My Jamaican Love Triangle

7

♠Tanya POV♠

Di red peas soup wah mi madda mek fi dinna sweet mi yo si, wah nice suh dan chicken foot soup mix up wid chicken neck wid di red peas ,yam, cook banana, dumpling, corn,breadfruit and piece a dasheen. Mi love soup man but only ting though, it crape mi gut man rite now mi hungry like dawg again,bout one hour now mi nyam the soup,me Neva understand how some people say dem drink soup, well me nyam it.

As soon as mi dun nyam a mi yard mi find back mi way go dung a melia yard fi some a har dinner. Mi tan up a mi yard an smell di pork ,mi Neva si a gal who love pork suh,every day shi wah har mada cook it ,nuh Wanda shi a get so big and outta shape. Mi Neva use to like it but rite now mi hungry yah man,me wud a nyam anything rite now.

"Melia weh fi mi food deh?" As soon as mi barge inna dem house me mek mi way to di kitchen fi go look sinting eat

"How yuh hungry gut suh? Mama nuh just cook?" If Yuh neva understand di connection before, my madda a melia grandmadda, so melia madda a my sista. My madda might a sound old but try don't let dat fool Yuh, mummy a hot gal from shi born nuh wonda she breed from suh early anyhow a young woman still.

"Mi gal mi a tell yuh seh di soup tun up but mi hungry ya now, yuh nyam off di pork?" Mi sista, Keisha did round a di kitchen a share,me com right on time man. As soon as we get dinna fi nyam mi and melia drink some carrot juice before we go relax back in a di settee. Mi gut full now, mi think mi over nyam to, yuh know di feeling wen yuh eat too much til yuh can hardly move?, dem seh a sin fi do dat but afta di food did so sweet!

Mi and melia did a try fi watch wah show pon cable, dis time one dat name how to get away with murder. We not even could a hardly hear sake a mi madda and melia madda a chat bout mi madda fada, dat a fimmi grand fadda

" yuh memba how papa use to love sleep inna light?" Mi hear Keisha a ask we madda, di two a dem inna di house just a chat suh dem mussa don't hear di tv a mek noise as much already

"Dadda use to seh, no darkness fi him cause him need fi see wat a gwan cause him don't wah no dead com ova him inna di dark. Yuh memba one night him a sleep inna di dark an him wake up a bawl seh dead com ova him, wah badword him cuss. Not even mama cud a calm di man dung" di two a dem start laugh ,den dem start chat again

"Papa seh dem set duppy unda him bed, wah heat him seh tek him wen him a sleep,him head start spin and him can't even shet him eye dem cause a pay cold sweat a wash him. Him bawl everyday seh people wicked til one day him finally suck down to bones an dead" Keisha she diss as bad as mummy. Dem love chat bout di past sah.

Me and melia decide fi lef weh dem deh so we go Inna har bedroom go chill. Mi tek out mi smartphone from outta mi back pocket, all who think seh a di likkle peanut phone alone mi did have a true mi don't like pose up wid mi galaxy dats why mi have one phone dat me use a yard an one dat me use wen mi go out, a don't wah nobody tief mi brand phone cause God know mi wudda feel it.

Mi a wonda who on Facebook weh mi know who would a know di bike bwoy. Mi still have in mind fi investigate him, mi wah snoop round him account fi see what is what. Mi couldn't really think bout nobody so mi just start scroll through mi Facebook news feed.

Badgyal Kay-kay

Hear dis . mi use to have a fren who thief mi man now di bwoy disgrace di slut an lef di bitch. Diss ya sweet mi nuh raw!!!😂😂