we were kids كــنــا أطــفــال

04

انيا :
كنت نجري في حرم الجامعي ونتعذب بطالون و و لاغوب ، نسيت مريقلتش رافاي و فطنت و أنا روطار ليوم نتحاوز ، معرفتش كيفاه طلعت 20 درجة و فت الغاشي كامل ، تخصص هندسة كان من تخصصات لي عليها لاشارج و بالتالي لازم يكون فيك عرق جزائري باه طبع و تفوت
وصلت وأخيرا ل كلاصةوصلت عند باب لونفي ، سقمت لاغوب و عاودت غوجلاف شفت روحي في مراية و دخلت ، دارو يشوفو من جيهتي ، موالف حرب تكون نايضة واشبيهم ساكتين ل يوم دورت عيني و كملت نمشي ، صوت طالون كان يتسمع في كامل قاعة
: برا
جاني صوت من مورايا ، درت ل مصدر صوت لقيت راجل طويل ب عينين اخضر غامق و لابس شيميز كحلة و سروال كلاسيك اكحل متناسق مع كور تاعو ، دار يديه في جيوبو ، ابتسمت على جنب و ربعت يديا و ورجعت شعري للور و شفت فيه من لفوق ل تحت ، هدا وجه جديد على حسب سن تاعو يكون طالب
: باغدون ! شكون معايا ؟
: درتي روطار 10 دقائق معناها راح دوري و تعاودي تخرجي من باب
: و شكونك انت باه تخرجني من حصة
: استاذك
بلعت ريقي هدا واش خصني نزيد نتضارب مع اساتذة ، سقمت وقفتي
: مكانش علابالي بلي انت استاذ جديد
: و درك عرفتي تقدري تخرجي
: راح نخرج متنفخش روحك بزاف
شديت على ساكي و جيت خارجة ، حتى دخلت طفلة لابسة نواظر و تجري ، هادي ماريا اول مرة تجي روطار على أساس هيا اولى على دفعة
ماريا : سامحني استاذ تأخرت بسباب بيس
يعني كي راح تحكيلو قصة حياتها راح يخليها تدخل ، شاف فيا و وامبعد ه‍در
: تقدري تدخلي
وسعت عيني فيه ، من وينتا ماريا عندها أفضلية عليا حسيت بجنوني بداو يخرجو ، قربت منو و حسيت روحي راح نثقب لرض بطالون
: واا استاذ جديد راه يدير في تحيز نورمالمون يعلموكم تكون عادلين قبل ما تولو اساتذة
: مراحش نقري ناس لي كيفك ونكون عادل معاهم
: لي كيفي ؟ واش قصدك ب لي كيفي
شاف فيا من فوق ل تحت و بدا يهدر و عينيه على كامل كور تاعي
: وجهك لي معمر بمكياج و لبستك لي مزيرة عليك و فوق هدا لابستلي طالون ، راكي جاية تقراي ماشي ل حفلة
: ديرها في بالك بلي أنت تكون استاذي مشي راجلي
: متخافيش مراحش نتزوج وحدة كيفك
صوت ضحك في كامل كلاصة ، عضيت على شفتي حتى حسيت دم فيهم
درت و جيت خارجة من باب لمحت ماريا و هيا تبتسم دورت عيني على ماريا لقيتها تحاول تتحكم في تبسيمتها ، زيرت على يدي و شفت في كتوبتها لي رافدتهم درت من جيهتها و ضربتهم بمرفقي طاحو في لرض ،
: اه ماريا سمحيلي حسبتك كي راكي دايرة نواظر راح تشوفي شكون لي قدامك
ماريا : لا عادي
هبطت باش ترفدهم ، عفست على كتاب و ضربتو برجلي و خرجت من قاعة ، ل اول مرة يقلل من احترامي واحد
خرجت قعدت برا في جاغدان كنت قاعدة فرق كرسي و نطرطق في صباعتيا ، شفت في طلاب يتهامسو على باركينق تع طنوبيلات نضت نشوف ل واش راهم يشوفو كانو يؤشرو على طنوبيل بورش كحلة ، غريب انو كاين طنوبيل بهاد مستوى في قسم باركينق اساتذة عادة ماكانو يكونو في قسم طلاب
: يقولو تع استاذ جديد
قعدت نشوف فيها يعني هادي تكون تع هداك ن.. ، ابتسمت راح نخليه يندم على دقيقة لي خمم فيها يوقف في وجهي
رفدت تلفون و عيطت ل كارلوس
: لازم نتلاقاو
كارلوس : اووو شكون تفكرنا كوين أنيا
: وجد روحك نتلاقاو في كافيتيريا
طلعت ل شمبرتي في اقامة ، فتحت خزنة و شفت شعال عندي دراهم كانو دراهم لي ربحتهم هاد شهر و علابالي ميكفوش كارلوس
دخلت يدي في شعري ذهبي ، اذا مديتهم راح نبقى مفلسة ل آخر شهر ، صح صوفيا و زاك يمدولي بصح مستحيل نمد يدي عليهم من نهار وليت 18 سنة تحملت مسؤوليتي وحدي
رفدت تلفون عيطت ل رايدن هو الوحيد لي يعاوني
رايدن : أنيا
: اه رايدن نسحق دراهم راح نرجعهملك في جولة ثانية
رايدن : راح نبعتلك في كونت و انساي تشاركي في جولة ثانية
: رايدن مرانيش طفلة صغيرة و راني عارفة مليح واش راني ندير
رايدن : انيااا راكي عارفة بلي بابا دايرك كيما بنتو علاه راسك خشين
: لازم نعتمد على روحي رايدن متحاولش معايا اكثر بسك راك عارف رأيي في موضوع
خرجت من اقامة ل للكافيتيريا ل راح نتلاقاو فيها
وصلت للكافيتيريا لي نتلاقا فيها بماركوس ، دخلت و صوت تصفار خلاني نتبعو بعينيا رحت قعدت قدام بنادم ، كان داير وشم في رقبتو و يديه و شعرو طويل حازمو
ماركوس : أووو برانسيسة جيتي
: نسحقك في مهمة
ماركوس : هممم عندك شعال مخرجتيش شيطان لي فيك علا حساب إصرار مهمة كبيرة
: قطع فران تع طنوبيل
ماركوس : اوووو موضوع خطير
دخلت يدي في ساك و جبدتلو دراهم
: هادي دفعة لولى اذا نجحت راح نزيدك عنوان و كلشي راهم داخل
ماركوس : كلشي راح يفوت كيما تبغي
هادي هيا حياتي من نهار وليت في ليسي كنت نهتم بلبستي و مظهري و داخلة في اعمال غير مشروعة و حتى بديت نفقد سيطرة على روحي
بعدما تفاهمنا على نهار و لي كان بعد يومين فليل ، كنت انا و إفاليا
إفاليا : أنيا راكي سير من واش راكي ديري اذا سلكنا قبل 5 اشهر هاد مرة ....
