البارت الاول رح يكون خفيف ولطيف عليكم ... قراءة ممتعة ^^
البارت الأول
تنهدت وبعض الذكريات تجول بعقلها...
"ربطت شعرها للخلف بعشوائية ..وكفكفت عن ساعدها ...رفعت رجلها وعينها على الهدف ..رح تصيبه متأكده ....همت تضرب بكل قوتها ..بس شيء جذبها للجهة الثانيه من أذنها بقوة وصوت يرعد غاضب: أنا مو قلت لك روحي اشتري لأخواتك وارجعي للبيت بسرعه !!
ضحكت بخفه وهي تحاول تخلص إذنها من قبضته: رايحه رايحه يبه ..بس أبغى اسجل هدف !!
ترك أذنها وناظر جاره الي يضحك بروقان: ذي البنت نهفة ... وكأنه ربنا عوضك عن الولد فيها !!
ناظرته وهي تخزه ما تدري جالس يشتم فيها وإلا يمدحها !!
توسعت ابتسامتها لما نطق أبوها: هذي حشاشة القلب ...يا ليت أخواتها مثلها ...روحي يبه لا تتأخرين على البيت!!
ناظرت أبوها بمحبه ونطقت بابتسامة: اسجل هدف؟!
ضحك جارهم بخفه: يا اخي هالبنت لما اشوفها أحس بالروح ردت لي ...صدق إنها نهفه!!يلا سجلي هدف وحنا نشجعك!!
ابتسمت لما هز لها أبوها برأسه بالموافقه ....رجعت لمكانها بكل حماس ..سجلت الهدف ..وتوجهت مباشره لجهة البقالة بعد ما ما لوحت لأبوها بيدها .."
مطت شفتها باستياء ذكرياتها مع أبوها جميلة بغض النظر عن بعض تصرفاته الي ما تروق لها ...بس عمره ما قصر معها أو زعلها ....أصعب شعور لما تكون بالوسط هذي أمك وهذا أبوك ....
زفرت بضيق من الضغط الي تعيشه ... أرخت ظهرها للكرسي ما عادت تشوف الحروف قدامها ..كلها متداخله مع بعضها ....
فركت عيونها من الحرقه الي تحس فيها بسبب التحديق بالشاشه ....
عبست ملامحها وهي تناظر نور لما وقفت وكأنها عارضه أزياء: بالله كيف هذا الفستان؟!
عقدت حواجبها بتقييم ..حركت شفتها تنطق سرعان ما ارتسمت على ملامحها ابتسامه واسعه ..وعيونها تتابعها بلمحة البصر كانت بنهاية الغرفه ....
رقية ضربت يدينها ببعض بعد الانجاز الي عملته: مرة ثانية تضربين اطيرك خارج المنطقه كلها انت وهذا الفستان المقرف!!
ما قدرت وهج تمسك ضحكتها بالرغم من تعبها وهي تناظر نور مثل المجنونه تتفقد فستانها!!
سرعان ما كتمت ضحكتها لما دخلت امها والعبوس مرتسم على ملامحها بعد ما دارت عيونها بالغرفه: ليش كل ذي الحوسه!!
تخصرت رقيه : انا ما لي دخل .. أم الفساتين هي الي عفست الدنيا!!..وانيشتاين شوفي أوراقها بكل مكان!!
نطقت نور باعتراض: كذابه لا تصدقينها يمه ...هي الي رمت كل الملابس على الأرض لأني ما أعطيتها العقد الي اشتريته البارحه!!
قاطعتها رقيه وهي تكش عليها: مالت عليك انت والعقد المقرف!..الي يسمع يقول ألماس وإلا ذهب!!
قاطعتها نور وهي تردح: دام إنه مقرف ليش ذبحتي نفسك حتى تأخذينه؟!!
عفست ملامحها وهج من صراخ أمها : خلاااااااص بسرعه نظفوا المكان قبل وصول خطيبك يا نور!!
نطقت نور باعتراض : بس هي السبب بالحوسه ذي!
همت أمها بالمغادرة ولسانها يتوعد: وربي إذا رجعت والحوسه ذي موجوده ما يصير خير!!
شدت نور على أسنانها بغيض وهي تناظر رقيه: الله يأخذك يا معفنه .. تأخرت بسببك!!
