انا مجرد انسان عايش زي الناس حياه طبيعيه بحب احلم بحب احقق حلمي بحب اوصل لحلمي بحب كل حاجه في حياتي بس كانت كل حاجه في حياتي بحبها لازم يبقى فيها شوية وجع على شوية ضياع على شوية توهان و كنت احيانا كمان معرفش انا ماشي ازاي كنت دايما اتوه بين الناس وكنت دايما افكر وارجع عن التفكير كان نفسي اعيش قصة حب زي ماكنت بشوف في الافلام كان نفسي اجرب الحب ده كنت اسمع عنه بس عمري ما عشته لحظه ابدا ...
وفي يوم طلعت سهرت مع صحابي ورجعت البيت تعبان اوي من السهر والهزار والضحك دخلت على غرفتي وبكل قوتي غطيت نفسي بالبطانيه غمضت عيني ومن هنا بدأت قصتي ؛
" انسان مجهول في عالم مجهول مش عارف انا فين ولا انا مين وضايع وسط العالم الناس ماشيه وعايشه وبتضحك وبتهزر والغريب ماشفتش حد حزين غير واحده قاعده جنب عامود في جنب الشارع و الغريب ان عنيها كانت غرقانه في الدموع والاغرب انها كانت حلوه جدا قربت منها ماتكلمتش كلمه بصيت عليها نظرة استغراب انا مش فاهم حاجه ابدا عايز اسألها فيكي ايه ؟ ومش قادر اتكلم عايز اقولها خدي بايدي ومش عارف حاسس ان لساني مش قادر احركه فضلت واقف فتره كبيره مستغرب اوي من اللي بيحصل قدامي مش عارف اقول ولا اعمل حاجه كل نظراتي كانت في عنيها ماعتقدش ان في حاجه في الكون ده شدتني غير عنيها فجأه ! قربت منها وقلتلها فيكي ايه؟
بصت في عنيا وعنيها غرقانه بالدموع وفي لحظه ابتسمت و اتغيرت ملامحها من الحزن الشديد للفرح استغربت اكتر قلتلها انا مش فاهم حاجه ممكن تفهميني ايه حكايتك مسكت طرف التيشيرت بتاعي ومسحت بيه دموعها استغربت لموقفها وانا بضحك غمضت عنيها وقالتلي اقعد هحكيلك كل حاجه .!
قعدت جنبها قلتلي غمض عينك . غمضت عيني .
فضلت ساكته ساعه بعدها قالتلي : عمرك جربت حاجه اسمها " الحب " .؟
ابتسمت وقلتلها ؛ الحب ده مجرد ( حلم ) مش واقع .
ضحكت ضحكه خفيفه قالتلي انا عشت الحب اللي انت بتحلم بيه وعشته من اوله لأخره وجربته .
قلتلها : طب اوصفيلي او احكيلي قصة حبك .
قالتلي صعب اوصفه بس هحكيلك وانت اتخيل القصه .
قالت : في يوم كنت بتمشى انا و واحده صاحبتي زهقنا من المشي قلنا نقعد على كافيه نشرب كوفي وبعد كده نروح كان قاعد قدامي انسان شكله جميل عيني وقعت عليه عجبني كانت صاحبتي بتكلمني وانا عيني على الشاب ده وتركيزي كله على الشاب ومش مركزه مع صاحبتي خالص .
صاحبتي استغربت سألتني مالك في ايه قلتلها لا مافيش حاجه كملت كلامها ورجعت عيني على نفس الشاب صاحبتي استغربت اكتر وبصت مكان ما ببص استغربت اكتر وبصتلي قالتلي بتبصي على ايه ؟!
قلتلها شايفه الشاب اللي قاعد هناك ده .
قالتلي شاب ايه ؟ مافيش حد في الكافيه غيرنا انا وانتي .
أنت تقرأ
قصة حلم
Misterio / Suspensoمجرد انسان عايش على الحلم و ضايع بين أحلامي و الواقع و فكرت أوصف حلمي بطريقه واقعيه ( قصة حلم ) .