: اششش درك يسمعونا مكاش لي قالو يقلل من احترامي
كنا متخبيين من مور الشجر في طريق رئيسي
صوت ماركوس من تلفون
ماركوس : تمت مهمة
شفت في عينين افاليا الحاجة الوحيدة لي تبان فينا من ماسك لي لابسينو
ماركوس : راح يخرج درك ل طريق رئيسي و عند اول منعطف راح يصرا الحادث
كنت نعض في شواربي ، راني نخاطر بحياتو طبعا 90 ./. مراحش يموت و هو عندو طنوبيل فيها الحماية عالية بصح اذا صرات غلطة راح نروحو فيها ، ضوء طنوبيل جاية خلاني نغطي عينيا من قوتو ، صوت محرك طنوبيل عالي ، هادي هيا طنوبيلتو
شدتني إفاليا من يدي
إفاليا : لازم نروحو
شفت فيها
: افاليا نتي روحي انا لازم نبقى
إفاليا : مراحش نروح بلا بيك
صوت احتكاك ل عجلات ب لرض و صوت زجاج و هو يتكسر جبدتني افاليا من يدي ل مور شجرة
كانت طنوبيلتو زادمة في شجرة و دخان يخرج منها من كل بلاصة ، بلعت ريقي ضربة عكس واش توقعت كانت أقوى من واش لازم تكون ، بعدت على شجرة و سڨمت ماسك و درت ڨلمونة و خرجت ل طريق ، وصلت عند طنوبيل كان زجاج مكسر ل داخل ، وقفت عند بلاصة لي يسوقو فيها ، قدرت نشوفو و دم نازل على وجهو للحظة حسيت بقلبي يخبط و احساس بألم و تأنيب ضمير ، كنت جامدة عند طنوبيل و مستوعبتش بلي كانت طنوبيل فايتة ، حسيت بيد جبدتني من وسطي و بعدتني على طريق ، حسيت بظهري إنقسم و أنا ندخل في شجرة
رايدن : أنيا واش درتي
طلعت راسي ، كانو شواربي يرجفو
: انا ...ق...ت..لتو
جبدني من يدي و جرني ل بلاصة طنوبيلتو ، كنت نرجف
رايدن : واش دارلك باه خليتي زعافك يسيطر عليك
عينيا تعمرو دموع
إفاليا : خلاص رايدن
دخلتني ل طنوبيل و انا ضميت رجليا و دفنت راسي
---------------------------------------------
أليس :
ليوم اخر يوم في امتحانات ، حاسة بالراحة كبيرة حطيت ستيلو بعدما كملت و جا وقت تسليم رفدت ورقتي و رقة استرايد ل بيرو تع روف
سيرافينا : استاذ كاين حالة غش
درت ليها و درت علامات إستفهام ، كانت تشوف فيا و تؤشر عليا انا و أسترايد ،
: واشمن حالة غش !
سيرافينا : شفتك نتي و أسترايد تتبادلو في اوراق
شاف استاذ ورقتي و وورقة استرايد و دقق فيها
استاذ : لازم تجو معايا ل مكتب مدير
: مكانش دليل بلي غشينا
استاذ : اجوبتكم متشابهة
ناضت استرايد من بلاصتها
استرايد : معندكش حق تشك فينا حنا مغشيناش و اذا كانت اجوبتنا متشابهة فسبب انو قرينا كيف كيف و اعتمدنا نفس مراجع
شاف فينا استاذ بشك و خرج
درت ل سيرافينا ليوم موتها على يدي
: انتي واش مشكلتك معايا ؟
ناضت من كرسي و شافت فيا
سيرافينا : مشكلتي مع خوك ماشي معاك
: واش دخل خويا في وسط
سكتت و مردتش ، وصلت ل اعلى مستوى من تحمل كنت راح نخسرلها وجها و ننتفلها شعرها بين يدي
دخلت استرايد بيناتنا و بعدتنا
استرايد : حاجة لي دارها وينس حنا ما عندنا حتى علاقة بيها
شفت فيها و بقيت نحلل في هدرتها
: دقيقة ، واش علاقة سيرافينا ب وينس
جبدتني استرايد من يدي و داتني ل زواية
: واش كاين استرايد واش دخل وينس
استرايد : اليس ، نهار لي رحتي فيه مع ايدن و صرات مشكلة ، وينس جا صباح هنا كي كنتي في مكتبة و دار فيديو ل بروف فيليب مع طالبة و للانو كان وجها مغبش مكاش لي عرف شكون طالبة
قربت مني كثر و همستلي
: على حساب تصرف سيرافينا فهي راهي تحوس تنتقم منه عن طريقنا
: واش فيه هدا فيديو ؟
استرايد : فيديو ل فيليب و سيرافينا في وضع ...
