مشى يطلع من المجلس ومجيد خلفه يتبعه يتجهون للمزرعه ودخل سهم يمشي بين النخل ونطق مجيد : اخوك وراه بلاء !
ابتسم سهم ينطق بهدوء نبرته : وش ورا منيف غير البلاوي عمرك شفت من وراه خير !
تنهد بضيق ورفع عيونه لنخيل ونطق : عطنا خير هاليوم يالله ، لف سهم من نطق منيف : وش عندك !
سهم : وش انت مسوي امس بالليل !
رفع حاجبه منيف ينطق بسخريه : نعم ! مااسمع من انت عشان تحقق معي !
مشى سهم يوقف قدامه ونطق بحده : انطقق !
لف منيف بيطلع من المزرعه ونطق سهم بنفس نبرته : لاتستعجل بخطبتك لاني ماضنيت ان خالك بيزوج بنته لمسجون
رفع حاجبه بعدم فهم منيف يلتفت ويرجع بخطاويه لسهم ونطق : ويش !
هز براسه سهم ينطق : الناقه اللي صدمتها البارح اهلها يطالبون بحقوقهم
ارتخت ملامح منيف ينطق بدهشه حول معرفه سهم : وش عرفك !
ضحك سهم بطرف ثغره ينطق : الواضح لي انك نسيت من انا ، انا سهم يامنيف مايحتاج اذكرك فيني
بلع ريقه منيف بتكرار ونطق سهم : الا عاد ان كنت تبيني اتدخل بالموضوع هذا شيء ثاني
رفع حاجبه منيف ينطق : تتدخل شلون يعني !
ابتسم سهم بطرف ثغره ونطق: ٣٠ الف ريال نشتري سكوتهم ولا من شاف ولا من درا
بقق عيونه منيف ينطق : ٣٠ الف انت بعقلك الوكاد ان المزهريه ضيعت صوابك
قوس شفايفه سهم ينطق : الكلام وجاك عندك اربع وعشرين ساعه كان ودك تعيش بسلام وتتمم فرحه عجلان فيك دبرها
لف سهم على مجيد اللي كان مذهول غمز له سهم بعيونه ومشى مجيد يتبعه يطلعون من المزرعه ونطق سهم من حس ان مجيد بينطق : اشششش اقطع حسك
مشو يتوجهون لدكان ودخلو ونطق سهم من شاف
شهاب : شلونك ياعم !
ابتسم شهاب يسكر الراديو اللي بيده ونطق : ارحب ارحب
ابتسم سهم يبادله الابتسامه ونطق : تبقى تبقى
ضحك مجيد بذهول : انت صاحي ولا مريض !
لف سهم له ينطق : اصحى واحد بالخلق كلهم
هز براسه مجيد ينطق : بالله عليك اجل وش اللي قلته من شوي لمنيف !
ابتسم سهم ماتغيب عنه ملامح الصدمه والخوف اللي اعتلت بوجهه منيف ونزل يده ياخذ الراديو من يد شهاب يرفع الصوت ويردد معه : كتبت لك من خاطري المكنون قصيدة تعرف خوافيها، ارحم حبيبك مد له بالعون
قربك فرح يا حظ لاقيها ، بسمة شفا علة المغبون
ارفق بحالي من مساعيها ، ضحك يتجهه لرفوف يرتب الاجهزه اللي عليه
ضحك شهاب ينطق : سهم مروق جعلها دايمه بس وش اسبابها !
اتجه مجيد ياخذ الراديو يقصر الصوت ونطق : وش تتعاطى انت وش العلم !
تنهد سهم ولف ينطق للي بالمحل : يلا يلاااا سكرنا
طلعو الزباين واتجه سهم يسكر باب المحل عليهم ثلاثتهم ونطق : انثبر
جلس مجيد وسحب سهم كرسيه يجلس عليه ونطق : اسمع يالملقوف حشى عمي جاني العلم اليوم ان منيف صادم ناقه ليله امس لجل كذا قزاز موتره مكسور واهل الحلال مايبون شيء منه بس انا لجل اربيه واخليه يوقف ورا اغلاطه سويت كذا فهمت يا الفضولي!
بقق عيونه مجيد ينطق : اشتغل عرق الملعنه عندك !
هز راسه بإيه ونطق شهاب بعدم فهم لحوارهم : شلون يعني وش طلبت من منيف !
ضحك سهم ينطق بسخريه : ٣٠ الف ريال ، ريال ينطح ريال
جمد وجه شهاب ينطق : حرام عليك سهم في النهايه هذا اخوك
رفع حاجبه وتلاشت ضحكته ووقف على حيله ينطق : واللي براسي ياعمي مهوب بحرام !
سكت شهاب يصد عنه ونطق سهم : العلم وسلامتكم انا بمزمز على منيف لين يطيب خاطري وتشفى جروحي وانفذ يميني ، اللي عنده كلمه سنعه ينطق بها واللي ماعنده يحتفظ فيها لعمره سهم مايحتاجها ، فتح باب الدكان يطلع من عندهم وتنهد مجيد ينطق لشهاب : الرجال انجن المزهريه ماسوت فيه خير ، تنهد شهاب وقام مجيد يتبع سهم ركض خلفه ينطق : سهم ياسهم انتظر علامك يالزعول !
رفع حاجبه مايتلفت عليه ونطق : تعقب
ضحك مجيد ينطق : وش بتسوي ب٣٠ الف !
ابتسم سهم بطرف ثغره ينطق : بعدل لسانك الاعوج
اعتلت ضحكات مجيد يمسك على بطنه واتسع مبسم سهم على صوت ضحكته اللي كان يسمعها بدون مايلتفت له ونطق مجيد وسط ضحكته: تسلفني ١٠ منها !
رفع يده يمسح على شاربه ويفتله ونطق : وش تبي فيها !
مجيد بضحكه : بشتري قطع غيار للموتر
سهم : مالك لواء اضبط عمرك ولك العشره
ضحك بخفه سهم ومشى مجيد ينقز على ظهر سهم وضحك سهم يمسكه ونطق بضحكه : يخوي انت ماتاكل ياويلي قلبي عليك ياولد مُلهم
ابعد عنه مجيد ينزل من على ظهره ونطق بضحكه: والله اني اكل راس جدي بس مدري وين يروح الا اقولك على طاري الاكل انهار مسويه حلى اليوم على كيف كيفك وماعاد اكلت منه امش معي نروح نتقهوى بالبيت
هز براسه سهم ومشى معه يتجهون لبيت مجيد ودخل سهم المجلس وتوجه مجيد يدخل المطبخ عند انهار ونطق : انهار!
لفت عليه من كان راسها بنص الثلاجه ضحك مجيد بعلو صوته ينطق : يابنت خافي الله في نفستس ارتفع علي عليتس السكر من اصبحتي وانتي راستس بالصينيه
شهقت تنطق بخوف على نفسها : اذكر ربك ، قول اعوذ برب الفلق من شر ماخلق صدق
ضحك مجيد يتجه لها ونطق : اسمعي اتركي عنك البربره سهم عندي بالمجلس جيبي لنا قطعتين من هالحلى ودله قهوه وكثر الله خيرتس مليون
شهقت تنطق بذهول منه : خير انا مسويه الحلى ذا لي
مجيد : اقول اتركي الجشع عنتس وبسرعه اعجلي اعرفه مايجلس في المكان الواحد ١٠ دقايق
تاففت تنطق : زين وش المقابل !
