we were kids كــنــا أطــفــال

07

أنيا :
بعد إفاليا كان دوري اني نتواجه ، طلعت فوق الحلبة نستنى في مجهول يجي و هدا واش كان مكتوب في لعبة ، مراحش نقدر نشوف وجهو بما انو يكون داير ماسك
ماركوس : أووو كوين قالو مجهول تاعك راجل
: ماشي اول مرة نتواجه مع راجل
فت عليه و حكمت كفوف تع بوكسينق و زيرتهم على يدي و انا نخمم في هذا راجل مجهول  ، طبعا في لعبة و من قوانينها مكاش فرق بين انثى و ذكر ، إفاليا خيرت هذي طريق باه تثبت قوتها اما انا دافع تاعي وحيد كان دراهم و اني ندي تعويض من لعبة ،
و هادي كانت من قوانين لي خلاتني نشارك بعد كل ما تربح جولة راح تدي مبلغ من المال ، صوت عياط و تصفار مشجعين خلاني نطلع راسي ل جهة صوت ، طاحت عيني على جسم ذكوري يتحرك وسط عياط لبنات ، كان داير ماسك اكحل و لابس شورت برك و عضلاتو مطراسيين ، بلعت ريقي على تفاصيل منحوتة و مرسومة في هاد كور كل ما كان يقرب جهة حلبة كنت نحس برغبة تاعي في اني نهرب تزيد  بنية جسدية تاعو اقوى من واش توقعت و بالنسبة ليا كل ما كان ضخم كل ما كانت مهمة صعيبة عليا و خاصة إذا كان مدرب ، طلع فوق حلبة و عينيا تفحصت كل شبر من كور تاعو صوت ماركوس و هو يعد عد التنازلي خلاني نهيء روحي ، زيرت على يدي عند اخر رقم ، كنت نستنى فيه يتحرك و يقرب ليا بصح بقى في بلاصتو و خلاني نقرب ليه انا لولة ،حاولت نضرب ب أقصى قوة عندي ل جنبو بصح حاجة وحيدة لي استوعبتها انو يدي ضربت في فراغ ، طلعت راسي بصح مكانش قدامي درت مورايا لقيته واقف مفاتتش لحظة واحدة بصح كان خفيف و قدر يتحرك بسرعة  ، قربت منو المرة الثانية حاولت نعاود نضربو وللمرة ثانية تجنبني و خلاني واقفة في وسط ، طلعت راسي و شفت في رايدن و ايدن و افاليا واقفين و يتفرجو في مسرحية لي راهي تصرا اذا كان يتجنب ضرباتي و حنا محدودين بوقت قليل  فهو راه يراهن على خسارة بصح مستحيل نخسر و خاصة و أنا لازمني نخلص اقساط جامعة و نرجع دين رايدن  ، صوت عياط خلاني نفيق من سرحتي و قبل ما نستوعب حركة لي دارت عليا لقيت روحي فلرض و قوة فوقي ومرفقو على رقبتي ، و رجلو مزيرة على ساقاي و يدو زاوجة شادتلي يديا في قبضة تاعو  ، في لحظة قصيرة كيفاش قدر يبلوكيني و يبلوكي كور تاعي و يشل حركتي ، حسيت بنفسي يضيق و وتيرة تنفسي تزيد
شفت فيه و صدرو يطلع و يهبط و هو يتنفس ، كان عندو جرح في كتفو و تبان خياطة جديدة ، صوتي خرج على شكل همس عند وذنو
: واش ...تحوس عندي
مراحش نكون غبية و نتغاضى على أنو هدف تاعو مكانش ربح و دراهم 
قرب مني كتر حتى لصق فيا و خرج صوتو من تحت ماسك بهمس خفيف عند وذني
: وجعاتك اهانة ؟ مالا نوعدك يا أنيا راح تولي كل ثانية تتنفسيها تتفكري واش معنى اهانة
حسيت بقلبي في هاديك دقيقة و هو راح يحبس من فيتاس لي كان  يخبط بيه ، نفس صوت ،نفس نبرة  بصح مستحييل يكون قدر يوصلني و لقاني فقط اذا كان ...، شفت فيه و مديت يدي لي رخف عليها قبضة تاعو ، كنت نشوف في يدي هي ترجف لدرجة اني مقدرتش نتحكم فيها  وصلت يدي ل عند وجهو و طلعت ماسك ، و في هاديك لحظة حسيت بروحي و أنا ندخل في مغناطيس لون الغابة غامق ، نفس درجة لون لي خلاتني نخمم نقتل ، نفس وجه و ملامحو لي كانت مغطية بدم
رايس : سوربرايز
ابتسم و قبل ما نستوعب صوت عد تنازلي ل نهاية كان بدا ، صوت عياط لبنات كان صرعني ، ناض من فوقي و أنا بقيت في دوامتي و حالة صدمة لي راني فيها ، يعني....بنادم لي قدامي ...قاطعني ماركوس كي مدلي يدو باه نوض
ماركوس : لأسف يا كوين خسرتي
فطنت من سرحتي و قفزت من بلاصتي وانا نشوف في كامل اتجاهات و نحوس عليه ، كان ناض من فوقي و اختفى في رمشة عين
: وين راح
ماركوس : خرج جهة باركينق
نزلت من فوق حلبة و بديت نجري و  نحوس نحلقو ،و ندفع وسط الغاشي و عياطهم ، واش راه يدير هنا ، كيفاش عرف بلاصتي و على لعبة و على هاد بلاصة
خرجت لبرا باركينق و بقيت نحوس على طنوبيلتو وسط طنوبيلات باركينق معلاباليش اذا كانت نفسها بعد الحادث بصح علا اقل نلقى أثر ليه ، حبست في نص و أنا نحوس بصح مكانتش كاينة طنوبيل جديدة مشفتهاش من قبل اغلبهم ل ناس نعرفهم دورت راسي في كامل اتجاهات و أنا نحوس عليه ، حبست كي شفت ظل مرسوم مورايا بسباب انارة تع بوطو ، دورت راسي لقيته مورايا و يشوف فيا
: انت ... واش راك دير هنا
رايس : نحوس عليك
: انت استاذ في جامعة و بلاصتك مرموقة واش جابك ل هاد تجمعات وواش هادي حالة و أنت كيفاش ...