مكملتش كلامها و فهمت واش راهي تقصد اه منك يا وينس
خرجت من كلاصة نجري ل كلاصة وينس بعد ساعة من مناقشة مع لجنة و تحقيق ،كانت استرايد تلحق فيا بصح انا كنت كي بركان ، كان علابالي بلي يدير طوايش بصح مكنتش متوقعة بلي راه واصل ل هنا
طلعت في درج ، هادي ثاني مرة ندخل ل كلاصتو و نتمنى اني منكونش تلفتها ، كان ممنوع على اصحاب صف اول يطلعو ل فوق وصلت ل صف 16 ، فتحت باب و حمدت ربي اني مالقيتش بروف داخل كون راني معاقبة ، لقيت وينس عند تاقة و يتكيف و رايدن راقد و ايدن مدخل راسو في كتاب
: وينسسسسس
دار ليا و ملامح غرابة على وجهو عينو كانت عليا و على استرايد ، شفت في كلاصة كامل تشوف فيا
رايدن رفد راسو على عياطي و ايدن ناض من بلاصتو
وينس: برانساس
: انت كيفاش تنشر فيديو هكاك و قدام ناس
وينس : حكاية عندها يامات ملي صرات شكون لي جبدلك عليها درك
شاف في أسترايد مورايا ، و أنا غطيتها ب ظهري
: أسترايد مكان مدخلها ، طفلة لي حطيتها في فيديو ليوم اتهمتنا بلي غشينا و استاذ دا وراقينا ل مدير
زير على فكو و جا خارج بصح شديتو من يدو ،
: وين راك رايح ، مكلاه تدخل روحك
وينس : أليس بعدي مزال مازادتش لي يخلط فيك
: وييييينس راح تعقدها عليا ، خليني انا نتعامل انت برك أبقى بعيد
كنت نحاول نقنع وينس يقعد في بلاصتو ، حتى فات عليا إيدن كيما رولو ،
لا مستحيل ماشي وقتو
وينس : بلاك ماشي انا لي راح ندير مشكلة هاد مرة
ابتسم و ربع يديه ، انا هبطت نجري في دروج نلحق في ايدن قبل ما يخربها
: ايدددن استنىى
مجاوبنيش و كمل حارق طريق ل مكتب مدير
وقفت و رميت روحي في لرض و عيطت
دار ليا و لقاني قاعدة فلرض و حاكمة رجلي
إيدن : ألييس
: راهي توجع فيا
رفدني و جا دايني ل مكتب ممرضة ،
واش ندير و واش نقلها بعدما حصلت روحي في هادي كذبة
: إيدن خلاص حطني
شاف فيا و رفع حاجبو
إيدن : كيفاش نحطك ماشي راهي توجع فيك
: كذبت عليك
شاف فيا و غمض عينيه و حطني على رجليا
: إيدن حبس
إيدن : واش تاني و متحسبيش بتصرفك راح ننسى واش صرا
: ماقلتش راح تصرا بصح مشي كلشي يتحل بالعنف و تهديد
إيدن : ينحل ينحل انتي برك ابقاي بعيدة و خليني نتكفل
: انا تاني نكون بنت إيتام و اخت وينس نقدر نمشي و نهدد الناس و ندي واش نبغي الحياة ماهيش هكا
إيتام : راح تعلمي تهددي مالا بسك مزال مازادتش لي يتهم بنتي
درت مورايا لقيت بابا مربع يديه و ماما حداه
: باباااا واش راك دير هنا
إيتام : عيطولنا باه نحضرو مجلس
: بابا شوف راح نحاول نثبت بلي مغشيتش و يتحل مشكل
قرب مني و دار يدو على خدي
إيتام : نتي و أسترايد بناتي و مراح تثبتو ل حتى واحد
: ماماااا
قربت مني و حضنتني بيد
سما : بوك و تعرفيه و حتى انا كي كنت نقرا في الجامعة كان اكثر من هاك
إيتام : إيدن ارواح معايا
وسعت عيني فيه ، واش راح يهدرو جيت راح نلحقهم
إيتام : برانساس ابقاي في بلاصتك
شفت في ايدن بصح غمزلي و كمل يمشي مع بابا
نفخت و درت ل ماما
: واش راح يديرلو علاه عيطلو
شافت فيا شعال
سما : أليس
: واش
سما : واش بينك و بين إيدن
حسيت بوجهي صفار و ألوان. تروحله
: واش راح يكون من غير
سما : شفناكم
عينيا توسعو ،
: واش شفتو
سما : كي كان رافدك و يجري بيك ل طبيبة
: بابااا واش قالك واش راح يديرلو
ضحكت ماما
سما : متخافيش ، راح يديرلو تحقيق
--------------------------------------------
وينستون :
: نتي لي خبرتيها ؟
أسترايد : ايه انا لي خبرتها , خليها تعرف شعال خوها انسان أناني و يخمم في روحو برك
: مراكيش مستوعبة واقيل بلي عطيتك فرص اكثر من متوقع
أسترايد : متخوفنيش و دير لي تقدر عليه
: مالا تحملي واش راح يصرا فيك
شديتها من يدها و جبدتها معايا ، اذا كنت مزال ما حاسبتها ، فسبب الوحيد هو خالي و صداقة العائلة بصح مخها الصغير مراهش مستوعب واش قادر ندير
استرايد : اطلقنييي
: اقعدي عاقلة و امشي و اذا بغيتي نستعمل معاك قوة مكاش مشكل
حسيتها هدات و بدات تمشي مورايا ، طلعت ل درج طابق اخير و ضربت باب سطح برجلي
دخلت و هيا مورايا
استرايد : واش جينا نديرو هنا
: نلعبو :)
حطت يدها بالجنب و بدات تتلفت في كل زاوية،معييتش روحي و غلقت باب و حتى هيا عارفة بلي مراحش تقدر تهرب
