رسالة من مراهقة

آخر مرة

صديقتي ..
ماكنتش أعرف أنها هتكون اخر مرة

آخر مرة هشوفك فيها
آخر مرة هاسمع فيها ضحكتك
آخر مرة هحضنك فيها
آخر مرة هضحك معاكي فيها
آخر مرة هشوف فيها نور عينيكي وانتي مبتسمة
آخر مرة هتسلمي عليا فيها
آخر مرة هشوفك فيها بتضحكي علي الحاجات الي بقولهالك
آخر مرة هنفتكر فيها الي كنا بنعمله مع بعض عشان بقالنا كتير ماشوفناش بعض
آخر مرة هلاقيكي بتجري عليا من الفرحة
آخر مرة هشوفك فيها فرحانة
آخر مرة الي هتجبيلي فيها هدية

طب ليه .. ليه محذرتنيش و كنتي تقوليلي انو دي آخر مرة .. قلت أقفلك وانتي بتعدي عشان عارفة اني مش هشوفك غير بعد فترة ، بس مش علي طول !! .. " أنا هقفلك هنا عقبال ما تعدي عشان عارفة إنك طفلة و هبلة " فاكرة رديتي عليا قلتي ايه ؟ " ليه ؟ هموت يعني !! " و ضحكتي ، وكانت آخر ضحكة .. شوفتك بتروحي مني قدام عيني ، أنا ندمانة إني معرفتش أعملك حاجة .. بس علي الأقل ضحكتك ، سبتلك ضحكة مني زي مانتي سبتي الفرحة الي زرعتيها جوايا لما فاجأتيني ..

بس طلعت المفاجأة الحقيقية إنك روحتي مني ...
بس عمتا !!
شكرا إنك جيتي تسلمي عليا
لآخر
مرة

الله يرحمك يا صديقتي .. !! ♡