جبل لكن لاطرقه الهوى مال

الثاني عشر

في بيت آل عقاب | المطبخ |
رفعت حواجبها جوري بعدم تصديق تنطق :احلف؟
ابتسم منير ينطق :والله.
ناظرتهم بيضاء بممل ونطقت :طيب ترى عادي، هو دايم يضحك مع العيال!
لفت لها جوري تنطق :بس ما يضحك عندنا! خلينا نكون صريحين.
ماردت بيضاء ونطق منير :اكا خلصتو علموني.
مشى يروح ونطقت جوري بعدم تصديق للأن وابتسامة :الله بيضاء قسم ما تخيلت اشوف الذيب وهو مبتسم يوم من الايام.
| بعد دقائق |
اخذ الفنجال منير وهو يصب لضاري أول وبعده الذيب ورفع راسه ضاري ينطق :ايه صح الذيب.
ناظره بهدوء ونطق :وشهو؟
عقد حجاجه ضاري ينطق :متى بتروح للجماعة انت؟
فهم الذيب عليه ونطق :والله اعلم بس لا حددت يوم بقولك معليك.
حط منير القهوه ونطق ضاري :منير خلاص اذا تبي تروح روح معليك.
مارد منير يناظر الذيب وضحك ضاري ينطق :روح روح امره عندي.
بلع ريقه منير وقام وهو يناظر بالذيب وصد وهو يخرج من المجلس وابتسم الذيب ينطق :وش نوحك؟
رفع حواجبه ضاري ينطق بضحكه :مخوف اخوك يالزهده! وش مسوي له انت بالله؟
ابتسم الذيب بضحكه ينطق :احسن، خله يخاف.
'
في بيت محسن |
فتحت عيونها ببطئ تشعر بصداع حرفياً شل راسها من قوته وقامت يقوم وراها شعرها الحريري ورفعت نظرها للمرايه تشوف تورم عيونها من بكي امس لأنها قررت تصلي الوتر بالأمس وبكت تفيض جميع مشاعرها امام ربها وعضت شفتها تتمنى امها ما تلاحظ هالشيء ولفت تطلع وتتوجه للحمام ولفت لها فاطمة تسمع دبيج الباب وعرفت انها هي ما غيرها، تنهدت تقوم وتشيل معها مواعينها وأغراضها الي استخدمتها ودخلتهم المطبخ وهي تغسلهم وبعد دقائق هي دخلت عليها تبتسم وتنطق :صباح الخير.
_هلا يا بنيتي، صبحك الله بالنور.
ابتسمت دانة تتقدم وتبوس راسها ولفت وهي تنطق: ايه وش اكلتي؟
فاطمة نطقت :سويت لك طماط بالبصل شوفيه عندك.
ابتسمت دانة بهدوء تلف وتناظر القدر ومشت وهي تنطق :اجل بحميه شوي.
مانطقت فاطمة تغسل مواعينها ولفت دانة تروح وتفتح الثلاجة.
'
في بيت مسعود |
كان مجتمع هو وأهله وياكلون بهدوء وناظرته بنَى وهي تمضع ونطقت :الا لك ايام ما جبت سيرة دوينه ذي! هي وامها.
ما رفع نظره يأكل بضيق وتفكير وكملت :ليكون طاردينك بس؟
رفع نظره مسعود لها وصد وهو يشرب حليبه وعقدة حجاجها من رد فعله ونطقت ليلى :يويلي مسعود ليكون طاردينك صدق؟
ناظرها بحده ونطق :مالك دخل!
بلعت الي في فمها بهدوء ترفع نظرها تناظره امل وقام مسعود يضع الفنجال ونطقت بنَى ترفع صوتها :تعاال!
راح يطلع من البيت بكبره وكملت بقهر :يعني طلعت فطيموه طاردته صدق بعد ما جابها من الموت بعد!
ضحكت ليلى تنطق :استغفر الله صدق.
لفت لها امل تشوف ضحكها الي مهب في محله أبد وسكتت بنَى بقهر للأن.
'
في بيت آل عقاب |
قفلت منه وهي تفكر ورفعت راسها تسمعها :هاه؟ من دق.
جلست مقابلها ونطقت جمانة بهدوء :خالك.