نطقت رقيه بسخريه: خايفه على أبو كرش ينتظر كم دقيقه!!
انتفخ وجه نور بانفعال: أنا أراويك الحين مين أبو كرش!!
عبست وهج ملامحها بضجر وهي تناظر شجارهم بدأ من جديد!!
رجعت نظرها للشاشه.... بدأت تبحر بين الأسطر وتغادر بعيد عن هذا العالم ..
قطع عالم اندماجها ..قطعة الملابس الي ضربت بوجهها ...ما تدري متى يتفقون ؟؟!
نطقت وهج بطول بال تقطع هالشجار وعيونها على نور: يا حلوة خطيبك على وصول!!
فتحت عيونها نور باستنكار لما استوعبت قرب قدومه: للحين ما جهزت والسبب الزفته ذي!!
بدأت نور ترتب المكان بعشوائية بعد هروب رقيه خارج الغرفه ..نطقت وهج بنصيحه وعيونها على الشاشة: انزلي بدون ما تتجهزين وكاد إنه يهون لما يشوفك...ترى التدليس ما يصير ....لزوم يشوفك على حقيقتك بلاه يتخرع يوم الزواج!!
تجاهلتها نور وتوجهت للمرآة تصبغ وجهها بكل مهارة !!
مطت وهج شفتها بشبح ابتسامه وعيونها تحركت تناظر الملاك بعد ما صبغت وجهها بأدوات التجميل ..صدق لما قالوا المكياج لا دين له!!
الي يشوفها يظنها ملاك ...بعكس وجهها بدون ذي الأدوات .... عاديه وأقل من عادي!!
تستغرب تصرفها لو كانت مكانها مستحيل تصبغ وجهها بالشوفه الشرعيه ..لزوم يشوفها على الطبيعه ...مسكين رح ينصدم يوم الزواج ...الفرق كبير !!
ابتسمت وهج لما رجعت نور ووقفت قدامها وهي تستعرض نفسها: حلو؟!
هزت رأسها بابتسامة دافئة: تجننين!!
قاطعهم دخول سناء وهي تتكلم بفزع : خالتي وصال هنا ومعها زوجها!
نور بعبوس: ذي وش جابها الحين!!..كيف اجلس مع ختيبي!!
رقيه كشت عليها من دلعها وهي تدخل الغرفه: مالت عليك وعلى ختيبك!!
تستاهلين ..جعلك شهرين ما تشوفين خطيبك!!
نور عبس ملامحها بقهر: حقيره ... إن شاء الله موضوع خطبتك يتفركش يا رقيه الدبه!!
رقيه فتحت عيونها على الأخير: استغفر الله....ذي عدوه مو أخت!!
نور كشت عليها وهي تتكتف: وخالتي ذي كيف نصرفها؟!
سناء بشماته : تستاهلين ترى زوج خالتي بالمجلس جالس مع ختيبك!!
ختمت كلامها بسخريه.. وهي تضرب يدها بيد رقيه مع ضحكه مستفزه!!!
نور ضربت الأرض بكل قوتها من القهر ...
قاطعتها وهج بابتسامه وعيونها على الشاشه: بشويش على الأرض نبغاها ..تعرفين الحال ..الوالد العزيز ما هو فاضي يرمم الأرض ...عنده مشروع زواج !!
رقيه اقتربت وهي تنطق بحنق : يا برودك .. أمي قالبه الدنيا على ذي السالفه وانت ما همك!!
نور وضعت يدها على كتف رقيه تستند عليها وعيونها على وهج: والله باخت السالفه بعد هالعمر وللحين يراكض حتى ينجب الفارس المقنع .. وش حلاتنا ما هو عاجبه البنات!!
مطت وهج شفتها بملل وهي تناظر سناء الي نطقت بحاجب مرفوع: لو تعرف أمي إنك انت دبرت الفلوس للوالد العزيز وربي إلا تقطعك تقطيع!!
كتمت وهج ضيقها من هذا الموضوع..وببرود نطقت: إذا ما تكلمتم ما رح تعرف!!
