بسم الله البداية ~~
بقريه من قرى نجد العذيه وقبل شروق الشمس بساعه ، واقفه امام شباك غرفتها ونسيم الهواء البارد يداعب وجها وخصلات شعرها وتدندن بحزن على حياتها وعلى طول صبرها واحتساب اجرها على حياتها اللي كانت واقفه من سبع سنين وهي ماتمس للبهجة باي صله ونطقت تكلم نفسها بضحكه
ساخره : إبتهاج؟ اتسعت ضحكتها الله يسامحتس يمه انا وين والبهجه وين ؟
غمضت عيونها بشده تمنع نفسها تدخل بتفاصيل اليوم المشاؤم ورجعت تناظر حولها ونطقت : اشرقت الشمس إبتهاج يلا انتهى وقتك وصار وقت غيرك ، سكرت الشباك وطلعت من الغرفه وهي تدخل المطبخ وتاخذ معها طاسه اخذت طرحتها ولفت لثمتها وطلعت تبعد عن البيت لناقات لجل تحلب منها وصلت وهي تفتح الشبك ودخلت رفعت قميصها ونزلت بطولها وحطت الطاسة قدامها ورفعت يدها تحلب منها انتهت وهي ترفع نفسها وتمسح على الناقه بيدها تنهدت واخذت الطاسه بعد ماامتلت بحليبها سكرت الشبك ولفت على محمود وهو جايها يركض لفت عليه تنطق : يامحمود خذ الحشائش ووزعها على الإبل ولياخلصت تعال عند شباك المطبخ اعطيك فطورك
هز براسه محمود لها ونطق : ابشري يا عمه
ومشت ترجع للبيت ودخلت المطبخ وهي تنزل طرحتها وتشمر اكمامها وتسوي فطورهم لفت على دخول عمتها ساره ولفت عليها إبتهاج ونطقت : صبحتس الله بالخير ياساره
ابتسمت ساره تنطق : صبحتس الله بالنور إبتهاجي حلبتي الناقه ؟
ابتسمت ابتهاج تنطق : اي شوفيه يمتس
لفت ساره تناظر الطاسه المليانه بالحليب ونطقت بابتسامه تملى منطوقها : جعل يدتس للجنه
ابتسمت ابتهاج تنطق وسط ابتسامتها : اجمعين ياسوير
اخذت ساره العجين وطلعت للحوش وهي تخبز خبز التنور واخذت ابتهاج الصحون تملاها بالسمن والعسل ودخلت ساره بالخبز الحار اخذو فطورهم يتوجهون لصاله ، اخذت ساره السفره تفرشها ونزلت الفطور ونطقت إبتهاج لجدتها اللي كانت تطحن انواع من البهارات : جده تعالي الفطور زاهب
وقفت الجده ضبيا ونطقت : بسم الله الرحمن الرحيم
جلست ودخل نواف وهو يجلس معهم ونطقت الجده ضبيا : هاه وانا امك افطر وروح جيب لي الاعشاب من المزرعه دام ماعندك دوام اليوم
رفع يده نواف على خشمه : ابشري بعزتس يمه على هذا
رفع عيونه نواف لإبتهاج : اقول إبتهاج!
رفعت عيونها له وهي تنطق : قول عمي ؟
نواف : جاني رجال ويبي ناقه عاد انا قلت اكلم إبتهاج وبعدين ارد عليه
هزت براسها إبتهاج : عمي شفيك حلالي وحلالك واحد كم مره اقولك !
لفت ساره على إبتهاج : حتى لو كانت هتوف ؟!
غصت ابتهاج وضحكو نواف وساره عليها ونطقت ، ساره وسط
ضحكتها : توتس تقولين حلالي وحلالك واحد !
لفت إبتهاج على ساره ونطقت : الا بهتوف معليش يعني بعدين ايش رايكم بالحليب اللي تشربونه كل يوم تراه منها
ضحك نواف ينطق : الرجال ماشر لي على هتوف ويقول يبيها
هزت براسها بنفي : حاشا وكلا ماتروح عليه
ضحك يناظرها وهو داري وخابر وش بتقول زمت شفايفها إبتهاج تناظر عمها ونطقت : للاسف ياعمي هتوف لا الباقي حلالك زي ماقلت لك
ضحك نواف وهز براسه: اني اعرفتس والله ، معليتس وانا عمتس هتوف لإبتهاج وقضينا
ضحكت إبتهاج ونطقت ضبيا : افطر واترك البربره عنك ولفت على إبتهاج تنطق : وانتي يابنت سمر قومي خذي البهارات ووزعيها بالعلب
تلاشت ضحكت ساره تناظر امها واسلوبها الجاف مع إبتهاج قامت من بينهم تنطق بهدوء نبرتها: سمي
اخذت البهارات من خلف جدتها وتوجهت للمطبخ ونطقت ساره : يمه حرام عليتس إبتهاج ماكلت وبعدين ترا الشغل مو طاير
احتدت نظرة ضبيا تنطق : سوير بلي ريقك وانتي ساكته مو كفايه عايشه عندي ومتحملتها من ماتت امها
نزل نواف بيالة الشاهي ونطق بضيق : يمه إبتهاج بنت عقاب ، عقاب اللي ماتدرين عن هوا داره عقاب اللي من ماتت سمر وهو مابين للحين بدل ماتهونين اللي صار فيها تقومين تعاملينها بهالشكل انا اقول احسني تعاملتس معها واحمدي الله انها جت تبر فيتس اكثر من اللي من لحمتس ودمتس
صرخت ضبيا تنطق وسط غضبها : نوووافف اقصر الشر وحط لسانك بلهاتك ترفع صوتك علي ؟
وقفت ساره من شافت امها بدات تنفعل ونطقت : نواف خلاص
وقف نواف ومشى يطلع من البيت تحت صراخ يمر على مسامعه بشكل يومي ، شدت بيدها على بيالة الشاهي من سمعت كلام جدتها اللي امتلى بكل البيت وتناثر زجاج الفنجال بيدها يحرجها فوق جرحها من حوار تسمعه بشكل يومي يهدمها ويضعفها يخدشها وهي مليانه بالجروح رجفت من شافت الدم ينزل من يدها للقاع عضت على شفتها تبلع غصتها كعادتها تحاول تخفيها رمت بقايا الزجاج وتوجهت تفتح صنوبر الماء ونزلت كفها تحته وغمضت عيونها ترجع راسها للخلف من نزلت المويه على جروح يدها ودخلت ساره تناظرها تتلون على كل لون ونطقت بخوف وهي تتوجه لها : إبتهاج بسم الله عليك وش اللي صار بيدتس ؟
فتحت عيونها تناظرها ونطقت وسط دموعها : مافيني شيء ساره
بققت عيونها ساره ونطقت : وش مافيتس شيء يدتس تنزف !
سحبت يدها إبتهاج من ساره ونطقت : الفنجال انكسر وجرح يدي عادي مو شيء كايد
ابعدت وهي تتعداها وتطلع من المطبخ توجهت لغرفتها تاخذ لها قطعه قماش تلف يدها فيها لجل يوقف دم كفها ورجعت المطبخ تكمل شغلها ...."