مجيد : بشتري لك خرافيش من البقاله
ابتسم تنطق بفرحه : زين يلا شوي وتعال عشان اعطيك
ضحك مجيد ينطق : ادري بتس يامدام نفيخه محد يجيب راستس الا الاكل
شهقت انهار وطلع مجيد من المطبخ وهو يضحك لسهم اللي كان بالمجلس ومشى يتجه له يشوفه ساهي ولا هو بحوله ونطق : سهم الكذاب كل هذا عشان الثلاثين الف والمصيبه انك اغنى واحد فينا كلنا
لف سهم عليه ينطق : الغني الله وحده هذا اولاً ثانياً انت تدري ان الفلوس ماتهمني ولا تفرق معي مثل متفرق عند منيف لجل كذا انا مسكته مع اليد اللي توجعه فقط
هز براسه مجيد مع ضحكه مرسومه على مُحياه : اي ماشاء الله عليك ، الله يزيدك كرهه فيها
ميل فكه بغضب ووقف مجيد يضحك من دقت الباب انهار ونطق وهو يتجه للباب : بعدي والله اختي
ونطق سهم بعلو صوته لجل تسمعه انهار : اقول يابنت مُلهم !
ضحكت انهار من خلف الباب تنطق له : سم ياولد جراح !
ابتسم سهم ينطق : سم الله عدوك خففي الحلويات على اخوك حس ثقالة الطينه زايده عنده
اعتلت ضحكاتهم ونطقت انهار : ابشر ابشر
سكر مجيد الباب يتجه له نزل الدله وصحون الحلى امام سهم ونطق مجيد : افا عليك انا طيتني ثقيله !
هز براسه ياكد كلامه سهم واعتدل بجلسته ونطق : اي نعم ودك تزعل شوف الجدار خلفك
مد له فنجال القهوه ونطق مجيد : ادري بك ماتقدر مجيد عندك بالدنيا كلها
زّفر بكرهه لثقه الزايده ونطق : اي على خير ان شاء الله
جلس جنبه مجيد ، واخذ سهم الملعقه ياكل من الحلى ونطق مجيد يترقب ملامح وجهه وضحك بخفه يشوفه ياكل الملعقه الثانيه وهو للحين ساكت ونطق مجيد يقطع الصمت : هوب يا ابو جراح وش علمك !
رفع حاجبه سهم بعدم فهم يناظره ونطق مجيد : ماودك تقول لنا رايك !
تنهد سهم ينزل الملعقه ونطق : انت اللي مسويه !
هز براسه مجيد بنفي ونطق سهم : اجل البخ
ضحك مجيد ينطق وسط ضحكته: اختي ترا
رفع حاجبه سهم ينطق : واذا يعني !
مجيد : يعني تقول لي رايك عشان ماتكون اخر قطعه تاكلها
وقف سهم بيطلع ونطق: قوم شوف لي طريق
بقق عيونه مجيد بذهول ونطق : انت تعبان انثبر بس
مشى يتجهه للباب ينطق : يا اهل البيت طرريقق
ورفع يده على مقبض الباب من نطقت انهار : اطلع سهم اطلع محد قدامك
فتح الباب يطلع من المجلس والبيت كله ، تنهد مجيد ينطق : ويقول لي الاكل وين يروح ، يروح من كثر ما الحق وراك ياولد عمي
« بيت صقر »
مشت تتجه لشباك وعضت على شفتها تشوفه يمشي بالحي ونطقت بفرحه تحتويها : اهخ ياسهم الله يجمعني فيك باقرب وقت بلعت ريقها من من شافته متجهه لبيتهم ونطقت : يمه لايكون استجابت دعوتي !
لبست طرحتها ونزلت تركض بعجل للباب الخارجي ووقفت تنتظره يطق الباب ، وقف سهم امام الباب يطقه
ونطق : ياعزيز ورع عزيزز
مسكت على قلبها من سمعت صوته تنطق : سم !
عقد حاجبينه من سمع صوتها ينطق : نادي اخوك يابنت
غمضت عيونها تدور فيها الدنيا من سمعت صوته ودخلت تركض لداخل تنادي اخوها مشت تدخل لداره ونطقت من فتحت الباب: عزوز سهم برا يبيك
وقف عبد العزيز يطلع لسهم ونطق من شافه : هاه ياسهم !
رفع يده سهم يلقطه مع ياقته ونطق : هاه هاذي ماتقولها لسهم تسمع ! امش تعال ابيك بكلمه رأس
ضحك عبد العزيز ينطق : نسيت انك سيد زمانك
ابتسم سهم بطرف ثغره ورفع يده يمسح على شاريه ونطق : لا تنسى يابو العز لا تنسى
هز براسه عبد العزيز يمشي معه ولف سهم على مجيد من صار ثالثهم ونطق : وش جابك !
غمز مجيد بعيونه ينطق :ولهان عليك
ضحك عبد العزيز وصد سهم يناظر قدامه ونطق : الله يخارجنا منك في ذا اليوم
ضحكو العيال وسكت يمشي قدامهم وهم خلفه ونطق عبد العزيز لمجيد : ياخي يحسسك انك تافهه وثقيل دم وماعندك سالفه
مجيد بضحكه : من عرفته وانا حاس بهالشعور
ضحكو يتجهون خلفه لاحد دكاكين عجلان دخلو ونطق سهم : سكر الباب يا عزيز وراك
سكر عبد العزيز الباب واتجهو يجلسون امامه
ونطق : اسمعني انت وياه ...
<< الساعه ٩ مساءا >>
تنهد يمسح على راسه ووجهه ويفكر شلون يدبر المبلغ رجع راسه على ظهر سريره يسنده ورجع انظاره للباب اللي انفتح ودخل ابوه اعتدل منيف بجلسته ومشى جراح يجلس امامه ونطق : منيف انا جايك لجل ابلغك اني مانسيت فعلتك امس بسهم ولو صار له شيء وقتها بندمك يامنيف بندمك احمد ربك انها سلمت ولا كان شفت شيء مايسرك
تنهد منيف ينطق : يبه انت تعرف سهم هو اللي اجبرني ارفع يدي عليه وكل هذا منكم ومن دلعكم له وانا ماغلطت عليه هو جنى على نفسه وبدل ماتعلمه شلون يحترم اخوه الكبير ويثمن حكيه معه جاي تقول لي هالكلام !
احتدت نظرة جراح ينطق بغضب : تبي تعلمني شلون اتكلم! صد منيف بدون رد ورجع ينطق جراح : شوف منيف انت بتعتذر من سهم وتحب راسه وهاذي اخر مره اسمح لك تتجاوز حدودك مع واحد من اخوانك وخصوصا سهم سامع !
ضحك منيف بسخريه ينطق: اعتذر ! ومن سهم بعد ! عز الله انه يبطي عظم
وقف جراح بغضب ينطق وسطه : بتعتذر وانت ماتشوف الدرب
وقف منيف قباله ونطق : ماني معتذر منه لو تطيح السماء على القاع، لو تصفق على راسه ميه مزهريه و اشوفه مغرق بدمه ، لو تطيح اللي بديتها على امي بحرقه على ولدها ويموت عجلان بمجلسه مااعتذرت
صدى صوت الغرفه بكف جراح اللي بين ملامحه على وجه منيف ونطق بغضب : عز الله اني ماعرفت اربي
انفتح الباب ودخلت نهله على صراخ جراح على منيف وراس منيف اللي بالارض نتيجه الكف اللي ماسمحت له يلفظ حرف ونطقت بخوف : وش قاعد تسوي بالولد انت !
رفع راسه لامه ونطق جراح وسط غضب يسري بانحاء جسده : لابارك الله فيك من ام هاذي تربيتك واقف قدامي ويراددني ولا كاني ابوه ولا كان لي حق عليه ربيت فيه لين شاب شعر راسي واخرتها يجي كذا !
رفعت حاجبها نهله تنطق : ربيت عيال هيفاء قصدك اما منيف محد تعب عليه كثري من صغره
جراح : اعميتي الولد وخليته يطغى ويتجبر حتى علي حتى على ابوه هاذي تربيتك !
