ح٢
خلصت حنة اخت ياسمين بعد مامشيت أمل وهى مشدودة ومش عارفة ايه الى حصلها فجاة من بصة مصطفى ليها وجه يوم الفرح وطبعآ اكيد ياسمين مشغولة مع اختها الوحيدة ومقدرتش أمل تروح ..
.وبعد م خلص الفرح وكمان عدى بعده اسبوع لولا م عرفت أمل تتلم ع ياسمين تحكى معاها وترغى فالتليفون بدل الوحدة والملل الى هى عايشاهم طول الوقت. مننكرش ان امل خدتلها يومين تفكر فمصطفى ومش قادرة تنساه بس بردو معلقتش نفسها..اصل امل عمرها م حلمت بحاجة ولا استنت حاجة دايمآ سايباها ع ربنا كده .
ياسمين بتحكى هى وامل تيلفونيآ عن الفرح والى حصل ف ، وشوية يحكو عن فرحتهم بالنتيجة بتاعتهم ومجموعهم القريب من بعض بس امل اعلى بحاجة بسيطة وشوية يحكو عن التنسيق وخايفين لتجيلهم كليه بعيد عن بعض او جامعات متفرقة. وفوسط المكالمة...
ياسمين: تعرفى ان مصطفى ابن خالتى سأل عليكى!
أمل: (بتدارى كسوفها وبتدارى ع ياسمين انها فاكراه) ايه؟ مين؟
ياسمين: يابت مصطفى ابن خالتى الى شاورتلك عليه من الشباك
امل: اه افتكرت...ماله
ياسمين: فالفرح سألنى عليكى وقالى هى مين صاحبتك الى كانت باصه من الشباك معاكى دى ؟
قولتلو دى امل بنت الحج عبدالباقى صاحب محلات العطارة فالشارع الى ورانا
امل: قالك ايه؟
ياسمين:قالى اه عرفه وعارف اخواتها...اصل اودة نوم اخوكى ابراهيم والسفرة طالعة من عنده فالمعرض هو الى عاملهم.
امل: والله!! طب كويس..وبس كده
ياسمين: اه بس كده...المهم اخوكى امجد نجح صحيح؟
امل: ايوة ياختى...بس طبعآ كالعادة مافيش حاجة بتعجبه قال ايه مش عارف يفرح عشان بعد النتيجة هيعمل ايه ومافيش شغل فالبلد
ياسمين: والله اخوكى ده خميرة عكننة ..الله يكون فعون الى هتتجوزة
امل: يتجوز ده ايه..انتى عارفة دايمآ يقول لماما انا مستخسر نفسى فالى هتتجوزنى ياسمين: ايوة عشان هو احمد زويل اصلى امل: هههههههههههههههههههه الله يكون فعونه
============================
عدت الايام بسرعة والتنسيق بان وجت لامل حقوق القاهرة زى م كانت نفسها وبتدعى فصلاتها..وياسمين جاتلها تجارة القاهرة بردو ، الحمدلله جتلهم نفس الجامعة عشان ميتفرقوش عن بعض بقى . اول يوم جامعة ..
. ده بيفرق فحياة ناس كتير ،بيبقى ليه ذكرى حلوة متتنسيش طول العمر... طبعآ بعد الحاح طويل من امل ع باباها انه يجيبلها موبايل زى ياسمين عشان حتى يتطمنو عليها، باباها مكانش موافق عشان بيخاف من حكاية الموبايلات دى والى بيسمعه عنها. بس قدر ابراهيم اخوها الكبير ان يقنعه انه ضرورى عشان هى بنت ولازم يعرفو مكانها واخبارها.
أنت تقرأ
~ أمــل بـــكــرة!! ~
ChickLitأمل.... الحكاية دى عن بنوتة جميلة اسمها "أمل" ،ودى حكايتها من 10 سنين امل بنت عادية جدآ ع قدر من الجمال..شاطرة طول عمرها فدراستها،عيونها جميلة وملامحها ملامح البنت العربية يعنى بشرة قمحاوية والتفاصيل الهادية الى فالوجه.