««بيت عجلان »»
طلع من غرفته يرمي شماغه على كتفه ويبعثر شعره بيده نزل يدخل المجلس ونطق من دخل : صبحهم بالخير
التفت عجلان عليه ينطق : يصبحك بنور والسرور ارحب وينك ابطيت ياسهم !
مشى يجلس جنبه يقبل جبينه ونطق : تبقى يالغالي امس مارجعت الا متاخر اخذتني السوالف مع العيال
هز براسه عجلان ولف على سلطان ينطق : ولد !
لف سلطان عليه ينطق : سم ياجدي !
عجلان : قم ناد لي ابوك
وقف سلطان ينطق لسهم :رجع عيال اختك من مدارسهم توي راجع امي مرسلتني في مليون شغله
رفع حاجبه سهم ينطق : افطرتو !
ضحك عجلان بسخريه ينطق : الله يرحمنا برحمته افطرنا وقضينا الحين حزة غدًا
ضحك سلطان ينطق : خبز امي وصحن سمن وشاهي نوران على كيف كيفك
مسح على شاربه ينطق : ماشاءالله عليكم محد ساكن معكم شلون افطرت ومرت اللقمه من حلقك ياعجلان والسهم ماهو بقدامك !
ابتسم عجلان ينطق : من غاب غاب قسمه اترك سهراتك اللي مالها وجه وافطر مع الخلق بدري
وقف سهم ونطق وهو يطلع من المجلس : بالعافيه محد درا عني الا هيفاء ، طلع يتوجه للمطبخ يشوف نوران واقفه تزين الغداً دخل ينطق : عندكم شيء نبلعه !
لفت عليه وضحكت تنطق : هيفاء مانستك قسمك موجود هنا وصتني قبل تروح لبيت عمي اعطيك ياه اذا قمت
ابتسم بطرف ثغره ينطق: لبى والله كبدها اجل عطينا ياه لاهنتي
ميلت شفايفها تنطق : والغدًا شوي وبطفي عليه ؟
هز راسه بنفي ونطق : لابالله ماودي فيه عطيني من فطور امي وخليني اروح للورعان اجيبهم من مدارسهم وراي شغل لليل
هزت براسها ونطقت: زين انتظرني بالصاله بجيبه لك
مشى يطلع وجلس بالصاله ولف على دخول منيف بيصعد داره
ونطق سهم : ديانتك وش هي ! الناس تسلم لامنها دخلت على احد
رفع حاجبه منيف يناظره ونطق : مابقى الا انت تعلمني ياالوجه الودر
بقق عيونه سهم يلف يناظر حوله ورفع يده ياشر على نفسه ونطق : تحاكيني انا !
ضحك بسخريه منيف ينطق : به احد غيرك !
وقف سهم يتجهه له ونطق : اي بالله فيه انت
وقف منيف قباله ونطق بغضب : تعقب ياالمره ولو انك رجال رحت اشتغلت مو عايش على منه عجلان
انفعل سهم ينطق بغضب يجتاحه : رجال وغصب عن خشمك وانا ماسك حلال عجلان مو عايش على منته يعني تنطم وتحط لسانك بلهاتك وتثمن حكيك لاني ادري انه مو حكيك حكي نهله امك لانك زي الورع تحفظه وتجي تكبه هنا
رفع يده منيف يمسكه مع ياقته ونطق بغضب : سهههمم
رفع يده سهم يدفع منيف للخلف ونطق : اقصر حسك وانت تتكلم معي ولا نهله ماعلمتك الا على الوقاحه وطولة اللسان !
طلعت نوران من المطبخ على حسهم الطاغي بانحاء البيت ونطقت : بسم الله وش جاكم ؟
تقدم منيف يدفع سهم يرجعه على الجدر وصرخت نوران من رفع منيف المزهريه يتركها حُطام من صفق فيها جبين سهم ناسي كل العواقب من شدة غضبه ، غمض عيونه سهم ورفع يده لجبينه من دارت فيه الدنيا مايحس بشيء حوله ، رجع منيف للخلف من طلع عجلان من مجلسه يسند نفسه على معكازه ، بلع ريقه منيف يناظر سهم اللي كان صامد بوقفته ويده على راسه والدم يتصبب من جبينه ، ونطق عجلان لمنيف من شاف حاله سهم : الله لايبارك فيك وش سويت به !
ومشى منيف يطلع من البيت ، وتقدمت نوران تركض لسهم ونطقت وسط بكاها تمسك يده اللي تغطي ملامح وجهه : سهم فيك شيء سهم !!
دخل جراح وخلفه سلطان ونطق جراح : علامكم !
بقق عيونه سلطان يشوف سهم اللي جلس على ركبه تدور فيه الدنيا ويعجز عن لفظ اي حرف ركض يمشي له ونطق: بسم الله عليك وش صار فيه !
ونطقت نوران وسط بكاها : تهاوش مع منيف
رفع حاجبه جراح ينطق : منيف سوا به كذا ؟
عجلان : منيف جعله يطيح بالشر ومايطلع منه هالشراني
مسح على وجهه جراح بغضب وتقدم لسهم ينزل لمستواه ونطق : يبه سهم انت معي !
رجع راسه للخلف يحاول يفتح عيونه ، وتقدم عجلان ينطق بالقرب منه : جعله بضلوع صدري ياسهم انت طيب !
رفع يده سهم ياخذ شماغه اللي على كتفه يضغطه على جبينه لاجل يوقف دمه ونطق بثقل صوته : جهزو قبره ان ماخليت الناس تصلي صلاه مابها ركوع اليوم ماني بسهم
ارتخت ملامح جراح لانه يعرف سهم ونطق : تعوذ من ابليس وانا ابوك
رفع يده سهم يستند على سلطان لجل يوقف ونطق عجلان : ارقى لدارك ريح نفسك واترك عنك منيف مايجي منه الا وجع الراس
مشى يتعداهم وهو ناويه شر هاليوم ونطق : يقول اني ماني برجال بس ان ما رديت حقي اليوم فانا اطلع مثل ماقال عديم رجوله
نطق جراح بانفعال : سهم ان قربت لمنيف ولا كلمته وقتها انا اللي بخليك عديم رجوله ماهو بهو
التفت سهم يناظره ونطق : بترد لي حقي هالمره !
هز براسه جراح ونطق : برده لك
هز راسه سهم ومشى بيطلع ونطقت نوران : سهم فطورك !
رفع يده لها ينطق بدون مايلتفت عليها : بطلنا مانبيه
خرج يسكر الباب خلفه ، وتنهد عجلان يرجع لمجلسه
ولفت نوران على سلطان تنطق : روح جيب زياد ومجد انتهى دوامهم وسهم ماضنيت انه رايح وهو كذا
تنهد سلطان يطلع من البيت يركب موتره ويتوجهه للمدارس ياخذ عيال اخته ."
زفر بضيقه خاطر يعيشها بهاللحظة ودخل الدكان
ينطق : سلام عليكم ياعم وشلونك !
