Tale of a Tear

ikaw na aking musika

Kailan ko kaya mapuputol ang pisi

na kung saan nakatali pa rin

ang damdaming ikaw

ang nakahabi?

Lumipas na ang panahon, 

kumupas na rin ang larawang

tayo'y may ngiti pa sa mga labi─

tila ang kasiyahan ay namumutawi.

Subalit sa puntong ito 

ay ikaw pa rin ang musikang

inaawit at ang instrumentong tinutugtog

kasabay ng malamyos na galaw.

Ang pighati at kabiguan 

na aking pinagdaanan at ang

mainit na pag-iibigang ating 

pinagsaluhan ay madarama

sa kumpas ng kamay sa gitara.

Bakit ikaw pa rin? 

Hanggang kailan matitiis ang sakit

na dulot ng sawing pag-ibig?

"Tama na! Itigil mo na," sigaw ko 

sa aking sarili. Ngunit sa tuwing 

sumasagi ang alaala ng kahapon,

nakikita ko na lang ang sarili 

kong pabalik sa bisig mo.

Sabi ko, "Hindi ko kaya, 

sapagkat ikaw pa rin talaga."