قربت منها و هيا بدات ترجع للور
استرايد : خليني نروح
: راح تروحي بصح لبلاصة واحد أخرى
شافت فيا و بعدها زدمت في حافة سطح ، قربت منها أكثر حتى خليت كور تاعها بين ذراعتيا
دخلت يدي في خصلاتها قصيرة ناعمة ، عينيها نوازات و رموشها ، إبتسمت على نظرات البراءة لي عندها
دمرتها بيدي حتى مال كور تاعها على حديدة و نصها فوقاني مال على حافة
استرايد : وييننننس
عيطت بإسمي و شدتني من رقبتي باه تعاود تطلع
: معجباتكش لعبة :) ؟ شوفي باقيلك سنتيمترات و تودعي
استرايد : انت ... انت مختل مراكش نورمال
: علابالي
عاودت دمرتها و خليت يدي على وسطها
استرايد : وينس
بدات ترجف و تفيبري بين يدي ، منظر كان يخوف شوي بصح هيا عندها حساسية مفرطة كيفاش بنت رائف تكون بهاد ضعف
: قولي
استرايد : ما..نيش ...قا..درة
قلبت عينيا و رفدتها من حافة ، وجها انخبط على صدري و يديها دارو على وسطي
حسيت بإنقباضات في كور تاعي
استرايد : انت ... كنت ...راح ...تقتلني
كانت ترجف و سنانها يضربو في بعض
حطيت يدي على كتفها و حظنتها كثر ، شكلي زدت في عيار
: مكنتش راح نقتلك
استرايد : بصح ... بصح
: بلاك بسيكوبات و مختل بصح متاكد رائف مراحش يرحمني
بقات دافنة وجها في صدري و انا بقيت نمرر بيدي على ظهرها
استرايد : راح ... راح تخلصها غالية
: اذا قدرتي تتحديني فمرحبا
بعدت عليا بعدما هدات و خرجت تجري من سطح ، نفخت و شفت في منظر لي قدامي اوكي ليسي كان بنيانو عالي بصح منظنش بلي يخوف ل هداك حد  و خاصة انها كانت تسوطي من مسافات عالية و معندناش فوبيا المرتفعات
هبطت تحت ، لقيت بابا مدخل يدو في جياب سروال و يهدر مع ايدن ، حركة تع بابا تبين بلي راه في تحقيق معاه
: واش راه صاري هنا
إيتام : وووو ميسيو وينس مزية وريتلنا وجهك ، وين راه رايدن
: وين علابالي نورمالمون معنديش طفل يسموه رايدن ؟
ايتام : عيط ل رايدن و تبعوني
: وين نتبعوك
شاف فيا خزرة ، خلاتني نبلع ريقي ، كنت عارف واش معناها الانو عندي نفس نظرة وقت نكره النقاش
: واش خبرتو
ايدن : عرف على فيليب وواش درنا
: الله يبارك معرفتش تشد فمك
إيدن : كي شغل انت تقدر تشدو كي يكون حقق معاك
: عيط ل رايدن
إيدن : عيطلو انت
: نورمالمون ماشي انا لي زاد معايا في نفس دقيقة
شاف فيا و راح يعيطلو و انا تبعت بابا لقيتو رايح ل مكتب مدير و كانت ماما و اليس عند باب
سما : إيتام وين كنت طولت
إيتام : مراحش نلتزم بقوانين ياك
جا إيدن و رايدان و موراهم أسترايد لي كان وجها صفر ، دخل بابا ل داخل و دخلت معاه ماما و حنا بقينا مستفين عند الباب كي عسكر على حسب أوامر ميسيو إيتام ، سمعنا صوت تكسار
اليس : واش هدا صوت
عقدت حواجبي ، عادة بابا مكانش يمارس العنف قدام ماما
سما : إيتاااام
صوت ماما و هيا تعيط ، خلاني نفتح باب و ندخل ، كان بابا طايح على مدير بالضرب و ماما تحاول تبعد فيه
إيتام : وينس خرج سما
شديت ماما من يدها و جبدتها
سما : وينس بعد راح يقتلو
: ماما هيا
جبدتها معايا بالقوة و خرجتها و قفلت باب ، معنديش مانع بابا يضرب المدير
بقات ماما تضرب في باب بما انو بابأ راح قفلو من داخل
سما : إيتاااام افتح راح تقتلو
اليس : ماما واش كاين واش راه صاري داخل
حطت ماما يدها على راسها
سما : مدير تاعكم كان يقرا معايا و كي شافني حكم يدي باه يصافحني و .......
بلعت ماما ريقها
: اووو جزء ثاني من مول راح يتعاود 
سما : مستحيل يديرلو نفس شي ياك !
: بابا و تعرفيه
أليس : واش حكاية مول
Flash back
كنت نمشي مع ماما كانت شادتني بيد و في لابوسات كانت أليس راقدة
سما : وينس واش باغي تشري
: سلاح و طنوبيل
سما : خير حاجة اخرى راه عندك منهم بزاف
: اممم بالون باه نلعب بيها مع ايدن و رايدن
هبطت سلمتلي على خدي و دخلت شراتلي العاب ، وخرجنا
الراجل : اوووو شوفو زين هدا كامل
شفت في راجل لي يهدر مع ماما وجها رجع أصفر و زيرت يدها على لابوسات
سما : راني بولادي معليش تبعد
الراجل : وامبعد ولادك ، نتي تاني تصلحي
: بعد على ماما
عيطت عليه و قدمت ليه ،
غطاتني ماما ب جسمها و دارتني موراها ،
الراجل : وليدك لسانو طويل
: بعد من وجهي احسنلك ، يا وحد .....
