Youth with you |SunSun|
Tags - omegaverse, fluffy, nsfw
______________________________
အားပြင်းစွာ ထိပုတ်ခံရနေရသည့် Basketball ဘောလုံးနှင့် ကြမ်းပြင်ထိခတ်သံ တဗုန်းဗုန်းသည် အားကစားရုံထဲ ထွက်ပေါ်နေသည် ။
လူကြည့်စင်များပေါ်မှ ကျောင်းသားများ၏ အော်ဟစ်အားပေးသံနှင့်အတူ ယှဉ်ပြိုင်နေသည့် ကစားသမားများမှာ အားအင်တက်ကြွနေကြ၏ ။
အပျော်တမ်းကစားပွဲပင် ဖြစ်လင့်ကစား ဆယ်ကျော်သက်အရွယ် အယ်လ်ဖာများ၏ ယှဉ်ပြိုင်လိုစိတ်သည် အရှိန်အဟုန်ပြင်းပြင်းနှင့် တောက်လောင်နေရကား ပြိုင်ပွဲရမှတ်များသည် သူမသာကိုယ်မသာနှင့် အချေအတင်ဖြစ်နေတော့သည် ။
အနီရောင်အသင်း၏ ချိုင်းပြတ်ဂျာစီနှင့် ဒူးအတိ ဘောင်းဘီကို ဝတ်ဆင်ထားသော အရပ်မြင့်မြင့်အယ်လ်ဖာသည် ခြေသလုံးကြွက်သားများကို အားပြု၍ နှစ်တောင်ခန့်မြင့်အောင် ခုန်ကာ ဘောလုံးကိုပစ်သွင်းလိုက်၏ ။ ကျွမ်းကျင်သပ်ရပ်သည့် ပစ်ချက်နှင့် ဘောလုံးသည် ကွင်းထဲသို့ တန်းမတ်စွာ ဝင်သွားသည်မှာ လှပစွာ ။
အနှီအယ်လ်ဖာက ကျေနပ်စွာဖြင့် သူ၏အသင်းသားများဘက်သို့ လှည့်ကာ သွားစွယ်ချွန်ချွန်များ လှစ်ဟအောင် တစ်ချက်ရယ်ပြလိုက်ချေ၏ ။
" Ahhhhh!!! သေအောင်ချောတယ် ပတ်ခ်ဆောင်းဟွန်း!!!"
" ပတ်ခ် ဆောင်း ဟွန်း!! ပတ်ခ် ဆောင်း ဟွန်း!!! "
လူကြည့်စင်များပေါ်မှ ပျံ့လွင့်လာသော ကျယ်လောင်စူးရှသည့် အိုမီဂါတို့၏ အော်ဟစ်အားပေးသံတွေကြောင့် အနှီအယ်လ်ဖာမှာ အထက်တန်းကျောင်း၏ နာမည်ကြီး လူကြိုက်များသူဖြစ်မှန်း သံသယဝင်စရာမလို။
နက်မှောင်သည့် ဆံနွယ်တွေနှင့် မျက်ခုံးထူထူတွေက ထိုသူ၏ ဝိသေသလက္ခဏာဖြစ်သလို မြင့်သွန်းလှသည့် အရပ်အမောင်းနှင့် ကျစ်လျစ်ပြေပြစ်သော ဖွဲ့စည်းပုံရှိသည့် ခန္ဓာကိုယ်အချိုးအဆစ်ကြောင့် ဆင်တူဂျာစီဝတ်ဆင်ထားသူများထဲ အနှီသူ၏ အရောင်အဝါက ကွဲထွက် ထင်းလင်းနေချေ၏ ။
ပတ်ခ်ဆောင်းဟွန်းက ပွဲစဉ်ပြီးဆုံးမည့် နောက်ဆုံးမိနစ်တွင် နောက်ထပ် တစ်မှတ်ကို ရယူပေးနိုင်လိုက်ကာ အနီအသင်းက နှစ်မှတ်အသာစီးဖြင့် အနိုင်ရရှိသွားလေ၏ ။