ابتسمت نهله بسخريه تنطق : اسال نفسك وش وصله للمرحله ذي !
مسح على وجهه جراح ينطق لمنيف وسط لعثمته: وش قصرت معك فيه يامنيف !
ضحكت نهله تنطق بذهول : لك وجه تسال !
لف جراح عليها ينطق : اقصري الشر يانهله اقصريه
تقدمت له وتنهد منيف يسمع امه : يكفي انك حارمه من كل شيء انت وابوك وكل شيء قاعد يروح لسهم املاك دكاكين عقارات كل شيء لسهم كل شيء ماتقول لي وش سويت لمنيف اذكر لي شيء واحد بس وبعدها اوعدك ماعاد تسمع حسي بكره اذا صار لك شي ولا صار لابوك مافكرت فيني مافكرت بمنيف شلون بنعيش ! حتى انت ولدك استولى عليك انت وحرمك انت واخوانك من كل شيء ، ضحكت وسط كلامها تكمل : ولد العشرين المتصرف بكل شيء شهالفضيحه ياربي !
رفع يده جراح وسرعان مانتهت كل حروفه من طاح بطوله يساوي الارض ، بقق عيونه منيف وبلعت ريقها نهله وتقدم منيف ينزل لمستوى ابوه وينطق لامه : ليش تكلمتي معه كذا ليش تدرين انه مريض قلب
صرخ منيف ينادي ابوه : يبه انت معي يبه يبه يبههه ........
وقف يطلع من عند عبد العزيز ومجيد يتجهه للبيت دخل وعقد حاجبينه يسمع صراخهم بالاعلى ونطق بهدوء نبرته: ياساتر ويش العلم !
رفع ثوبه وطلع فوق يتجهه لغرفه منيف دخل و ارتعد داخله يشوف ابوه وكلهم حوله ونطق : اخو من طاع الله وش فيه !
اتجهه له ينطق بخوف يهز كيانه : يبه انت معي يبهه !!
بكت هيفاء تنطق لسهم : وش تنتظر انت وياه سوو اي شيء
بلع ريقه سهم بتكرار ورفع عيونه لسلطان ينطق : نط لمستوصف كلم الدكتور اللي ماسك حالته يجي الان اعجلللللل
طلع سلطان ورفع عيونه سهم لمنيف ينطق: تعال عاوني
ماكان من منيف الحركه يرتعب كثير من اللي يشوفه واللي تسبب فيه هو وامه وصرخ سهم ينطق : العن ثواك انا تعاللللل
نزل منيف يساعده لجل يرفعون ابوهم ونزلوه على السرير وجلس قدامه يمسح على وجهه وطلعت نوران من سمعت عجلان ينادي نزلت له تشوفه واقف امام الدرج مايقوى على صعوده اتجهت له تنطق وسط دموعها: جدي وش قومك !
عجلان : وش فيكم ابوك وش فيه !!
تقدمت تمسك ذراعه ونطقت وسط انهيارها : تعب علينا كله من منيف وامه ، تعال ياجدي تعال
عجلان وسط خوفه على جراح : منيف الله لايبارك فيك وين مااتجهه وجهك يامنيف
فتح سلطان الباب والدكتور خلفه يصرخ بكل ارجاء البيت لجل يسمعونه : ياولد طريققققق سهمممم طلع اللي عندك الدكتور معي اعجلوووو
قامت نوران تاخذ عجلان المجلس ودخل سلطان من قال له سهم يدخل طلع والدكتور خلفه لغرفه منيف وقام سهم من جنب ابوه من تقدم الدكتور له يلبس سماعته لجل يسمع نبضات قلبه وتقدم سهم ينزل لمستوى الدكتور ينطق : وش طلع معك !
لف الدكتور لسهم ينطق: نبضات قلبه مو مستقره هو تعرض لصدمه او زعل!
لف سهم يناظر منيف وصد منيف يطلع من الغرفة هز براسه ورفع يده يمسح على شاربه يخفي غضبه ويشد على كفوفه ، تقدم سلطان لسهم ولف سهم عليه
ينطق : منيف !
هز براسه سلطان وميل ثغره سهم بوعيد ورجع انظاره لابوه ولف الدكتور على سهم ينطق : لازم مستشفى سهم ماينفع رعايه صحيه ابدا يحتاج تخطيط قلب واشعه لعضلات القلب هو بيقوم بس ماراح يقدر يمشي ولا يتحرك من مكانه وزي ماقلت لك نبضات قلبه مو مستقره ابدا
زّفر سهم ينطق : يادكتور الله يرضى لي عليك المستشفى بعيد يبي لي ساعتين بالكثير عشان اوصل له شلون اخذه وهو كذا !
وقف الدكتور يتجهه لسهم ونطق : مثل ماانت عارف هنا مافي الا رعايه صحيه الاجهزه مو متوفر لا تخسر وقت وخذ الوالد عشان تتاكدون من سلامته
هز براسه سهم ونطق لسلطان : بروح اقرب الموتر خلك معه
مشى يفتح الباب ومن فتح كان منيف امامه تقدم له واعتدل منيف بوقفته ونطق سهم بغضب يجتاحه : راجع لك ياملعون الثوى راجع لك
ابعد عنه يطلع للخارج يتجهه لموتره ويقربه من البيت ونزل يرجع البيت يرقى للغرفه وتقدمو سهم وسلطان يرفعونه وينزلوه لسياره ، نزلت هيفاء تنطق لسهم من خلف الباب : سهم يمه وين بتاخذ ابوك !
تنهد ينطق بعلو صوته لجل تسمعه : بنسري المستشفى
هيفاء : زين اصبر بمشي معك
سهم : مايحتاج خليتس انا وسلطان معه بطمنتس مابه الا كل خير ان شاء الله
ركب موتره يتجهه للمستشفى شد على الدركسون يضغط برجله على الفرامل وعينه على المرايا يناظر ابوه وسلطان بالخلف ...
<< بيت الجده ضبيا >>
تنهدت إبتهاج من اصرار ساره ونطقت : زين بعلمتس علامتس ياساره اصبري جده تنام واساسا ابي اطلع اتطمن على هتوف
زفرت ساره تنطق : يالله إبتهاج من الصباح وانتي تقولين اصبري
إبتهاج : وش اسوي شايفه الشغل اللي على راسي من اصبحنا
لفو ثنيهم على دخول ضبيا عليهم تنطق : وش علمتس انتي وياها !
ساره : همم لا يمه ولا شيء قاعدين نسولف
ضبيا : اتركي البربره اقول وروحو اخمدو وراكم قومه بكره من بدري لدكان تودون البهارات مع محمود نواف ماهو بموجود مستلم الليله وبكره
هزت براسها ساره ومشت إبتهاج تتجه لغرفتها ، ولفت ساره تركض من شافت امها سكرت باب غرفتها تسحب إبتهاج معها شهقت إبتهاج من سحبتها ساره يطلعون للخارج جهه شبك النياق ،رفعت ابتهاج طرحتها تتلثم فيها
ونطقت : ساررهه شفيتس مطلعتني كذا افرضي محمود شافني !
تنهدت ساره تنطق : ماهو بحولتس يلا قولي لي وش صار !
مشت تفتح الشبك وتدخل لهتوف تاففت ساره تتبعها ونطقت إبتهاج: جاني محمود وقال لي انه عرفه وشافه عند بيتهم من كان بالحاره واسمه منيف
انا رحت وطلعت لي بنت وسالتها اذا هذا بيت منيف ولا لا ، وقالت لي اي قلت لها تناديه لي وطلع لي واحد انا على بالي انه منيف وصار اللي صار مااستحملت من شفته وصرت اسب فيه قال لي ماهو انا اللي اتخشخش على فعله عملتها عبالك وقفت ؟ لا كان يقول لي محمود مو هذا منيف
شهقت ساره تنطق بذهول: منجدتس شلون مين هذا اللي طلع لتس !!!