قاطعني كي ابتسم و قرب مني كثر
رايس : غبية
: واش راك ...
رفد يدو و حسيت بنقزة في رقبتي ، شفت في يدو لقيت لبرة
: هدااا
رايس : سوري لازملك تتحاسبي برانسيسة
و بعدها جاتني ضربة عنيفة ل رقبتي خلاتني نفقد توازني و رؤية تولي ضبابية اكثر 
---------------------------------------------------------
أليس :
بعدما رجعت ل دار لاحظت انو وينس تناسى سوجي و مجبدليش عليه و ماما و بابا كانو متفهمين و مسقساونيش او بالأحرى ماما قنعت بابا انو هادي تعتبر من مساحتي شخصية ، كانت ماما دايمن متفهمة و تحاول تخلينا نعيشو حياتنا بطريقة لي حابينها  ، شفت في ساعة كانت 09 رميت الغطاء و قفزت من سرير ، حماس بدايات قاعدة نعيشو حاليا مع ايدن ، انا برك مانيش مستوعبة سرعة لي ارتبطنا بيها ،  دخلت ل دوش فاتت سمانة على آخر مرة شفت فيها إيدن و ليوم مفروض يكون اول موعد لينا ، خرجت من دوش و قعدت ساعة و أنا نخمم واش نلبس كلشي كان عندي بسيط و عادي عادة منكونش بهذا اهتمام باه نخير واش نلبس بصح ليوم بالنسبة ليا مهم ، وصلني ميساج ل تلفون
إيدن : راني نستنا فيك تحت
ضربت طلة من تاقة لقيت طنوبيلتو مڨارية عند مدخل
جبدت غوب كحلة قصيرة بأكمام طويلة من يدين بما انو روما مزالت باردة و خاصة في الشتاء تحسب روحك في قطب جنوبي،  زدت معاهاا ليبا كحلة باه نضمن اني راح ندفى ، عدلت شعري اشقر و لبست صباط
رفدت ساكي و خرجت ل عند ماما
سما : اه اليس نضتي بكري !
كانت تشوف فيا و في شكلي تبان بلي عندي خرجة
: ماما معليش نخرج
سما : تخرجي !
بلعت ريقي علا اقل تغطي عليا قدام وينس و بابا
: رايحة مع إيدن ل متحف فنون
شافت فيا بشك و أنا قررت نستعمل اكثر نظرة متقدرش تقاومها
سما : اوكي روحي بصح مطوليش
طرت عليها بستها و جريت ل عند باب كنت راح  نخرج حتى سمعت صوت بابا
إيتام : برانساس
درت لقيتو يشوف فيا و مربع يديه
: اه بابا صباح الخير راك هنا
قرب مني و ابتسم معايا
ايتام : وين رايحة صباح ربي ؟
بلعت ريقي و مخي قرر يدير ايرور
: انا ...عندي ..يعني
قرب مني و انا هبطت راسي ، مراحش نقدر نكذب على انسان كيف بابا كان يقراني من عيني
ايتام : برانساس قوليلي وين راكي رايحة
هبطت راسي ندعي كاش معجزة تنزل عليا حتى قاطعنا صوت طبطيب من مورايا لي سلكني من تحقيق درت و فتحت باب و أنا ناوية نهرب بعدها ، قابلني بنادم لابس تريكو كحل مطراسي كور تاعو تحتو و جين ازرق و فاست كوير ، كان ايدن واقف ومربع يديه و يبتسم ، لالا مشي وقتو و خاصة و بابا راه مورايا ماحسيت بروحي غير و أنا بلعت باب في وجهو
إيتام : اليس شكون !
: حتى ...واحد 
قرب مني و دارني مور ظهرو
: بابااا
فتح لباب و بان جسم ايدن من موراه
ايتام : ايدن هدا انت !!
ايدن : اه انا شكيت اليس تلفتني
خلالو بابا الباب و دخل ل دار بكل اريحية ، غمزلي و فات ل صالون
دخل بابا موراه و أنا بقيت واقفة كي صنم نحاول نستوعب جرأة تع ايدن ،حطيت يدي على قلبي نحاول نهدئ في روحي و نقنع فيها انو هدا شي عادي و مراحش تصرا كارثة 
دخلت موراهم و لقيت إيدن قاعد و بابا يشوف فيه بنظرة شك ،  طلع راسو ليا و اول ما طاحت عيني في عينو ، دورت عينيا في كل بلاصة ما عدا عينيه
إيتام : اليس علاه مخبرتنيش انو عندك ليوم مسابقة في رسم
: مسابقة !!
إيدن : خبرتيني انو وينس مبغاش يديك
علامات استفهام لي كانو في راسي  من سؤال بابا بداو يتوضحو من ردة فعل إيدن ، عضيت على شفتي من موقف لي خلاني نطيح فيه