فاق لحالو مرة تانية ، طرفو اليمين كان فارغ وبارد كتير ، طلع عليه بعيون حزينة ، فتح موبايلو ، الساعه سته ونص الفجر ، كتب رسالة
" وينك " وارسلا
" بالشغل ، عندي كتير اليوم " رد ايروين تقريبا فورا بعدا ارسل " لسا بكير ، لازم ترجع تنام "
هو مو غبي ، هو بيعرف انو ايروين بطلع بكير مشان يهرب منو ، بس عادي لانو الامور بينن مو كتير منيحة هالفترة ، بس رح تعدي ، كل العلاقات فيا مطبات ، اكيد هو بحتاج يعطي ايروين مساحة
" اوك " رد عليه لانو مابدو يتخانقو بالمسجات " بتمنالك يوم سعيد ، بحبك "
ايروين ماجاوب لحتا صار وقت الغدا بعت مسج صغيرة " وانا بحبك ، بليز خليك الليلة فاضي "
بعد ماخلصو العشا ، حكو شوي بالمواضيع المعتادة ، بس الوضع كان ناشف اكتر من العادة ، ايروين مختلف الليلة بطريقة ليفاي ماقدر يميزا ، حتا بعد اربع سنين سوا ، هو لسا مابيقدر يفهم كلشي بفكر فيه ، الوضع شوي محرج مشان هيك ليفاي قرر يغير الوضع
ليفاي: بدك مساج؟ ..
مسك ايدو واخدو لغرفة النوم
ايروين سحب ايدو منو
ايروين: بصراحة .. كنت بتمنا انو نقدر نحكي
ليفاي: اوه.. عن شو؟
هالسوال مالو طعمة بس مجرد رد فعل مخلوط مع الرفض للواقع هو بيعرف شو الجواب ، الكلمة الصغيرة الي بتعني كلشي وولاشي
ايروين قعد عالكنبة وتنهد ، ليفاي لحقو واستناه يحكي ، بس كلشي عملو هو انو مسح بايديه على وجهو وشعرو الاشقر الدهبي
ايروين : اكيد انت عندك فكرة مسبقا عن شو رح نحكي
اندار عليه وطلع فيه بحده
ليفاي: عنا
حكا بارتجاف ، حاسس حالو صغير ، صغير كتير وكانو طفل واهلو عم يعلمو وكانو ايروين رح يعطي نجمة دهبية على الجواب الصحيح
ايروين: نحن مو زابطين مع بعض ليفاي
مع انو حكا بصوت ثابت بس باين وكانو الاعتراف هاد كان تقيل عليه
ليفاي : العلاقات صعبة
ليفاي حس بثقب بقلبو ، قاطعو ايروين لما هز راسو بالنفي
ايروين : لا طفلي
اخد نفس وهديت ملامحو
: قصدي انو .. نحن عنجد مو زابطين مع بعض
صوتو نكسر بنهاية الجملة
وايد ليفاي تلقائية ارتفعت لعند تمو برعب ، لانو الوضع صار فجاه حقيقة ، كتير حقيقي وهو مو عارف كيف يستوعب شو عم يصير
ايروين: يمكن صار الوقت انو تقبل حقيقة انو كل واحد فينا لازم يروح من طريق
ليفاي قاعد ماتحرك مصدوم بغباء ، صدى بادنيه والوقت وقف فجاه ، وجهو صار سخن وعم يحرقو ، تجمعو الدموع بعيونو وكانو بستنو لحتا الحياة القاسية تامرن بان ينزلو
ليفاي : من وين كل هاد اجا
قدر يحكي مع انو صوتو تغير لدرجة حس انو مو صوتو حتا
: نحن تخانقنا كم مرة .. وانت .. وانت بس استسلمت بسرعه
ايروين حط ايدو عخد ليفاي ، بس ليفاي عصب بشكل هستيري وضرب ايدو وكمل
: وانت بكل وضاعه قعدت هنيك واكلت العشا معي ، بعتلي رسالة عم تقلي فيا انك بتحبني ، وانت طول هالوقت كنت عرفان انك رح تتركني بهي الطريقة
ايروين : انا عنجد بحبك
حكا بسرعه وايديه بتحاول تسيطر عليفاي الي طلع عن السيطرة
ليفاي : نقلع .. حل عني
حكا ليفاي بعصبيه ، وحواجبو قربت كتير من بعض ، كان عم يحترق
: مابتقدر تقلي انك بتحبني وانت هون لتحاول انك .. انك تتخلص مني
ايروين دار وجهو عالطرف لانو لو ضل عم يطلع فيه رح يخسر المعركة بسبب دموع ليفاي الي ماعم توقف
ايروين : انت بتعرف انو الموضوع مو بهي البساطة ليفاي
ايروين تنهد بتعب وكانو عجوز مع انو لسا صغير
: بس لان بعتقد انو لازم ننفصل مو يعني اني مابحبك بعمق
ليفاي بحاول يستوعب ويهدا للحظة ، كل الي عم يصير مو منطقي ، ولاشي منطقي بالنسبه لالو
ليفاي: اذا انت عنجد بتحبني لسا منقدر نصلح كل هاد.. انت بس عم تتخيل انو كل هالمشاكل مالن حل .. انت مفكر رح نضل هيك للابد.. بس مارح يضل الوضع هيك ايروين
ليفاي حس انو ايروين عم يسمعو وانو رح تنحل المشكلة .. حس بامل
: نحن بس لازم نحاول اكتر
ايروين : نحن جربنا كلشي
ليفاي : لا مو كلشي ايروين ، منقدر نروح لعيادة الازواج مرة تانيه ، بوعدك مارح اضيع ولا جلسة من بعد هلق ، ورح نقضي وقت مع بعض اكتر ، بس لو منقدر نح..
ايروين مسك ايد ليفاي وضما لصدرو ، بعدين رفعا لشفايفو ، وطبع بوسة ناعمة وصغيرة عايدو
ايروين : انت قلت هالاشياء من قبل
بعدا همس
: نحن منضل نوعد بعض بشغلات مارح نعملن
ليفاي : لاتتركني..
ماقدر الا يصرخ
: انا مابعني شي لالك كل هاد انا قليل عندك
ايروين: الموضوع مابقا يزبط بالمحاولة ليفاي ، مارح يزبط بالمحاولة الوضع مو بالمحاولة هلق.. انا ماعاد حس بنفس الطريقة .. ختلفت الامور
بعدا اجت الصاعقة
: انا ماعاد حب ابقا معك بعد هلق
ليفاي: اوه ..
ليفاي انصدم بشدة .. اخد نفس .. كلشي هدي فجاه .. تقوست شفايفو وقفت دموعو .. حس وكانو رح يستفرغ .. بس ماستفرغ هو مات شي جواتو ، عيونو دبلت كتير ، والوجع الي جواتو اكيد باين ععيونو
ايروين دفن وجهو بصدر ليفاي كان بقلو انو هو اسف .. اسف كتير .. مرة ومرتين وتلاتة
تركو يبكي بحضنو .. وينمسحو دموعو ببلوزتو .. حتا هو بدا يمسح على شعرو الاشقر وصافن بالحيط الي قدامو .. استمر بكاء ايروين لفترة بعدا قال ليفاي : اذا العالم الي بدوني هو الي بتحتاجو لتكون سعيد .. فانا موافق عقرارك
ايروين رفع راسو عيونو كانت حمرة وكان بطلع عليفاي ، ليفاي مسح باصبعتو على رموش ايروين المبللة ، مسح دمعتو وقال : انا بس بتمنى انك ماتندم.