ختمت كلامها ورجعت تناظر الشاشه ببرود ظاهري ...ما كان سهل عليها تعطي أبوها الفلوس حتى تساعده بزواجه ... الموضوع للحين تحسه غصه بحلقها ما قدرت تبلعه ...
رفعت نظرها وهي تحس عقلها تشوش من أخواتها وثرثرتهم ...ناظرت رقيه وهي تنطق بترقب: أمي تقول إذا تزوج إلا تتركه وما تجلس بالبيت دقيقه!!
نطقت وهج بعد ما مطت شفتها بملل: وكأنك ما تعرفين أبوك يعرف نقطة ضعف الوالده ما تعرف تجلس إلا في بيتها ...وما ترتاح تروح لأحد ..زيارات يا دوب تطلع من البيت ... ما تحب تطلع من البيت مجرد زياره كيف تطلع للأبد ..وبالنهايه تجلس تحت رحمه زوجات إخوانها؟!
ولا تنسي الكتيبه الي عندها ...قلبها ما رح يطاوعها تتركهم!!
نور هزت رأسها: صادقه أبوي يعرف نقطه ضعفها ...ما أدري كيف يفكر ...ما يعرف إنه المرأة مالها علاقه إنه يكون بنت أو ولد
رقيه وهي تردد جمله أبوها المعتاده : غيروا العتبات ترزقون!!
ختمت كلامها بضحكه ساخره!!
سناء توجهت للشباك وهي تناظر بضجر: يا رب قبل ما يخطب أبوي اكون متزوجه وما أكون ملزومه أحضر كل شوي مسلسل طلقني !!
رقيه ضحكت من قلبها وهي تنطق: مسلسل حسبي الله ونعم الوكيل فيك!!
نور بتذكر كشت عليهم: اشغلتوني كيف اجلس مع خطيبي الحين !!
سناء ناظرتها بشماته: لا تحلمين تجلسين معه ... خالتي اسمعها تقول اليوم عندهم مفتوح وسهره متأخره!!
نور عبست ملامحها بحسره: يا خساره هالكشخه تروح لخالتي .. أنزل أسلم عليها ...وكاد تشوفني متزينه وقتها تستحي على حالها وترجع لبيتها!!
هزت وهج رأسها بقلة حيله من قلة أدبها ...يذبحوا أنفسهم على الزواج ومن أول يوم تبدأ المشاكل ..مثلها مثل أخواتها!!
رقيه بعد خروج نور نطقت بتذكر: وش صار على سلفك يا سناء ما قلت رح يخطب من هنا!!
سناء هزت رأسها: ايه ...امي قالت لهم عن رنا !!
رقيه بعبوس: رنا صغيره ...انت قلت عن ذي المزيونه!!
سناء مطت شفتها بسخريه: انت لوحدك افهميها .. أبوك ما رح يزوج البنك ويجلس بدون فلوس!!
ناظرتها وهج للحظات ورجعت للكتابه بدون ما تعلق بحرف واحد ....حتى أمها ما تعرف سبب الرفض .....كتمت ضيقها أبوها دوم يحملها فوق طاقتها!!
رقيه وهي تعدل شعرها: تعالي ننزل نشوف خالتي ..الحين تزعل أمي!!
سناء ناظرتها بتساؤل: نازله؟!
نطقت وهج بدون ما تناظرها: شوي وأنزل!!
**
**
**
بالصالة فركت وهج عيونها وهي تحس بحراره بعيونها من التحديق على اللاب ...ناظرت خالتها الي تتكلم بانتقاد: لعنبو ابليسك انت طول الوقت على الجوال وإلا التي في ..شوفي عيونك وارحميهم!!
ابتسمت وهج شبح ابتسامه وهي تلمح نظرات أمها الي تؤشر لها بعيونها ما تتكلم بشيء قدام خالتها ما تبغى احد يعرف بوظيفتها خايفه من العين ...وقبل ما تنطق توسعت ابتسامتها على نور بملامحها المنتفخة من تواجد خالتها وهي تنطق: تقولين يا خالتي كذا وانت طول وقتك على الجوال
وصال فتحت عيونها باستنكار: أنا ؟! مين قال؟!
رقيه ضحكت: خالتي سماء قالت عنك!!