جا شدها من يدها و زير عليها حتى عيطت من كثر وجع ، معرفتش واش ندير راجل كان طويل عليا ، هربت و رحت نجري ، لازم نخبر بابا
سما : وينس وين راك رايييح
حاولت تجري مورايا بصح راجل زير عليها ، لقيت بابا واقف عند طنوبيل
: بابااااا
شاف فيا و مورايا
ايتام : وينس وين راهي ماماك
بديت نلهث من الجري
: راجل راجل راه يضرب في ماما
عينيه ظلامو رفدني بيد وحدة و طريق لي جريتها كامل قطعها في خطوات قليلة ، لحقنا و لقينا راجل مزال شاد ماما
ايتام : واش راك دير ل مرتي
للحظة حسيت عزرائيل يهدر مشي بنادم
الراجل : مرتك ؟؟؟؟؟
طلق راجل ماما و هرب
سما : ايتام خلاص هيا نرجعو
حطني في لرض
ايتام : ادي لولاد ل طنوبيل منطولش
سما : ايتام
ايتام : مراكيش باغية تشوفيني و انا نتحول و نكسرلو عظامو قدامك مالا روحي ل طنوبيل راح نجي
رفدتني ماما و دمرت أليس بلابوسات ل طنوبيل
كانت خايفة و تهز في رجليها
: ماما متخافيش درك يرجع بابا
رفدتني و حطتني في حضنها
بعدها ب نص ساعة جا بابا و حوايجو كامل دم و بعدما كبرت عرفت انه دخل غيبوبة بسباب ضرب و يدو ولات مشلولة نصفيا
End flash back
أليس : يااااا بابا ميشوفش قدامو كي يغير
رايدن  : مدير راح يستقيل من تشوهات لي في وجهو
خرج بابا و طرطق رقبتو ، طليت على مدير و كان من احسن منطلش عليه
وجهو رجع فيه خريطة عالم ، كان متغاشي من قوة ضرب
ماما عيطت و حطت يدها على فمها
سما : إيتام منيتك ؟! واش درررت
إيتام : واش درت ؟ لمسات خفيفة برك
سما : من احسن تشوف وين تبات ليوم
إيتام : منيتك !!
سما : مفاتيح تع طنوبيل
إيتام : سما مراحش ترجعي وحدك
سما : إيتام هات مفاتيح ولا نقسملك بالله راح نروح و اول طنوبيل تحبسلي راح نركب فيها
مدلها مفاتح ، غير خرجت من باب تع ليسي
إيتام : هات مفاتح طنوبيلتك
: علاه طنوبيلتي
إيتام : وينس متهبلنيش كي شغل ماتعرفهاش كي تكون مقلقة كي تبدا تسوق , ونتوما ثلاثة روحو للمقر دوك نلحقكم
عطيتو مفاتح و أنا درك فاه نروح
ايدن : لي بغا يركب يجي
فهمت بلي كان يمعني عليا ، راح تخلاص عليا راكب معاه 
------------------------------------------
إيدن :
دخلنا ل مقر ، حكمت كرسي و قعدت نشوف في وينس و رايدن ، كنت ندور بالكرسي في بلاصتي
رايدن : حبس ما دير كيما ذراري صغار قاعد دور كي زربوط
: راك معايا واقيل ؟
رايدن : معامن راح نكون مثلا ؟
: تعلم تحترم لي كبار عليك
رايدن : كبار عليا ؟ نسيت واقيل بلي رانا توأم
: منسيتش بصح تاني معلومة صغيرة بلي أنا لي زدت لول
وينس : تحسب ذراري صغار سكتونا
رايدن : اهدر معاه هو
: هو لي بدا
دخل عمي رائف
رائف : راكم هنا نسحق واحد يشرف على تدريبات افاليا
رايدن : اناااا
شفت في وينس و شدينا ضحكتنا بسيف ، خالي رائف شاف فيه و طلع حاجب
رائف : رايدن مشي راك متحمس اكثر من لازم
رايدن : لالا برك بسك باغي نتدرب
وينس : انا تاني معنديش مشكلة ندرب افاليا
: حتى انا راني فارغ
شاف فينا رايدن و كان راح يقتلنا
رائف : لي راح يدربها يلحقني ل لاصال
غير راح ضربني رايدن برجلو و ضرب وينس ل وجهو
: اوووو علاه عنف ، واش رايك نخبر نسيبك على حالتك نفسية عنيفة
رايدن : إيدن بلع فمك
وينس : خليه يعبر على رأيو ، و زيد لازم خالي رائف يعرف حقيقة
رايدن : راح نروح لا ندير فيكم جريمة
وينس : بالعقل على روحك لا تطرطق في طريق و تخلاص علينا ندربو في إفاليا ، رمى عليه كرسي و راح
وينس : واشبيه خوك بسيكوبات قاع هك ، قريب شوهلي وجهي
: تستاهل ، كي شغل انت مشوهتليش وجهي شباب
وينس : مزالت راح نشوهولك
: حبس ما تلحق فيا كي مهووسين كون منعرفكش كون قلت عليك معجب سري
وينس : انت وقتاش خليت اليس تلاحظك
إبتسمت عرفتو بلي لاحظ اليس و كيفاش زعفت نهار فت عليها مكنتش قادر نشوف فيها بسك عزرائيل تع وينس كان يشوف فيا
: والله واحد شباب كيفي نورمالمون تسقسي كيفاش مكانتش ملاحظاتو كامل سنين لي فاتو
وينس : اختي راح تتزوج براجل لي نخيرو انا