رفعت يدها تمسح على هتوف ونطقت : اخوه طلع
ضربت ساره على وجها بقهر : ياويلي وش ذنبه هو !
رفعت اكتافها بعدم معرفه ونطقت: وش دراني انا قلت للبنت نادي لي منيف مو اخوه وانا يوم شفته انحرق قلبي على هتوف وماقويت امسك لساني
ساره : يالله انا انحرجت كيف انتي !
ابتسمت إبتهاج تنطق : لا تنحرجين ولا شيء لانه حتى هو ماقصر
ضحكت ساره تنطق : لا والله وش قال لتس!
إبتهاج : ماادري شلون شايف نفسه مااعجبني اسلوبه يعني يتساهل ماجاه تخيلي وش قال لي !
ساره : وش قال لتس ؟
ابتهاج :سالني وش سوا منيف وقلت له انه صادم ناقتي قال لي على بالي انه صادم واحد من اهلك على هالصراخ وطولة اللسان
ضحكت سارة وضحكت إبتهاج من ضحكتها ونطقت : وش يضحك !
ساره : صراحه زين سوا فيتس على التهجم اللي جاه
رفعت حاجبها إبتهاج تناظرها وضحكت ساره تنطق : اسفين اسفين
ابتسمت ترجع انظارها لهتوف ....
تافف يناظر الطريق رفع عيونه للمرايا ونطق سلطان من تحرك ابوه يفتح عيونه : قام قام
لف سهم يناظره ونطق جراح يحاول يتسوعب وش حصل له : سلطان !
سلطان : يبه خلك قربنا على المستشفى
لف جراح لسهم ينطق : وش اللي صار !
تنهد سهم ينطق : للحين ماندري بس راح ندري ان شاء الله
انتهى طريقهم للمستشفى ونزل ينادي الممرضين وطلعو يتجهون لسياره يرفعون جراح على السرير ودخلو المستشفى يتجهون لقسم الطواري بجراح اللي كان بالسرير وصامت من شده تعبه وعياله خلفه ، دخل الدكتور يفعل اللازم وهم امام الباب زفر سهم يسند ظهره على الحايط يهز رجله بتوتر يعيشه وغضب يجتاحه ، مشى سلطان يبتعد عنه يمسك جبينه يغمض عيونه بخوف شديد على ابوه ، نزل راسه سهم لجواله اللي كان يدق بجيبه طلعه يشوف رقم امه بلل شفايفه يرد عليها : سمي يمه !
بكت هيفاء تنطق وسط بكاها : سهم يمه طلبتك طمني قولي لي شيءٍ
يريحني !
بلل شفايفه يسمع بكاها ونطق بهدوء نبرته: تونا دخلنا
سكتت تجهش بالبكاء تنهد سهم ينطق : يمه تعوذي من ابليس مابه الا العافيه
سكرت المكالمه هيفاء ماتقوى على لفظ حروفها ، غمض عيونه يرجع الجوال بجيبه ومشى سلطان يتجهه له ونطق : امي !
هز براسه سهم ونطق سلطان : ودي اعرف وش صار وش اللي وصله للمرحله ذي نوران تقول تهاوش مع منيف وامه
زفر سهم ونطق : لعنبو منيف وامه
لفو على طلوع الدكتور وتوجه سهم له ونطق الدكتور : ولده !
هز براسه سهم ونطق الدكتور : هو عنده ضغف بعضلات القل...
قطع كلامه سهم ينطق : عندنا علم بهذا يادكتور وش اللي طلع معك غيره !
وكمل الدكتور كلامه : سوينا تخطيط ونبضات القلب مو مستقره لازم يبتعد الفتره ذي عن كل شيء يضايقه ننتظر حاليا الاستشاري يجي ونحدد اذا يطلع الليله ولا يبقى عندنا
سلطان : نقدر ندخل عنده !
هز براسه الدكتور ومشو يدخلون وتقدم سهم لابوه يجلس بالقرب
منه ينطق : جعله بضلوع صدري عنك
جراح وسط تعبه : مجار
تقدم سلطان بالطرف الثاني ينطق : يبه انت طيب وش تحس فيه ؟
جراح : طيب طيب وانا ابوك ماعلي خلاف
ابتسم سلطان ينطق : ادري بك تقول كذا لجل ماتقلقني عليك
رمش جراح بخفه ينطق : والله اني طيب
صد سهم يخفي التساولات اللي فيه حول الناقش اللي جمعه مع منيف ولف من مسك يده ابوه ينطق : خابرك وش قاعد تفكر فيه و انك معصب ونار تاكل جوف صدرك ، رفع يده جراح لطرف شاربه : طالبك تفكنا من هالدوشة اللي تدور براسك
شتت انظاره سهم ونطق وهو صاد عن ابوه : ابشر بالخير ابشر
ابتسم جراح ونطق : شلون هيفاء !
ابتسم سلطان بطرف ثغره ينطق: شافت جراح بهالحاله وش تتوقع يصير لها !
سهم : ادق لك عليها !
هز براسه جراح واخذ سهم جواله يدق على امه ونطق من سمع
صوتها : جراح قدامي وطالبني ادق عليك ودك فيه ياهيفاء !
بكت ونطقت وسط بكاها : سهم ! انت صادق احلف !
ابتسم بطرف ثغره يمد الجوال لابوه ، ابتسم جراح ياخذ الجوال
ونطقت هيفاء بغصه وسط حلقها : جراحح
عقد حاجبينه من صوتها ونطق : سمي ياخلف هلي كلهم !
لف سلطان على سهم ينطق : المكان يطلب فرقنا
ابتسم سهم ووقف يطلع من الغرفه وقم سلطان خلفه ينطق : حب الستين هذا مشكله ، ضحك سهم يجلس على ركبه امام الباب ..."
«بيت عجلان »
قفلت هيفاء من جراح من تطمنت عليه ولفت عليهم تنطق : يقول انه بخير الحمدلله
تنهد عجلان ينطق : بيطلعونه !
رفعت اكتافها بعدم معرفه ونطقت: والله ماادري ينتظرون الاستشاري
بكت نوران تحتضن هيفاء وشدت عليها هيفاء تنطق : خلاص ياحبيبتي والله انه بخير توه مكلمني
رفعت يدها مجد تمسح على دموعها تخاف الفقد بعد وفاه امها وابوها من صغرها ونطقت : جده تكفين لايصير فيه شيء
هيفاء : ماراح يصير له شيء ان شاء الله
زفر عجلان يرفع عيونه لمنيف اللي كان صامت
لفت نهله تناظر منيف وقام يطلع من بينهم وقامت خلفه
ولفت نوران تنطق بهمس : الله ياخذه ونرتاح منه
تقدمت هيفاء تنطق : اشش مو ناقصين .."
رفع راسه عجلان يسمع مجيد يدق الباب من الخارج وينادي سهم ونطقت هيفاء لزياد : قوم يمه زياد افتح الباب لمجيد
وقف زياد يطلع ويفتح الباب ونطق مجيد من شافه : هلاااااا انت للحين صاحي !
هز براسه زياد ونطق مجيد بابتسامه: شلون الدراسه !
ابتسم زياد ينطق : زينه الحمدلله
صغر عيونه مجيد ينطق بضحكه : زيننههههه اي كفو لاتطلع على خالك
ضحك زياد ونطق : سهم !
هز براسه مجيد ينطق : اي هو ، بقولك سر بس قبل اقولك انت تحفظ السر ولا لا !
