دلوقتى وانا واقف قدامه فوسط الترب والضلمه ، الضلمه اللى عامله زى السجن اللى مينفعش الخروج منه ودماغى مع كلامه ومش معاه ، مش قادر احدد انا مين ؟! مش عارف انا الخير ولا الشر ؟! بس الكتاب .. الكتاب اكيد فيه الحل ولا انا اللى فيا الحل اكيد الكتاب اكيد كل اللى بيحصل لى ده من الكتاب ، الراجل قالى : كلام اللى عبدالعزيز قالهولك صح ! قولتله : طب وانت عرفت منين انى كنت مع عبدالعزيز اصلا وكمان انت عارف هو قالى ايه ؟!
قالى : اه عارف عارف ومتأكد هو قالك ايه وانت اساسا حقيقتك ايه زى منا متأكد انك واقف قدامى ، سيبك من الكلام ده بقى وخلينا فى المهم اللى فى ايدى ده ملفك فى كل حاجه عنك من يوم ما اتولدت انا عايزك تقرأه كويس بعد ماتروح مشوار هقولك عليه !
قولتله : هاه عايز ايه اخلص ؟!
قالى : اهدى على نفسك شويه خد ..! ورمى ليا الملف على الارض ، اخدته وقالى تعالى .....
فتح شنطه عربيته لقيتها مليانه سلاح ورشاشات قالى انا عايزك توصل الحاجه دى لواحد فى اسيوط وعنوانه هتلاقيه فى اول ورقه موجوده فى الملف ومتنساش لو موصلوش للراجل او حاولت تهرب يبقى احسن لك تقتل نفسك قبل ما انا اجيبك واقتلك .. هاه ! فاهمنى !
قولتله : يعنى انت عاوزنى اوصلك السلاح ده علشان تدارى عليا لا يا حبيبى انا مش بتهدد ومقبلش ان مجرم زيك يهددنى !
قالى : مجرم ههههههه اه ! انت بس تقرأ الملف وانت هتعرف كل حاجه عن نفسك انت دلوقتى الطيب متخافش روح نام والتانى هيخلص ليا اللى انا عاوزه ! ولقيته بيقولى : هات مفتاح عربيتك وخد العربيه دى وروح وبكره ابقى اتصرف ! ركب عربيتى ومشى ، ركبت العربيه وانا مش عارف هعمل ايه ولا فاهم كلامه يعنى ايه التانى هيتصرف ويعمله اللى هو عايزه ! اه يا دماغى اه !
لقيت التليفون بيرن رديت لقيت حد بيقولى : سلام عليكم يا استاذ احمد .
رديت : ايوه مين معايا ؟
قالى : انا دكتور شاكر اخت حضرتك مدام مى جاتلى وكان لازم اقابلك .
قولتله : بخصوص ايه يا فندم ؟!
قالى : بخصوص حاجه هتريحك وتخلصك من كل اللى انت فيه !
قولتله : طيب عنوانك فين ؟
قالى العنوان ورحت فعلا على هناك وطلعت وخبطت على الباب فتح وقالى اتفضل يا استاذ احمد دخلت وقعدت .....
قولتله : نعم خير بقى ايه يا استاذ ايه الحاجه اللى هتريحنى وتخلصنى من اللى انا فيه واساسا هو ايه اللى انا فيه ؟! قالى : بص انا عاوزك اهم حاجه تستوعب الكلام اللى هقولك اخت حضرتك حكتلى عنك كل حاجه تقريبا وحضرتك من تصرفاتك واضح انك عندك انفصام فى الشخصيه !
قولتله : انفصام ازاى يعنى ؟!
قالى : حضرتك جواك شخصيتين ، شخصيه طيبه وشخصيه شريره ، الشخصيه الطيبه هى احمد على لكن الشريره هى على حسنين انا عارف ان الموضوع صعب شويه لكن فيه شخصيه معترفه بأبوها وامها وفى شخصيه تانيه كارهاهم وبتتمنى الموت ليهم ، فى شخصيه بتحب الناس وشخصيه بتعاديهم ، فى شخصيه اشتغلت فى المخدرات والسلاح وفى شخصيه بتروح تدرس فى الكليه !
قولتله : انا كده ابتديت استوعب ايه اللى بيحصل يعنى الكتاب ملوش اى دعوه وميقدرش يحركنى او حتى يعمل فيا اى شئ وحش ، طب لو سمحت يا دكتور انا ازاى اقدر اغير ده لان انا كده هموت يا دكتور وقربت اتجنن انا يا دكتور قتلت وممكن البوليس يمسكنى فى اى لحظه !
قالى : هو كعلاج ممكن يأخد شهور وساعات بتبقى سنين لكن فى حالتك مينفعش لانك ممكن تتحبس انا الصراحه معنديش اى حل لحالتك بس انت اهم حاجه تقدر تتغلب على النص التانى الشرير وبكده هتبقى عالجت نفشك بنفسك .
قولتله : شكرا ، حضرتك انا اسف انى تعبتك ومشيت ......
-
مش قدامى حل غير انى اخلص على نفسى خالص والا هبقى خطر على الناس وخطر على نفسى ! مينفعش انام علشان لو نمت هعمل اللى الراجل عايزه وممكن اقتل واساعد فى القتل وتجاره الدم اللى ملهاش بدايه او نهايه ، لا لا ؟!
انا مش عارف اعمل ايه انا لازم اقتل نفسى !!
اه لازم لكن لكن كده حياتى هتنتهى وهخسر الدنيا والاخره ، لا لا لا !
انا هروح اسلم نفسى للبوليس وزى ما تيجى تيجى ؟!
يتبع .............................