وصال كشت عليهم: ترى بناتك سخيفات مثل خالتهم ... وبعدين أشوفك متشيكه
نور حطت رجل على رجل وهي تنطق بغبن: والله يقولون خطيبي جاي يشوفني ويجلس معي
قاطعتها وصال بلعانه: ابشرك زوجي اليوم ما عنده شغل ومشتاق يجلس مع أبوك ..فريحي ملامح وجهك وغسلي وجهك واجلسي معنا أبرك لك من كذب الرجال!!
نور بقهر: يعني ما حبكت إلا اليوم تزورينا!
قاطعتها أمها بحده: نور انكتمي أفضل لك!!
مطت شفتها وصال : شفت وقاحتها ...وجكر فيك ما رح أتحرك من هنا ..وبالطوفه طقي رأسك!!
زمت شفتها نور بقهر وسكتت وهي تشوف عيون أمها المتوعده ...
لا شعوريا ابتسمت وهج على حركة نور ..سرعان ما توسعت ابتسامتها لما نطقت نور بقهر: ليه تضحكين!!
هزت رأسها وهج وللحين الابتسامه مرسومه على ثغرها: ما ضحكت
نور من قلبها : اشوف فيك يوم تتمنين تجلسين مع خطيبك وما ت
قاطعتها وصال بنغزه : وهج ثقيله وما هي مثلك خفيفه!!
نور مطت شفتها: نشوف آخر هالثقل !!
ام زينب نطقت بحده: نوووووور انتهينا!!
دخلت رنا وهي تعدل شعرها ..سلمت على خالتها وجلست ...نطقت وصال بابتسامة: وكذا قربت تنفقين الدرزينه يا ام زينب ما بقى عندك الا وهج والبزران الصغار !!
رقيه بابتسامة: قولي ما شاء الله بلاه تصكينا عين وتترفكش خطوبتي أنا ورنا!!
كشت عليها وصال: مالت عليكم ...
والتفتت على أختها تتابع كلامها: بناتك ذول صغار ...تزوجين الصغار قبل وهج .. المفروض تزوجين وهج قبل ذول البزران!!
ابتسمت وهج وهي تناظر سناء الي نطقت وما عجبها كلام خالتها: والله هذا النصيب ...بعدين الناس لما تشوفنا تخطبنا .. وإلا تبغين نقول لهم لا لا تعالوا اخطبوا الأكبر ....
قاطعتها ام زينب : هذا نصيب ..وهج متى ما جاء نصيبها رج تأخذه
رقيه بانفعال: جاء وانتم تقطعون نصيبها ..سلف سناء يبغى من بيتنا وما حدد ...وعلى طول قلتم رنا
رنا قاطعتها بهجوم: وانت وش حارق بصلتك ..
ام زينب بخفوت حاد: انكتموا ...الله يأخذ عدوكم ..تبغون تفضحونا!!
وانت يا رقيه خليك بخطوبتك وما تتدخلين بأي أحد !!
ارجعت وهج خصلة من شعرها والبرود يحيط فيها وكأنه الموضوع ما يهمها ...
يا حبها لرقيه تبغاها تتزوج بما إنها أكبر منهم وما هو عاجبها خطوبة رنا مكانها ..
ناظرت خالتها وهي تنطق وعيونها عليها: يا حظك يا ام زينب بذي البنت ..مختلفه عن كل بناتك بكل شيء .. أدب وأخلاق وهدوء والأهم ثقيله!!
ضحكت بخفه وهي تشوف ملامح أخواتها بعد كلام خالتهم ...
بلعت ضحكتها لما نطقت رنا بحنق: دام كذا عجبتك ...اخطبيها لولدك ...من هنا لوقت تخرجها تجهز البيت والمهر وكل أمور الزواج ويكون ولدك بوقت الزواج!!
خزتها وهج لسخافة كلامها ...وبعدها ناظرت خالتها لما نطقت بحسره: ليت ولدي كبير ما افرط فيها !! ...بس من هنا حتى يكبر ولدي أخواتك الصغار يكونوا كبروا وأكيد رح أخذ منهم ..مستحيل أفرط بنسب أختي أم زينب!!
ام زينب كل كلامهم ما هو عاجبها ...وخلقها ضايق من بعد سالفه زواج زوجها ...نطقت بضجر: وبعدين مع ذي الجلسه ؟!
