البارت الـ 17
فتحت عيني ولقيتها ع طرف السرير موطيه راسها ومغمضة . . النور ساطع مادري من وين . . صديت يمين لقيت الستاره مفتوحه والشمس تضرب بعيني . . تحركت شوي وفزت امي . .
اميه : مهـــــــــره . .
انا ابتسمت : اسفه واعيتج . .
اميه تي تمسح ع ويهي : شو ياج يا اميه شو ياج . .
تمت تحظني وتبوسني ع راسي وع خدي . .
اميه : ليش تغيبين عن الوعي . .
انا اطالعها بتعب : ماعرف . . كم صارلي طايحه . . ؟
اميه تطالعني : ماتذكرين
انا : مادري . . ساعتين ؟
اميه : ساعتين !!! انتي من كم يوم طايحه يا امييييييه . . تقومين شوي واطيحين . . تقومين شوي واطيحين . .
انا اغمض عيني . . وتمت امي ادقني . : مهره . . مهره . .
انا اطالعها بارهاق : خليني ارقد شوي . . شوي بس . .
ورديت اغمض وماعرف ليش هالتخدير كله . . انا متاكده يعطوني مخدر ولا منوم عشان ما احس ب عوق .. لكن انا ماعرف شو الي يعورني بسهم لا يعطوني . .
فتحت عيني مره ثانية ولقيت شهاب ع راسي . . شكله توه داخل لانه باس راسي وعقبها فتحت عيني .
شهاب يطالعني : انتي قمتتتي . .
انا اطالعه : لا تخليهم يعطوني مخدر . . اكيد يعطوني مخدر . . تعبت من النوم تعبت . .
شهاب بتردد واضح حطا ايده ع شعري وتم يمسحني : بتتألمين . .
انا اطالعه : انا بخيييير . . ما احس بألم والله . .
شهاب يتنهد . .
تميت اطالعه بحيره : انا شفيني . .
يندق الباب . .
شهاب : وليد بيدخل . .
ساعدني عشان ألبس الشيله وتغطيت . .
وليد دخل ويطالعني: واعيه ؟ " يطالع شهاب " ليش واعيتها . .
شهاب : بروحها قامت . .
وليد يطالع شهاب بنظرات غريبه . . متاكده مخبين شي بس ماعرف شو . .
شهاب يتنهد : بسير ايييب لج عشا . . شو فخاطرج . .
انا اطالعه : صدق بتيب لي
شهاب يطالعني : هههههه بييب لج الي تبينه . . شـو تبين . .؟
انا اطالعه : ماكدونالدز . . والله احس ابا اكله ماعرف ليش
شهاب يبتسم : ان شاء الله . . امش وليد . .
وليد يطالع شهاب . .
شهاب عاقد حياته : امششش . .
وليد : ياخي روح . .
شهاب : شو اتم وياها روحك . .
وليد : تشوفها مجسحه وطايحه شو بسوي فيها باكلها ؟ بكلمها . . انا اخوك ترى . .
شهاب : واخوها . .
وليد عاقد حياته : اعتبرني الحين بس اخوك وسو فيني خير وفارج . .
شهاب يبتسم وطلع . .
انا ركزت عيني عليه لين تقرب وبدال لا يقعد ع الكرسي القريب قعد ع السرير . .
وليد باهتمام واضح : انتي احسن . .
انا : هيه . .
وليد : تحسين ب عوق
انا : ما احس ب اي شي . . اصلا ما احس ان فيني شي ليش مخليني اهني . .
وليد يطالعني : انتي حاسه ب إلي انا اسويه
انا عاقده حياتي : شـ تسوي . .
انتبهت لـ ايده . . كان حاط ايده فوق اللحاف وقابض شي
انا عاقده حياته : شو ماسك . .
وليد يرص أقوى : مش عارفه انا شو ماسك . .
انا : لا . .
وليد يغمض عينه ويتنهد .
انا عقب استوعبت . . هو ليكون ماسك ريلي . . من غير ما احس قعدت ورفعت عني اللحاف وشفت ريلي مجبسه واطراف اصباعي عليها لصق وشاش ودم . . انصصصصصصصصصعقققققت . . كيف ما انتبهت . . انا متاكده اني قمت ورحت شفت امي واطمنت عليها كيف ما انتبهت اني مجبسه .!!! اصلا . . اصصصصصلا . . اصلا ليش قعدوني ع كرسي ذاك اليوم . .