عقدة حجاجها تنطق :ملفي؟
هزة راسها وغطت فمها غدير تنطق :يا وك! ابك ذا ماعنده كرامة ابد.
ابتسمت حلا وهي منسدحه ونطقت :مؤسس عدم الكرامة.
ضحكوا كلهم ونطقت غدير :يلا وش قال.
عضت شفتها جمانة تبتسم بخفه :حددوا الملكة.
لفت لها غدير بذهول وقامت حلا من مكانها تنطق :وش ملكته؟ مهب كانت خطبة صارت ملكة الحين!
تنهدت جمانة ونطقت غدير :انتي صادقه يا بنت؟
'
في بيت سعود |
توسعت عيون جمانة تنطق بضحكه :اييه! خلاص بتشتاقوا لي.
ناظرتها حلا وانسدحت تنطق :ياخوفي انتي الي تشتاقلينا.
ضحكت غدير ونطقت جمانة :بنات تخيلي امي جت تسألني!
ناظرتها وهي منسدحه ونطقت :متى؟
عقدة حجاجها غدير ونطقت :وش قالت.
لفت لها جمان تنطق :اول ما عرفت و وش قالت؟ سالتني ان كنت ابيه صدق ولا لا.
رفعت حواجبها غدير :وش قلتي لها؟
توسعت عيونها جمانة تنقهر من اسألتها :وش وش قلتي لها؟ قلت لها اني ابيه خلاص.
ناظرت جوالها تنطق :وانتي منجدك تبينه؟ والمسكين ذاك وش صار عليه.
صدت عنها جمان تنطق :وش صار عليه يعني؟ الي ما يبيني ما ابيه.
استغربت غدير تنطق :كيف يعني؟
جمانة بهدوء نطقت :يعني واضحه بلكته خلاص.
ناظروها بصدمه ونطقت حلا :وش؟ وش صار وإنا ما ندري!
غدير نطقت :متى بلكتيه يعني؟
تنهدت جمانة من اسالتهم ونطقت :خلاص صار الي صار وقفلوا على السيره هدامني بتزوج بنات.
'
في بيت محسن |
كانت فاطمة جالسه في الفيّة كالعاده وعقدة حجاجها تسمع صوت الباب ورفعت صوتها :يا دانة الباب.
طلعت دانة من المطبخ تضع الطرحه على راسها وزاد طق الباب يجعلها تركض أكثر واستغربت فاطمة وهي تتسأل من! وفتحت الباب دانة تنطق :طيب طيب.
ناظرتها بنَى بغضب وتقدمت تدفها وشهقت دانة تناظرها بذهول! ونطقت بنَى بغضب :اجل تجينا ونفتح لك باب وآخر شيء تطردون ولدي من هالقرنبع ذا!
وصرخت تكمل :هاه!
ماردت عليها دانة تحاول تستوعب ودخلت بنَى أول ما سمعت صوت فاطمة وصرخت :هذي آخرتكم يا فاطمة! آخرتكم تطردون وليدي الي شايلكم أكثر من ولدكم الدشير!!
بلعت ريقها دانة وقامت بسرعه لهم وصرخت بنَى بغضب :جايبك ذاك اليوم من الموت يا فاطمة! ومع هذا جحدتوه! والواحد يحمد ربه انه لقى احد يطالع في وجهه بعد!
بلعت ريقها دانة تناظر امها بخوف وهي خايفه يرتفع ضغطها وتقدمت تمسكها وتنطق :عمتي إنا...
دفتها بنَى تلف لها بغضب ونطقت :جعلك العمى لعد تقولين عمتي سامعه!
ركض مسعود أول ما سمع صوت امه منتشر بكل الحاره! و وقف عند الباب يتنفس ونطق :يا ولد!
ناظرت دانة بنَى بذهول للأن وهي من شديد وعلو صراخها ما سمعت صوت مسعود الي اول ما شافها صد وراح لأمه يمسكها ونطقت بنَى بحده :فكني! فكني خلني اوريها هالجحود ذي!
تنهد مسعود وهو للأن ماسكها وكملت :هالي ما تخاف ربها! أحمدي ربك احد قرر يتزوجك من زين هالخشه صدق.
