المتاهه

ألمتاهه الثالثه

- شَهرزاد ..

- - حنان : عذروها خويه ماتعرف شتحجي
- حامد : ميخالف شلونجن يابه
- شهرزاد ، شهزنان : الحمدلله

- عمتي تداركت الوضع و كالت صار لازم نروح ورجعنه للبيت حيلي مهدود ماعرف شنو اسوي تعبت حيل تعبت ، مرت ايام الفاتحه يوم اسوء من يوم وعماتي يجن دائماً وتجي عمتي تحجي وياي وتخفف عني ، حجت وحده من عماتي

- وسن : ماتجن يمنه كم يوم ويا البنيات؟
- شهزنان : لا
- شهرزاد : لا والله عمه ماكدر
- وسن : ليش حتى هنه يشوفنجن تتعرفن على بعضجن وهم وين تبقين بعد
- شهرزاد : لا اسفه والله
- حنان : عوفيها خيه عوفيها براحتها

- وفعلاً سكتت ، عماتي اربعه ومره اجن ثنين من نسوان عمامي وشويه وراحن بس سلمن علينه ما حجن شي ويتجاوبن عمه حنان على كد السؤال ما يكثرن بلحجي ، اجت مرت خالي تحجي وياي

- مَلاك : حبيبتي خالج سلوم يكول تجي ويانه
- شهرزاد : اشوف وضعي
- مَلاك : براحتج حبيبتي احنه عكب باجر نروح

- هزيت راسي وهيه راحت تدري بيه مالي خلك احجي اليوم ثالث فاتحه طلعت للطرمه اغسل وجهي

- زين العابدين : شهرزه
- شهرزاد : ها؟
- زين العابدين : شلونج
- شهرزاد : زينه انت شلونك
- زين العابدين : اذا انتِ بخير انا بخير
- شهرزاد : الله كريم

- رفع الشماغ على راسه ولفه على وجها وكال انتبهي لنفسج وأبوي يريدج ويانه ، هزيت راسي وطلع دخلت للمطبخ واكفات البنات ويمهن شهزنان

- مَلاك : تعالي شهرزه تعالي حبيبتي
- شهرزاد : ها كولي
- مَلاك : صفنت لثواني ، امشن وياي خنروح لبيتكم
- شهزنان : مو احترك نكدر ندخل ؟
- مَلاك : اي عيوني نجيب الاشياء المهمه

- ما عارضتها دخلت لبست حجاب لان برا اكو زلم وهيه لبست عبايتها وطلعنه اجه أدم باتجاهنه

- أدم : ها يمه؟
- مَلاك : نروح لبيتهم نشوف الوضع ونرجع
- أدم : صدك جذب وين تكدرن؟
- مَلاك : يمه شعليك نكدر بس اخذنه

- ما عارض كال امشن اخذنه وصلنه ونزلنه الباب مفتوح دخلنه المطبخ كلششش متضرر محترك لدرجة قويه الغرف البقيه محتركات بس مو مثل المطبخ دخلنه اخذنا ملابسنه السود بس وغراضنه المهمه واعرف أمي وين مخليه الفلوس رحت طلعتهن وما حسبتهن خذيتهن كلهن وتلفوني بكنتوري جان سحبته وطلعنه رحت للمَره الي جانت وياي واخذت جنطتي دكيت الباب طلعتلي بتها

- هلا حبيبتي كولي
- وين ماما؟
- هسه اصيحها دخلت جوه واجتني
- هلا حبيبه هلا عيوني شلونج
- هلا ياروحي الحمدلله بخير انتِ شلونج
- يابعد حيلي الحمدلله بنيتي البقيه بحياتج والله مرتين اجي وما الكاج عذريني والله
- لا خاله عادي بس خاله اذا ماتصير زحمه جنطتي وجنطة شهزنان عندج اذا موجودات اريدهن
- اي يمه تدللين عيوني الج هسه اجيبهن الج من عيوني