هز براسه زياد ينطق : اي قول
مجيد بصوت خافت : خالك كان كسلان ومشاغب بالمدرسه وكل المدرسين طايحين طق فيه عشان كذا ماعاد كمل دراسته بس انت خلك شاطر مو زيه وتفشلنا انت وش تبي تصيراذا كبرت !
زياد : طيار
رفع حاجبه مجيد باعجاب ينطق : العبببب والله منت بسهل زين اسمع اذا كبرت وصرت طيار ابي تسوي لنا مطار هنا بالديره
زياد بصدمه : شلون مطار هنا !
ضحك مجيد بعلو صوته ينطق : امزح امزح معك بختبرك بس
ضحك زياد ونطق مجيد: خالك وينه !
زياد : مو هنا
رفع حاجبه مجيد ينطق: شوف الحيوان وينه اجل !
زياد : بالمستشفى مع جدي جراح
ارتخت ملامح مجيد ينطق : ليه وش فيه جدك !
رفع اكتافه بعدم معرفه ونطق : تعب واخذه خالي سهم وخالي سلطان المستشفى
مشى مجيد يركض لبيت عبد العزيز يطق الباب وينطق بعلو
صوته : عزيززززززز ياهو ياعزيززززز ولدد ياولد صقر ياولد عمي
طلع عزيز يفتح الباب ونطق : بسم الله الرحمن الرحيم علامك !
زفر مجيد يلقط انفاسه : اقولك عمي تعبان واخذوه المستشفى
رفع حاجبه عبد العزيز ينطق: لييه وش صار له !
مجيد : مدري مدري اسمع جوالي بالبيت جيب جوالك دق على سهم ولا تقول لابوك
هز براسه عبد العزيز يركض لداخل ياخذ جواله ، ويرجع لمجيد يدقون على سهم فتح الاسبيكر ورد عليهم ينطق : نعم !
مجيد : سهم وينك فيه !
سهم: اتمشى واشرب شاهي ومزاجي عال العال
تافف مجيد ينطق : هاهاهاي ماشاء الله عليك خفيف دم وش فيه عمي
سهم : دامك تدري وش له تسال !
تنهد عبد العزيز ينطق : شفيه عمي وش جاه !
زفر سهم ينطق بغضب : من ملعون الرقبه منيف جعل شمس ربي ماتشرق عليه
عقد حاجبينه مجيد يناظرعبد العزيز ونطق سهم : الدكتور جاء يلا
قفل سهم من جاء الدكتور وتنهد مجيد ينطق:شف الحيوان !
عبد العزيز : ياولد منيف هذا وش طينته !
تافف مجيد ينطق : بيذبحه سهم
عبد العزيز : امش نروح لجدي
هز براسه مجيد ومشو يتجهون لمجلس عجلان ..."
<<قبل الفجر بساعه >>
وقف سهم موتره امام البيت ونزل سلطان يفتح الباب من جهه ابوه وتقدم سهم يدخل تحت ذراع ابوه ويساعده بنزول ومشى سلطان يفتح الباب
ونطق جراح : ودوني المجلس ماراح اصعد فوق
هز براسه سهم يدخله المجلس ووقفو العيال مجيد وعبدالعزيز يتجهون لجراح ونطق عجلان : يارب لك الحمد جيبه هنا ياسهم
مشى سهم يسند ابوه ويجلسه جنب عجلان ونطق عجلان لجراح : بشرني والله ان قلبي مشغول عليك عساك طيب !
ابتسم جراح ينطق : ابشرك يبه على ماتحب ماعلي خلاف
زفر عجلان ينطق : لك الحمد والشكر جعلها دايمه
مجيد : سلامتك ياعمي ما ترا بأس
جراح : الله يسلمك يا مجيد
عبد العزيز : طهور ياعمي طهور وتكفير ذنوب ماصابك ان شاء الله
جراح : اي والله الحمدلله
تنهد سهم يجلس ومشى مجيد يجلس جنبه : ليش ماقلت لي ان عمي تعبان !
لف سهم عليه ينطق: انت صاحي تبيني افكر باحد ذاك الوقت !
مجيد : اي لازم تقول لي
تنهد سهم ونطق : عض على شحمه انا اقول
تقدم سلطان يجلس جنب ابوه ونطق جراح بهمس: شوف لي منيف وينه
ارتخت ملامح سلطان ينطق: يبه وش تبي بمنيف مو وقته !
لفو على دخول منيف من اصرت عليه نهله بالنزول ، ورفع يده سهم يمسح على شاربه شد بكفه ونزل انظاره مجيد له ينطق بهمس : مو وقته سهم زين مو وقته ، بلل شفايفه يسيطر على غضبه
ونطق منيف لابوه : سلامتك يبه ماتشوف شر تكفير ذنوب ماصابك ان شاء الله
رص على اسنانه وضحك بغضب يهز راسه ، ابتسم منيف يناظره ويتمتع بغضبه ، لف سهم يناظره ونطق : ليت غيره يكفر ذنوبه واحطها بذمتي انها جبال وبعدين انا اقول ادع ان الله يسلمك انت
تنهد جراح ونطق عجلان بحده : سهمم اقطعها
رفع عيونه سهم لعجلان ينطق : ايي خليكم كذا خلونا نشوف النهايه معكم الكلب ذا يغلط وانتو اسكتو له ، وقف يطلع من المجلس كله مايتحمل الجلوس قباله ابدا تافف يمشي بالحاره وزفر كل مافيه من شعور ونطق : يابري حالك يا سهم برياه واحد نفس منيف قاعد يسوي بك كذا تافف بضيق : لجل جراح ياسهم تمالك نفسك وش هالمصيبه اللي ابتليت فيها انا يارب ارزقني بما رزقت ايوب
نزل انظاره لخطواته ، ومشى يتجهه للمزرعه يمشي فيها يناظر النخل والسعف سند ظهره على النخل يرفع ثوبه بيده ونطق : بتعم في صدري الفوضى وتحتله واعيش في حزني وفى خيبة أمالي ، تنهد وسط فضفضته اي بالله اني داخل فوضى الله ينجينا منها رفع انظاره يناظر السماء وطلوع الفجر...
صدى صوت الاذان بكل ارجاء القريه معلن دخول صلاة الفجر تنهد يردد مع الاذان وطلع من المزرعه يسكر البوابه خلفه وتوجهه للمسجد يتوضى ويستعد لصلاة يوقف بأول الصفوف يادي فرضه ويدعي ربه تنهد يمسح على وجهه بضيق يجتاحه ويسيطر عليه ماتعود يكبت غضبه بس اليوم بذات هو مجبور على كبته لان الموضوع يوصل لابوه وقف ياخذ له قران من احد الرفوف يقرا له كم آيه تهديه وترده لصوابه وثباته سكر القران ونطق بيقين
تام بالاستجابة : يارب اني داخل عليك اللهم إني وُكلتك أمري فكن لي خير وكيل ودبر لي أمري فاني لا أحسن التدبير، وقف بيطلع من المجسد يناظر الدنيا المظلمه للحين لبس نعاله والتفت وسرعان ماعقد حاجبينه يشوف محمود ونطق : هذا انا وين شايفه ! ايههه الا هو هوو
مشى سهم خلفه يتبعه وعقد حاجبينه ينطق : هذا بيت العجوز ! شلون ؟ مشى خلفه يتوجهه لشبك الإبل مشى سهم لمحمود ينطق : سلام عليكم
ارتعب محمود يلتفت له ونطق : بسم الله الرحمن الرحيم ؟
رفع حاجبه سهم ينطق: شايف جاثوم وش تسمي له !
صغر ملامحه ينطق : انت اخو منيف !
تافف سهم يصد بانظاره وينطق بهمس : امحق اخوه
رجع انظاره لمحمود وهز براسه ينطق : زين انك تعرفني ذاكرتك زينه ماشاءالله عنك
محمود : ويش جابك !
