نفسي بش ميحسش بيا زوجي ومحمد يركبه ستين ألف عفريت كان يلقى يقتله 😡
ومررة تيليفوني رن ف يد راجلي قتله منو قاللي رقم غريب مشى حطه ف كاشف الارقام طلعله اسم عمر .. مشاله يجري بيقتله
عمر/ مش أني اللي ران عليك
محمد/ تي كيف والرقم طلع باسمك ورقم العويلة شفرة جديدة مليهاش سنة وين حصلته الرقم 😡
عمر/ قتلك مش أني
محمد/ غر الرقم محيته بس، لكن شد روحك وافطن لعمرك لان المرة الجاية حنقتلك بيديا 😡😤
أني تضايقت وبكيت شن يبي مني توا بعد ما باعني وقاللي شوفي نصيبك وتوا براجلي وصغيويرتي يضايق فيا 😭
مرة كنت طالعة للمحلات ف رمضان كنت حامل بنشري لبس العيد كان محمد ماسك يدي ❤ وبالصدفة لقى صديقه قتله خليني نشوف المحل هذا حتى بروحي مخلانيش لين شد فيه صاحبه خشيت للمحل قعدت ندور ونتفرج ع اللبس ويطلعلي عمر من تحت العلاليق .. اني بنموووت 😭😣
عمر/ شفتك انتي وراجلك قعدت نتبع فيك ..
اني مقدرتش نرد عليه ولا كلمة خفت يشوفني محمد ونبقى ف مشكلة طلعت نجري ونزلت من الدروج ..😭
علاش هكي كل ما نبي ننساه نلقاه قدامي😭
وأوقات نطلع لحوش جدي نمشي على رجليا نلقى فيه واقف يشبحلي 😭
ويبعتلي ف سلام مع معارفنا وان يبي يتواصل معاي بس اني مسكرتله المجال لاني بعهدة راجل منخوناش 🔥👌🏻
للمرة التالتة جبت بنوتة .. قعدو الناس يقولو ي ناري جتكم بنت حتى توا
محمد/ عادي هادو بيدخلوني للجنة الحمد لله ع نعمته
زاد ما كبر بعيني ومحسسنيش بالنقص أبدا 🔥
مرة اشتركت ف سهم جمعية مدايرتها صديقة ليا
عطل بينا المرتب منزلش وقعدت تلح صديقتي وقتلي الراجل مستعجل ديريله حتى شيك ..
بعتتلي مسج باسم الشخص .. وجي ف يد راجلي دارلي ليلة حرفة 😭😭 طلع عمر هوا اللي يبي الشيك وخاش فالجمعية حتى هوا ..
محمد/ تندري عليه ان فالجمعية ؟
والله منعلم قسم بالله 😭😭
قاللي اتصلي بالمراء شوفاها وافتحي الخط قداامي بش نشوفك
وبالفعل اتصلت باها وفتحت المايك واقتنع ان أني معنديش علم بيه ...
فاتو ايام رجعلي الشيك كان معكرش وحالته حالة قعدت نحضن فيه ونشم ف ريحته لعل وعسى تكون فيه ريحة عالقة لعموري فسطه 🔥😣
_______♡■☆Kd°•Sha▪La'Bi☆■♡_______🏵💎 روايــــات دمــــعتــي تـــــروي مــــــأســـاتــي 💎🏵
الكاتبة|:- 💜 خ ـــلـــود شــــــــــلابـــــي 💜
👑🎶Kd Sha La Bi🎶👑
تلاقيت بالصدفة مع سارة ف عرس جتني تسلم عليا وتحضن وتبوس واني مستغربة
سارة/ سامحيني بالله عليك طلع خوي الصغير هوا اللي حاكي لخوالي شوره كان يتصنت عليا ..
قلتلها خلاص توا أني متزوجة ونسيت 😏😎 خليت روحي عادية معاها ومبيتش نعطاها وجه .. بسببها كل شيء رااااح 💔😔
عمر ينوض من سكيره ويرقد بسكيره لدرجة امه ندمت وقتله ياريتني خديتلك اللي تباها 😭 كانت مرته عارفة بقصته ومتحملاته بسبب الصغار 😔💔 ع سكير وع حشيش كان متليع ✌🏻
حملت بحكم محمد مانع عليا ان ندير موانع حمل .. وجبت ولد .. عشنا حياة الحمد لله مدللني اني وصغاره كنت معاه زوجة مطيعة لكن مش عاطياته الحب الكامل والثقة .. فيه حلقة مفقودة .. لان خياناته خلتني هكي نحس ،، متع راجلي بالاسم ..
