📱
"මේ අයියේ...අද මට ටිකක් කලින් යන්න ඕනේ, ඔයා හයයි තිහ වෙද්දි අපේ ගේ ගාවට එනවද..."
"අනේ මල්ලි මම මේ වෙලාවට ස්කූල් හයර් එක යනවනේ... වෙනදා හතයි හතලිහටනේ එන්නේ..."
"අද ටිකක් කලින් යන්න ඕනේ අයියේ...හරි මම අදට වෙන එකක යන්නම්..."
"අනේ සොරි වෙන්න ඕනේ මල්ලි..."
"අනේ ඒකට කමක් නෑ අයියේ..."
කලින් දවසේ සිදුවුන සිදුවීම් මතක් කර කර ඉදලා පාන්දර දෙකත් පහු වෙලා වෙලා නින්ද ගියත් සිහිනට පහ වෙනකොට ඇහැරුනා... සිහින කල් ඇතුවම බබාගේ වැඩත් කරලා එයාගේ වැඩත් කරගෙන හයයි කාල වෙද්දි වෙනදා යන ත්‍රීවිල් එකට කතා කලේ අද කලින් යන්න... කලින් දවසේ වැස්ස නිසා වැහි වතුරට කොළඹ පාරවල් යට වෙලා නිසා ට්‍රැෆික් හිටිනවා... ඒ මදිවට රෑ ශේනුක එක්ක ඇවිත් බයික් එකත් ඔෆිස් එකේ දාලා ආව නිසා යන්න වෙන්නෙ බස් එකේ... සිහින උදෙන්ම බබාව අම්මලගෙ ගෙදරින් දාලා වේලාසන බස් එකේ වැඩට යන්න හිතුවේ ගිහින් එයාට කරන්න ලොකු වැඩක් තියන නිසා... ඊයේ ශේනුකට කිව්වා වගේ රස්සාවක් හොයාගෙන ඒවට online apply කරන්න යන්නයි සිහින කලින් යන්න හිතුවේ...
"තාත්තගේ චූටි මැණික...කෝ කෝ එන්න අනේ...අපි මේ කුක්කු එක බීලා සීයා ගෙදල යමු හලිද...ඔව්නේ... අද කලින් යනවනේ... මගේ චූටි දූට තාම දෝ මතද... හනේ හනේ... කම්මැලි කෙල්ල... අද ටීවිල් අංකල් නෑලුනේ මැණික... දූ ඉක්මනට කුක්කු බිව්වට පස්සෙ අපි පාරට ගිහින් ටීවිල් එකක් ගමු හලිද..."
සිහින හුරතලේට කියවන අතරේ ආල්යට කිරි එකත් පොවලා ආල්යට ගුඩුස් යැව්වා... ඊට පස්සේ එයාගේ බැක් පැක් එක කරට දාගෙන ආල්යගේ බෑග් එක උරහිසකට දාගෙන ආල්යව එක අතකට වඩා ගත්තා... තාම සෙනුරි රට ගිහින් දවස් අටයි උනත් සිහිනට වැඩ කලේ එයා කාලයක් තිස්සේ ඒ දේවල් වලට හුරු වෙලා හිටියා වගේ...
"දන්නවද මැණික...ඔයාගේ නපුරු අංකල් මට හිනා උනානේ... දෝණිගේ තාත්තා...ගෙදර යතුර පෝච්චිය යට තියලා යනවා කියලා... හොරුන්ට ලේසි වෙන්න දොර ඇරලා දාලා යන්න කිව්වනේ... ඒ නිසා... අපි දොර ඇරලා යමුද... ම්න්... අනේ එයාට පිස්සු... එයාලට වගේ ඉබි යතුරු,දොර අගුල් දාලා පරිස්සම් කරන්න දේවල් කොහෙද අනේ අපිට... ඔයා තමයි මට වටින එකම වස්තුව... උම්ම්මා..."