صد سهم مايرد عليه وتقدم لشبك ياشر عليه وينطق : تعال افتح
رفع حاجبه محمود بذهول يناظره ونطق سهم بحده : يلاااا افتحح
هز براسه محمود بنفي ونطق : لييش افتح لك !
تافف يمسح على وجهه ونطق : بشوف ناقة عمتك تعال افتح اعجل علي
هز محمود راسه بنفي من جديد وزّفر سهم ينطق : شوف نفسيتي براس خشمي وماني طايق ثوبي عشان كذا تعال افتح لافرغ كل اللي بجوف صدري فيك اعجللل
محمود : انا اشتغل هنا وماعندي اي حق افتح الشبك بدون ماتدري العمه
ضحك بسخريه سهم ينطق : منت بعاقل والله ودك تنجر مع اذنك ماانصحك امشي لك بتندم واجد بعد مو شوي
سكت محمود يناظره ومشى سهم بغضب ونطق محمود : بفتح بس لاتطول
وقف سهم بخطاويه ونطق : اي اعقل معليك ماني مطول اعجل علي بس
تقدم محمود يفتح القفل ومشى سهم يدخل بين الإبل ونطق : وينها !
اشر محمود على هتوف وهو يتلفت بخوف لان هالوقت وقت طلوع إبتهاج ومشى سهم لها ونزل انظاره لعرقوبها تقدم ينزل لمستواها ونطق بهمس : حتى انتي لتس نصيب من منيف !
طلعت من البيت تتجه لشبك وتاففت من شافت الشبك مفتوح ، التفت من سمع صوتها تنطق : محمود ليش فاتح الشبك كم مره اقولك سكره انت تبيني اعيد الكلام اكثر مره ولا وشلون صاير ماتفهم يامحمود ونفسي تراودني اغيرك واجيب غيرك
زفرت بضيق تجلس على ركبها تنزل الطاسه وتحلب من الناقه انتهت توقف على حيالها ، لفت بتطلع وسرعان ما شهقت من شافته تطيح الطاسه من يدها بلعت ريقها تعض طرف شفتها بتوتر يرتعش نبضها واطرافه جسدها وكل مافيها ، نزل انظاره لطاسه والحليب الخالي منها ونطق بثقل صوته : وشو له هالخوف ما اكل ترا !
ينبض قلبها بشده بهالحظه تخاف كل شيء تعجز عن لفظ حرف واحد يفسر لها اسباب جيته ووقفته قبالها وخصوصا بهالوقت ، هز براسه سهم ينطق : صار لازم نعوضك مرتين
ابتسم بسخريه يشوف رجفه اهدابها وكفوفها ونطق: انبلع لسانك !
رفعت يدها تعدل لثمتها ونطقت وسط رجفة صوتها : وش جابك !
رفع حاجبه بعدم معرفه ونطق: جاي اشوف ناقتك وفعله اخوي واحدد اذا تستاهل الكلام اللي توجهه لي او لا !
لفت تناظر محمود اللي كان خلفهم ونطقت : انت شتبي مني قلت لك سوء فهم على بالي انك منيف مادريت انك اخوه انتهى مابي تعويض ولا ابي شيء منكم بس فارق كنت اضن اني غلطت معك بس طلعت تستاهل الكلام اللي توجهه لك
رفع حاجبه وبان طيف ابتسامه على مُحياه ونطق : الضنون تمثل اهلها يابنت الاجواد سلام عليكم
مشى يطلع والتفتت تناظره من رجع ينطق بدون مايلتفت لها : ماتشوف شر ناقتك
ونطقت بدهشه : يويلي عليتس يا إبتهاج وش سويتي بعمرتس ابليتي نفستس بهالمريض!
لفت على محمود تنطق : شلون جاء !
رفع اكتافه بعدم معرفه ونطق : والله ما اعرف طلعت من المسجد وماوصلت هنا الا هو وراي سالته وش يبغى يقول لي افتح الشبك بيشوف الناقه
زفزت بخوف ومشت ترجع للبيت دخلت المطبخ تسحب طرحتها وتنزلها على اكتافها تحرر شعرها ونطقت : الحمدلله ان عمي مو موجود ولا كان صارت علوم حسبي الله عليك ناقصتك انا
دخلت ساره ونطقت : هاه إبتهاج خلصتي عشان نطلع بدري ؟
عقدت حاجبينها ساره ماتشوف ردها ونطقت : إبتهاج بنت ياهو !
همهمت لها تستوعب وجودها ونطقت ساره : وين دماغك قاعده اتكلم وش تفكيرين فيه ؟
إبتهاج : معك معك ياساره
رفعت حاجبها ساره تنطق : لا والله وش كنت اقول !
بللت شفايفها لانها حرفيا ماكانت تدري وش تقول ونطقت : وش تبين ساره!
ضحكت ساره تنطق : ايي ان داريه انك مو يمي ، اقول خلصتي الفطور !
هزت راسها بنفي ونطقت : ماسويت شيء ساره
بققت عيونها ساره تنطق : تستهبلين ضبيا بتاخذ روحي انا وياك بسرعه
تنهدت ابتهاج وبدات تجهز الفطور معها وكل مافيها ساهي...."
_______________
زًفر بغضب ومشى يدخل البيت فتح الباب وابتسم يسمع امه ومشى يدخل الصاله ونطق : جعل حسك يملي ارض عجلان ياهيفاء
لفت عليه وابتسمت بوسع ثغرها تنطق :بعد روحي ياسهم
ابتسم بطرف ثغره ومشى يحط راسه على فخذها و يغمض عيونه ، تنهد يفتح عيونه من جديد من نزلت مجد تركض ونطق بثقل صوته : وش عندتس يامجد وش عندتس!
تقدمت تجلس على طرف الكنب بالقرب منه ونطقت : ابيك توقع على ورقه تعهد ، المديره اعطتني تبي توقيع ولي الامر لو سمحت ياسهم ياخالي الجميل خط قلمك على الورقه عشان اعيد الاختبار
رفع يده لجيبه العلوي يطلع قلمه واخذ الورقه يسندها على ركبته ونطق : لا تنعاد ياخالي سامعه عشان ماانفض الورقه بوجهتس
ضحكت هيفاء وقوست شفايفها مجد تنطق : ماتقدر ياخالي ماتقدر
رفع حاجبه سهم ينطق بسخريه : ايي هين
نزلت راسها تقرب من اذنه تنطق بهمس : شدعوه عليك ادري انك تموت علي واني غير عندك ، رفعت راسها ونطق سهم : ما اداني الثقه يابنت الغاليه
أبتسمت بطرف ثغرها ونطقت بحزن : ولاني بنت الغاليه قاعده اقولك هالكلام
تنهدت هيفاء تنطق: الله يرحمهم يا رب
وقفت مجد تنطق: يلا باي خالي سلطان برا واكيد زياد طلع
لفت تطلع وفز سهم يسمع صراخ نوران ونطقت هيفاء تناظر
جهه المطبخ : هاذي نوران !
رفع راسه سهم يسرع بخطواته ودخل المطبخ يشوف نوران ويد منيف المرفوعه عليها ونطق بحدة صوته : منييفففف !!!!
التفتت منيف لسهم ومشى سهم يوقف قدامه وينطق بغضب من اللي شافه : ماد يدك عليها !
بكت نوران والتفت سهم عليها ينطق : قولي لي مد يده عليتس والله لاخلي الدنيا كلها تحاول تفكه من يدي وماتقوى !
نطقت هيفاء بحده وغضب : منيفف وبعدين معك انت !