و اللي نسألها تقولي مش كل شيء حب ،، المهم يصرف عليك و يقوم بواجباته ،
لين فيوم لقيت محادثة بينه وبين بنت يحكي معاها جيت واجهته .. تعصب وقعد يقوللي من قالك شووفي التيليفون ومد يده عليا 👊 ضربني وحسيت بكرامتي انهانت 😭💔😔
طلع وخلاني مشى رنيت ع اهلي وقالولي حنجو نرفعوك وكلمت اهله قالولي عندك الحق 😣
قعدت شهر حرجانة مافيش حد مبعتاشي لينا ،، يتجدى غر سامحيني ومعش نكرر أغلاطي .. ومعش نمد يدي عليك
كان اوقات بوه يجي ياخد ف حفيداته بش يشوفو بوهم يقعد يقوللهم قولو لأمكم راني نحبها ومستحيل نعيش مع غيرها قولولها تسامحني 😭💔 يتصل بيا ويبعتلي ف مسجات منردش عليه..
يجوني بناتي يقولولي بابا قالك نحبك وسامحيني نقعد نبكي ..😭
وعمر سمع بيا قعد يتصل بيا حتى هوا ويبعتلي ف مسجات لين رديت عليه قتله شن تبي
عمر/ نبيك تطلقي خلاص اني معش نقدر نعيش من غيرك
اني متزوجة وبصغاري وانت بصغارك يا عمر 😔💔
عمر/ أني والله ما نجي ربع راجل اللي فرطت فيك وخليتك لغيري يا هومي 😭💔
قتله زي منرضاش لروحي الخيانة منرضاش لبنت الناس 😔
عمر/ تندري عليا نحبك وتندري على كل شيء
قعدنا نحكو وخدانا الحنين
عمر/ تعرفي الشيك متعك درته مقابلني وكل دقيقة نشم فيه ونشوف ف اسمك وتوقيعتك عليه
ايه حسيت لان رديتهولي معكرش وممزق وحالته حالة 😁
.
.
.
و طوالت مدة حرجي ،، و بعد الحاح شديد مرة نرد و عشرة لا
قررت نديرله حد ،،
حسيته زي اللي يبي يهدرز و خلاص ،، أو لاني مدام توا ف يقدر يستغلني بشيء تاني و الحق مش قادرة نوثق فيه ..
قتله اوك أني حنسيبه راجلي ونتطلق إنت شن حتدير هي
عمر سكت
ريت روحك كيف!🤨
قالي .. و الله نحبك ،، و مش حنحب غيرك ،، و دارلي سطور كلام غزل و هجاء و ابيات شعر ..
لكن اني كنت ليه بالمرصاد .. لين خليته يتكلم
عمر/ أني بصغاري وانتي بصغارك حاليا صعب ومنقدرش نوعدك بشيء منقدرش عليه
ريت روحك كيف تواااا،،!! كيف هكي طول تبيع وتوخر !!
معش نبي نشوف رقمك فاااااهم
عمر/ أني مستاحشك أفهمي هومي حبيبتي
خلاص قصتنا انتهت يا عمر وقعدت دكرى بيناتنا
عمر/ سامحيني اللي ضيعتك يا قلبي والله ما نحب بعدك ي هومي 😭❤ سامحيني
_______♡■☆Kd°•Sha▪La'Bi☆■♡_______
ليه يوم ما افترقنا أنا قلتلو ••• اعتبرو ماضي وهعرف أنسى !
ليه مستنيتوش واسمعتلو ••• او عالأقل اديتو فرصة !
هعمل بس إيه لو عزت أشوفو وكلمو صعبة علياااا
ده اللي بحس بيه مش أي حد هيفهمو ويحس بيا 🥺💔
منستش أنا لسا فاكرة ••• لسا عايشة عاللي فات
ده نا لو غمضت عيني ••• بتناديني الذكريات
واهو بعد ما كنا واحد ••• كل واحد راح مكان
ده نا لو لايام بترجع ••• كنت حرجع من زمان
كنت متليعة و الوقت كأنه كابوس و اني غارقة في خفاياه ،، تلخبطت عليا حكايتي ..