: مخك مزال ما يستوعب ل اي حد نقدر نولي مريض
وينس : صدقني يا إيدن راح تولي تشوف اليس في منامك
فات عليا و خبطني في كتفي
دخل علينا عمي إيتام و بابا بعدما لحقنا رايدن و حنا مستفين كي العسكر
زاك : تقدرو تفهموني واش راكم تخططو نتوما ثلاثة
: والو
وينس : والو
رايدن : والو
إيتام : مليح راكم متفاهمين متنطقوش مالا
زاك : واش حكاية فيليب و علاه طيحتوه
وينس : مكان والو ، هو برك كان يقلق فينا كي مكناش ندخلو ل كلاصة ، و مدير كان راح يحاوزنا بسبابو
إيتام : مدير ؟
إبتسمت عرف وينس على واشمن خيط يلعبلو
شافوا إيتام و بابا في بعض ، ناض عمي إيتام ووقف مقابل وينس
إيتام : وينس ، متنساش شكون انا و بلي أنا لي ولدتك ماشي انت
رايدن : مراهش يكذب فيليب مكانش يحملنا كي كنا نهربو من كلاصة
زاك : و نتوما علاه مكنتوش تدخلو تقراو
: بسك حنا مستوانا عالي على انو نحضرو و نقراو في ليسي طبعا ما عدا رايدن عندو مشاكل في مخو مخلياتو متخلف عقلي
رايدن : يا.... ليوم ..... و .....
زاك : راييييدن
إيتام : تقدرو تروحو
خرجنا من تم ووينس خرج نفس
رايدن : سلكنا من تحقيق
: راح يفيقولنا بلي لعبة من عندنا باه نسلكو
وينس : لازم نلقى حل باه نغطي حادثة
وصلت وينس ل دار في طريقي ، رغم مشاحنات لي بيناتنا صداقتنا من مستحيل تتزعزع
-------------------------------------------------------
إفاليا :
كنت نجري و نعرق ، راني قاطعة عشر دورات كامل من جري بسباب غبي تع رايدن ، كل ما راني نغلط في وتيرة جري يخليني نجري اكثر ، صوت صفارة صرعني
رايدن : عاودي
: يا أنت مخك راه في بلاصته !!! راني نجري بنفس وتيرة
رايدن : 2 دورات
: علا واش 2 دورات واشبيك انت
رايدن : 3 دورات و تزيدي تناقشيني عدد يزيد
: غبي
رايدن : 4 دورات
بديت نجري بكامل قوتي لازم نكمل ربع دورات بطريقة صحيحة ، اذا بقيت هاك راح يكمل نهار غير جري و بعد معاناة كملت جري
رايدن : مليح ، درك عندك اختبار واحد آخر
: جيت نتدرب مجيتش باش نختبر
رايدن : اذا كنتي باغية تدربي و تكوني في نفس مستوى معانا لازم قدرة تحمل تاعك تكون عالية و واش راني نديرلك اعرفي بلي قطرة من بحر
بلعت ريقي و تبعتو ، موضوع مخرجش ساهل و من 14 دورة لي جريتها بديت نحس قوتي و قدرة تحمل تهبط
رايدن : راح تطلعي ل فوق و تهبطي
كان يشاورلي ل برج ، مصنوع من حديد و فيه لي بلاك خارجين نسند بيهم روحي و نتسلق ل قمة
: بصح هادي ساهلة
رايدن : راح تطلعي و مراحش يكون عندك حزام معناها لازم تشدي روحك حاجة ثانية ، عندك مناطق مناطق راح يحرقوك و مناطق راح يخلوك تتجمدي 
بلعت ريقي و قعدت نشوف في ارتفاع برج اذا طحت من نصو راح نولي فيونداشي ،
رايدن : واجدة ؟
درتلو براسي ايه ، بديت نطلع و نحط في رجلي و مع لول كان أمر عادي كل ما طلعت كتر ، درجة حرارة تزيد و جنب تزيد فيه درجة برودة ، اذا كملت هاك راح نحرق يدي
شفت ل تحت عالية منقدرش نقيس روحي
رايدن : متخميش تقيسي روحك
: مرانيش نخمم
عضيت على شافتني ، واش ندير درك ، اذا طلعت اكثر راح ننحرق واذا رحت ل جانب أخر راح نطلق يدي من كثر برودة ، شفت من جيهتي مكان كاين والو حاجة نشد فيها ، متبكيش متبكيش ، حسيت بالعجز و بالنسبة ليا ه‍دا أسوء شعور مكنتش نبغي نبان ضعيفة في أي موقف من مواقف
رايدن : افاليا شدي مليح
على صوت عياطو لقيت بلي يدي راهي ترجف و مزالت معلقة في الهواء ،
في لحظة لقيتو طلع عندي
رايدن : شدي فيا
: لا نقدر نطلع وحدي انا برك ...
رايدن : مكاش برك ، راح تزيدي طولي راح تنحرقي
شفت فيه ، و اذا زدت شوي راح نطيح ل تحت
مديتلو يدي بصح هو جبدني بيد وحدة و خلاني نعنقو
رايدن : دوري رجليك عليا و يديك على كتفي
حسيت بيه كي وصل ل تحت ، بعدت عليه و هبطت راسي
إفاليا : راح نروح دروك
درت و جيت خارجة ، متوقعتش يكون امر صعيب ل هذي درجة ، باه تكون في بلاصة كيما هاك لازم تكون مستعد تحرق روحك بصح...