تميت اطالع وليد بصدمه : شفيني . .
قعدت اطالع ريلي واحاول ارفعها مش قادره . . تخخخخخخخخخبلت . . تميت احاول واحاول . . ابي احرك اصابعي ابا احرك ريلي مول ماقدرررررت . .
صديت صوب وليد ومصدومه وعيني تغلغل دموع . . : وليد انا تشللت ؟
وليد يا صوبي ومسك ايديني الهنتين : انا بفهمج . .
انا اصيح ودموعي تنزل وصوتي بح : وليد تشللت انا . . شششوف ماقادره ارفع ريلي . . تشلللللللت
وليد يمسك ايدي بقوة : اشششششش . . ولا حرررف . . انا بفهمج . .
انا دموعي تنزل بغزره : شو تفهمني . .
وليد : اذا صحتي ما بقولج ولا شي اهدي . .
مسح دموعي بظهر ايده ورد قيض ايدي بقوه : موضوعين بكلمج فيهم اباج تسمعيني عدل . .
انا اطالعه . .
وليد : ريلج ما بيكون فيها الا العافيه . . الي فيج ما يتسمى شلل . . الشلل انج خلاص مالج امل تمشين لكن انتي بتسوين عمليه وبتمشين ان شاء الله . .
انا اطالعه ودموعي تنزل وبصوت هادي : شو كنتو تتريون طول هالفتره . . ليش ما سويتو لي العمليه . .
وليد : لا تصيحين قلتلج . .
سحبت ايدي عن ايده ومسحت دموعي . . : جاااااااوبني
وليد : كنتي تتألمين منها وايد والدكتور قال مآ
انا اصارخ واقاطعه : حتى لو اتاااااااالم ليش ما عالجتوني لييييييشششش
وليد : اشششششش . . افهميني " تقرب مني " تبين تتعالجين . . ؟؟
انا اطالعه عين ب عين وقابضه دمعتي وبصوت يادوب يطلع : اكيييد ابا اتعالج . . انا ابا امشي مابا اتم جيه مااابا
وليد : ماراح اتمين جيه . . والله ما راح اتمين جيه انا احلف لج ماراح اخليج اتمين جيه . . بتتعالجين وبوديج تتعالجيييييييين . . العلاج مضمون 100% فـ ألمانيا . . اهم شي تهدين الحين وتخليني افهمج كل شي بهدوء ورواق من غير صياح . .
انا اطالعه عقب هدوء وسكوت بسيط نزلت راسي : منو بيوديني . . منو عندي يوديني ويسفرني . . امي مريضه ماتروم ع السفر ولا تروم تراعيييني . . عنود حامل . . شهاب بعده يتلوم مني . . يدي ريال عود ياااااالله يشييل نفسسسه . . منو عندي يوديني " تميت اطالعه بتركيز وقلبي معصور عصر واحس بخنقه "
وليد يطالعني : ها الموضوع الثاني الي كنت ابا اكلمج فيه . .
انا اطالعه . .
وليد : خلينا نملج . .
انا اطالعه بصدمه اكثر . .
وليد : ادري . . مش الموضوع الي كنتي تبين تسمعينه
اقاطعه : طبعا لآآآآآآآآآآآآآآ . .
وليد يطالعني . .
انا : لو اتم طول عمري متشلله وما امشي راضيه لكن . ..
وليد يطالعني بصدمه : لكن ما تتزوجيني ؟ معقوله . . لهالدرجه
انا اطالعه . .
وليد : ها الي كنتي تبين تقولينه
انا : طبعا لا . .
وليد يطالعني يتريا مني جواب ويبين من ويهه انه يغلي غليان . .
انا : راضيه اتم بهالحال لكن ما استغلك . . اتزوجك عشان تعالجني . . لهالدرجه انا حقيره . .
وليد عاقد حياته : كيف يخطر ف بالج هالتفكير .. احنا جيه ولا جيه كنا بنملج وانتي ادرى كنا نتريا موافقه منو . . . !!! ميره بنفسها كلمتني . .
انا اطالعه : وليد اطلع خلني بروحي . .