فيوم جتني عمتي تبكي 😭 وقتلي راهو محمد تاعب ومريض خلاص سامحيه والله قال ماعاد نعيدها وامسحاها ع خاطرنا
قاللي بوي لو مرة تانية مد يده عليك أحني اللي حناخدوك ونروحو بيك من حوشه غصب عنك حتى انتي .. لكن الناس شدو فينا وهوا كل مرة يبعتلنا ف حد ويجي يتجدا والصغار يبوه متعلقين ببوهم
قعمزت بيني و بين نفسي ،،
و خديت رأي الكاتبة خلود و المتابعين فالتعليقات اللي شجعوني نتخطى المحنة هادي على شان صغاري و مستقبلي .. و بديت نحاسب في روحي ..
** حسيت روحي أني اللي كنت مقصرة باتجاهه و اني لي خليته يرجع للماضي و مكنتش محتوياته بحبي و شغفي ،، يخش للحوش عادي ..
بدل ما نجري و نفتحله الباب ،، او ندير اجواء زي اي تنين يحبو بعض ،، كنت نتخيل لما نتزوج بعمر حندير و حندير و حندير ،، لكن لما تزوجت محمد مدرتش ولا شيء ع خاطره ،،
خديت وقتي فالتفكير وقعدت نصلي ونقرا ف قرآن واستخرت ربي ..
قررت نبدا صفحة جديدة ،، الشخص اللي قعدت نراجي فيه لآخر عمري كان ف كل مرة يتبتلي انه مش قد مسؤوليتي وكان يبيع فيا 💔 لدرجة محبيتش راجلي ومعطيتاش قلبي وهذا اللي خلاه يشبح لغيري مرااات ،، أني ملامة بطريقة مباشرة فالموضوع ،، فالمواقف الكبيرة لقيت محمد ومعمره ما قصر معاي وجاني من الباب وتم فيا ،، يخدم ع راحتي وراحة صغاري .. وقت تصير اي مشكلة مع أهله كان يجي معاي بس عمر كان يسمع ف كلام أمه وبوه لدرجة عارضو عليا ف سمع كلامهم 🔥✌🏻
فرق كبير بيناتهم .. يمكن وصلت للنتيجة هادي متأخر ومقدرتش نرجع بغلطتي .. لكن توا القرار حيكون اختياري وحنحاول نحتوي زوجي اللي يحبني وحنحبه و حنعطيه قلبي ونعيش اني ووياه وأطفالي ❤👌🏻
و حننقد ما تبقى من زواجي ،، في سبيل صغاري
كنصيحة من بطلة القصة 👇🏻
☆☆ لو فيوم تفارقتي إنتي وحبيبك متقعديش تنغلقي على نفسك وتقعدي تراجي فيه ،، من الأول لو محافظش عليك اشطبيه من حياتك ومتعطيشي فرصة إن يرجعلك ..
☆☆ردي بالك واحد يقولك بري شوفي نصيبك وترجعيله ، ديري قدر لروحك وعيشي حياتك مع اللي يقدرك ويخاف عليك ومتقارنيش حد سيبك بحد شاريك ..
☆☆متظلميش الطرف الجديد ف علاقتك الفاشلة القديمة ،، ديما خودي وقتك بعد أي تجربة واقعدي بروحك لين تتحسني ،، متنسيش شخص بشخص تاني هادي حركة يديروها الضعاف اللي ميقدروش يعيشو الا من خلال حب شخص تاني ،، كوني الشخص القوي ،، و حبي نفسك قبل ما تراجي حد تاني يحبك 😉💪
و عمرك ما تضمني حد فهالدنيا و تغضبي ربي على خاطره ،، خلي حبك عفيف ،، باش ربي يباركلك فيه ..
_______________•☆°☆•_______________
قال عمر 👈 إذا جمعنا القدر فلن يفرقنا البشر
بس كان غالط
لأن اللي فرقو بينا اهله ،، يعني مجرد بشر قدرو يتحكمو ف حياته ،، و محاربش ع خاطر حبه ولهالسبب مجمعناش القدر 👌🏻🔥
انتهت خلود شلابي ❤
