الهاويه
البارت الخامس
جمانه السعيدي
نور...كنت مامصدكه الأمور مشت مثل مااريد فرحتي شكبرها
اتفقنا بلبدايه عقد شيخ ولمن يجهز نفسه يكون العرس
بس المشكله منيين يجهز نفسه
وهو ماعندا بس الراتب وطاير على النفقه ومصرفه
المهم لازم هسه نعقد شيخ
حددنا يوم المهر الجمعه الساعه ٣ العصر
احنا من عاداتنا ابو العروس يعزم كم واحد من الأقارب الجوارين على حفلة المهر
حتى موضوع الخطبه يكون بي إشهار كدام الاهل والاقارب
والكل يعرف هاي البنيه انخطبت
للعصر بيتنا انترس ناس والكل منتضر المشيه
صارت الساعه ٣ وماكو المشيه
صارت الساعه بلاربعه وهم ماكوووو
اني دخت مدري شصار بيه معقوله مايجي وابوي يتفشل كدام هاي الناس كله
صعدت الغرفتي اتصلت علي
نور....يمعود وينك بيتنا انترس ناس
راسا كام يبجي
نور... شكووو احجي
خالد....محد يقبل يجي وياي شلون
نور كمت كلني ارجف لا مومعقول فدوه خالد ابوس ايدك شلون ابوي راح يتفشل كدام الناس
فدوه لا تسوي ببنا هيج لازم تجي المشيه
راسا سد التليفون بوجهي اتصل يطلع مغلق
لا ياربي مستحيل معقوله شراح نكول للناس هاي
نزلت امشي واتخربط مامسيطره على نفسي
جمانه السعيدي
صارت الساعه بلخمسه وهو بعدا مجاي
شفت الناس كامت تطلع من بيتنا وابوي وجه صار اسود من الخجل
بقو كم واحد كاعدين
بعد ماكدرت اسيطر على نفسي مااعرف شصار بيه راسا وكعت من طولي
اجمعو اخواني وامي عليه وهمه يحاولون يرجعوني الوعي
شويه وكعدت بس مااكدر احجي
اكو غصه بكلبي مجاي اكدر اتحمل الموقف
امي وخواتي شبيج
نور...لا مابيه شي يمكن من التعب طبعا الكلمه كوه تطلع من حلكي
الساعه بلخمسه ونص اجا الشفيه وجايب وياا كم واحد من اصدقائه
كعد يطلع أعذار ويتحجج كدام ابوي
بعدين اعتذر من ابوي وباس راسه
ابوي كلبه طيب قدر الموقف وقبل اعتذاره أتفهم ضروفه
اجا اخوي كال حضري نفسج للعقد
طبعا الاتفاق نعقد وبعدين نبدي نجهز كلشي حتى الذهب بعدين
كعدت وبدا الشيخ يعقد بس ابد مامرتاحه كلبي عبالك واحد ويعصر بي ضجت بشكل مو طبيعي
اكثر يوم كنت منتضرته صار ٣ سنوات
صار اتعس يوم بحياتي
جمانه السعيدي
كملت واهلي باركولي
بعدين عقد الخالد
من خلص العقد كعدو شويه وطلعو كلهم حتى خالد وياهم
بعد ماكو ذهب ليش يبقى
هما طلعو واني تخبلت ضجت لان خليت اهلي وخاصة ابوي بهيج موقف صعب
قفلت تليفوني بليلته مااريد احجي وياا على هذا الموقف الخايس
ثاني يوم كعدت من النوم كتلهم مااريده
اني هذا الولد مااريده هسه تتصلون بي وتكللوله
كلشي انتهى اني مااريد ازوج خلاص
