كنتم عايزينا نرجع نلف العالم ، تعالوا نروح رحلة صغيرة بسيطة لكوريا الجنوبية عشان نشوف قصة صغيرة حصلت هناك ، مستعدين ؟؟
أهو اللي هيحكيهالنا وصل هناك أهو ... إقعدوا هاديين بقي عشان نسمعه كويس
و كمان عشان أنا مش واثق فيه !
يلا نسمعه ؟؟
.
أنا شاب غني جدًا و بكلمة غني أقصد إن معايا فلوس معرفش عددها و مش عارف هلحق أصرفها إمتي ، مش بشتغل طبعًا !
حد يبقي معاه الفلوس دي كلها و يشتغل ؟؟
وقتي فاضي و أنا بزهق بسرعة عشان كده من فترة إخترعت لعبة تسليني ، اللعبة دي هي إقناع الناس إنها تعمل حاجات مجنونة أدام الكاميرا عشان الفلوس ، و الحجة إن ده فيديو لقناة تحديات علي اليوتيوب بس في الحقيقة محدش بيشوف الفيديوهات دي غيري أنا و مجموعة من إصحابي ... فكرة حلوة ... صح ؟
جنب بيتي فيه حديقة واسعة معروف إنها مكان بيتجمع فيه الأجانب هنا ، و أهي فرصة ألاقي حد أكلمه بالإنجليزي و حد جاي هنا عشان يشتغل ، سايب بلده و أهله عشان الفلوس ، لما نزلت أول واحد عيني جت عليه كان شاب لطيف ، أوائل العشرينات و وسيم ، قربت منه و سألته : " إزيك ، إسمك إيه ؟؟ "
بصلي بقلق و رد عليا ، قالي إن إسمه جيمس
سألته لو يحب يعمل حاجة مجنونة في برنامج تحديات لقناة علي اليوتيوب مقابل مبلغ محترم ، فكر شوية و بعدين وافق ، سلمنا علي بعض و بإبتسامة كبيرة قلتله إن اللعبة 4 تحديات بأربع جوايز مختلفين
كل تحدي بيكون أصعب ... و جايزته بتكون أكبر
.
التحدي الأول كان بسيط ، لازم جيمس يروح لأي ست هنا بشكل عشوائي و يقولها إنه بيحبها جدًا و الجايزة المرة دي 50 دولار
جيمس ضحك و حس بالإحراج لكن بعد ثواني راح لأقرب ست قاعدة جنبنا و قالها إنه بيحبها جدًا ، الست إستغربت و كانت هتضربه بالقلم علي وشه لولا ضحك و قالها إننا بنصور برنامج تحديات لليوتيوب ، الست ضحكت و إدتنا موافقتها ، جيمس جالي و خد الـ 50 دولار
إستحقها
.
التحدي التاني كان أصعب شوية
لازم جيمس يمسك إيد راجل بشكل عشوائي لمدة 10 ثواني مش أكتر ... الجايزة المرة دي 200 دولار !
جيمس إبتسم و حس بالإحراج أكتر المرة دي
وقف ثواني يراقب الناس و بعدين خد نفس كبير و راح مشي جنب راجل كوري و مسك إيده ، الراجل وقف و بص لجيمس ، جيمس إبتسم للراجل و الراجل لسه مذهول
عدي 7 ثواني ، الراجل حاول يسحب إيده لكن جيمس نجح يفضل ماسكها لمدة 10 ثواني و بعدين ساب الراجل و جالي بيضحك ، الراجل بصله بإستغراب و سابه و مشي ، إديته الـ 200 دولار
للمرة التانية ... جيمس إستحقها !
.
التحدي التالت كان أصعب كتير
لازم جيمس يقلع حد ماشي حتة من هدومه ... الجايزة المرة دي 500 دولار
المرة دي كان التحدي صعب ، جيمس كان متردد كتير لكن الحاجة للفلوس دايمًا بتكون وحشة و بتخلي الناس تعمل أي حاجة ، وقف كتير ، حوالي ربع ساعة يتفرج علي الناس لحد ما لمحها ، ست ماشية لابسة كوفية ، الجو كان برد جدًا
مشي وراها ثواني و إستغل الفرصة و قلعها الكوفية بشدة واحدة ، الست زعقتله لكنه رجع الكوفية و إعتذر لها جدًا ... قالها علي البرنامج لكنها كانت لسه غضبانة ، طلع لها 100 دولار و إداهملها و فورًا إبتسمت و سامحته و مشت
الفلوس بتقدر تعمل أي حاجة للأسف
للمرة التالتة جيمس أثبت إنه ذكي و يستحقها !
.
التحدي الرابع و المستحيل
سألت جيمس لو كان فاضي بكرة طول اليوم ، قالي إنه ممكن يفضي نفسه بسهولة ، كان ده شيء عظيم ، المطلوب منه يتسلق معايا جبل بشورت بس في عز الجو التلج ده ، جيمس رفض بالطبع ، مستحيل يضحي بصحته عشان أي حاجة
لما قلتله إن الجايزة 5000 دولار ، وافق بدون تفكير !
إتفقنا هيلبس شورت بس مش أي حاجة تانية و هيقابلني في مكان معين قريب من الجبل بكرة الصبح بدري
.
تاني يوم كنت مجهز كل حاجة ، الكاميرا بتصور و العربية جاهزة ، خدته و رحنا الجبل ، كان الجو تلج و كنا لسه بدري فالجبل كان فاضي تمامًا ، قلع كل هدومه إلا الشورت و بدأنا نتسلق الجبل سوا ، مر حوالي ساعتين زمن لما وصلنا لقمة الجبل ، فرحنا جدًا ، سلمنا علي بعض قدام الكاميرا و قلتله إننا هنحتفل ، كنت جايب معايا الحاجات اللي هنحتفل بيها ، سكينة حادة مخبيها وسط هدومي
دبح إنسان شيء ممتع ، إنك تشوف الدم و هو بيدوب وسط اتللج و بيصبغه بلونه الأحمر شعور مش ممكن تتخيل عظمته ، دبحت جيمس أدام الكاميرا و كنت حريص علي تسجيل كل لحظة عذاب له و هو بيطلع في الروح قبل ما أرمي جثته من فوق الجبل
أنا مجنون ؟؟
ممكن أكون مجنون ... بس مجنون عبقري
عبقري معاه فلوس كتير و وقت فاضي و حابب يثبت لنفسه و لكم إن الناس مستعدة تعمل كل حاجة عشان الفلوس
.
.
.
#بتاع_الرعب
#حدث_بالفعل
#قصص_حقيقية_حول_العالم
#بنلف_الدنيا
#كوريا_الجنوبية
