اريد اعلن حداد وللعشك ماعود
واريد انساك ونسة البينك وبيني
وشك دفتر غرامك خاطر انة انساك
ودير الوجه عنك من تلاكيني
ماريدك بعد لو انتة روحي تصير
ماريدك لون من تموت تحييني
ملح بعيوني احطن ونسة حتة النوم
اخاف بالمنام اطيوفك تجيني
اذا شافتك عيني وفرحت بملكاك
ولله اتبرة منه هاي مو عيني
وذا صافحك خدي بحجة الخملان
اكص اثنين ادية اليساري واليميني
وذا كالولي حبك يسري بشريان
ثق بالله اكطع كل شراييني
واذا صاير شمس انة ابقة دوم بليل
ومارد الضوة بالظلمة خليني
تذكر من لكيتك والعطش واليك
وكلتلي يمعود اترجاك رويني
عصرت اجفون عيني وشلييت دموع
وشربتك بدية وانتة تدريني
ومن مرني العطش صرت انتة جربت ماي
كصتك معتني ومديت جفيني
وانتة بكل وكاحة وكل صلافة عين
درت بجفوفي سم وردت تنهيني
تذب نفطك علية وانة بية النار
وتتحمة اعلة ناري وماتطفيني
وصرت محبس بيدك وكمت بية تسوم
ساعة تبيع بية وساعة تشريني
اضل خصمك وفضك حتة من تموت
علة كبرك اخطن بايك اسنيني