ابتسم شهاب يقفل الدفتر ونطق : يالله انك تحيه و..... ياساتر علامه راسك
سحب الكرسي يجلس قدامه ونطق : الله يبقيك تقابعت انا والكلب منيف
تنهد شهاب لانها مو اول مره يحصل هالشيء : الله يهديك كم مره اقولك اتركه وكبر عقلك
رجع ظهره على الكرسي ينطق : اي هين مو كل مره تسلم الجره ننتظر جراح وش بيسوي به وان مابرد خاطري ماني خامد الليله لين اشفي غليلي فيه ولد امه
مسح على دقنه شهاب يوقف ونطق : اقرب اشوف جبينك
نزل سهم شماغه اللي كان متعصب فيه ووقف شهاب له ينطق : وش ضربك فيه !
زفر سهم ينطق : مزهريه
بلع ريقه شهاب ينطق : سهم تدل المستوصف ولا ادلك عليه
رفع راسه سهم ينطق: مستوصف ! عز الله سلم مني
تنهد شهاب يناظر جبينه ونطق: روح وانا عمك يمكن دخل قزاز ولا شيء براسك ماني قادر اشوف من دمك
تنهد سهم ياخذ شماغه يتعصب فيه من جديد وقف ولف على دخول مجيد الدكان ينطق : هلا هلا مطر وسحب كان ابطيت اكثر !
تنهد سهم ينطق: مالي خلق هرجك مجيد امة الله كل ابوها على راسي
لف مجيد على شهاب من نطق : روح معه المستوصف مجيد
رفع حاجبه مجيد ينطق : افا وانا ولد مُلهم وش لك حاجه بالمستوصف !
لف انظاره لشارع ينطق : انا بجلس اعيد الحاصل لين تشرق شمس بكره !
مشى يطلع من المحل ونطق شهاب لمجيد : روح اتبعه تهاوش مع منيف وفالق راسه
تافف مجيد وطلع يركض لسهم مشى جنبه ونطق : اخوك ذا مابيهجد !
ضحك سهم بسخريه ونطق : بيهجد على يد سهم ان قالها الله.
تنهد مجيد يشوف غضب سهم ومشى معه لمستوصف اللي باخر الشارع ودخلو ونطق مجيد لسهم : اجلس اجلس
توجه يكلم الدكتور اللي داخل ويعطي بياناته للاستقبال طلع مجيد يناديه وقام سهم يدخل وتقدم الدكتور يكشف على جرحه ونطق الدكتور : تحتاج خياطه
تنهد سهم ينطق : سو اللي تسويه يادكتور وخلني اتوكل
تقدم الدكتور يعقم جرحه ويخيط جبينه وماكان من سهم اي حركه ، ميل شفايفه مجيد يناظره يدري انه قاعد يتالم بس خافي هالالم بداخله انتهى الدكتور يلف الشاش على راس سهم ونطق : تجي تراجع بعد كل يومين عشان نغير الشاش ونعقمه
هز براسه يوقف ياخذ شماغه من على السرير وطلع وهو ينطق : اي هين ان عاد شفت وجهي ضحك مجيد ومشى يطلع خلفه
<<الساعه ١٠ و مساءا >>
فتح شباك موتره يطلع يده للخارج يفكر بسهم وهل ممكن هالمره تسلم تعدي مثلها مثل غيرها نزل يده لجواله من كان يرن وسرعان ماطاح الجوال من يده تحت معقد الراكب تافف ينزل ياخذه ورفع راسه يشد على الدركسون بكل يدينه يحاول يمسك فرامل من شاف الناقه اللي طلعت امامه لكن بدون جدوى صدمها وسرعان ماتكسر قزاز سيارته رجع براسه للخلف وتجمد من طاحت الناقه بالارض فتح باب السياره ينزل لها يشوف رجلها اللي تتصبب منها الدم نتيجه الصدمه تافف ينطق : ماكان ناقصني غيرك
لف يناظر حوله ورفع راسه من شاف رجال يركض ناحيته عقد حاجبينه من تقدم له ينطق : الناقه لك !
هز براسه محمود ونزل انظاره يناظر رجلها المعكوفه والدم يتصبب منها بلع ريقه ينطق : انتهت حياتك يامحمود
جلس قدامها ونطق: ويش الحاصل ؟
تافف منيف مايرد عليه وتوجه يركب سيارته ويتعداهم رفع عيونه محمود من مشى كان شيئا لم يحدث ونطق : الله لايوفقك العمه بتغضب الان انتظري هنا ياهتوف راجع لك
وقف يركض يرجع للبيت ويدق الباب ، رفعت انظارها ساره من نزلت صحن الشاهي على الارض ونطقت : بسم الله شفيه محمود !
طلعت إبتهاج من المطبخ تنطق : هذا محمود !
هزت براسها ساره وخرجت إبتهاج للحوش تنطق من خلف الباب: محمود علامك !
محمود : الحقي ياعمه الحقي
تجمدت إبتهاج ورفعت طرحتها على راسها وتلثمت تفتح الباب
ونطقت : محمود شفيك الحق على ايش !
محمود : هتوف ياعمه صدمتها سياره على الخط وانكسرت رجلها
بققت عيونها تنطق بخوف : ايششش !
مشى محمود يركض دخلت تاخذ عبايتها من غرفتها ونطقت ساره لها من مرت من امامها : إبتهاج شفيه محمود !
رفعت حاجبها ساره من ماسمعت لها رد ونزلت إبتهاج مسرعه تلبس عبايتها وتطلع خلف محمود ركضت تشوفه على جانب الخط وهتوف جنبه ونطقت من وقفت تناظر رجلها : حسبي الله عليك يا محمود وينك عنها !
رفع راسه لها ونطق : ماشفتها ياعمه بين الحلال وطلعت ادورها وشفتها مثل ماانتي شايفه
نزلت إبتهاج لهتوف تنطق : هتوف تكفين لايصير لك شيء !
رجعت انظاره لمحمود تنطق : وينه اللي صدمها !
محمود: ركب سيارته ومشي
عضت على شفتها تكتم دموعها ونطقت : كلم الدكتور يجي يشوفها بسرعه وحط اي شيء قدام الخط عشان السيارات بسرعه محمود بسرعه
وقف محمود ينفذ ماطلبت منه وبكت ابتهاج تنطق لهتوف وهي تمسح على رقبتها : تكفين هتوف انتي الباقيه لي من امي تكفين
...............
دخل البيت بعد ماقضى نهاره كلها بالخارج وصد من شاف امه قدامه رفع يده ينزل شماغه لحدود حاجبه لجل ماتشوف الشاش وتقلق عليه ونطقت هيفاء بابتسامه عريضه: سهم وينك يمه اخر مره شفتك البارح !
تنهد لانها ماسالته عن شيء والدليل ان محد بلغها بالي حصل بينه وبين منيف اليوم ابتسم لها وتقدم يقبل جبينها ونطق : ارحبي ياام سهم قمت على عشره الصبح بس قالو لي انتس عند عمتي
ابتسمت تنطق : اي والله رحت عندها بس ماطولت عادك افطرت قلت لانوران بس تقوم تعطيك فطورك !
