خطرة في وهران

D.T 13 (ما قبل الأخيرة)

* بعد يوم *

* في السبيطار *

وائل راقد في السرير وذراعتيه بلابوند محزومين ومغطي بدرا بيض خفيف عند سرته في السبيطار.. مغمض عينيه بصح مشي راقد.. وقاعد يتخيل غي في اللقطة تاع جواد وإلياس..

حتى تلمساته يد خفيفة باردة في صدره.. حل عينيه حتى شافها واقفة عنده.. ما أمنش بلي جات تزوره.. تبسم كي سقساته:

- كي راك وائل ريحت شوية؟؟.. شفتك كانت ماماك عندك ما بغيتش نديرونجيكم خليتها حتى خرجت ودخلت..

= مرحبا بيك ريم.. عادي كون دخلتي..

بغا يطلع روحه شوية وما قدرش.. سقمتله ريم المخدة تحت راسه وطلعتها وعاوناته باه يتكى على المخدة بظهره.. وعاودت قعدت في الكرسي مقابلاته..

- انخلعت كي سمعت بجواد مسكين.. ولي خلعتني كتر حكاية إلياس الرخيس.. صار هو السبة في كلشي؟!

= مانيش عارف إلهام كي راه صاريلها مسكينة..

- علاه ما سمعتش؟

خزر فيها وائل وضيق عينيه..

- إلهام كي سمعت بجواد دارت السم لخالتها.. و... ماتت.. ودروك إلهام راهي في الحبس المؤقت.. حتى يكملو التحقيقات..

دور وائل راسه وبقى يخزر في التاقة. ومزير على يديه كيما الدبزة.. خافت ريم كون يضغط كتر ينظر في جرحه.. حطت يدها على يد وائل.. وحاولت تخليه يتكالما..

- تقلقش روحك وائل.. كلشي صرا ماعندك فيه حتى ذنب..

سكت وائل شوية ومن بعد قالها:

= تلاقيت بياسين وعطاني نيميرو وآنستا تاعك.. ونسيت باه نعيطلك..

- يااا ياسين كي راه؟.. هو تاني سمعت بلي صراله مشكل وراه هارب من ليجوندارم..

عاود خزر فيها وائل وحس روحه بلي تفكر حاجة..

= هذا وين تفكرتك.. ريم..

- شا تفكرت؟

= أول مرة شفتك فيها.. كنت خارج من البيار تاع ياسين.. كنت في الموطو.. وشفتك واقفة من البعيد وكي رحت شفتك داخلة عند ياسين..

تفكرت ريم داك النهار وتفكرت بلي رجعت لسيليا وحكاتلها عليه.. وتبسمت..

= علاه راكي تتبسمي!!