ما ابغى اسمع أي كلام يخص الزواج وانتهينا!!
**
**
**
اليوم الثاني وقفت وهج بالصالة قبل ما تطلع للجامعه وهي تناظر نفس السيناريو كل يوم ...تحس قلبها أوجعها من المشاكل ...تحن لأيام الهدوء مثل قبل ..بس وش تقول وأبوها مصمم على الزواج يبغى ولد ...ما تدري كيف يفكر ...بعد هالسنوات تذكر يسعى حتى يكون عنده ولد !!
ناظرت أمها وهي تهدد والدمعه تلمع بعيونها من الحرقه الي تحس فيها ...سنوات عمرها قضتها معه ..رضيت بالقليل ..فقدت صحتها وهي تنجب له لعلها تنجب الولد ....كانت تحس بخنجر ينغرس بصدرها لما تنجب بنت ...وبعد مرور السنوات الحين يقول يبغى الولد ....نطقت وصوتها يهتز ينذر بموجه بكاء: وربي إذا تزوجت ما رح أجلس بالبيت ... وما يهمني شيء !!!
قاطعها ببرود ولا كأنه الموضوع يعنيه: متى ما طلبت موافقتك قولي هذا الكلام .. أنا ابغى ولد ومن حقي هالشيء ... وانت في بيتك معززه ومكرمه!!
ام زينب بوعيد وهي تخرج من الصالة : اذا تزوجت رح تندم!!
تنهدت وهج بعد خروج أمها ..وعيونها تناظر أبوها الي يقلب بالتي في بكل برود ولا كأنه في مشكله وتصادم بالبيت ولزوم يحله بما إنه رب هذه الأسرة!!
نطقت قبل ما تتحرك وبخيبه نطقت : هذا هو المشروع المهم الي فيه حياتك أو موتك!!
رفع عيونه عن الشاشه ...توقعها طلعت ... تفاجئ من كلامها ...ما توقع توجه له هالكلام ..نطق بهدوء: وش أكثر من إني أموت وما ألقى اسم يحمل اسمي!!
كسرتني وهي كل سنه تنجب بنت ...دمرت وضعي المادي ...ضاع عمري وأنا أراكض حتى أقدر على تأمين لقمتكم ...١٢ بنت وأنا اقول لنفسي اصبر اصبر لمتى؟!
من حقي يكون عندي ولد وانتهينا !!
رفعت حاجب تفكير أبوها عجيب غريب ...مو كأنه كل سنة ينتظر هالولد ...
نطق وهو يؤشر لها: الله يسهل دربك ..ما عليك منّا..لا تشغلين بالك!!
هزت رأسها على مضض ما تبغى تتأخر عن دوامها...
تحركت خارج البيت وقلبها ينفطر على أمها ...من لما تزوجت ما عاشت حياتها ...دفنت نفسها وهي تراكض خلف هالبنات ...وانحرمت كثير من تردي الأوضاع الماديه ...للحين تتذكر لما كانت تأخذهم للسوق تشتري لهم وما تشتري لنفسها حتى تخفف المصاريف على زوجها ....أبوها إلي ضيع كل ورثه بالهواء من ضعف ادارته ...حتى بيتهم الكبير اضطر يبيعه حتى ما ينسجن ...وسكنوا بهذا البيت الي يا دوب يوسعهم ..... ومع ذلك أمها رضيت معه على الحلوة والمره ...تحس أمها مثال للتضحيه وللزوجه الوفيه ..بس بالمقابل أبوها ما قدر هالشيء ..وجالس يحرق قلبها وفوق هذا يعايرها إنها سبب البنات ...
وش فيهم البنات ؟!
مطت شفتها بملل من تفكير هالمجتمع ....تفضيل الولد على البنت بكل شيء ..ويعاملونه وكأنه ملاك ...وحتى لو ارتكب الأخطاء يقولون عيبه في جيبه!!
زفرت بضيق من ذي العقليه المتخلفه ...تنقهر من المجتمع الي تعيش فيه ...حتى وصل فيها الكره لكل شيء ذكر!!
**
**
**
بالجامعه جالسه عندها بريك ...تتكلم بالجوال مع أختها زينب ...وما في موضوع مشغلهم إلا زواج أبوها ...نطقت بضيق: يعني برأيك وش الحل ؟!
