"God know, yuh leg smooth like you and cocoa butta a best fren."
"Nuh bathroom yuh seh yah go? Di toilet paper deh right deh so." Mi seh, an pull di sheet ova mi foot.
Di lickle place did a get hotter as it guh deeper inna di night, an it did start feel like a devil convention mi deh.
"Bwoy.. Yuh couldn't jus seh tanks? Yah gwaan like a every day yuh hear compliment. "
Mi lean up good an look pon di gyal.
"Lickle girl. Go piss an leave mi alone."
She did small inna body too, suh mi neva know how she full a suh much mouth.
"Who yah call lickle girl?" She ask, an har voice raise same time.
"Mah go sleep." Mi seh, an mek a move fi duck under mi sheet an try sleep when she say:
"Yeah man. A dat yuh do. Hide under yuh sheet."
"Renee, stop di noise. We a try sleep." A girl weh guh har church fling a lotion bottle afta har but she jump like she a play dandy shandy an it miss.
"Alright alright. Goodie, weh yuh say di toilet paper deh again?"
One mind tell mi fi nuh ansa har enuh, cause mi couldn't tek crosses inna di night. But mi point towards di corna an afta she tek it up she say, "Tanks yer?"
"Mhmm... " mi seh, an flip ova again.
Mi twist an turn fi long until sleep finally start come, then smaddy touch mi shoulder and frighten mi.
"If yuh nuh leave mi alone!" Mi say, vexation a cross ova mi.
Mi think mi voice woulda loud but instead it sound like a loud whisper.
"I couldn't sleep, and I saw the door open.. "
Mi turn ova, and look pon him.
"Curtis, march yuh baxxide out a door guh tek some breeze an guh sleep. Mah try sleep."
"You sound so cute when you're sleepy.. " Him seh, then him seh, "Sorry about today, if I push you away it can't be your fault."
"Curtis... " Mi seh, a mek up mi face. "Mi nah go memba nutten tomorrow. Gwaan guh sleep. "
Him lean ova an kiss mi pon mi forehead. "Goodnight Shantel.. "
"Mhhmm.. Night. "
.....
Next mawnin bright an early, mi jump inna di cold water an start hop, jump and skip when mi feel ice a beat down pon mi body.
A weh di rass..
Mi jump ova to di side weh nuh wata nuh deh an start soap up mi rag.
Same time, mi hear di door open and a girl say, "Sorry. Mi can come back when yuh done."
Mi gwaan soap up mi rag and check pon di curtain fi mek sure seh nutten wouldn't show.
Di water did still feel like ice and when mi hear di door open again, mi did a get ready fi peep through di curtain when mi spin round fast and slip inna di water.
Mi get a piece a drop deh, mi feel it straight inna mi soul.
"Whoever is in there, are you okay?" Mi hear a familiar voice an start pray.
Him come over and move di curtain an help mi stand up and mi sigh. Mi naked as day. Wah type a place only have one bathroom fi everbody??
"Didn't know anybody would be in here this early. You alright?" Him ask, but even as him seh so, mi see him eyes a roam ova mi body.
"Yes, Curtis. March yuh yeye dem ova deh suh." Mi seh, a cover mi breasts and private wid mi hand and mi rag.
"But.. God blessed me today. Yuh cah tek weh mi blessings."
Mi roll mi yeye dem. "Think yuh did vex wid mi."
"No sah... Not at all... " Him seh, still a stare.
"Yuh know this nuh fair. Yuh walk in pon mi last night and today an mi neva once even walk in and see yuh collar bone."
Him mek a move fi lift him shirt ova him head and mi seh, "CURTIS!"
Him laugh.
"Wasn't going to do anything Shantel. I respect you. Was just trying to be fair... "
"But.. " As mi say suh, mi stop an think bout it.
I mean, if him wah fi be fair, a who me fi tek weh him chance fi feel like him a be fair?
Plus, curiousity did a kill mi, and all di water did all start feel less cold.
"Alright.. Be fair. "
∆
Remember to vote, comment and share. 💋I'm on Instagram @asherene
![](https://img.wattpad.com/cover/59505787-288-k51939.jpg)
YOU ARE READING
Saints
Teen Fiction(Written in Jamaican Patios) HIGHEST RANK - #1 IN JAMAICAN STORIES Mawga foot Shantel want di pastor son.. but what she get is not what she bargain for ☆ Copyright © 2016 Asherene Ramdon All rights reserved. No part of this publication may be reprod...