|حب قاتم | Dark Love |
"ماذا لو كان لشرير الرواية نصيب في دور البطولة"
ما قاطع تواصلهم البصري غير صوت الكلب لي بدا كينبح ...ماكانش عندها معرفة كبيرة ب سلوكيات الحيوان حيث عمرها ربات حتى ذبانة ولكن من طبع الكلب الغير الشرش عرفات هيكون كينبح غير حيث شاف مولاه ...نيت هيكون موحشو علاش لا وهي ملي طلقاتو غبر ليه الآثر يوماين .
هزات تيلفونها وهي كتراقب اخر كومنطيرات الانستغرام لي ولات رادة معاه لبال بسباب آخر ماوقع ليها ...زفرات بضيق و شافت في علي لي كان كيوجد لفطور عاطيها بالظهر من ناحية هي ممثيقاش بلي هو مول فوكونطات لي كانو كيسبوها ولكن من ناحية آخرى كيبقى الشك فيه وارد .
الموضوع كان غريب شوية حيث هذا لي فكر في الفعلة اما حاقد عليها اما حاقد على علي ...حيث باش انسان يفتح 165فوكونط بسمية ALi ZAmel و مرادفات اخرى راه مايكون غير مريض نفسي مسالي شغلو في هاد الدنيا .
حطات تيلفون ملي شافتو داخل ل كوزينة وفي يديه ميكات لي جايب فيهم فطورهم و كلبو من وراه تابعو مكانتش عارفة شمن فصيلة هاد نوع ولكن كان باين بلي كلب منزلي أليف حجمو كان كبير شوية ولونو الابيض و فرو الكثيف كيخليه يبان فحال شي سحابة .
رجعات عينيها ل مول الكلب لي كان متناقض مع هيئة كلبو رسمات ابتسامة مزيفة ليه ونطقات بصوتها الانوثي: صباح الخير .
جر كرسي مقابل معاها وماردش عليها في حين الكلب بقا مبعد منها ومشا كيدور بين رجلين علي لاحظ هاد شيى زاد تأكد بلي هي مولات الفعلة
هز عيونو السوداء فيها ونطق بعبارة صريحة: علاش طلقتيه؟ وآش قربك ليه؟
كانت باقا راسمة نفس ابتسامة ونطقات بصوتها الانوثي وهي كتطقطق بظفرانها على الطابلة:كنآمن ب مبدأ الحرية واش نتا تبغي شي حد يبقى مستعبدك و حابسك بحبل من عنقك؟
علي ضار شاف فيها و شاف في صاحبو إيلام لي كان كيبان فيه مهدن واخا هو عارفو هاد ساعة مكارهش يشق ليه راسها على فعلتها قرر ينطق باش يشد نقاشهم قبل مايبدى: ميلا اجي عاونينيي احبيبة وحطي فطورنا في الطبسيل .
ميلاء شافت في علي ورجعات شافت في ايلام: عيب تسخر الضيفة و تخلي مول الدار جالس...ياك امول دار؟
ايلام حط يدو حتى هو فوق طابلة و جاوب علي بلا مايشوف فيه:عمر كيدوش دابا و يسالي وهيجي يوجد هو الطابلة ...ونتي ا ميس ميلاء لي كتآمني بالحرية ماكتعرفيش تدخلي سوق راسك؟
ميلاء شافت فيه مطولة هو من الناس لقلال لي كينطقو سميتها بالهمزة اغلب الناس كيحذفو داك الحرف الاخير اما باش يدلعوها اما باش يخففو من ثقل الكلمة : لا ... واش نتا عمرك شفتي شي سوق خاوي؟ ديما السواق كيدخلو و يخرجو منهم الناس
ايلام زير على يدو حتى برزو عروقو ديما فاش كتجي دوي معاها كتدخلك في سوق معيور النسا وهادي حاجة كانت غير محببة عندو تنهد وشاف فيها: سوقي كنت شاد بابو ب قفل اش داك تنقزي سور و تدخلي ليه؟
كانت كتطقطق بصباعها فوق الطاولة وهي عارفة هاد الحركة من الحركات لي كيشتتو تركيزو و كيصدعوه في راسو: نتا نسيتي ماتعلي السور ديال سوقك مزيان .
ايلام ركز نظرو في عيونها لي ماكانوش كيتزحزحو من عيونو: ماتقربيش للكلب مرة اخرى
ميلاء ابتاسمات و بعدات نظرها منو وشافت في الكلب لي كان ملاهي مع سجادة صوفية في الكوزينة العصرية : ان شاء الله
بعد نظرو عليها هو الثاني و شد جبينو بين يدو و ماعلا عينو حتى دخل عمر لي غير شافها ضحك و مشا فاتح ذرعانو ليها : هاي هاي شكون نورنا جارتنا الفريزة
ناضت من الكرسي و عنقاتو وهي كضحك : جاري العزيز شفتك ضعافيتي والو ماكيتهلاوش فيك بقا تجي عندي نوكلك على يدي نخليك تربي فورمتهم و تفوتهم (رجعات جلسات في الكرسي وهي كضحك) حسدوك حسدوك كينقصو عليك الماكلة باش ماتفوتهم في الفورمة .
جلس في كرسي حداها وهو كيضحك : بروجولة حتى توحشتك مافعايل ماوالو فاش هربتي علينا
ايلام جر الكرسي و ناض يحط سخرة لي جاب في طباسل مخلي عمر جالس مجمع معاها نيت هو لي كيجيها مع مزاجها .
جبد طباسل من لبلاكار و شاف في علي لي كان كيقاد ليها العصير ...
ايلام كيفتح الميكات: اوبن مايند مع راسك
علي كيعصر العصير: داير كي خوها
ايلام : مافيه حتى شرط باش يكون خوها...مارضعو من بزولة وحدة ماخرجو من كرش وحدة
علي: الثقة كافية ا خاي ايلام كاين لي مزوج بوحدة وكتلقاه ماكيخليهاش تزور خوها الشقيق بسباب قلة الثقة
ايلام: ختار الوسط ماتزيرش عليها ولكن ماتطلقهاش (ضار شاف في ميلاء لي كانت منعسة راسها على صدر عمر و كتضحك بالجهد) عاملها كي صابونة لي اذا رخفتيها هتزهق بسباب لما واذا زيرتيها هتطير بسباب الرغوة
علي بسخرية: هندير الكيس في يدي و نشدها كيف بغيت(واصل بهمس) هنخليها تبغيني و هيشدها القلب ديك ساعة بزز منها
ايلام: الكيس كيجرح الصابونة
علي: ولكن على الاقل ماهتبقاش تفلت من يدي
ايلام: كيف لقتيها رطبة و ريحتها زوينة خاصك تخليها
علي بتاسم: راها في عيني مانقدرش نآذيها
ايلام حرك راسو بالايجاب في حين يدو مزيرة على طبسيل
علي: صافي انا قربت نسالي حط لفطور فوق طابلة
ايلام: حتى انا قربت نسالي
هز طباسل لي قاد و حطهم فوق طابلة وعينيه على يد ميلاء لي فوق يد عمر لي كيهضرو ناسين راسهم وضحكهم كيزعزع حيوط دار
يتبع ...
أنت تقرأ
|حب قاتم | Dark Love |
Romance|حب قاتم | Dark Love | "ماذا لو كان لشرير الرواية نصيب في دور البطولة؟" •بين المعتلِ النفسي هذا و تلك الطموحة الشرشة واحد و أربعون قاعدة عشق• Farah el manssourye ●في طور الكتابة ...
