حدوتة السندريلا
كان ياما كان
كان في بنوتة رقيقة وقمورة اسمها سندريلا الحبوبة
ورثت طباع جميلة
من أم نادرة في الطيبة والاخلاق
واتنقل جمال روح مامتها اللي اتوفت
لجمال الشكل كمان
كان ليها اب طيب حنون اتجوز مرة تانية من ست يا ساتر
على طباعها متعجرفة مسيطرة ومعاها بنتين نسخة كربونة منها
طبعا مع طباعهم الشرسة حصلهم غيرة من جمال السندريلا
وابتدت الام وبناتها يستغلوها في تنضيف البيت
وخدمة البنات
لكن البنوتة كانت ودودة ومن كل كائنات الكون محبوبة
لكن المسكينة حتى باباها مقدرش يعارض مراته
لانها كانت غنية
وهي اللي بتصرف على البيت فكان بيشترك معاهم
ويقسو على بنته سندريلا
وفي يوم خبط الباب وجه مرسال وفي ايده رسالة
دعوة من الامير مكتوب فيها انه عامل حفلة كبيرة
وان سعيدة الحظ اللي هتخطف الفؤاد هتصبح هي الاميرة
طبعا الدعوة جت عل هوي الاختين وابتدوا يفكروا
ويحكموا على المسكينة انها تختار بذوقها الرفيع ليهم
اللي يليق عليهم ويحليهم
وبطيب خاطر اختارت بحب اجمل حاجة يلبسوها
وكمان عرضت عليهم تعملهم احلى تسريحة
وهي بتوضب فيهم سالوها بخبث ومكر
-ايه رايك يا سندريلا تيجي الحفلة معانا
ردت المسكينة: انتوا بتتريقوا عليا هو انا اقدر اروح حفلة زي دية
مسكتها مرات ابوها الشريرة وقالت
هو معقول تروح حفل كبيرة بهدومها القديمة
بعد مالبستهم ووضبتهم
وودعتهم بدموع في عينها
واحلام القصر جواها بتنده عليها
دموع السندريلا اثرت في الساحرة الطيوبة
وطبطبت عليها بحنان وقالت لها
نفسك تحضري الحفلة
ردت سندريلا من بين دموعها
نفسي.. نفسي
قالتها الساحرة طيب روح هاتيلي من الجنينة حباية قرع
وفعلا سمعت سندريلا الكلام
وجابت احلى حباية قرع
وحولتها الساحرة لعربية بديعة
وحولت عدد من الفيران والسحالي بعصاها السحرية
لخدم وحشم وخيول يجروها بأجمل جميلة
وبضربة بعصاها السحرية
حولت الساحرة سندريلا لأجمل حورية
واشترطت على السندريلا مع دقات منتصف الليل
لازم تسيب الحفلة وترجع في غمضة عين
لانها لو قعدت دقيقة زيادة كل حاجة هتعود لاصلها
هترجع لفستانها البسيط والعربية لحبة القرع والخيل للفيران
والخدم للساحالي
ووعدتها سندريلا انها هتسيب الحفلة وقت الميعاد تمام
وركبت الاميرة اللي سحرها تعشقه العين
لمحها الامير
واتخطف قلبه معاها بسحرها
وهوكمان خلى اوتار قلبها
تتاثر بسحر نظرته لها
وطبعا الكل بقى يقول مين تطلع الجميلة
والغيرة اكلت الاختين اللي قلوبهم شريرة
واتقدم الامير وانحني بهيام ومسك ايد الجميلة
ورقص معاها على نغم الالحان
واخدها معاه لعالم كله سحر وخيال
وسمعت سندريلا وهي في دنيا الخيال دقات الساعة 12
وجريت من الأمير ومع لخبطتها وقعت منها فردة جزمتها
وحزن الامير وفضل يدور على الاميرة
وامر الحراس بالبحث عن صاحبة الحذاء
لف الحراس على بنات البلد لكن الحذاء كان اصغر من اي مقاس
ووصل الحارس لبيت ست الحسن والجمال
استقبلوه الثلاثي المرح وطبعا مكانش ينفع تكون الرجل على اد المقاس
وسأل الحارس لو فيه حد تاني موجود معاهم
قالولوا فيه بنت غلبانة مش ممكن يكون ملكها
اصر الحارس لانها اوامر من الامير ان الكل لازم يجرب المقاس
وندهوا عليها بلهجة فيها ضحك وهمز
وجرب الحارس الحذاء اللي كان علي مقاس السندريلا تمام
وراحت لبست الفردة التانية كمان
وبضربة سحرية من الساحرة الطيوبة اتحولت البنوتة الخنوعة
لاجمل عروسة
واتعرفوا عليها الاختين وطلبوا منها السماح
قربت منهم السندريلا وقالتلهم انها بتحبهم ومن جوة القلب مسامحاهم
واتقابلت السندريلا مع الامير وكانت في عنيه اجمل الجميلات
وخطفها لبدء حياة تجمع بينهم وتكون سعيده.