وليد يطالعني : ليش تعقدين المسأله
انا اطالعه : انا ما اعققققققد شي ما اعقققققد شي . . بس انا توني طالعه من علاقه فاشله وخطبه فاشله ماقدر ادخل بعلاقه ثااااانيييييييييييه
وليد : قلتيها بنفسج . . خطبه . . احنا بنملج . . بتكونين حلالي . . سيف عمره ماكان حلالج . . كان خطيب بالاسم بس . . تختلف
انا اطالعه : ما يختلف شي . . انا نفسيتي مش مستعده حق علاقه . .
سكت ماكملت
وليد : علاقة حب ؟ ماعليه . . انا بخليج تحبيني . . من البدايه قلتلج هالكلام وماطلبت منج تحبيني لاني اعرف كيف اخليج تحبييني وماتفكرين الا فيني . .
انا اطالعه : وليد دخيلك اطلع برا مابي اتكككلم . .
وليد : توج مستعيله . . تبين تتعالجين ؟ يالله . . قرار علاجج بايدج . . وعلى فكره انا ما استغل هالنقطه ترى ابد . . لاني قايل حق امج اني بوديج .. ان كنتي حلالي ولا تميتي بنت عمي . . لكن انا اباج بالحلال . . اابا اعاونج واوقف معاج بالحلال . . انتي بترتاحين معاي اكثر بدال ما تتسترين مني . .
انا اغمض عيني واحط ايدي ع ويهي واصيح : ليش صار فيني جيه ليش . .
وليد : استغفري ربج . . كل الي صار مكتوب ومقدر . .
انا اطالعه ومسحت دموعي : ماكنت احلم اتزوج بهالطريقه . . ولا املج علشان اتعالج . .
وليد يطالعني : سمعي بنت عمي . . كل الي صار خيره صدقيني . . ربج كاتب كل شي . . خلينا نروح نتعالج وبعدها نرجع البلاد وصدقيني ما بضغط عليج ف العرس . . خذي وقتج . . سنه ؟ سنتين ؟ 5 ؟ 10 ؟ والله بتريا . . ولا بضضغط ابببببببد . . بخليج مثل ما تبين ولين ماتين تقوليلي بنفسج تاريخ العرس . . " يبتسم " عقب كم شهر بيروحون العمره . . خليني اكون اكون محرمج . . ادري انج مارحتي ولا مره وكنتي تتمنين حد من عمومي يوديج ومحد وداج . .
انا اطالعه : عندي شهاب بيوديني . .
وليد عاقد حياته : الحين شهاب بيدخل ف كل موضوع صح . .
ابتسمت بتعب . .
وليد : شو قلتي . . .
انا اطالعه واتنهد : ماعرف شقول . . والله ماعرف شقول . .
وليد : ترا امج موافقه وكانت من اول المؤيدين
انا اطالعه : انت كلمت امي . .
وليد يبتسم : اكيد كلمتها . .
شهاب يدخل : انت ششششحقه يالس ع السرير . . من قلت الكراسي ؟؟؟
وليد : اسغفر الله . . " يطالعه " اقولك قسم بالله بعطيك بكس بخلي ويهك بروحه شعار ماكدونالدز
شهاب يبتسم ويطالعني : بلاه ويهج وارم . . " يطالع وليد " خبرتها
انا اطالعه : خبرني . .
شهاب : لا تخافين من شي ياوخيتي . . العلاج موجود ووو
وليد يقاطعه : لا تفتح الموضوع . . قلتلها كل شي
شهاب يطالعني : ترا لو ماتبينه قولي ماباه . . عندج اخو وانا بوديج وبتكفل ف كل شي والله لا تشيلين هم . .
وليد : ها الي شكله بيرد وأد البنات وبيخليني ادفنه بدال البنات . .
شهاب : انت شو تبا . . ارمس ويا اخوك العود باحترام
وليد : انت الي شو تباااااااا . . ياخي انا اتريا موافقتها الحين وانت ناشب لي تخرب كل شي ؟
انا : انا موافقه
وليد : والله انك مخرب الملذات . .
اظن شوي واستوعب وليد اني تكلمت ورد صد اطالعني . .
وليد : شو قلتي . .
ماقدرت انطق ولا قدرت ابتسم ولا اقول شي . . تميت اطالع شهاب بس وبلعت ريجي . .
شهاب : قالت موافقه .. " يطالعني " ليكون غصبج وهددج
انا ابتسمت . .
شهاب : قولي لا تخافين