هز براسه وهو وده يقول لها انه ماذاقه ولا نزل شيء ببطنه من اصبح ونطق يمثل العكس : اي جعلني فدا راستس
هيفاء : اجل دامك مافطرت معي بتتعشى معي يلا تعال لاني حتى انا ماتعشيت
سهم : افا ليه وش اللي مانعتس!
ضحكت هيفاء تنطق : انت
ابتسم بطرف ثغره ينطق: ياويل حالي عليك ياسهم والله انك ماتنتخي
ضحكت هيفاء تنطق : محشوم ياحبيبي يلا تعال
ابتسم يدخل خلفها المطبخ يساعدها تزهب لهم العشاء اخذت الصحن تشيل فيه كل الاكل واخذ سهم برادي الشاهي يتبعها لصاله نزلت الصحن الكبير على الارض وجلس سهم قدامها ونطق : والله انتس القبال السمح
ابتسمت هيفاء تمد له الخبز ونطقت : بالعافيه عليك
تقدم ياكل معها ورفع انظاره من نزلت مجد تجلس على الكنب خلفه
ونطقت : خالي !
هز براسه يستقبل حكيها ، ابتسمت مجد تنطق : سم الله عدوك بقولك شيء
تنهدت هيفاء تنطق : مجد بقى احد مادرا بسواد وجهتس
رفع حاجبه سهم ينطق : وش علمتس يامجد !
ضحكت مجد تنطق : جده هذا اهم واحد بكل البيت هو الوحيد القادر على كل هالمشكله
ابتسم سهم بطرف ثغره ونطقت مجد : تخيل ياخالي اليوم اختبرت زين ، كان يجيني سوال مااعرفه ولا مر على بكل المنهج حاولت افكر وافكر بس مافي فايده عقلي وقف وقتها لفيت على وحده كانت جنبي وغشيت منها السوال وماحسيت الا المعلمه وراي ساحبتني مع مريولي وتصارخ علي انا وقتها حسيت بإهانه صراحه وماقدرت امسك نفسي قمت ارد عليها هي كلمه وانا كلمه ونزلتني عند المديره وصارت سالفه ، سكتت مجد تترقب ملامح وجهه
ونطق سهم يستقبل الكلمه اللي بتطلع منها : ايوه !
رفعت اصبعها تعض طرفه ونطقت : قالو لي ماراح تعدين الماده وانتي غاشه
رفع يده ينفضها ويوقف يسحبها مع اذنها صرخت تنطق : خالي شفيك انا من اليوم انتظرك وفي النهايه تسحب اذني !
تقدم ينزل راسه لها ونطق : لا بالله غاشه وجايه تبين اخذتس بالاحضان !
رفع يدها لاذنها تنطق : خالي تراني بنت اختك مو عدوتك شفيك انا جايه عندك تحل لي المشكلة مو تقلب علي !
ابعد يده عنها ينطق : ماني واقف معتس على الغلط
وتقدمت تنطق بهمس لاجل ماتسمعها هيفاء : خالي ادري انك معصب وراسك منتهي عشان كذا انت قاسي معي الحين بس تكفى انا احتاجك شلون يعني اعيد السنه وصديقاتي كلهم بيروحون الثانوي وانا اجلس بالمتوسط يرضيك !
لف يناظر امه ونطق : تعالي
مشى يتوجه للمغاسل يغسل يده ودخلت خلفه مجد ونطقت : لا تخاف جده ماتدري محد قالها
غسل يده ورفع يده يمسح على شاربه ونطق : جدك وينه !
مجد : نام وهو ينتظر خالي منيف يرجع
رفع حاجبه سهم ينطق : للحين مارجع ؟
هزت راسها بنفي ونطق سهم : ماشاءالله عليه واليمين اللي رميته يروح كذا !
لف من سمع الباب يتسكر ونطق : هلا والله هلا
رمى المنشفه على مجد وطلع يرجع لصاله وقف منيف مكانه يناظره وصد بيطلع لغرفته ونطق سهم : على وين يالطيب !
لف منيف عليه ينطق : توكل سهم توكل
رفع حاجبه سهم ينطق بحده : تعال المجلس
لف يتوجه للمجلس ولف راسه يشوف عجلان يتوسطه وزياد قدامه ونطق سهم : زياد وش عندك صاحي للحين !
رفع عيونه عجلان لسهم ينطق : يسولف علي وش لك فيه !
لف سهم من دخل منيف خلفه ونطق : لي ان ابوي نام وانا حالف يمين مايعدي الموضوع بالساهل وماتغفى عيني الليله الا وخاطري راضي
تنهد عجلان ينطق لزياد : قوم زياد روح لاختك
وقف زياد يطلع من المجلس ونطق عجلان لسهم : نصحي ابوك ولا شلون !
مشى سهم يجلس جنب عجلان ونطق : اذا لزم الامر ايه
مشى منيف يجلس قبال سهم ونطق بسخريه : تنتظر ابوي ياخذ حقك ليه ! وتزعل اذا قلت لك انك منت برجال
وقف سهم وسرعان مامسكه عجلان مع ذراعه يرجعه يجلس و يمسك طرف شاربه : انا طالبك تهدا
ونطق سهم بغضب : تسمعه وش يقول !!!!
هزّ براسه عجلان ونطق : اسمعه جعلني فداك اسمعه اجلس واهدا والعن الشيطان
ولف عجلان على منيف اللي قدامه: وانت يالخسيس ان ماعقلت وفكتنا من شرك ان تشوف علم مايسرك
رفع حاجبه منيف ينطق : خسيس ! بس مو صبي عند احد
وقف سهم مايستحمل ابدا وتوجهه لمنيف يرفع يده على وجهه يضربه كف يهز كيانه كله ، نزل راسه منيف وتقدم سهم ينطق بحده وسط غضب يسيطر
عليه : واللي خلق سبع وانزل سبع وبسط الارض وسواها واستوى على العرش انك لو ماتحشم نفسك وتسد نحرك اني لاساويك بالارض وانت تعرفني زين تسمعععع
دفعه على الكنب ومشى يطلع من المجلس مايشوف شيء حوله فتح الباب يطلع ونطقت هيفاء من شافته : سهم !
تنهد يلف عليها يحاول يسيطر على غضبه : سمي
اتجهت له تنطق : شفيه صوتك لاخر الدنيا تهاوشت مع منيف صح !
رفع يده يمسح على شاربه ونطق: مابه شيء يمه
ولف يطلع تنهد يسكر الباب خلفه ورفع يده يحرر رقبته من ازرار ثوبه وعقد حاجبينه من مر من امام موتر منيف يناظر قزاز السياره الامامي رجع انظاره للبيت ينطق : والمصيبه ان كل شيء يصيبه ماهو تاركه ياخذ لا عظه ولا عبره
وتقدم مجيد من خلفه ينطق : منهوووو !
لف سهم عليه ينطق : الله يفجع العدو ماودي اقول انت
ضحك مجيد ينطق : شدعوه عليك بتدعي علي !