زينب بحده: يعني انت قابله إنه يتزوج على أمي ؟!
زفرت بضجر ما أحد قادر يفهم وجهة نظرها ...نطقت بهدوء: أنا اكيد ضد هالشيء...بس بنفس الوقت أبوي ما رح يعمل شيء حرام ...يبغى يتزوج مع ألف سلامه .. أمي وش تبغى فيه ؟!
وإذا تحس نفسها مو قادرة تتحمل زواجه ..ترى الطلاق هو الحل الأمثل
قاطعتها زينب بانفعال : يطلقك القرد قولي آمين ...تظنين من السهل على أمي بعد هالسنوات تتطلق ؟!
أرخت وهج ظهرها للكرسي وبتعب نطقت: وش الحل بنظرك ؟!
زينب بعصبيه : الحل عندك ....تنقلعي تأخذين الفلوس الي أعطيتهم لأبوي ..غبيه انت يوم تأخذين قرض على اسمك حتى ييجي الفارس المنتظر!!
وافرضي شغلك توقف وأبوك الشايب بأي لحظة يودع وإلا يفلس فوق افلاسه ..حضرتك من وين تسددين؟!
والأهم كيف قلبك طاوعك تعملين بأمك كذا ...يا أختي ما عندك دم ولا إحساس؟!
وأنا الغبيه دوم اقول عنك العاقلة والفهمانه بين أخواتي ..بس بالنهاية طلعت حقيره!!
ابتسمت وهج ابتسامه باهته والدمعه معلقه برمشها ...نطقت بغصه ما قدرت تخفيها: تراه أبوي لو يطلب روحي ما قلت له لا ..
قاطعتها زينب والشياطين تناقر فوق رأسها: أنا هذي لي ابغى اذبحها وأشرب من دمها !!
قفلي الخط قبل تصيبني جلطه .. لأنك أساس البلاء ..لو ما دبرت الفلوس كان الحين أبوي جالس يحلم على قده !!
مطت شفتها وهج لما قفلت زينب بوجهها الخط ... ما تدري هي عديمه إحساس وإلا طريقه تفكيرها تختلف عن أخواتها الي تغلبهم العاطفه!!
بالرغم إنها ضد زواج ابوها بس بنفس الوقت هذا الشيء ما يسمح لها تتعدى حدودها وتتكلم عن أبوها بقلة أدب ...هذا الشيء بينه وبين أمها ....
**
**
**
**
مجتمعين على سفرة الأكل ..أمها ماده البوز شبرين ... وأبوها جالس مروق ..تتمنى تكون سالفه هالزواج مقلب من أبوها ويخلصوا منه ....
ناظرت رقيه الي اشرت لها بعيونها مع ابتسامه ماكره على نور ...
ابتسمت وهج على شكل نور من البارحه قالبه البوز لأنها ما جلست مع خطيبها ...
نور لاحظت نغزاتهم نطقت بشر:نعم جالسه انت وإياها توزعون ابتسامات..صدق قلة أدب!!
ابو زينب رفع حاجب: وش فيكم!!
نور بغبن: جالسات يضحكوا علي!!
وهج خزتها بقوة هالبنت خفيفه .. متأكدة بكل برود تقول لأبوها إنها زعلانه لأنها ما شافت خطيبها ...نطقت تغطي على الموضوع: يبه المغرب عندي كم غرض أبغاهم من المكتبه!!
نطق بهدوء وهو يناظرها: اممم المغرب مشغول ..اطلعي مع أخواتك .... أو باكر اروح معك
بلعت ريقها وهج وناظرت البركان الي انفجر بوجه أبوها: اييييه مو فاضي يمكن عندك شوفه شرعيه!!
رقيه مسكت ضحكتها بقوة لما حست ابوها نقز من انفجار أمها بوجهه ...
أبو زينب بحده من طريقه كلامها معه قدام البنات: قلت لك هالموضوع انتهينا منه
ام زينب والشرار يطلع من عيونها: لا ما انتهينا ...جعلك ما تتهنى ...إن شاء الله تنقلب فيك السيارة ويبقى الزواج حسره بقلبك ...جعلك ما تشوف العيال طول حياتك ... وإن تزوجت ما تشوف غير البنات !!