منيف : ربي بنتك يازوجه ابوي ربيها لسانها طايل واجد وان كانك عاجزه انا بتكفل بالمهمه ولا يهمك نعين ونعاون
رفع يده سهم لدقن منيف يدفعه للخلف ونطق : اقطع واخس انت يالواطي تبي تعلم امي شلون تربي !
بكت نوران تتوجه لامها تدخل بحضنها ونطقت هيفاء لسهم بحده لجل يبعد عن منيف : سهممم ابعد عنه ابعد قاعده اقولك
رص على اسنانه يشد على دقن منيف بقوته ونطق بهمس : لاتختبر صبري منيف منت بقدي بندمك واخلي دموع نهله ماتجف عليك
ضحك منيف بسخريه ورفع يده ليد سهم المستقره على دقنه ونطق : نهله ماتدمع عيونها الا من فرح غيرها تعقب ياصبي عجلان
صرخت هيفاء من طلع سهم السكين من الدولاب اللي كان خلف منيف بالضبط لعنقه ونطق بصراخ ووسط انفعاله : اهد فكك والله اهده واحفر قبرك بيدي واخلي الناس تقيم ببيت عجلان ثلاث ايام واخلي انين امك يوصل لاخر بيت بالديره هاه منيفف ودك اعلمك انت وامك مين الصبي فينا !
ارتعد داخله بخوف من السكينه اللي كانت على حدود عنقه بلع ريقه ماينطق بحرف ، وتقدمت هيفاء تنطق وسط خوفها ودموعها من انه يتهور: لاااا يمه لا تكفى طلبتك هات اللي بيدك والعن ابليس لاتخليه يسيطر عليك هذا مو حل موحل امي انت هات سهم انا ماربيتك كذا !
صد مايناظرها وركضت نوران تطلع من المطبخ تدخل المجلس تدق الباب من كان مجيد وعزيز بالمجلس : تكفون احد يلحق على سهم بيذبح منيف
بقق عيونه عجلان وفزو العيال ونطق جراح بخوف لانه ادرا بتهور سهم من يعصب ويدري باستفزاز منيف له لجل يظهر غضبه : يارب اني في وجهك وقف جراح ونطق عجلان : خلك انا بروح له
وقف عجلان يسند نفسه على معكازه ويتوجه للمطبخ يسمع ترجي هيفاء لسهم دخل يناظرهم بذهول ونطق بحده : نزل اللي بيدك سهم نزلههه انجنيت انت ولا شلون تبي تذبح اخوك لعنبو خوتكم ياشيخ
رفعت يدها هيفاء لذراع سهم تنطق : هات يمه اللي بيدك هات حبيبي
دخلت نهله تسمع اصواتهم بالمطبخ وصرخت تشوف منيف والسكينه المستقره على عنقه : انتتت انجيت بتذبح ولدي مريض انت !!!
شد سهم على منيف ينطق : اي نعم وماعلى المريض حرج
بكت نهله ونطق عجلان : سهم نزل اللي بيدك قاعد اقولك انت ماتستحي امك قاعده تترجاك !
مشى عجلان يوقف بالقرب من سهم ونطق : اصحى على نفسك اللي قاعد تسويه لايرضى الله ولا يرضى رسوله انت تربيت على يدي وانا لايمكن اسمح لك تسوي شيء مثل هذا هات اللي بيدك انا انفدا وجهك
صد سهم يبلل شفته السفليه وهزت براسها هيفاء تنطق : اسمع كلام جدك ياحبيبي هات منت كاسب شيء غيرانك بتكسر ظهري باندفاعك من متى هيفاء تهون عندك !
اهتز كيان سهم من تقدم عجلان يقبل جبينه يترجاه لايخطي خطوه يندم عليها عمر ، دفع منيف لحضن نهله ورمى السكينه على الدولاب من خلفه وطلع من المطبخ يفور من غضبه سكر باب البيت بقوته يزفر انفاسه وطلع مجيد من المجلس خلفه يوقف عنده ونطق : العنه يابو جراح العنه علي بالحرام انه حولك انفث يسارك انت سهم يعقب منيف وكلامه يخليك ترضخ لابليس
تافف يمسح على شاربه ويفتله يخفي غضبه وعروق جبينه المتفجره من شدة غضبه ونجاح منيف باستفزازه مشى يطلع من الحوش يتوجهه لدكان ومجيد خلفه دخل سهم يسحب الكرسي ويجلس ورفع يده يفك عصبته اللي على راسه وينزل شماغه على اكتافه ويفرك عيونه ، عقد حاجبينه شهاب يناظر مجيد واشر له مجيد يسكت ونطق سهم بندم : استغفر الله العلي العظيم من كل ذنب عظيم
نزل يدينه ياخذ قاروره المويه اللي كانت امامه يفتحها يشرب نصها والنص الثاني يغسل فيه ملامح وجهه يحاول يطفي نار غضبه
رجع ظهره على الكرسي وتقدم مجيد يمسك كتفه
ونطق : ياولد تعوذ من ابليس
تنهد سهم يهز براسه وينطق :الله يلعنه
شهاب بتساؤل: وش العلم وش فيكم ؟
زفر سهم ينزل راسه على طاوله المكتب واشر مجيد للعم شهاب واكتفى بانه ياشر له بان كل اللي بسهم اسبابه منيف ، تنهد شهاب يهز براسه ، ورفع راسه سهم
ينطق : مجيد خلك مع العم شهاب بروح مشوار وراجع
هز براسه مجيد ووقف سهم يلف شماغه من جديد على جبينه المصاب للحين يخفي الشاش بعصبته وطلع من الدكان ، ورفع حاجبه يشوف الوانيت الواقف امام الدكان المقابل له ارتخت عقدت حاجبينه يشوفها واقفه امام الوانيت ومحمود اللي ينزل الكراتين لدكان مسح على شاربه ينطق : الاقدار شائت يابنت الاجواد اشوفك مرتين بيوم ، ضحك بسخريه وتكتف يناظرها من كانت بعز انشغالها مع محمود و بساره اللي كانت ترتب العلب على الرفوف ، عقد حاجبينه من طاح احد الكراتين من يدين محمود على الارض تتكسر العلب بداخله رجعت للخلف يصفق ظهرها على باب الدكان وطلعت ساره من الدكان تنطق : بسم الله عليتس ، شفيك يامحمود ماقمت تشوف !
ونطق محمود بخوف على إبتهاج: جاك شيء ياعمه !
عضت على شفتها تنحني لكعب رجلها اللي يتصبب منه الدم وسرعان مارفعت راسها من سمعت صوته
ينطق : انكسر الشر
بلعت ريقها بتكرار تناظره بذهول ورفع حاجبينه لها ياشر خلفه و ينطق : المستوصف بنهايه الحاره كانك ودتس بزياره له
عقدت حاجبينها ساره باستغراب ، ونطقت ابتهاج
بانفعال : يالله ياربي ارحمني محد طلبك يامسلم اذلف
عن وجهي
رفع حاجبه سهم ومشت إبتهاج تسند كفها على الباب وتدخل الدكان وساره خلفها دخل محمود يسحب كرسي لها لجل تجلس عليه ونزلت ساره تناظر
كعب رجل إبتهاج وتنطق : مين هذا !
«امام الدكان »
مذهول من نفسه شلون انه قاعد يسكت لها ونطق
بهمس : لانتس حرمه قاعد اعديها ولا كان اللي بكعب رجلتس يسري بجسمتس كله
مسح على شاربه وصغر عيونه وتقدم يوقف بمكانها اللي كانت واقفه فيه نزل بظهره يرفع الخلخال يناظره بيده من طاح من رجلها وكان من نصيبه ابتسم بطرف ثغره ووقف يدخل الخلخال بجيب ثوبه ومشى يخلص مشواره ...
تاففت ترفع عيونها لمحمود وتنطق : يالله محمود شفيك صاير كذا !