تنهد مسعود يسحبها ويطلعها وبعدت عنه بغضب تنطق :ابعد عني بعد انت! ابعد.
مشت وهي للأن غاضبه وتنهد يمشي معها وهو عاقد حواجبه ونطق :مبسوطة انك فضحتي نفسك عند الناس!
رفعت حواجبها بنَى وهي للأن غاضبه :الا خذيت حقي منهم حسبي الله ونعم الوكيل بس وخلهم هم الي ينفضحون هالجحايد.
تنهد مسعود وهو للأن يمشي وراها وبلعت ريقها دانة تستوعب كلامها ودمعت عيونها بلاوعي ولفت تنتبه لأمها ونطقت :يمه؟
ماردت فاطمة وتقدمت منها دانة تنطق بقلق وخوف :يمه لا تخلينها تأثر عليك؟ لا تفكرين ويرتفع ضغطك يمه!
ماردت فاطمة مذهوله للأن من كلامها وصراخها الي متاكده سمعه آخر جار حتى! ولفت لبنتها بهدوء تنطق :روحي جيبي ماء.
ماردت دانة تناظرها ببكي وخوف فعلاً وبلعت ريقها تقوم وهي للأن تراقبها بخوف.
'
في بيت آل عقاب | الآخرين |
كانت جميلة عندهم ورفعت راسها تسمع كلامهم عن الزواج ونطقت سارة :والله يأنهم عيالً عاقين! اقولتس عيال اخواني كلهم محد يجيني منهم الا هويجد بس وبعد يالله يالله يجي.
نزلت نظرها جميلة تفهم حديثها والمقصد منه ونطقت الاخر :ياويلي! وعيال سعد؟ عساهم بس يجون بعد.
تحركت سارة تناظر جميلة ونطقت :حتى عيال سعد، الله يخلف بس.
_بعد، الله يخلف صدق.
سكتوا شوي ورفعت نظرها الآخر تنطق :انتي الله يهديتس يا جميلة وراء ما تقولين للعيال يطلعون لعماتهم واهلهم هاه؟
تنهدت جميلة تنطق بابتسامة :يا بنت الحلال العيال كلهم كذا، كل ما قلت لهم لينهم طالعين من البيت ولا راقدين والبنات مشغولات بالمدارس عسى الله يوفقهم بس.
هزة راسها الاخر تنطق :آمين آمين.
'
في بيت آل سعود | الليل |
كان يمشي بهدوء وجنبه شهد ورفع راسه أول ما تقدمت شهد تدف الباب وابتسمت جمان من وراه تنطق :أرحبي.
ضحكت شهد وتقدمت تسلم عليها وقفلت الباب جمانة ماتدري من خلفه وناظر الباب ينبض قلبه بألم وهو ما توقع توافق على الذيب أبد! وتنهد يرجع فقط وهو يفكر للأن.
دخلت شهد قبلها ونطقت جمانة تبتسم عيونها معها كالعاده :من جابك اجل؟
نزعت طرحتها تنطق :سعيد، نفس كل مره.
ابتسمت حلا تنطق :كذابه مو نفس كل مره، احيانا يجيبك خالي ملفي.
جلست تسولف وهي تكمل سوالف معها ودخلت عليها تنطق :هاه زانت؟
غدير نطقت :حبيبتي مدري وش اركز عليه!
وقفت جمان تاخذ لها دونات تأكل وكملت :اليوم مدري وش بلاك متوحمه على الحالي والمالح سوا.
ابتسمت جمان تنطق :اشتهيت يختي.
ماردت غدير ولفت جمانة تسمعها تنطق :بنات؟ شعندكم جالسين هنا.
لفت لها غدير تنطق :اسوي وحام جمان، اليوم متوحمه على ورق عنب وكيكة بالتشوكلت.
ضحكت شهد تتقدم منها ونطقت :الله ورق عنب! انا بعد ابي.
جمانة نطقت :اجل اجلسوا عنده وانا بشيل ذي انا وحلو.
وصرخت باسمها تناديها :حلو! تعالي شيلي يلا.
طلعت وهي للأن شايله بيدها وهم ناوين يسهرون قبل الملكة بكرة.