تنهد سهم ومشى يطلع من الحوش ومشى مجيد خلفه يتوجهون لمكان سهرتهم المعتاد عليها وسط المزرعه ونطق مجيد بطريقهم : مجهز لك سهره يحبها قلبك والعيال كلهم هناك شفناك تاخرت وقلت اروح امعطك مع اذنك
زفر سهم ينطق: اي على خير ان شاء الله
دخلو ولفو العيال على مجيهم ورفع حاجبه سهم يشوف سلطان
جالس : ماشاءالله عليك ماادخل مكان الا وانت سابقني
ضحك سلطان ينطق: اجلس اجلس شلون راسك !
هز براسه ينطق: زين
عبدالعزيز : سلامتك ماتشوف بأس
جلس مجيد من ضبط لهم الشاهي واخذ البيالات يصب لهم ونطق سهم : الله يسلمك ياعزيز
مد مجيد بياله الشاهي لسهم ونطق سهم ياخذهاً
منه : تعيش
عبد العزيز : اقول يالعيال
سلطان : اسلم
عبد العزيز : وانا راجع شفت اخوكم والوكاد انه مسوي حادث
ونطق سلطان بربكه عكس سهم اللي كان صامت وعينه على بيالة
الشاهي : تقولها صادق ! متى !
ابتسم سهم بسخريه ينطق : ريح اعصابك مابه دقه الموتر اللي راح فيها
تنهد سلطان يمسح على وجهه ونطق مجيد يغير
السالفه : خلاص ياعيال فكونا من منيف ومن سوالفه دام سلم اقطعوها ،
رفع رجله سهم لركبه سلطان ينطق : قم قابل عزيز
ضحك مجيد ينطق : اي حي عينك هذا الكلام
سلطان : ودك اجلدك يالعضيد !
ضحك سهم ينطق : والله انك تعقب قم وانت ساكت
قام سلطان يقابل عبد العزيز ومجيد يقابل سهم ونطق سهم : وزع عزيز
ضحك عبد العزيز يطلع ورق البلوت من جيب ثوبه يوزع لهم ....."
<< بيت عجلان غرفة منيف تحديدا ً >>
دخل عرفته يضرب الباب خلفه بكل قوته يحس حاليا باشد انواع الغضب والاهانه للكف اللي جاه من سهم اخذ نفس يزفره بغضب ونطق : انا لك والزمن طويل والله مايوقفني عنك لا عجلان ولا حتى ابوي
لف على دخول امه عنده تنطق : منيف
صد عنها يخفي غضبه ودخلت تسكر الباب خلفها ونطقت : علامك
تنهد يجلس على السرير ومشت له نهله تشوف احمرار ملامحه والوكاد بانه غاضب من شيء جلست جنبه تنطق : شفيك بعد !
لف لها يسرد لها اللي صار من بدايه اليوم لاخر موقف من شوي ونطقت نهله بانفعال : مد يده عليك وسكت له ؟
لف منيف يصد عنها ونطق : جدي كان موجود وحالف يمين مااطلع خلفه
وقفت نهله تنطق : واذا يعني اذا كان عجلان موجود يافرحه قلبي فيك يامنيف اكيد عجلان بيوقف معه ضدك عجلان يحب سهم ومسلمه كل حلاله واملاكه وانت ياويل قلبي عليك ساكت والمويه تجري من تحتك
شد على كفوفه ونطق : سهم يشتغل عند جدي مو ماسك حلاله
ضحكت نهله بسخريه تنطق : انت لمتى بتكون غبي جدك على اخر ايام عمره بكره اذا مات محد بياخذ كل هالحلال والنعمه غير سهم وقتها بنخسر كل شيء انا وياك حتى البيت اللي احنا جالسين فيه
وقف منيف يمشي بالغرفه ونطق : يعقب يسويها
وقفت نهله تنطق : بيسويها هذا محد يوقفه اصحى على نفسك وامش ورا مصلحتك تعبت اقولك حاول تكسب عجلان لك واترك عنك البربره مع سهم
زّفر منيف ونطقت نهله : يمه منيف اسمعني عجلان يبي له مسايس وعشان تكسبه صفك ماعندك غير حل واحد
وقف منيف بتساؤل حول هالحل : وش هو اللي بيخلي عجلان واقف بصفي !
ابتسمت نهله تنطق : تتزوج
جمد وجهه منيف ينطق : ايش !
هزت براسها له تنطق: اي نعم تتزوج وتجيب لك عيال يشيلون اسمك قبل مايودع الشايب الدنيا
شتت انظاره ونطق : والزواج بيخلي الاملاك كلها لي !
همهمت له بإيه ونطقت : اي منيف اللي بتاخذها بتخلي عجلان يطير من الفرحه بس يدري انك تبيها
رفع حاجبه بدهشه ينطق : مين هي اللي باخذها !
ابتسمت نهله تنطق: فرح بنت خالك ، عجلان يحب اخوي ويعزه ولا نسيت انه هو اللي جبر ابوك ياخذني ووقف بوجهه من جاء بيطلقني اسمعني منيف انت اكبر احفاده وانت لك الحق بكل هالحلال مو سهم ولد خطافة الرجال هيفاء
سكت منيف يفكر بالموضوع وابتسمت نهله تنطق: تصبح على خير بروح انام وانت فكر بالموضوع ورد لي
هزّ براسه منيف وطلعت نهله من الغرفه تسكر الباب خلفها تاركته يفكر بكلامها ."""
<<امام بيت الجده ضبيا >>
تنهد نواف يشوف بكاء إبتهاج ونطق : ياابتهاج هتوف مافيها كلها كم اسبوع كذا وترجع امورها طيبه
نزل يوقفها معه من كانت جالسه على ركبها قدام هتوف ونطقت : ياعمي تكفى لايصير لها شي هاذي الباقيه لي من امي
هز براسه ينطق : ماهو صايبها شيء بس تعالي معي يلا
لفت على محمود تنطق وسط دموعها: محمود انتبه لها انتبههه لها تسمع خل عينك عليها
هز براسه محمود ومشت إبتهاج تدخل مع نواف وطلعت غرفتها ومن دخلت ، وقفت ساره لها من كانت تشوف حاله إبتهاج من شباك غرفتها ونطقت : إبتهاج هاه بشري !
رفعت يدها تمسح دموعها ونطقت : الدكتور يقول اسبوع او اسبوعين عشان تقدر ترجع تمشي طبيعي
تنهدت ساره تمشي لها وتنطق : زين الحمدلله علامك تبكين طيب !
تقدمت ابتهاج تحضن ساره ونطقت : خفت يحصل لها شيء
رفعت يدها ساره تمسح على شعرها ونطقت : ماهو بصاير لها شيء ان شاء الله ، إبتهاج منهو اللي صادمها !
ابعدت ابتهاج تناظرها ونطقت : ماادري ماامداني اسال محمود قلبي غضبان عليه
تنهدت ساره ومشت إبتهاج تفتح الشباك اللي كان يطل مباشره على شبك حلالها كله رفعت طرحتها تغطي وجها ونطقت بعلو صوتها : محموددد يامحمود
وقف محمود يتجه لها ونطق : امري ياعمه
إبتهاج : تعرف اللي صدم هتوف !
