عروس البيت الاسود

لكل اليسئل عن حور البطله

استفسارات هوايه جتي عن حور
واكو رادو جزء ثاني للقصه
اني مجان عندي تواصل وياها كل هالسنين
هيه اختفت و غيرت حسابها
رجعت تواصلت ويايه كبل شهر تباركلي عالقصه الجديده
سولفنا عن حياتها الحاليه
سئلتها متابعه تعليقات القصه تكول ادخل اقره بين فتره والثانيه
ادمع واضحك وياهم
كتلها ليش منسوي جزء ثاني عن نفسي قصتج ناجحه و اكيف ارجع اكتبها
تكول ماتغير شي نفس ما اني
شاهين كل فتره يهب يتحجج بالبنيه يخابر لو يمر علينا
ابوه شويه مضوجني كلما تجي السنه مال ابن شاهين الله يرحمه
تهيج احاسيسه يشحن بشاهين على موضوع ايه يريدون الوصايه ياخذوها مني
اني بذيج الفتره لحكت كملت خارجي كملت سادس اعدادي
ومهدي جاب من طرفه واسطه جابولي عقد كاتبه بمدرسه
و تثبتت ويه العقود
علمود يصيرلي دخل ثابت و ينسد موضوع المحكمه

شاهين ينطي نفقه كل شهر و موصي مهدي علينا
يعرفني ما اتقبل رجعته لو يمشي امورنا حجج علمود يتقرب اكثر

حتكلولي ليش مارجعتيله
بنات اول شي الي مرينا بي مايتحمله بشر
نطيته فرصه و ثنين و تلاثه
فئه جبيره منكم سموني بلا كرامه كد مانطيت فرص

و موضوع الثار جان حيحدد اذا هالانسان كد يعبر و يسامح علمودنا
كد انو اامنه ع نفسي و بنتي و بيتي بالمستقبل؟

ادري موته ابنه الها حساب
بس دام اخذني و فرض عليه اصير زوجته ويعلقني بي
يعني المفروض تتغير حساباته لخاطري و خاطر بنته

بس مطلع كدها سوه البراسه ويه ابويه
محسب حساب لكسرتي بعين الناس
اني بلا شي دخلت بيته مكسوره

كمل عليه من اخذ حقه من ابويه و كبلها امي و اخواني
و مشاكله ويه ابويه مستمره لحد هسه تره
شاطبيني من حساباتهم
واذا ارجع لشاهين يعني شيصير منا و جاي استاهل اليجرالي
ماساعدني نسوي حياه هادئه
ماكدر يستوعب صارتله مره و بنيه يخاف عليها من سالفه الثارات
ماكلكم نسيته للاخير بس مو مثل كبل بجي و نوح
من اتذكر اتنهد لان ماتغير مو حته رايدته يتغير هسه
تفهمون عليه ؟

السبب الثاني مهدي
اني كل هالسنين وحدي حرفيا وحدي
اذا اكو بشر اله فضل عليه هو مهدي
و افضال مو فضل واحد
بكل مشكله الكي بكل حاجه احتاجها سواء للبيت او ل ايه الكي موجود
بنتي تكوله بابا مو عمو
ادري ضالمته ويايه بس شسوي ؟
اكطع وياه يعني احتاج لاهلي و لشاهين وضيمهم
البحر ورايه و مهدي كدامي

كلما اكوله شوف حياتك يستهزء بكلامي و يغير السيره
محترم ما يتماده ابد رغم اعرف بداخله متاذي
اهله عجزو وياه يجيبوله بنات مايقبل يخطب

هاري نفسه شغل مرات يبات بشغله ميرجع بيتهم
ادري هوايه بيكم حيفرحون ههههه بس والله ممفرحني الوضع
مهدي ينحب الف بنيه تتمناه و يمكن اني منهم
بس التنفيذ مستحيل

اني معايشه بره اني بالعراق مجتمع مبني عالقال والقيل
بيا وجه اواجه العالم و شكول لبنتي بعدين
من تكبر و تبدي تربط الامور حتكول امي العايله و ابويه جان صح بكلشي سواه
و اهل شاهين شيسكتهم ؟
مهدي نفسه شحيكول لاخوه
طيبته تخليني امنعه يغلط هالغلطه

تمنيته يشوف حياته
يوميه اهله يشوفوله بنيه ماتو يردو يزوج مايقبل
و مايحجيلي اعرف بالصدف من شاهين
شكد ما احجيلكم الامور مخربطه
رجعتي لشاهين دمار لمهدي
و العكس نفس الشي  هاي اذا ما تصير كوارث اكثر
شاهين خال كل ثقته بمهدي
مامنه علينا حاسبه ضهره الينسد عليه
اذا اصير لواحد منهم يعني خراب بين الاخوه
حياتي زينه هسه مابيها شي
عايشه لبنتي فرحانه بيها هيه وتكبر كدام عيني
الحمدلله ع كل حال
لتنسوني بالدعاء