'
في بيت آل عقاب | غرفة بيضاء |
توسعت عيون جوري تسمع كلام امها ونطقت بيضاء بذهول :يمه مهب منجدكم؟ تروحون انتو وإنا لا؟
هزة راسها جوري تنطق :صدق.
بيضاء نطقت :وبعدين هذي ملكة اخونا! حتى الملكة ما بنروح لها؟
جميلة نطقت :عاد وش نسوي؟ الذيب طلب تكون مختصره وعائليه، وهو صادق اجل ودك عمانك يجون ويذبحون لهم ويبلشونا بعد؟
رفعت حواجبها جوري تنطق :بس كذب بيشرهون على الذيب بعد!
لفت لها جميلة وصدت تنطق :بصره، انا الي علي وسويته كام والذيب مير ما يفكر بكلامهم عنه.
مشت تكمل :بالطقاق يهرجون ولا لا، بصرهم.
'
في بيت سعود | عند البنات |
ناظرتها حلا وجلست تصفق وتنطق :واو! بكره ملكتها وجالسه تاكل من الكيك ذا.
ناظرتها جمانة بذهول وضحكت شهد وصدت تكح عنهم! ونطقت جمانة :خير حلو شفيك؟ وش تبيني اسوي مثلاً.
حلا نطقت :قومي توتري واعتني بنفسك الرجال بيشوفك بكره.
لفو لها البنات بسرعه ونطقت بذهول :بسم الله شفيكم؟
غدير نطقت :حبيبتي من كاذب عليك وقايل بيشوفها؟
رفعت حواجبها حلا ونطقت شهد بابتسامة :منجد.
لفت لها تشوف صدمتها ونطقت :البنت انصدمت! مالومها مالومها.
صدت عنهم جمانة تصب لها قهوة ونطقت حلا :كيف يعني؟ ما فهمت.
قفلت الثلاجة تنطق :يعني الشوفة الشرعية الي تتكلمين عنها مستحيل تصير أبد.
ماردت حلا ولفت لها شهد تنطق :لأنها عيب عندنا، فهمتي؟
ماردت حلا للأن ولفت شهد تنطق :بس تصدقون اني مب مع أهل الديره ابد؟ يعني حتى شرع الله قالو عيب ما يوفرون صدق.
غدير نطقت :حبيبتي عشان لا شاف وجهك ما ينحاش بعدين.
صغرت عيونها جمانة تناظرها وهي تاكل ونطقت :ولا العكس.
ضحكت شهد تنطق :صدق ممكن انا الي انحاش منه مهب هو؟
ضحكت حلا ومعها شهد ونطقت بذهول للأن :بنات لحظة؟ وقفو التصوير شوي.
ناظرتها شهد وكملت :يعني صدق ما اقدر اشوفه اذا جاني؟
هزة راسها شهد تبتسم وتنطق :ايه.
غدير نطقت :بتعيشين معه طول العمر وشوله تشوفينه.
ضحكت حلا بذهول تنطق :بدوخ! واذا ما عجبني وجهه ان شاء الله؟
ضحكوا البنات ومسكت قلبها تنطق :مستحيل! مقدر اكمل.
ابتسمت غدير تنطق :انحاشي.
لفت لها حلا وضحكت تنطق اتوقع بننحاش كلنا عشان لا ينلعب علينا بعدين.
'
الثلاثاء | عند الذيب |
بعد ما خرج من دوامه الظهر، دخل البيت ينزع شماغة ويضعها على المتكى وهو يسلم عليها واتسع مبسمها تنطق :وعليكم السلام ورحمة الله وبركاته، صليت احط الغداء؟
هز راسه الذيب و وقفت جميلة تنطق :قبل لا احطه، تعال معي بوريك شيء.
عقد حجاجه الذيب يستغرب ودخلت المقلط تولع الانوار ولانت ملامح الذيب يشوف المانيكان والهدايا المجهزه والمغلفه وابتسمت جميلة تقرب ونزلت تاخذ الأكياس ونطقت :وهذا الذهب، اشتروه خواتك معي اليوم.