محمود : لا والله ياعمه
رفعت حاجبها إبتهاج تنطق : تعرف وجهه طيب !
هز براسه بإيه ونطق : ايوه شفته وسالته ويش الحاصل وركب سيارته ومشى
هزت براسها تنطق : زين روح لهتوف ولا تغيب عينك عنها سامعني !
دخلت تسكر شباك غرفتها ونطقت ساره : منهو هذا اللي صدمها ومشى ولا كانه مسوي شيء !
إبتهاج : ماعندي علم لو اعرفه والله ان اوريه نجوم الليل بعز الظهر واحرق قلبه مثل ماحرق قلبي على هتوف
تنهدت ساره تنطق : العني الشيطان إبتهاج
توجهت لفراشها تفسخ عبايتها وطرحتها على طرف سريرها ونطقت لساره اللي كانت واقفه وتناظرها : سوير بنام ولا عليك امر
هزت براسها ساره تطلع من عندها ونطقت قبل تسكر الباب : تصبحين على خير ابتهاجي ، قفلت الباب تتوجه لغرفتها ..."
ضحك سهم يرمي اوراق البلوت بوجهه عبد العزيز ونطق :يخوي لو اني مكانك على بالحرام اعتزل البلوت
ضحك مجيد يرجع بظهره على المكتى ونطق سلطان بغبنه : الله يفضحك ياعزيز ياحيوان يخوي ماتعرف تلعب انت ولا وش قصتك !
عزيز : احلف بس عز الله انك انت الدلخ
ابتسم سهم ياخذ برادي الشاهي يملي بيالته ورفعها يشربها وينهي مافيها ووقف ينطق : انا برجع البيت
رفع عينه مجيد ينطق : وين على الله تونا !
سهم : بالله عليك انا لو اسمع منك لاحنا من صلاه الفجر ولا فطور هيفاء جعلني افدا رجلها ، لف لسلطان ينطق : قم
وقف سلطان يمشي خلفه ونطق عبدالعزيز من خلفهم : انتو وجيهكم وجيه سهره !
ابتسم سهم ينطق وهو طالع من المزرعه بدون مايلتفت: اترك عنك البربره يا عزيز وقم اخمد سهرتك مامنها منفعه لك مير تسري الليله وانا ابلعك في الخساره
ضحك مجيد ينطق : الله يكون بعونك طحت بيده
ورفع صوته سهم لجل يسمعه مجيد : سكر باب المزرعه وجيب المفتاح معك بكره سامعني ياولد مُلهم
ونطق مجيد بنفس نبرة صوت سهم : سامعك سامعك
مشى سلطان يمشي جنب سهم ونطق : ولد قالت لك مجد عن اللي صار لها بالمدرسه
هز براسه ينطق : قالت لي مقصوفة الرقبة
سلطان : وش الحل !
سهم : الحل ان نوران تروح معها بكره تشوف وش العلم
دخلو من البوابه ولف سلطان على موتر منيف ينطق: ياساتر انت متاكد ماجاه شيء ؟
زّفر سهم من الطاري ونطق : قايل لك انه بسبع ارواح حتى الحديد يتاذى وهو يسلم
تنهد سلطان يدخل خلفه وطلع سهم يتوجه لغرفته يسكر الباب خلفه ووقف عند المرايا يزيح عصبة شماغه وتقدم يناظر راسه تافف يشوف الشاش يحاوط جبينه ومشى يفسخ ثوبه ورمى نفسه على سريره بعد يوم طويل عاشه ...."
<<<صباح يوم جديد الساعه ٦صباحا >>>
اعتلت ضحكات نوران تنطق وسطها : ياجدي جعلني فداك مو كذا الموضوع
ضحكت مجد تنطق : ياجدي والله العظيم انا نشبت نشبت في السوال ماقدرت اتصرف اسالني كم عليه درجه ؟
عجلان : كم !
مجد : ٦ درجات يعني ياجدي لضروره احكام
دخلت هيفاء تنزل الخبز على الارض ونطقت : ماشاء الله ضحكونا معكم
ضحكت نوران تنطق : يمه تخيلي جدي وش يقول !
ابتسمت هيفاء تناظر عجلان ونطقت : وش يقول !
نوران : يقول روحي لمديرة مجد وقولي لها تقصر الشر وتعيد الاختبار قبل يخلي نجد كلها تشهد على فصلها من المدرسه
ضحكت هيفاء تنطق : هوو ياعمي الموضوع مو كذا ومجد غلطانه يعني تاخذ جزاها تاخذه
ابتسم سهم يسمع ضحكه امه بالممر ودخل المجلس ينطق : صبحهم بالخير
لفت هيفاء تنطق : صبحك بالنور والسرور يمه زين انه قمت
توجه لها يفسخ نعاله على عتبة الباب ودخل يقبل جبينها ونطق لمجد : اخوتس وينه !
رفعت اكتافها بعدم معرفه ونطقت : مدري يمكن نايم يمكن صاحي مااعرف صراحه
رفع حاجبه سهم ينطق : بالله عليتس قالبتها تضاحيك بالمجلس واخوتس ماتدرين وينه !
تنهدت مجد تنطق : ياخالي انا همومي اكبر من زياد
ضحك عجلان ينطق : وهي صادقه همها اكبر
لف سهم على دخول سلطان وزياد جنبه ونطق : انا ماني قايل لك اخمد بدري !
هيفاء : خل الولد واجلس افطر عشان توديهم المدرسه انا ابي سلطان بمشوار
مشى سلطان يجلس ونطق : وش مشوارتس !
هيفاء : بروح السوق انا وعمتك
هز براسه سلطان ينطق : على خشمي ابشري
ابتسمت تنطق : عليه الشحم ياعيون هيفاء
رفع حاجبه سهم يناظرها ونطق : يبطي والله عظم يكون عيونتس
اعتلت ضحكاتهم ونطق عجلان : نطق ابو راس
ابتسم بطرف ثغره بخفه يكمل اكله ونطق سلطان : اي عيونها وش لك عندي !
رفع عيونه سهم له ينطق : لي انك تعقب
ضحكت هيفاء تنطق : كلكم عينين في راس
شهقت نوران تنطق : وانا يمه وش موقعي من الاعراب !
ضحك سلطان ينطق : هيا خذلك
دخل عليهم جراح ينطق لنوران : خلي هيفاء لعيالها وانتي خليك لي
ضحكت نوران تنطق : اقتنعت
مجد : واحفادك ياجدي مالهم شيء من اعضاءك !