قاطعها بغضب ..خلاص زودتها وكل مره تحاول تقلل من احترامه .. نطق والشرار يطلع من عيونه: احترمي نفسك لآخر مرة أحذرك ...وما هو عاجبك البيت يوسع جمل ...فوق ما تحملتك طول هالسنين
قاطعته بقهر : أنا الي تحملت فقرك وقرفك وسوء اخلاقك وأنا اقول هذا نصيبك وارضي فيه ...بس انت ما تستحق التضحيه!!
تحلم تشوف رقعه وجهي هنا !!
أشر لها بلامبالاة: بالناقص منك !
وهج بضيق نطقت : يبه
قاطعها بانفعال: شفتوا أمكم بعيونكم وكيف تقلل من احترامي ... وأنا من أول الموضوع أكلمها باحترام ..بس ما هي وجه احترام ...تبغى تجلس في بيتها معززه مكرمه ما أحد مقصر معها ... أما انها تقلل من احترامي ما اسمح لها !!
وهج تحاول تخفف الأجواء المشحونه: راعي نفسيتها ..ما هو سهل عليها تتزوج عليها بعد هالعمر
قاطعها بانفعال: الي يسمعك يقول مطلقها وراميها ...قلت لها ما رح تشوفين الي رح اتزوجها ولا كأنه الموضوع تم ...بس هي تعيد وتزيد بنفس الموضوع ..ورب الكعبه اذا ما اختصرت الا أسكنها هنا وهذا اخر كلام عندي!!
ختم كلامه وطلع من المكان!!!
رنا وهي تحرك الملعقه يمين وشمال: حلو حلو ما تذابحوا الا وقت خطوبتي ..والناس تنتظر موعد للزياره!!
سناء بخلق ضايق: أقول انكتمي ..صدق فاضيه لنفسك
رنا بحنق وقرف من الحياة: أبغى أطلع من هالبيت بأي طريقه ...خلاااااااص قرفت المشاكل ..نبغى بس شوي من الهدوء ...
رقيه وضعت يدها تحت خدها بملل: المشكله جالسه تكبر وأمي ما رح ترسيها على بر!!
ويا خوفي الحين جالسه تجمع أغراضها وتبغى تزعل !!
ترى ذي الحركات باخت وما هي لايقه بعد هالعمر!!
الي يسمع مشاكلهم يقول عرسان أول حياتهم!!
وهج تنهدت بضيق: ما هو سهل عليها ... أمي بنظرها تشوف إنها انغدرت من أبوي وذي تعتبرها خيانه!!
نور نطقت بانفعال: مو كأنك أساس البلاء!!
رنا رفعت حاجب بتساؤل: ليه وش دخلها؟! لا تقولون العروس عن طريقها!!!
وهج ما بقى إلا رنا الفتانه تعرف بالسالفه ..نطقت بضجر: ايه صديقتي بالجامعة ..استغفر الله!!
ناظرت بنان لما دخلت وهي تنطق بفزع: بنات أمي تجهز ملابسها تبغى تطلع من البيت!!
زمت شفتها وهج بملل وكأنه هذا الي ينقصهم ...ناظرت رقيه لما وقفت وهي تنطق: تعالوا نشوف العروس نقنعها ..تعرفون ما لهم اسبوع متزوجين بلاه الناس تتكلم عليهم ....
ابتسمت وهج على تعليق رقيه الساخر ....وناظرت سناء الي نطفت بجديه: المفروض أمي متوقعه هاليوم ...بعد ١٢ بنت وش تنتظر منه ؟!
رقيه ضحكت: لزوم يعطيها وسام البنات للتميز!!
وهج ضربت رقيه بخفه على كتفها : عيب تراهم أمك وأبوك ..شوي من الاحترام!!