مارد الذيب يناظره بهدوء ولا استغرب لانه أعطى امه قبل أمس فلوس لأجل تجهز وتشتري الذهب والهدايا لانه ما يعرف لهالخرابيط أبد ولفت له جميلة تنطق :اشترينا طقمين، واحد كبير ومعه الخراصين والثاني صغير وناعم ومعه اسواره.
مارد الذيب يناظر ويسمع كلامها وكملت :وست بناجر ويوم علمت اخوك محمد قال وراه ما يزيدها؟
عقد حجاجه ونطق :ازيدها؟
هزة راسها ولف يكمل :طيب وراكم ما زدتوها؟ ولا ما كفت الفلوس.
هزة راسها جميلة تنطق :الا كفت وزادت بعد مير اني مدري قلت اخد رأيك بالأول.
مارد الذيب ولفت وهي توريه الخواتم كذلك والساعه وجميع الهدايا الي جابوها ونطق بهدوء :يعطيكم العافيه، ما قصرتوا.
'
في بيت آل شبيب | العصر |
كانو البنات مجتمعين كلهم بالغرفه ويساعدونها ونطقت حلا بذهول :جمان على وشهو تتجهز؟ مهب يقولون مافيه شوفة شرعية.
غدير نطقت :حبيبتي اهله بيجون! بيجون.
رفعت ثوبها تمشي وكملت :ابعدي عن الطريق بس.
بعدت حلا تناظرها بذهول وصدت تسمع كلام شهد :جمان وش تلبسين ازرق ولا اصفر؟ هاه.
وهي تسوي حواجبها نطقت :مدري يا صيته والله.
ناظرتها ونطقت : هدام كذا البسي ازرق جمان! والله يهبل عليك.
تخصرت حلا تنطق :لا ذا ولا ذا! الأزرق غامق مره والاصفر فاتح مره، بتحرقهم.
ماردت عليها شهد وقامت جمان أول ما خلصت ونطقت :وينه يا صيته؟
ناطرتهم وضحكت بعدم تصديق تنطق :صيته مهب لهدرجة؟ بعدين امه بتشوفني وش بتقول عني هاه!
ميلت شفايفها بعدم اهتمام تنطق :معليك منها، لا تهتمين بكلام احد.
جمان :ما اهتم بكلام احد لكن انا بنفسي ماني متعوده البس كذا، احس مره فاصخ ولا يصلح لملكة أبد.
شهد بهدوء همست :كيفك.
لفت تناظر الأصفر ونطقت :ايه ذا زين، والله حلو مالك داعي عليه.
ناظرتها حلا وكملت :يعني بالله احرقهم كيف وهو اصفر فاتح هاه! انطقي.
ضحكت شهد وصدت جمانة وهي تقيسه عليها ودخلت غدير وهي تنطق :بنات بسرعه كبو جمان وتعالو ساعدوني.
التفتو لها ونطقت حلا :جو؟
هزة راسها تنطق :اييه، صيته كبي جمان خلاص سوت كل شيء تعالو نستقبلهم يلا.
تنهدت شهد وحطت الفستان تنطق :بروح استقبل وانا فيني رهاب اجتماعي.
ضحكت حلا تنطق :حبيبتي كلنا ابشرك.
'
عند المجالس |
كان الذيب جالس ويساره ضاري وعمانه الي في الديره وعلى يمينه ملفي و وراه مسعد وسعيد الي كاتم مشاعره من اليوم ومسود وجهه من شديد الضغط الي يحس به، كان الشيخ جالس وسطهم وكانو يرددون وراه وأول ما خلص هو عطاهم البصمة يجعل الذيب يبصم وبعدها عطاها مسعد عشان يعطيها جمانة وتبصم كذلك.
'
في بيت آل شبيب | الصالة |
بعد ما بصمت جمانة وخلصت هي خرجت من غرفتها تدخل للصاله ورفعت نظرها جميلة تبتسم وتهمس ب - ما شاء الله -
و وقفت توقف بيضاء معها وهي تناظرها بذهول وابتسمت أول ما سلمت عليها جمانة وعضت شفتها بحرج لأنها ما انتبهت على ملامحها! لكن من يلومها وهي تشوف جمانة لابسه فستان اصفر فاتح، حرير ومطلع مظهرها بشكل أنيق فعلاً، ترجع شعرها لورا ولابسه اكسسوارات ناعمه توضح نعومتها ورقتها وجمال اختياراتها وجلست جمانة بخجل تنزل نظرها وجلست جميلة تناظرها بابتسامة للأن ونطقت :ما شاء الله ما شاء الله.