اعتلت ضحكاتهم ماعدا سهم اللي كان صامت وياكل ، ونطق جراح : لكم لكم
زياد : اشوا ماجحد
ابتسم جراح يناظر سهم اللي مارفع عيونه له من دخل ، دخل منيف
ونهله خلفه ونطق : سلام عليكم
زّفر سهم من سمع حسه ووقف ينطق لنوران : اعجلي عشان تروحين مع مجد تشوفين موضوعها، ولف لمجد وزياد ينطق : خففي دمك انتي وياه
ومشى يطلع من المجلس يتعدا منيف لف منيف يناظره من طلع ، وقامت نوران تنطق لمجد وزياد : يلا مجد انتي وزياد عشان ماتتاخرون ، وقفو معها يطلعون
ونطقت نهله : هوو شفيهم قامو يطلعون من دخلنا لايكون ماودهم نفطر من حلال عمي
تنهد جراح ينطق : نهله اقصري الشر
ميلت شفايفها واتجهت تجلس ومنيف معها
...."
ركض محمود يتجهه لشباك إبتهاج يرمي الحصوات عليه لجل يبلغها التفتت إبتهاج من كانت تمشط شعرها ونزلت المشط ورفعت الطرحه على راسها وتلثمت فيها تتجه لشباك تفتحه ونطقت : محمود شفيك !
محمود: ياعمه انا عرفت الرجال اللي صدم هتوف
بققت عيونها ونطقت : عرفته ؟ مين هو !
ونطق محمود وهو يلقط انفاسه : اسمه منيف
رفعت حاجبها تنطق : وش عرفك انه هو !
محمود: شفته نازل من سيارته ووقفها امام بيتهم
ميلت شفايفها تنطق : زين انتظرني عند الباب بجيك
هز براسه محمود ومشت تطلع من الغرفه تنطق : ساره ساره بنت !
طلعت ساره من المطبخ تتجه لها ونطقت إبتهاج : اسمعيني محمود جاني ويقول انه عرف مين اللي صدم هتوف وانا بروح معه غطي علي لين ارجع جده لاتدري ولا حتى عمي
بققت عيونها ساره تنطق : إبتهاج انتي منجدك ولا تمزحين شلون بتروحين لرجال ماتعرفينه !
إبتهاج : ساره ماعندي وقت اجلي نصايحتس لبعدين
اتجهت لغرفتها تاخذ عبايتها وتلف لثمتها وطلعت لمحمود بالخارج من كان ينتظرها ونطقت : امش يامحمود امش
مشى قدامها ومشت خلفه تتجه لبيت عجلان اللي بالحي الثاني دخلو من البوابه ورفعت حاجبها تشوف سياره منيف والقزاز المحطم ونطقت : ياويل قلبي عليتس ياهتوف كل هذا جاتس ..
نزلت مجد تطلع من الغرفه من لبست واخذت شنطتها ترميها على ظهرها ونطقت لسهم من كان بالصاله : يلا ياخالي
وقف سهم ينطق : وين الباقي !
مجد : جاين
رمى لها مفتاح موتره ونطق : زين اطلعي جايتس
مشت تطلع فتحت الباب تشوف إبتهاج امامها ونطقت : بسم الله علي
رفعت حاجبها إبتهاج تنطق : وعلينا هذا بيت منيف !
عقدت حاجبينها مجد تنطق : اي بيته انتي مين !
إبتهاج : روحي ناديه لي لو سمحتي
هزت براسها مجد تركض لسهم من كان بالصاله ونطقت : خالي خالي
تنهد سهم ينطق: ياكثر هرجك يامجد
مجد : خالي في وحده برا ومعصبه وتقول تبي خالي منيف
رفع حاجبه سهم ينطق : تبي منيف! ليه !
رفعت اكتافها بعدم معرفه ومشى سهم يطلع لها وخرجت مجد خلفه ونطق من شافها واقفه امام الباب : سمي !
رفعت يدها إبتهاج تاشر عليه ونطقت : شوف يابن الناس اهلنا علمونا اذا سونا مصيبه ناقف خلفها و نبرر فعلتنا ونعتذر من الناس على اغلاطنا لكن بعد سواتك ليله امس مالك مبرر غير انك وقح وجبان
ارتخت ملامح سهم يشوف حدة عيونها وكلامها ونطق : الظاهر انه راح عن بالهم شلون يعلمونتس الاحترام
رفعت حاجبها تنطق بذهول: لا والله لك وجه، لك وجه يالردي !
رفع يده يحك شاربه بغضب ونطق : احشمي عمرك ماسك نفسي لانك مره
زّفرت بغضب تنطق بانفعال شديد : ماشاءالله عليك فيك الخير والبركه طلعت تعرف الادب !
ابعد سهم يمسح على وجهه ورجع انظاره لها ينطق : شوفي انا ماعندي علم عن وش قاعد تبربرين عنه لكن حطي بالك ماهو انا اللي اتخشخش على فعله عملتها
ولفت إبتهاج على محمود من نطق : ياعمه ماهو هو
بلعت ريقها تناظر محمود ونطقت : شلون ماهو بهو !
محمود : ماهو هذا منيف
هز براسه سهم ينطق : اخيرا قررت تنطق
رجعت انظارها على مجد المذهوله من كل هالحوار : قلت نادي لي منيف مو غيره
رفع حاجبه سهم ينطق : بتحولين عليها ولا وشلون !
رجعت انظارها إبتهاج له ونطقت : معليش ماكانت ادري
ابتسم بسخريه ينطق : هاذي المصيبه انك ماتدرين وين الله قاطك
شتت انظارها من حست بإندفاعها ورجع سهم ينطق : وش العلم وش لتس بمنيف!
إبتهاج بتساؤل: وش يصير لك منيف !
ناظر لها سهم يكبّت غضبه ونطق : اخوي
هزت براسها إبتهاج ونطقت له : اخوك المصون صادم ناقتي وكاسر عرقوبها
ضحك سهم بدون صوت ينطق : انا على بالي انه صادم واحد من اهلتس على هالصراخ وطولة اللسان
رفعت حاجبها ونطقت : وش علمك انت ! وبعدين انا ليش قاعده ابرر لك من الاساس ناد لي منيف مالي كلام معك
طلعت نوران وخلفها زياد ونطق سهم بحده: ارجعي يابنت
رجعت نوران من شافت محمود ولف سهم على مجد وزياد ينطق : اركب انت واختك جايكم
هز براسه زياد ومشت مجد معه يركبون موتره ورجع انظاره لابتهاج
ينطق : من انتي يابنت الاجواد!
سكتت تناظره ونطق سهم من طال سكوتها : عشان نعوضتس يعني وان كان ماودتس فإنا مو ميت صدقيني عشان اعرف من انتي
ضحكت بسخريه تنطق : ولا انا ميته على عوضك وماني جايه اطلب العوض من ناس مثلكم جايه اوصل لك هالكلمتين وانت بدورك كإخ وصلها لاخوك الجبان
ولفت تمشي ومشى محمود خلفها ، تجمد سهم يلف يناظرها لين طلعت من البوابه تختفي من امامه ونطق بذهول : وش عثرت فيه يا السهم لعنة الله عليك يامنيف !
مسح على شاربه ولف يفتح الباب ونطق : نوران اطلعي
مشى لموتره يركب ونطقت مجد : خالي الساعه ٨ واكيد بدات الحصه الاولى من زمان
ركبت نوران وحرك سهم ورفع عيونه للمرايا ونطق لمجد : الخوف على زياد ماهو بعليتس ياغشاشه
تنهدت مجد ترجع ظهرها على المعقد و تنطق : الواحد عندكم ممنوع يغلط !
