Saints

One

Me shub me foot inna di black heels weh mi sista sen from foreign.

"Shantel yuh ready?!"

"Yeah.." Mi seh.

"How mi nah hear yuh??!" Mi deaf ears father bawl out.

Me kiss me teeth and shout, "Yeah! Mah come!"

Why dem people always want fi extra early fi go church is sumn weh mi cah understand. Dem must excited fi gi weh dem lickle ten cents to di wutlis pastor.

"From mi a call yuh til now, weh yuh deh??!" Me father shout one more time. Feel fi throw one vase after him yuh see. Why him nuh leave me alone? A true him wah fi go see dry foot Patrice enuh. Mi nuh know why she nuh go fling on some lotion before she come church. Maybe she a hope seh God will bless her wid some cause mi nuh know wah else coulda strike her fi leave her house so.

"Come man Shantel! A two bus wi haffi tek."

Mi walk out of the bedroom weh mi used to share wid mi sister wid mi hot self.

"Mi ready." Mi seh, wid mi hand a sit down pon mi hip like a model.

Mi nuh know why him neva go di church roun di road. Him pass me my bus fare and we step thru di door. Afta him lock it, we walk go ova to di bus stop a wait pon a bus. A coaster bus pass weh pack nuh rass an dem still call we. Mi jus turn mi head like mi nuh see dem.

"Me love how yuh always gwaan like yuh hype everytime yuh see we enuh. Not even pon school morning yuh nuh wah take di good good bus when yuh late."

Mi ready fi throw a bottle weh mi see a mi foot pon di conductor head. How him can chat so?? Not even fi fada nuh know seh mi eva late fi school.

"Mi nuh hype. Mi just cah manage fi pay unnuh $50 when mi can pay less."

"Yuh jus cheap man. A hot bus yuh wah tek weh yuh nah've no space, no tv, no AC-"

Mi nuh hear di rest a wah him a seh as mi walk past him and step inna one half empty coaster.

"Ohhh.. so a suh yah deal wid me?"

Mi nuh seh ntn an just wait pon di bus fi drive off. Mi father find himself beside di dutty nasty gyal weh cah lotion her foot an mi turn mi head inna di next direction. If him eva feel seh him can bring dah gyal deh inna we yard and expect me fi call her step mother him make a sad mistake.

When we finally reach a town mi hear one bagga noise round me. Pickney dress inna school uniform pon Sunday because dem wah pay cheap fare, and mi almost bruk mi foot as mi step inna one pothole. See dem crosses yah??

"See di bus a leave deh! Come on!"

Me, mi father and di dry foot gyal start run. Di bus stop inna di middle a di road and pick we up and di whole a we stand up inna di bus. Afta bout twenty minutes mi realize seh dis nah go two two work out cause mi two foot dem start bun me like two hot peppa. Kiss me neck!!

Dis is why mi did prefer when mi live a St. Mary enuh... dem things yah nuh usually gwaan cause Bredda John weh live right next door woulda jus carry we. Now mi haffi go tru all dem stress yah. Mi jus hope smaddy come off quick so mi can sit down.

Di conductor start walk tru di bus a beg fi fare, and a get a piece a squeeze deh! Sure mi body cah function after dis!

"Move ova to yuh side lickle bit make me pass tru."

"Me cah go ova nuh more." Mi seh. Mi haffi stop mi breath and suck in mi belly fi can stand up inna di lickle small space weh mi deh right now!

Well.. since mi nah move, him slide himself past me fi go straight roun a d back. Him collect di fare all di way to do front an mi try fi squeeze mi han inna mi lickle purse fi take out di money.

"Let we off right yah so." Mi father seh.

Mi give di 'ductor di money and step off. Almost bruk mi foot again! Who di rass woulda stop a bus ova a pothole. Wait deh.. mi shouldn't cuss nuh bad word. Today a Sunday. Sorry Jesus.

Mi step tru di church and sit down inna di back while mi father and Patrice step to di front. Fi smaddy wid two dry foot mi wah know how she love make front appearance so. She nuh shame??

"Shantel. How you hot so everytime yah come church?? Yuh remind me a Latoya."

Yes.. cause a she send di clothes dem fi me..

"Mi nuh know.. me jus fling on sumn." Me lie.

Mi rass. God ago sin me. Deh inna big big church an a tell bloodclaat lie??

"Shantel.. pastor bring him son a church today." Mi fren Shanda step towards me and seh.

"Soo??" Like me business bout pastor and him wutlis son.

"Me nah talk bout wutlis Renard.. mah take bout di one weh did deh a foreign."

Mi pick up mi ears and finally start listen. "Pastor did have a son a foreign??"

"Yeahh girl. Him cute too."

If pastor have a pickney mi nuh see how di rass him ago cute. Dem nuh see how pastor look?? All Renard look like him and boy...

"Weh him deh?"

She look ova to di front and mi follow her eye. A tall boy a stand up a talk to pastor and when him tun roun mi see say a ugly Renard.

"Weh yah show me Renard fah? Nobody want fi see him?"

Just as mah talk, mi see show off Gabby start walk towards me with this extraaaa cute boy beside her. True she come from uptown, fi her clothes dem eva hot. Dem always say mi an her inna competition but mi nuh need fi inna competition wid no uptown gyal when it comes to dressing cause my clothes come from foreign.

"Hi Shantel. Hi Shanda." She seh, a grin like pleased puss.

"Wah gwaan Gabby." Shanda seh, while mi eye dem start linger pon di boy beside her. The. Boy. Look. Good. Thank God seh mi dress nice today. Him tall and brown and... ohh lawd.. him look good.

"Hi." Mi say to him, ignoring Gabby. Gabby can go chuck off a bridge fi all me care.

Him turn round and walk weh!

☆
So this is my first story in patios. I hope it's readable cause I know everyone spells words differently in Patios.

And I hope you like it :)

-Asherene