تركتها وتوجهت تشوف أمها ..رح تحاول تقنعها...اقتربت لما شافت أمها تسحب حقيبتها وملامحها معدومه من البكاء ..تحس بداخلها شيء ينكسر لما تشوف امها كذا ...كل يوم يزيد كرهها للرجال وللزواج وللحب الي ما يجي من خلفه إلا وجع الرأس ...كعادتها ما تظهر مشاعرها ..تعودت من صغرها تحمل هم أخواتها ...وهم البيت وتحاول تحل مشاكلهم ....تدفع دم قلبها مقابل ما تشوف أحد متكدر أو زعلان ...مسكت يد أمها وبنبره حنونه نطقت: ويهون عليك العشرة
نطقت ام زينب بنحيب: أبوكم ما ترك للعشرة مكان!
رنا نطقت من بين دموعها : تظنين سهلة عليها يتزوج عليها بعد هالسنوات .. أنا لو مكانها إلا اخلعه!!
وهج تضايقت منها بدل ما تخفف الأمور جالسه تشحن أمها ...نطقت بتحذير: وربي إذا ما انسحبت من هنا إلا اخلع وجهك ...الواحد يقول خير أو يصمت!
رقيه شدت رنا من شعرها ..والدمعه تلمع بعيونها وهي تشوف امها حزينه ومكسوره: فارقي ما هو ناقصنا بزران!!
رنا دفتها عنها بانفعال: انقلعي!!
وهج مسحت دموع أمها بخفه: إذا أبوي ما حفظ العشرة الي بينكم ...تتركين البيت وتهجين!!
وحنا ما فكرت فينا؟!
اخواتي الصغار ما فكرت فيهم ؟!
بعد هالعمر ما اقبلها لك تتطلقين ويخترب بيتك!!
ام زينب باختناق وكأنه جبل فوق صدرها ما هي قادرة تتحمل فكره زواجه: مو بيدي هالشيء!!
وهج عقدت حواجبها باستنكار: تذبحين صحتك وتهملين نفسك وبيتك وعيالك علشان رجال ؟!
ما أحد يستاهل صدقيني تذبحين نفسك علشانه!!
شوفي حالك كيف منهاره وكئيبه وهو بالمقابل عايش ومبسوط وفرحان وكأنه أسعد رجل بالدنيا !!
ما احد يستاهل دمعه من عيونك الحلوة!!
بلعت غصتها وهج بصعوبه ...وهي تحس بخنجر ينغرس بقلبها ....تحس إنها طعنت امها بظهرها ..حتى لو ما كان علم لها بالسالفه ....لو تعرف أمها إنها كانت من الأسباب الي سهلت لأبوها الزواج وش رح تقول لها ...
كتمت ضيقها وتابعت كلامها: لزوم يمه ما تكون عيوننا ضيقه ...نناظر النعم الي حنا فيها قبل النقم ...شوفي كم أنعم ربنا عليك بنعم كثيرة ...وجودنا حولك واهتمام اخواتي فيك وطول الوقت يتواصلون معك ويهتمون لأدق تفاصيلك ..هذي نعمه كبيره ...لزوم تحمدي ربك عليها ...يمكن تشوفين بناتك نقمه من حولك وبسببنا رح يتزوج أبوي ...زواج أبوي ما له علاقه ببنت أو ولد ... إذا ربنا كتب لطفل أو طفله ييجي لذي الدنيا رح ييجي غصب عن الكل ..كم زوجه زوجها تزوج عليها وعندها درزن اولاد ...صدقيني النصيب ما احد يوقف بوجهه!!
سناء اقتربت وبملامح حزينه: كلام وهج مضبوط ...جارتنا ام علي عندها ٦ اولاد ومع ذلك تزوج عليها !!
بعدك صغيرة دوبك بوسط الأربعين ما نبعى ننحرم منك ... إذا فقدناك يمه الحياة بدون طعم !!
ختمت كلامها ودخلت بموجة بكاء ....زفرت وهج بضيق وهي ماسكه دمعتها بقوة وهي تناظر أخواتها الكل ينحب ....سحبت أختها الصغيرة أشجان الي تبكي بصمت وقربتها من امها ... وبنبرة موجوعه: وش ذنبها تعيش المشاكل والنكد وهي بأول الحياة ...انا ما أبغى يصير بيتنا موحش ...ويبحثون بالخارج عن الطمأنينه والراحه...ما لهم ذنب بكل ذي المشاكل!!
تنهدت براحه وهي تشوف أمها لانت ملامحها وخاصه بعد ما حضنت أشجان ....