كنت غاطسة في تخمامي حتى حسيت بيدو جبدتني
رايدن : افاليا
: واش
رايدن : طلعي راسك و شوفي فيا
: بعد خليني نروح
حكمني من فكي و طلعلي راسي ، مشي وقتو ، عينيا كانو مضببين بدموع و هدا أسوء شي يقدر يشوفو رايدن و يحكمو عليا شدني من كتفي و جبدني عندو حتى راسي ترخى على صدرو
رايدن : بالنسبة ليا نتي أقوى انثى شفتها في حياتي
: كذاب ، كاين بنات يخدمو في مقر و يكونو فاتو هادي مرحلة
رايدن : نتي لولة
: واش قصدك
رايدن : هاد تدريب يخص الرجال ماشي لبنات
رائف : واش كاين هنا
بلعت ريقي و بعدت عليه ضربة وحدة ، يعني بابا دخل في اكثر وقت غالط و اسوء موقف أنه يلقاني حاضنة رايدن
: والو ، هيا نروحو
هربت ل برا و ركبت في طنوبيل ، شفت في رايدن نظرة أخيرة لقيته مستريح على آخر ، غير انا كليتها حطيت يدي على خدودي و شفتهم في مراية تع طنوبيل كانو حمرين و لون باين على وجهي جا بابا ركب و بدا يسوق ، ل اول مرة نحس روحي انثى بسباب مشاعر لي راني نعيشهم ، تفكرت أول مرة تهورت فيها و بسته كنت مغيبة عن واقع و حاجز لي درته
رائف : إفاليا
طلعت راسي فيه ، رمالي قرعة تع ماء باردة
: علاش هادي
رائف : خدودك راهم حمرين شكيت جو ليوم راه سخون
شفت فيه لقيته يبتسم ، بلعت ريقي باينة فهم كلشي بما انو الشتاء راهي طيح و رعد فجو راه كيما ألاسكا ، حاولت نبدل موضوع
: احم ..ماما كانت تشبهلي ؟ يعني شخصياتنا
رائف : ريتال صح كانت تهتم بطنوبيلات و سلاح بصح كانت صريحة مع روحها عكسك
: عكسي ؟ حتى انا صريحة
رائف : خلينا نقولو انك تكذبي على روحك ، وقت تكوني تتوجعي و ضعيفة تبغي تبيني قوة و هادي اسوء حاجة فيك انك متعترفيش ل روحك
: كل ما اعترفت بلي راني نتوجع معناها راني نعترف بلي ضعيفة
رائف : انتي راكي تتظاهري بلي انتي قوية و راح يجي وقت راح تطيحي و ماتقدريش تنوضي ، افاليا الناس لي راهم محيطين بيك نهار تبكي مراحش يبينولك بلي نتي ضعيفة
هبطت راسي و سكت ، كلام بابا ل اول مرة حسيتو واقعي و فاهمني و فاهم حواجز لي بنيتهم من صغري
وصلت ل دار طلعت ل شمبرتي و رميت روحي ، مانيش قادرة نخمم نتمنى وقت يمشي بلخف
----------------------------------------------------------
أسترايد :
و أخيرا كملنا اختبارات و جات عطلة ، أحسن حاجة في ايطاليا هو ايام أعياد لي يتبعها عطلات بزاف
كنت راقدة حتى فطنت على حس في شمبرة
ريتال : استرايد نوضي راهي 5 تع حشية
حاولت تنحيلي الغطى و انا زدمت تكمشت
: واش كاين خليني نرقد
ريتال : نوضي سما راهي عارضتنا
بعدت الغطاء على وجهي و طبعا كي العادة لازم انا نخرج نشري و نوجد
لبست سيرفات و زدت فوقها فاست و خرجت ، جو بارد لدرجة موليتش نحس بيديا ، دخلت يديا في جياب فيستا و رحت شريت واش نسحق ، خرجت من سوبر ماركت و لمحت رايدن يمشي كنت راح نعيطلو بصح لفت انتباهي لقيته رافد سلاح قدرت نلمحو من تحت لافاست ، بلعت ريقي و بديت نمشي على طروف صباعتيا ، عادة ما كان وينس و ايدن و رايدن يرفدو معاهم اسلحة بسباب تدريبات على التصويب ، تبعتو ل طريق ل رايح منها كانت طريق خالية و جاية مور فيلات و مجمعات سكنية ، وصل ل مجمع سكني مهجور خزنت مور الحيط لقيتو دخل من باب ، قربت كثر بصح باب كان مغلوق و كان حيط و شجر محاوطين بيه من داخل ، كان في حيط حدايد حطيت ساشي و رميت يدي و رجلي ل حدايد و بقيت نطلع حتى وصلت ل نهاية سور ، وقفت فوق حاشية و رميت رجلي ل شجرة ، كان شجرة كبيرة و قدرت تغطيني ، وقفت فوق غصن كان خشين و قدر يحمل وزني ، لقيت رايدن ووينس واقفين و مغطيين شخص بظهورهم و كان باين على وينس أنه واصل ل أقصى مراحل زعاف ، حسيت برعشة في عمودي فقري من منظرو كان يخوف
اول ما بعد رايدن حطيت يدي على فمي من منظر ، وجه مشوه بالضرب و جروح في كامل وجه دم نازل في كل بلاصة حاولت ندقق في ملامح مشوهة ، دايف أخ دانيال اكبر و عندو مكانة معروفة في ليسي و خارج ليسي بما انو عائلتو تعتبر ممول اول ل جمعيات كنت عارفة بلي بينهم و بين دانيال حساب بصح واش دخل دايف مكانش من نوع لي يدخل روحو في مشاكل ، كان وينس يعيط و حاكم سلاح و حاطو على راس دايف مكنتش قادرة نسمع واش يهدرو ، تكمشت فوق الغصن ، صوت رصاصة خلاتني نعيط ، اللحظة حسيت بقلبي حبس من قوة صوت فتحت عيني و لقيت رايدن واقف و دايف طايح في لرض و يعيط من قوة ألم و حاط يدو على كتفو تنفست براحة انو رصاصة مكانتش في راسو حوست على وينس بعينيا بصح مالقيتوش