لفت تكمل :الله يوفقهم يا ام جمان، الله يوفقهم.
ابتسمت سراء بخفه ترد عليها ونطقت غدير بهمس :وش حطيتي شروطك؟
لفت لهم حلا تهمس :جمانه تكفين قولي طلبتي بيت عشان اسكن معكم.
شدت على ملابسها بتوتر منهم وهمست :استحوا! تراهم قدامنا.
ناظرتهم شهد وهي بعيد وقامت تجلس معهم ولفت مها تنطق :بنات وراء ما تشغلون لنا شيء نتسلى عليه؟
هزة راسها غدير وقامت ونطقت شهد :اقوم معها؟
لفت لها جمانة وهزة راسها تنطق :قومي.
قامت شهد تلحقها وهي تشغل السماعات وابتسمت جميلة تقوم و وراها بيضاء وأخذت العَقد الكبير وهي تلف على جمانة وتلبسها ونزلت نظرها جمانة تخجل وتقدمت حلا تساعدها وتبعد شعرها عن عنقها ولفت جميلة لبيضاء الي تعطيها الأشياء شيء وبعدت بيضاء أول ما خلصت وابتسمت تصور امها وهي تلبس جمانة للأن ورفعت حاجبها شيخة تناظر كبر العَقد ونطقت :و وشوله كل هالخساير يا ام محمد؟
ابتسمت جميلة تلف ونطقت :تستاهل جمانة، تستاهل.
ابتسمت مها بحرج من كلام شيخة وناظرتهم جود وهي متكتفه وهي ارتاحت نوعاً ما لأنها توقعت ان سعيد بيأخذ جمانة وعقدة حجاجها بانزعاج أول ما رفعوا صوت الأغنية وقامت تروح للمطبخ وتنوي تشرب ماء لكنها وقفت بذهول أول ما سمعت صوته المخنوق والضايق فعلاً و وقفت بذهول ما تتحرك ومسح دموعه يبلع ريقه وينطق :يمه بالله عطيني حبوب راس اذا عندك.
ما سمع صوت ورفع نظره يستغرب لانه سمع صوت ونطق : يمه؟..
وقف محله مذهول وصد على طول وهو يمشي وبلعت ريقها جود ما تهتم ولا تفكر انه شافها وهرب حتى من وجودها، كان كل تفكيرها هو ليش يبكي؟ هل معقوله انه يحبها فعلاً ولهذي الدرجة يعني.
| بعد ثلاث ساعات ونصف |
وقفت جميلة يوقفون وراها ومشت وهي تودعهم وخلفها بيضاء الي جت عشان تساعد امها بالاغراض وابتسمت بخفه تسلم على جمانة وبينت سنونها جمانة لهم تسلم عليهم بخجل وطلعوا لأن الذيب ينتظرهم برأ واول ما ركبوا لف لهم الذيب بهدوء وابتسمت له جميلة تنطق :كيف الملكة؟
اتسع مبسمه ينطق :بخير.
رفع نظره للمرايه يشوفها :كيف الملكة؟
ضحكت بيضاء بخفه :عال العال.
ابتسمت جميلة تنطق :الحمد لله.
ابتسم وحرك وهو يسمعهم ونطقت جميلة :ما شاء الله وانا امك، جميلة بمعنى الكلمه.
ضحكت بيضاء تنطق :منجد، احسها غير عن الديره وبناتها.
بينت سنونه يسمع مديحهم لها ونطقت جميلة :مير اقولك لا تأخر العرس من الحين.
هز راسه الذيب بالنفي ينطق :توني متكلم معهم، وماني مأخره ان شاء الله لكن بستنى عمي هاجد لين يتعافى ويقوم بالسلامة.
هزة راسها جميلة تنطق :ايه زين.
سكت الذيب لثواني ونطق :لكني عندي مداهمات بعد، يمكن أأجله ثلاث شهور ولا اربع وبعدها اقوم العرس.
'