تكتف يناظرها ونطق : انا اعتذر ياعمه والله ماشفتك
زفزت تناظر كعب رجلها وساره اللي تصب علبه المويه لجل توقف دمها
ونطقت ساره : إبتهاج علامتس قاعده اتكلم انا
رفعت عيونها إبتهاج لمحمود الواقف ويناظرهم : جيب شاش منديل اي شيء محمود ، هز براسه ومشى يطلع من الدكان ونطقت إبتهاج : هذا اخو منيف اللي قلت لتس عنه
بققت عيونها ساره تنطق بذهول : نعم ! خير وش يبي !
رفعت اكتافها إبتهاج بعدم معرفه ونطقت : ما ادري ساره ما ادري شلون وكيف لو تدرين انه بعد الفجر كان عند البيت !
ارتخت ملامح ساره تنطق بصدمه : تمزحين شلون وش يبي ذا !
زّفزت إبتهاج تنطق : يقول انه جاي بيشوف هتوف ساره الظاهر ان دخلت نفسي بمصيبه ، والواضح انه ماراح يخليني وهو كل شوي والثاني طالع بوجهي
رفعت يدها ساره لقلبها بخوف ونطقت : يمه إبتهاج نواف لو يدري بتصير سالفه
تاففت إبتهاج ورفعت يدها تعدل لثمتها وتنطق : وش اسوي ساره عطيني حل !
وقفت ساره تمشي بالدكان مسحت على عيونها تنطق : وين بيتهم !
عقدت حاجبينها إبتهاج بعدم فهم تنطق : ليه !
مشت ساره لها تنطق : ساره نواف لو يدري بيذبحنا وانتي تعرفينه بيسوي لنا سالفه الله رحمتس انه مداوم تخيلي لو انه شافه يوم جاء عند البيت ! فكرتي وش راح يصير ؟
بلعت ريقها إبتهاج تنطق : ادري ساره والله ادري بس وش اسوي انا ماتوقعت الموضوع بيوصل لدرجه انه يجي البيت بعدين واضح انه مايهاب احد ولا وين احد يسوي كذا !
زفرت ساره تنطق : اليوم نواف بيرجع بالليل لازم نشوف حل للمسخرة ذي
رفعت حاجبها إبتهاج تنطق : انتي تستهبلين ولا وشلون وش تبين نسوي !
ساره : نروح البيت يمكن تطلع امه اخته اي احد نكلمهم
ارتخت عقدت حاجبين إبتهاج تنطق : تمزحين صح !
هزت راسها ساره بنفي تنطق : لا ما امزح منجدي قاعد اتكلم
ضحكت إبتهاج بسخريه تنطق : اقول سوير انثبري
لفت ساره على دخول محمود والشاش بيده ونطقت
ساره : محمود وين بيت اللي صدم هتوف !
لف محمود ياشر على البيت اللي كان بنهايه الحاره ، هزت براسها ساره وهي تطلع ، شهقت إبتهاج ووقفت خلفها تنطق : ساره عله آن شاء الله وقفي بنت !
مشت ساره تتجه للبيت وإبتهاج خلفها تنطق : حسبي الله عليك يا محمود سويررر وعمى وقفي ماني قادره امشي
دخلت ساره من البوابه تتجه للبيت طلعت مع الدرج تدق الباب ، ركضت إبتهاج تمسك يدها تمنعها تدق
ونطقت : انتي صاحيه ولا علامتس بتفضحينا كذا ماراح تحلين الموضوع ابد يكون بعلمتس يعني !
تاففت ساره تسحب إبتهاج خلفها وترجع تدق ، بلعت ريقها إبتهاج من نطقت نوران من خلف الباب : مين !
ونطقت بهمس وسط خوفها : يويلي ساره تكفين خلينا نمشي
ساره : افتحي
فتحت نوران من سمعت انها بنت ودخلت ساره وإبتهاج خلفها
ونطقت ساره : سلام عليكم
هزت براسها نوران تنطق : وعليكم السلام ياهلا مين انتي ماسبق لي شوفتس !
لفت ساره تناظر حولها ونطقت : ولا انا ، جايه ودي اتكلم معتس وبمشي
عقدت حاجبينها نوران تنطق : تفضلي !
سكرت نوران الباب ومشت ساره و إبتهاج جنبها تنطق بهمس : ساره تكفين !
تنهدت ساره تنطق بنفس نبرتها : اشش اسكتي
اشرت لهم نوران يدخلون مجلس الحريم ودخلو يجلسون ونطقت نوران: بجيب لكم شيء تشربونه
هزت رأسها ساره بنفي ونطقت : لا الله يكرمتس بالجنه تعالي اجلسي ماعندنا وقت بنكلمتس ونمشي
جلست نوران امامهم ونطقت ساره : شوفي ياطويله العمر انا ساره وهاذي بنت اخوي وجايين نبي مساعده منتس
رفعت حاجبها نوران ماتفهم شيء ابدا ونطقت : سمي اذا اقدر عليه وبين يدي اعتبري انه صار !
ابتسمت ساره وبدات تسرد لها كل شيء تحت صدمه نوران ونطقت نوران بذهول وعدم استيعاب من اللي سمعته : لحظه شوي ممكن توصفين لي شكله
إبتهاج : طويل عنده شارب بس ويلف عصبه على راسه
مسحت نوران على وجها بذهول ونطقت : مستحيل سهم يسويها
إبتهاج بذهول : اسمه سه....
تأوهات بالالم من كوع ساره اللي استقر ببطنها يمنعها تكمل كلمتها ونطقت نوران من تذكرت : اهاه انتي اللي جيتي عند الباب اي عرفتس من الصوت
هزت براسها إبتهاج تنطق : انا على بالي انه منيف والله ماكنت ادري انه يصير اخوه
ساره بحده : على العموم كل اللي صار سوء فهم لا اكثر ولا اقل فهمي اخوك اننا بنات ناس واللي قاعد يصير استهتار ولا نبي منه شيء بس يفكنا من هالتصرفات اللي مالها وجهه
وقفت ساره وإبتهاج ونطقت نوران : ما ادري وش اقول لكم صراحه انا مصدومه لن سهم مو مثل ما انتو متوقعين ابدا اخوي واعرفه بس ابشرو بحل الموضوع اوعدكم تقدرون تتطمنون
هزت براسها ساره ونطقت إبتهاج : زين مشكوره بس ولا عليتس امر لحد يدري
ابتسمت نوران تهز براسها : ابشري من عيوني محد عارف
ابتسمو البنات ونطقت نوران : بعطيكم رقمي لحظه قبل تطلعون
إبتهاج : تعالي سجليه بجوالي
هزت براسها نوران ترجع لهم واخذت الجوال من يد إبتهاج تسجل رقم جوالها ونطقت : اسمي نوران وتشرفت فيكم والله كان ودي تجون واتعرف عليكم بطريقه افضل من كذا
ابتسمت إبتهاج تنطق : ولا يهمتس حصل خير
مشو يطلعون وسكرت نوران الباب من خلفهم تنطق بصدمه من اللي
سمعته : يالله انا متاكده في شيء غلط ولا سهم يسوي كذا من متى !
مشت تتجه للمجلس ونطقت هيفاء من شافتها : مين !
نوران: الاطفال اللي برا
ابتسمت هيفاء تنطق : اي ياحليلهم ، جلست نوران تفكر شلون تحل هالمشكله
ودخلت نهله تنطق لعجلان : البشاره ياعمي !
نزل عجلان نظاراته ويقفل الكتاب اللي بيده ونطق : هاتيها !
ضحكت نهله تتجهه له : اخوي وافق وينتظرون منا زياره
...
انتهى ✅
قراءه ممتعه
تعالو انستا Sr_h11224
من طول الغيبات جاب الغنايم 🤎