وينس : انزلي
كور تاعي كامل رعش مع حروف لي خرجهم بصوتو لي كان كالم و خافت بصح قدرت نفهم بلي هدا هو هدوء ما قبل العاصفة ، كان واقف تحت شجرة و يشوف فيا ، عينين سماء اختفو و جا في بلاصتهم ازرق غامق
كان يشوف فيا و يجبد في ڨارو بيدو حطو في فمو و بدا ينفخ و يد لخرى حاكم فيها سلاح
رجعت للور ، مستحيل نقابلو بهاد حالة بديت نتسحب باه نوصل ل نهاية غصن و نقيس روحي على الحيط و نهرب ، صوت رصاصة كان قريب مني لدرجة حسيت بحاسة سمع راحتلي ،جمدت في بلاصتي و مفقتش حتى حسيت بغصن يميل بيا ل تحت و قبل ما نستوعب بلي وينس تيرا على غصن و راح يطيح بيا ، لقيت روحي طايحة بين يديه و لافة يديا عليه بكامل قوتي
فتحت عيني و قابلوني عينيه زروقا لي تفتح لونهم مقارنة بواش كانو نطقت و أنا نرجف ... مرانيش مستوعبة بلي كان قادر يقتلني
: أنت ... أنت مريض كيفاش ...
وينس : خبرتك انزلي انتي بغيتي تهربي
: و اذا كنت باغية نهرب تروح تيري على غصن كنت راح تقتلني
وينس : بصح رصاصة مجاتش فيك
: كنت راح نطيح و نتكسر
وينس : على حساب علمي راهي عاجباتك وضعية و نتي معنقتني
انتبهت على روحي و بعدت عليه ، حطني في لرض
وينس : يعني واش صرا في سطح مفادتش فيك
بلعت ريقي على موضوع لي يلمح ليه
: انا برك ...
وينس : انتي واش ؟
قرب مني كثر و مد يدو ل خصلة من شعري و دارها مور وذني و همسلي
وينس : واش رايك كون نطبقها هنا
حطلي سلاح في جنبي و دار يدو على وسطي و لصقني فيه ، مكنتش قادرة نطلع عينيا فيه بقيت مهبطة راسي ونرجف ، كامل بسباب فضولي لي وصلني ل هنا
رايدن : ماشي وقت رومانسية تاعكم لازم تخرجو من
طلعت راسي ل رايدن لقيتو يشوف فيا و في وينس و مربع يديه ، بعد عليا وينس و دورت راسي و شفت في دايف لي كان مرمي بلا حركة ، كيفاش طاوعو قلبو يضربو برصاصة شفت فيه بنظرة شفقة و درت ل حجرة لي قدامي معندوش ذرة رحمة ولا مشاعر
وينس : نظرات قطة زعفانة وفريهم لليام جاية راح تسحقيهم
: كل يوم نزيد نتاكد بلي انت مريض و مختل عقلي
وينس : قبل ماتخمي في دايف خمي في واش راح يصرا فيك
دورت وجهي و شفت في رايدن
: عيطو ل اومبيلونس تديه راح يموت
رايدن : مراح يصرالو والو راح ينوض كيما كلب من جديد
: بصح ..
حسيت بعبد جبدني من يدي ، كان وينس شادني و مزير على معصمي
: اطلقني نعرف نمشي وحدي
وينس : معنديش وقت ل محاضراتك على انسانية
وصلني ل دار و دخلت وهو راح ، و طبعا كيما حاولت نقنع ماما باه منروحش ل عرضة كل محاولاتي باءت بالفشل و هاني دروك عند باب دارهم
قعدت شادة قالب في يدي حاسة روحي داخلة ل الحبس و كي نتفكر بلي وينس رآه داخل
انفتح الباب و حمدت ربي بلي اليس هيا لي فتحت
سلمت عليهم و عليا
اليس : مزية جيتي كرهت وحدي
: حتى انا كون جيتي بقيتي معانا
اليس : قوانين اخ وينس مراهش مخليني نتحرك في راحتي
سما : اليسس جيبي قاطو
اليس : حطي قالب في كوزينة راح ندي قاطو ونجي
غير دخلت ل كوزينة قابلني بصدرو عريان و شعرو طايح على وجهو ، بلعت ريقي و ماحسيت بروحي غير فقدت توازني و كان راح يطيح كيك ، و في آخر لحظة توازنت ، رجعت نفسي كون طاح ماما تبعتني ندير زيارة ل مقبرة ، طلعت راسي لقيتو يشوف فيا ومربع يديه
وينس : مكانش علابالي بلي غير تشوفيني خيوطك يطيرو
: على زينك خيوطي يطيرو و قاعد معري روحك علينا
قرب مني
وينس : نورمالمون كنت رجل احلامك ولا راني غالط ، و راني في دارنا نتي لي جاية زادمة
حطيت قالب تع كيك و خرجت ل صالة

ـــــــــــــــــــــــــــــــــــــــــــــــــــــــــــــــــــــــــــــــ
رايكم 🩷 ديرو فولو للكونت باه يطلع و فوت ل بارتيات مدابيا نشوف دعمكم للكونت إذا عجبوكم كرونيكات ✨🥺