لفت نوران على سهم تنطق : وش السالفه سهم !
سهم : لامني فهمت قلت لتس
تقدمت مجد تنطق : شدعوه ياخالي كل هذا ومافهمت !
تنهد ينطق : سدي نحرتس انا اقول
وكمل طريقه وكل افكاره تدور حول هالانسانه وكلامها يتردد بإذنه ، وقف عند مدرسه زياد ونزل معه يكلم الحارس لجل يدخله ومن دخل رجع يركب يوصل نوران ومجد ونطق قبل ينزلون : نوران انا هنا شوفي وش يصير واذا خلصتي من مجد اطلعي لاتبطين علي وراي شغل
هزت براسها نوران ونزلت ، ونطقت مجد : خالي ابي مصروف
تنهد يستغفر ربه ودخل يده بجيبه ومد لها مصروفها وتقدمت تقبل خده ونطقت : اه احبك والله
نزلت وابتسم سهم ينطق : الله يكملك بعقلك وانا خالك ، ركن موتره امام المدرسه ينتظر خروج نوران ..""
« بيت ضبيا »
دخلت تفسخ عبايتها بالحوش قبل تدخل وطلعت لها ساره تنطق : إبتهاج وينتس فيه تاخرتي !
ابتهاج : بعدين اقولتس احد سال عني !
هزت براسها ساره تنطق : اي امي وقلت لها انتس عند الحلال
مدت إبتهاج عبايتها لساره ونطقت : اي زين امسكي ذي انا بروح اشوف وش تبي
تنهدت ساره ، ودخلت إبتهاج تتوجه لجدتها ونطقت من دخلت عندها : سمي ياجده !
رفعت عيونها ضبيا لابتهاج ونطقت بحده اسلوبها المعتاد معها : وينك فيه يابنت سمر سرتس انقطع عند الناقه !
زفرت إبتهاج ونطقت : هتوف تعبانه ياجده ورحت اشوفها
تاففت ضبيا تنطق : اتركي عنتس البربره وتعالي وزعي البهارات بالعلب
بللت شفايفها وتوجهت تجلس امامها و تسوي ماطلبت منها ، ماتنكر انها حست بنوع من تانيب الضمير على الكلام اللي قالته له وخصوصا ان ماله ذنب بكل اللي صار لهتوف بلعت ريقها ماتغيب عنها نظرات الصدمه بعيونه وغصبه الواضح على ملامح وجهه ، اندفعت لدرجة انها مافكرت بانها تسال عنه ولا من يكون ، هو منيف ولا لا ، بس كل اللي تعرفه حاليا ان هتوف اغلى ماتملك خصوصا انها هديه من امها لها قبل وفاتها ....."
<< امام المدرسه الساعه ٩ ونص صباحًا >>
تافف يناظر ساعته وشغله اللي تاخر عنه لهل الوقت ونطق لذاته : الشغل طار والعم شهاب نشب فيه لوحده وولد مُلهم الوكاد انه راقد بعد سهرته
تنهد وسط حلطمته ينطق : وهاذي ناشبه داخل الله يسامحتس ياهيفاء ضروري اليوم تاخذين سلطان
زّفر يمشي حول موتره و يلف سبحته على اصبعه ، ورفع راسه من طلعت نوران تتجه له ونطقت : تاخرت عليك !
سهم : وش رجعك كان رقدتي داخل !
نوران : وش اسوي انبح حلقي وانا اتكلم معها
مشى سهم ينطق : اركبي
هزت براسها ومشت تركب وفتح سهم بابه يركب ولف
عليها ينطق : وش طلع معك !
نوران : بالبدايه رفضت وجلست اقناعها لين وافقت بس تعديه مع الاختبارات النهائية
شغل موتره ونطق : زين وعيها تحط عقلها براسها ماني فاضي لها كل يوم رايح جاي وحرك يوصل نوران للبيت ويتوجه لشغله ..."
<< بعد صلاة العصر >>
طلع من المسجد يتجهه للبيت دخل المجلس عند اعمامه ونطق : سلام عليكم
لفو يردون السلام عليه ومشى يتجه لعجلان من اشر له يجي يجلس جنبه
ونطق عجلان : وينك عن الغداً !
سهم : تغديت مع العم شهاب بالدكان
هز براسه عجلان ينطق: فيه العافيه
ولف سهم من نطق عمه صقر ينطق : وصلني علم ماهو بطيب عنك ياسهم
رفع حاجبه سهم ينطق: مايجي من وراي الا الطيب ياعم بس اسلم وش انت سامع !
صقر : ان حلال ابوي قاعد يضيع على مشاريعك اللي ماتخص حلال عجلان ابد !
زّفر سهم بضيق وغضب يمسح على حاجبينه ونطق عجلان : وش هالكلام ياصقر سهم انا ادرا فيه وبشغله
هز براسه سهم ينطق : خله يقول اللي يبي
ورجع انظاره سهم لعمه ينطق : قل للي وصل لك هالهروج يقولك سهم ابن جراح ماسك حلال عجلان وذراعه اليمين تبطي عظم وتعقب توصل مكانه ولا تاثر عليه ولا حتى تثير الشكوك بينه وبين عجلان
رفع حاجبه صقر ينطق : شدعوه ياسهم كله كلأم ووصلناه لك ليش انفعلت !
تنهد سهم ينطق : والله ياعمي اللي ينبش بالحكي لايزعل اذا جاه
مُلهم : استهدو بالله ياجماعه الخير جاين لجل ناخذ علوم بعضنا مو نشب النار بالمجلس فكونا من الكلام اللي ماله وجهه
دخل منيف يجلس جنب عجلان بالطرف الاخر
ونطق : اقول ياجدي
لف عجلان له ينطق : اللهم اجعله خير !
ابتسم منيف يناظر سهم ونطق : خير ياجد خير ، انا قررت اتزوج
رفع حاجبه سهم بذهول ، وعم الصمت بالمجلس من اكبر عيال عجلان لاصغر احفاده ونطق جراح بذهول : انت !
هز براسه منيف ينطق : اي نعم
وضحك عجلان ينطق : هاذي والله الساعه المباركه ومين بتاخذ !
ابتسم منيف ينطق : بنت خالي
اتسع مبسم عجلان ينطق بفرحه : لك الحمد والشكر انه رجع عقلك براسك خير مااخترت
لف سهم لمجيد يناظره وقف ينطق لمنيف : لا منك خلصت من مشروع هالخطبه اللي مدري من وين جاتك تعال المزرعه ابيك بعلم يخصك
........
انتهى ..
عاد الهوى عاد 🤎
تعالو انستا الروايه تنزل رسمي اول باول هناك
واللي ودها تقرا واتباد تتحمل الانتظار 🤷🏼♂️
حسابي انستا sr_11224
لايك وكومنت ماتخسرون شيء 🫶🏻
قراءه ممتعه.....
